Roma 11 - Eipomek

Allah arye, “Na tenen ninye, Israel ninye ati, ninye mitik tonunuk wibuka delinamsine,” nyabuk yupu

¹ Winira yuk yupu ton asipdenusine. Sik Israel ninye arye Allah ati malya kibuka yaniltalamikba, Allah arye el wipdeiyamuk Israel ninye ati, ‘Na like,’ tenebuka, pia batakuk do? Aning ara pia kume. Na Paulus babye Israel yalanye unune. Nun apu kopropa Abraham arye deibukba, dadeipdanin yangalamika ani, sirya talak ara, taruk bokuka delilamik ning, Benyamin yala ninye arye na deipnike.

² Kume, minop talak Allah arye, ‘Israel ninye ara na tenen nang unamak,’ tenyamsukce weiamsuk ninye, Israel ninye ati, kum batakamsuk. Ura, Allah yupu noutamak ara, nabi Elia birye Israel ninye ati tenebukce, nyapdeiyamuk yupu ara, kum kel kiyamlum do? Nabi Elia birye Allah ati ayupu nyabuk.

³ “Na ni Allah na kanye imun upnilye ning ara, kum tenepmanilam do? Ara, sik Israel yala nang arye, an yupu laka nyana deiyok nang, nabi-nabi nirya akunum oplopmake. Winipmakce, an si erena ap, an kina ap ati, pala keil yangabuka deibuburye, kam ning obuka uku dakinyabak nirya ara, dakuka sirya dakmake.” “An yupu lak nyanyak nang, nabi-nabi nirya oplopmakba, wini talak ara, na Elia tonok batakmaniakba unman bukni, na babye, ‘Optibye’ tenen, dobonmaniake.” Nabi Elia birye, Allah ati nyabuk. (1 Raja-Raja 19:10, 14)

⁴ Elia birye nyabukura, Allah arye tamubuka Elia biti nyabuk yupu ton, na yupu kekenmanulum ninye tuba tenepmalum do, kum do? Ayupu ara, ani. ‘Elia ance, “Nabi-nabi nirya oplopmake,” nyabuka engenmalam bukni, na dipkoprop nyapkine. Israel ninye ton yupa weik 7.000 nang, na tenen ati, bulubukapsirye, moubuka deipmanbuk, wini talak tuba kam unmake. Aning ara, isa el si Bahal ati, ‘Nun ni kopropa’ tenen, gutam tuku dipdongobuka, el si kum erenyake. Allah arye nyabuk.’ (1 Raja-Raja 19:18)

⁵ Minop talak aning ulamuk touk, wini talak babye atonun, Allah el kanye aryuk bico tenyamsukce, ‘Anang ara na tenen ninye unamak’ tenen, Israel ninye kan-kan arye, elti, diba tenyamik nang, mitik tonun moubuka deiamukba, tuba unyake.

⁶ Allah el kanye aryuk Israel ninye ati, bico tenyamsukce, urdem arye wiamsuka ara, teleb ubuka pil dolamupa deice arye kume. Nun apu yapu, Israel ninye babye, sik teleb ubuka pil dolamika deiceuk wipdeiamtopura, “Allah el kanye aryuk bico tenesilirye, wibuka delisulule,” kum nyaptibye. Bukni, el kanye aniryuk, bico tenyamsukce talye wiamsuka ara, nun teleb pil dolamupa deice arye kume, el kanye aniryuk bico tenyamsukce wiamsuke.

⁷ Aning ati ara, ayupu ton nyapnusine. Minop talak ulamik Israel ninye nirya ara, ‘Allah arye diksukum ninye kipdeipnamsile’ tenen, patalamukba, pia pi dobuka pirilamikce, pil weik dolamik bukni, winilamika deice, Allah arye sikti, ‘Aninye ara diksukum ninye unyake,’ tenebuka, aninye ati teleb kibuka kum deibuk. Winibuka ati, sik nirya ara, diksukum una deiyok ning kum dololamik. Allah el kanye aniryuk, ‘Na tenen ninye ani,’ tenyamuk ninyeuk wipdeiyamuk. Elce kum wiamuk ninye ati ara, sik kanye talima kat kibukba, elti, diba tenebuka kum ulamik.

⁸ Anyapmasin yupu kel bikna ati, ayupu ton seklamik. ‘Allah arye aninye ati, sik kanye talima pum tam wi talina atonun ning aribukba, asing arye talye nong bol deiceuk elilamik bukni, nong pum tam moubuka kum elilamikce, deiyok noutam ning ara kum kel kilamik. Tonda, amul deiceuk kekelamik bukni, ‘Deiyok ani’ tenen, moubuka kum kel kilamik. Allah arye sik kanye talima pum tam kunukna atonun ning areamukba, sik wini talak babye, walwal tuba unyake.’ (Ulangan 29:4; Yesaya 29:10)

⁹ Ayupu Atonun ton Raja Daud ayupu ton nyabuka sekuk. “Na ni Allah, sik aninye malye unyak ning wenena ati moropkine. Ara, ance Israel ninye ati, teleb ning weik areamlumba, sikce sik bidamang kanye talima erelalamika deice arye, malyeuk ulamike. Ati, ance areamlumba, sikce kanye deibuka talinyak ning nirya arye, mana wena youlamle touk youplirye, diptingopura, ‘Sikda weik imun kanye bobuka unamak’ tenen, moropkine. Tonda, ‘Sik talinyak ning nirya ara, keil yan dum duklamla atonun, uptuba, sikda aning deice arye, sakuka optue’ tenen, sikda, ‘Imun kanye bobuka unamak’ tenen, moropkine.”

¹⁰ “Tonda, ance ninye kanye talima pum tam kunukna deiyok ning arepminba, sikce, ‘Deiyok anye’ tenen, moubuka kum tenenamake. Aning atonun, ‘Sik nong deice ara, ikin ning weik upliba, mambul kanye bobikirye, kanupdongobuka unamak’ tenen, moropkine.” Daud birye nyabuk. (Mazmur 69:22-23)

“Kanye bokoltona kum diparyuk, tuba diba tenebibyopura, Allah el mapu pia unamabe,” nyabuk yupu

¹¹ Na kayapo, tonap asipdesine. Allah arye sik minop talak ulamik Israel ninye ati, “Ninye lyena ning ara, winibuka unamne,” nyalamuk ning ara, ‘Nun lik’ tenen, yaniltalamik. Winilamika deice arye, keil yan dum duklamsil touk, sik Israel ninye malye ulamikce, keil yan dum dukliba kote saklamak touk ulamik ning ara, lipsisikuka lyepmanto kum unyak do? Kume, lyepmanto unyak bukni, sik Israel ninye malye winilamika deice arye, ninye lyena deiyok yupu ara, yala yuk-yuk ninye sik dam anyuk akunum yangalule. Ara, Israel yala kum ninye ati, buru tam ninye ati, Allah arye ninye lyena ati laka teleb yupu, peterena deiyok nang arye ayupu dobuka, yuk mutuku ninye dam akunum yanuka peterenyaka ati nyapsine. Allah arye utenyamuk. ‘Yuk yala ninye noutamak ara, ninye weika arye lyepneba, Israel yala ninye arye, se tenebikirye, sik talima pum tamuk dinamle,’ tenyamuke. Ara, Israel ninye arye, ‘Se, yata deiyok ning ati, Allah arye yuk mutuku ninyeuk minopce lyelolul do? Allah arye nun ton lyepsitue tenen, se tenebikirye, bouku sukunamle,’ tenyamuk.

¹² Bukni, na kayapo, anyapnusin yupu moubuka teneipdelulume. Sik Israel ninye arye, Allah yupu kum kekelamika deice arye, lo ubukba, Allah arye arisilye teleb ning ara, yuk yala ninye, mutuku-mutuku nirya dolonyake. Allah arye sik Israel ninye ati, kintinyamuk lyena ning bisik ati, ‘Nun like’ tenen, yaniltalamika deice arye malye ulamik. Malye winilamika deice arye, sik lyena talak lo kum uamuk. Aning ati ara, wini talak ara sik buru tam ninye, Israel yala kum ninye, pia mambul ning, ninye lyena deiyok ning dolonyake. Ati, Israel ninye malye winilamika deice arye lo ubukba, yuk yala ninye ati, pia teleb ning yanmala ati ara, Allah tenyamuk touk, aminyan talak sik Israel yala ninye weika arye diba tenebikirye, lyena ning doprobicopura, aminyan talak pia teleb ning weika arye yanuka unamsile.

“Allah arye, Israel yala kum ninye, yuk-yuk mutuku unyak ninye weika arye lyelonamle,” nyabuk yupu

¹³ Ura, na Paulus birye anggun Roma mutuku ninye ap, Israel yala kum ninye nirya ap ati nyapsine. Allah arye nati, ‘Anye bira na yupu dobuka, Israel yala kum ninye unyak mutuku nirya, peterepra bana ati, deiyok kouna deiyoknye, Rasulnye unamle’ tenen, wipdeipnukba, apiluk talibuka donune. Yuk yala ninye nirya ati, Allah el laka teleb yupu, ninye lyena ati nyalul yupu dobuka peterelbanune. Wininuna ati ara, na yupu weika arye nyanune.

¹⁴ “Yahudi yala kum ninye ara, ‘Allah arye lyepnamne’ tenen, pil donune,” nyabuka, weika arye nyanuna deiyok ara ani. Ara, na yala ninye kopropa, Israel ninye arye, na nyanye yupu kekebikirye, sikda, ‘Se, Allah arye nun ton lyepsitue’ tenen, patapliba, ‘Talima bouku sukunamle’ tenen, unune. Israel yala ninye arye, ‘Se, Allah arye nun ton weika arye lyepsitue’ tenen, patapliba, diba tenebikcopura, ‘Allah arye sik kan-kan noutamak Israel ninye pia weik lyepnamne’ tenen, yupu weika arye nyanune.

¹⁵ Aning ara talye ati kume. Israel ninye, sik malye winilamikba, Allah arye tia talak ati, Israel yala ninye batakuka deice arye, lo wamsukba, wini talak yuk mutuku ninye im sirya, mutuku sirya nirya arye, Allah yupu kekebikirye, lyena ning doprobica deice arye, Allah el ap, sik ap, kanye talima dukulongolule. Allah arye akunum dibilamice ninye kam bukdeipliba, kam bukuka teleb kibuka ulamak touk, wini talak ara, Israel yala ninye akunum dibilamik ninye atonun unyak bukni, Allah arye sikti, kanye deibuka weika arye lyeplyopura, diamice ninye tuba tamubuka kam ulamak touk, unamake.

¹⁶ Winira winipmanto yupu deice nyapnusine. Ara, Allah el si erena ati, ninye arye weinye kwaning minopce yongobuka elti, aribicopura, aminyan yongonamak ning nirya babye, ‘Allah el ning uka’ tenebuka, aning nirya aribicopura, telebuk unamle. Winipmanto ning ara, yo yating ap, nong ap, telebuk uplyopura, aminyan ayo nong arye taruk kwa leklamle ning babye telebuk unamle.

¹⁷ Ura, na kayapo, winipmanto yupu tonap nyapnusine. Duk teleb moulamle yo, el si ara, Ara yo, ninye arye ayo kouamikibuk, teleb ubuka kwapu bongona kum arye, duk mouna kum diparyuk, kolupyopura, akolupmalye yo taruk ara, deiltakanyake. Ayo taruk seklobikirye, yuk talye buru mutuku palamle yo taruk dobuka, ‘Yo duk teleb ubuka moupnamle’ tenen, ayo taruk seklopmaca deice yanuka dukulongonyake. Winibikiba adukdongopmace yo, el yating ara, kum ulamle yating ap, nong ap, taruk ap arye, teleb ning doproplirye, teleb ubuka palule. ‘Min arye teleb kibuka papnamle’ tenen, kouamikiba, palamle ning ap, aminyan dukdongobice ning ap ara, tukwak teleb ubuka bongoplirye, duk moupnamle. Aning atonun, anggun Yahudi yala kum ninye ara, aminyan talak dukulongolamak yo taruk atonun ululume.

¹⁸ Anggun Yahudi yala kum ninye ara, aminyan tam dukulongolamak yo taruk atonun ninye ululume. Israel ninye ara, duk teleb yo minyuma yala kouamikiba, kolupliba sekeltaklamak yo taruk atonun ninye unyake. Ati sik Yahudi yala kum ninye arye, Israel ninye ati ara, ‘E, sikda malye ninyeuk unyak bukni, nunda telebuk unyabe’ tenen, anggun bidamang kanye aryuk kum erelanamlulume. Luba kilongona meme. Talye bai tam yo taruk dobuka dukdongobica deice arye, minop talak ulamle yating ap, nong ap teleb kum ulule. Minop talak ulamle tuku teleb ap, yating teleb ap ulamlya deice arye, aminyan talak dukulongonyak yo taruk teleb ubuka duk moulule. Ati, sik Yahudi yala kum ninye arye, Israel yala ninye ati, ‘Sikda malye unyak bukni, nunda teleb nanguk unyabe,’ nyabuka pia kum nyanamlulume.

¹⁹ Bukni, na kayapo, ton nang aryeura, nyapnitinge. “Kume, ayo deiyoknye birye, ‘Ayo duk teleb ubuka moupnamle’ tenen, koulamlibuk, koluplirye, malye uplye yo ara, deiploplirye, yuk talye yo taruk dobuka dukulongolamle touk, nunti dobuka dukdongopsuke,” nyapnitinge.

²⁰ Ura, aning ara nyapnitinge bukni, luba kina meme. Minyuma yo taruk seklobuk ning deiyok ara, sik Israel ninye diba kum tenyamika deice arye batakuk. Aminyan dukdongobuk yo taruk ara, anggun Yahudi yala kum ninye, tuba-tuba diba tenemunya deice aryuk, tuba ululume. Aning ati ara, ‘Nunda, akunuma. Teleb ninyeuk unyabe’ tenen, anggun bidamang kanye talima erelana meme. Aning kum bukni, ‘Nun diba tenenyap ning ara lik upsilyeba, batakipyak’ tenen, adiparyuk ilil asa arye unamlulume.

²¹ Ati, “Ilil asa arye unamlulume,” nyapmasina deiyok ara, talye ati kum nyapsine. Ara luba kina meme. Yo kouamica deiyoknye Allah arye, el minyuma wiamuk yo ati, ‘Na,’ tenyamuk bukni, akunum kolubukce, malye ubuka ati, seklobuk. Winibuka seklobuk bukni, aseklobuk yo ati, ‘Talya namin kipnamne,’ kum tenebuk. Ayo taruk seklobuk. Ati, anggun aminyan dukdongobuk yo taruk atonun ninye ara, anggun babye ton malyeuk winipmunyopura, Allah arye Israel ninye malye ulamikba, bataklamuk touk, anggun wini talak umunce dib tenelulum ninye arye malyeuk winipmunyopura, dipkoprop Allah arye bataknamsile. Anggunce, ‘Malye winibibya babye, talye namin kipnamsile,’ kum tenenamlulume.

²² Aning ati ara, Allah arye nunti bico tenebuka namin asa arye lyelosulul ning ap, tonda malye winibibye ning ati, el yu upliba, wenesilye ning ap, deice arye moubuka tenenamlulume. Ara, sik minop talak ulamik Israel ninye ara, diba tenena kumce, pia malye weik ulamika ati ara, Allah arye yu ubukba, wenebuka oplobuk. Bukni, anggun Roma mutuku ululum ninye ap, yuk Yahudi yala kum ninye nirya ap, elti, diba tenelulumce, tuba talimunyopura, Allah arye anggunti, bico tenebuka namin asa arye pia melinamsile. Bukni, elti, diba tenena kumce, yaniptapmunyopura, ninye arye malye yala ning kouamna kwenebuka bataklamak touk, Allah arye anggun babye atonun kibuka bataknamsile.

²³ Aning atonun, sik Israel yala ninye ara, ‘Allah arye nyasilye yupu, nun like’ tenen, ilil pia kum kanye bobuka malye winilamice ning nirya bataktingce, ila tuba diba teneptingopura, Allah el wa windam atonun anya arye, ila tuba dobuka dukdongopnamle. Winiplirye, aninye nirya ati tamubuka el mapu kopropa ulinamsile. Aning ara elda ikin kum uptue.

²⁴ Anggunda moubuka teneipdelulume. Anggun Roma mutuku tam ululum Yahudi yala kum ninyeuk ululume. Ara yo kouna deiyoknye birye, ‘Talya bai tam palamle yo taruk arye dobuka dukdongopnamne,’ kum tenelamsuk bukni, aminyan talak ara, el bita moulamuk yo taruk deice aryuk yanuka dukdongopsuke. Ati ara, el minyuma tenyamuk yo taruk dobuka, ikin kum diparyuk yanuka dukdongopsuke. Winipsuka deiyok ara ani. Winiplyopura, dipkoprop teleb ubuka paplirye, nenamle. Anggun Israel ninye ara, talye buru tam palamle yo taruk atonun kume. Elce pia moubuka bita moulamuk yo deiyok arye tamubuka dukdongoplyopura, pia teleb kibuka papnamle, nyapsine.

“Allah arye Israel yala ninye nirya lyepnamle,” nyabuk yupu

²⁵ Na weit yapu, anggun Roma mutuku ninyeo. ‘Anggun walwal arye, anggun bidamang kanye aniryuk, ‘Nunda weik mambul weik nang unyabe,’ tenemunce, kwalilulum do?’ tenen, ayupu laka nyapsine. Ayupu ara, minop talak Allah arye duknyamuk bukni, wini talak ara akunum laka nyapsuk. Allah arye Israel yala ninye noutamak arye, ton nang ara, sik talima kat kibuk ning ara, tia talak ati ubuk. Winibukba, sik ilil pia kum kanye bobuka el yupu kekena kum arye ulamica ani, Allah arye, ‘Yahudi yala kum ninye yupa pia weik, winibukap dopropnamne,’ tenyamuk touk, sirya dakuka akunum doproplyopura, akunuma. Winibuka sirya daknamle talak ara, Israel yala ninye sik kanye talima nirya ara, namin asa aryuk unamake.

²⁶ Allah tenyamuk touk, talye buru tam unyak ninye yupa pia weik lyeplyopura, aminyan talak sik Israel yala ninye nirya lyepnamle. Allah yupu noutamak ara, nabi Yesaya birye sekamuk touk winipnamle. Ayupu ara ani. ‘Ninye Lyena Deiyoknye bira, Sion mutuku noutamak arye yanamle. Yalyopura, Yakup birye deibukba, dadeipdanin yangalamik Israel yala ninye arye, Allah ati, ‘Nun like,’ tenebuka malye ulamikce ning nirya ara, kum kipdeipnamle.

²⁷ Na Allah arye anggun Israel yala ninye ati nyapsine. Ara, “Anggun malye tenen ning ap, malye winina ning nirya ap ara, kum kipreipnirye, teleb updeipnamsine,” nyapdeipsine. Allah arye nyabuk.’ (Yesaya 59:20-21)

²⁸ Ati ayupu ton nyapsine. Sik Israel yala ninye arye, Allah el laka teleb yupu, ninye lyena yupu bataklamik ati ara, Allah arye, ‘Sik Israel ninye ara, na like,’ tenelule. Bukni, Allah arye, “Aninye ara, ‘Na’ tenen ninye, na mapu kopropa unamake,” nyabuka, Israel yala ninye wiamuk ning ati ara, Allah arye sik aninye ara, tuba bico tenelule. Winilula deiyok ara, Israel ninye sik ayupu yapu ati, “Wininamsine,” nyabuka, nyalilamuk yupu tuba tenelula anya arye, pia kum bataknamle.

²⁹ Allah arye ninye ati bico tenesilirye, talyauk arisilye ning nirya ap, ‘Aninye ara, na mapu kopropa unamak’ tenen, yukusilye yupu nirya ap ara, min kum winipnamle. Ara kum winipmanto anya arye, Allah arye arisilye ning ap, yukusilye ning ap, nyalisilye ning ap nirya ara, dipkoprop nong upnamle.

³⁰ Sik Yahudi yala ninye arye malye winilamikba, Allah arye siktia ati, batakuka deice arye, anggun Roma ninye buru tam atonun ululum ninye, Yahudi yala kum ninye ati, lo arepsuk. Anggun Roma mutuku ululum ninye ap, yuk Yahudi yala kum ninye nirya ap, minop talak Allah ati, yanilamluma deice arye, adiparyuk wenebuka bataksutu bukni, wini talak lo arepsuka noutamak arye, bico tenebuka lyesulule.

³¹ Aning atonun, wini talak ara sik Israel yala ninye arye, Allah ati yaninyak bukni, Allah arye anggun Roma mutuku ululum ninye ati, bico tenebuka lyesulule. Allah arye anggun Yahudi yala kum ninye ati, adiparyuk oplopsutu bukni, bico tenebuka lyelosilya deice arye atalak noutamak ara, sik Israel yala ninye ati, adiparyuk oltakana kumce, ila tuba tonap bico tenebuka lyenamle.

³² Allah arye ninye tukwak im sirya, mutuku sirya nirya unyak ninye nirya ati, nyasulule. “Sik nirya ara, nati yaniltanikirye, malye unyaka deice arye, tapu koultalamak ninye atonun unyake. Sik bidamang kum lyepdanmanto ninye unyake. Sik nirya arye malye unyak ning wenena ati, adiparyuk sikti, wenebuka oploptinye bukni, tuba bico tenepnirye, anggun nirya ati lyepnamne,” nyasulule.

Paulus birye, Allah el si erena ati, nyabuk yupu

³³ Se, na kwit capu. Allah elce kel kiyamuk ning ap, elce, ‘Deiyok ani’ tenen, moubuka tenelye ning ap ara, mambul weik ning ulule. Allah arye kel bikamuk ning nirya ara, kum nukmanto ulule. Elce, ‘Winipnamne. Teleb una ara ani,’ tenebuka yupu lepsisikuka bokolisilya ara, nun talye tukwak unyap ninye arye moubuka kum teneptibye. Allah el pil dolye ning ap, el winilul ning nirya ap, nun bidamang aryuk kum kel biktibye.

³⁴ Aning ara talye ati kum nyapsine. Deiyok ara ani. Yatanye birye, Allah el kanye talima pum tam tenelye ning nirya tenepturye laka nyapsutu do? Kume. Tonda, yatanye birye Allah ati, “Teleb una ara ani,” yupu melibuka yupu petereptu do? Kume, ara kum winipmanto.

³⁵ Tonda, yatanye birye Allah el patalamle teleb ning, Allah ati tia ariamlyeba, aminyan talak Allah arye el areamlye ning pununa ati, anye tamubuka arenamle do? Kume. Allah ara yata ning pataptuba areptibye do? Aning babye kum winipmanto ning ulule.

³⁶ Aning ara talye kum nyapne. Deiyok ara ani. Allah arye aning-aning nirya kwepdeiamukba, ulul ning nirya ara, Allah el mikip deice aniryuk tuba teleb ulule. Tonda, sirya talak ara, elcuk aning-aning nirya deice tam erebuka ulirye, aning nirya talinamle. Aning nirya ara, el ninguk unamle. Aning ati ara, ‘Ninye im sirya, mutuku sirya nirya arye el siuk erebikirye, Allah ati, “Elda pia telebuk ulule,” nyabuka nyanamak’ tenen, Allah moronune. ‘Dipkoprop anyapman touk pia aunamle’ tenen, Amin nyapne.