Ratapan 4 - Eipomek

Yerusalem mutuku dakuka batakuk talak ara, weik ikin ning yayukba, doprobuk yupu

¹ Nun ni Allah, an ‘Naʼ tenen, nang, Israel nang ara, emas pereng-pereng alamle touk, pia teleb ulamik bukni, emas pereng-pereng alamle ning, urasin pia malye ulamle touk, anang babye, tuba teleb ton kum unyake. Aning atonun, Allah an si eren aik pum tam, moubuka deiamupu urasin pia teleb keil ara, nun mal olan nang arye, aning nirya dakuka batakikce, bisik bana ati, deiyok kounakuk yamubuka batakik. Aning atonun, nun wel nang nirya ara, nun mal olan nang arye, onauk ulamikba, sik nirya dana-dana tam, bai sakuka bindobik.

² Min talak ara, Sion mutuku ulamik wel nang ara, pia teleb, mambul nang ulamik ati, sik kamo ara, dekna weik ning, el si emas, teleb ulamle atonun ulamik. Bukni, wini talak ara, sik kamo ara, aning kel nang arye, kat tuku dobuka, talye yun mek makau deiamica ani, yun talak kiplyeura, ‘Dauplye,’ tenelamak atonun, nun wini talak, Sion mutuku unyap wel nang ati ara, ninye nirya arye, nunti, ‘Sikda, dauplye, sikda pia teleb mambul nang kume. Kum ubikceba babye, dauplye. Nun like,’ tenenyake.

³ Bai tam ulamlye kil kam arye, el mapu ati bico tenelamlirye, moubuka moum arelule. Bukni, Allah el mapu, Israel nang ati ara, tukwak mutuku ulamle sanip maka ara, yu weik ulamlirye, el maka duk talye batakuka balamle touk, wini talak ara, Allah el mapu koproba Israel nang babye, yu kanye bobuka, sik mapu ati pia malyeuk unyake.

⁴ Ara, sik mapu nirya ara, moum teleb kibuka kum areceba, moum ap, mek ap, pia patanauk unyak ati, dina kum deice arye, sik sitang pum pia kel-kel aplyeba, winibuka ulamikca ani, sik amapu nirya arye, “Se, nun nin yapu, nun din pia patasulula ati, nun din ton arepsilulume,’’ nyabuka, engena deice arye moronyak bukni, sik nin yapu ap, yuk nang ap arye, sik din ton pia kum arenyake. Amapu ara, dibinauk unyake.

⁵ Min talak ara, sik bona talin nang ara, pia dekna weik baju, urasin mirin ning kiniklamikce, pia teleb-teleb din ninguk dobuka, dilamikce sik urasin ara, pia telebuk ulamik bukni, wini talak ara, anang babye, din patana ati ukirye, ‘Ninye batakmace, din ning aupmaliba, aninguk dobuka dipnuyapʼ tenen, bai bisikuk bakirye, din ning sung-sunga donokolbanyakakuk epnin banyake. Tonda, din pia pataplyeura, balamikca ani, mitang uplyopura, ninye balamak bisikakuk dibinyake.

⁶ Aning nirya deiyok ara, ani. Ara, sik Israel nang malye weik ulamik bukni, sirya ara, Allah arye yu ubukura, sik menenga ati, el mapu deice ara, weik ikin ning deibukba doprobik. Ara talye ati kume. Min talak ara, Sodom mutuku ulamik nang arye, pia malye weik ulamikba, sik deice ara, ikin ning sik dam deibukba, dopromika deice arye, obuka batakupu, sik nirya sirya dakuk. Like tonok sum aryuk, Sodom mutuku ulamik nang nirya obuka batakuk. Atalak ara, sik Sodom mutuku nang ona ati ara, ninye sik taruk deice arye, anang ati ikin ning kum arebik. Aning nirya ara, ninye arye winina kum bukni, Allah el taruk arye, amutuku nang wenebuka oplobuk. Bukni, min talak Sodom nang wenebuk ning ara, mitikto ikin uka. Wini talak ara, Israel nang ati, Allah arye wenepnamle ning ara, dipkoprob ikin weik ning upnamle.

⁷ Min talak arye talibuka ulamsik ninye deiyok nang ara, pia telebuk ulamik. Winipmanto ara, pia kurulamle ning arye, maka kurun potong pia lek ulamle touk ulamik. Ara, sik winin ning nirya ara, pia teleb, diksukumuk ulamik. Sik nong babye, uk dina kum ati, pia mikip weik ubuka, telebuk ulamik.

⁸ Winilamik bukni, wini talak sik urasin ara, uku arye diplyeba, mirilamle kalum urasin atonun bobuka unyake. Aning ati ara, sik bisik banmace talak ara, yuk nang arye, ‘Sik anang banmakʼ tenen, kum bikinyake. Sik bol urasin ara, pia tumakdobukce, yok nyelebuka deice arye, sik urasin malye ubuk. Sik nong bol ara, bol malye ubuka ati, ninye arye peikamikce yo kouluna atonun, pia sesal seprobuk.

⁹ Mal olanak arye olanmakirye, ya arye obikce nang dibikce ara, telebe uka. Bukni, din patalamlyebuk unyak nang ara, pia kanye imun deiceuk ulamikca ani, dibinyake. Ara, sik wa wiamikca nong kum uplyeba, din ning babye, ton kum dipmakirye, din patalamyeba, pia ati ikin kanye bobuka ulamikca ani, dibinauk unyake.

¹⁰ Allah el mapu, sik deice yayukba doprobik ikin ning ara, pia kanye ikin ning ubukura, adeice arye, sik mapu delilamik kilapu ara, ninye kum winipmanto ning, pia malye ning wininyake. Ara, yu weik nang arye, Allah el ‘Naʼ tenen nang ati obikirye, anang nirya, sirya dakanamak talak ara, Israel nang nirya, sik din ning, pia kum ubuka ati, pia kanye imun uplyeba, sik Israel kilapu ara, kanye namin kilapu ulamik bukni, sik mining mapu uk, obikirye, yubuka dinyake.

¹¹ Israel nang arye pia malye weik ulamik ati, Allah el yu pia weik ubukura, ‘Sion mutuku ap, amutuku unyak nang nirya ap ara, tonok ning babye kum bataknune,’ tenebukce, lo arebukba, sik mal olan nang arye, uku dinibikba, amutuku nirya uku arye dibuka sirya dakuk. Asukum nirya ara, ‘Nun aik mikip kipnamsileʼ tenen, sik aik amu tam deiamik keil babye, uku dibukba, sice uk buklobuk.

¹² Winibuk ning ara, sik ninye deiyok talibuka, Raja-Raja ulamik nang ap, yuk mutuku nang mutuku-mutuku nirya ap, ulamikce tenelamik ning ara, ‘Kume, Yerusalem mutuku ara, ninye mal olan nang ara, tonoknye babye, Yerusalem mutuku weik asik dobuka ulamikak ara, dipkoprob pia kum wekuka bitinge,’ tenelamik bukni, aning akunum winibikce, malye kibuka sirya dakik.

¹³ Utenelamik bukni, Allah elcuk lo arebukba, aning ara, dipkoprob akunum winibuk. Allah arye amutuku nirya, sirya dakuk ning deiyok ara, ani. Ara, sik imam-imam nang ap, Allah yupu laka nyalamik nang, sik nabi-nabi nang ap, sik pia malye weik ulamik deice arye winibuk. Sik amambul pil talibuka ulamik nang arye, malye kum winipman ning bukni, diksukum teleb winin nang ton, Yerusalem asik noutam arye, talye lupabuka olamika atia. Sik ateleb nang, sik ining balamuka ning ati, Allah arye amutuku sirya obuka dakukba, akanye imun ning nirya ara, winibuk.

¹⁴ Atalak noutam ara, asing kouamlye nang arye, kirikuka talye bisik balamak touk, sik imam nang ap, nabi nang ap arye, talye bisikuk balamik. Deiyok ton kum uamanabuk, sikce diksukumuk ulamik nang olamikba, sik ongolamik baju ara, ininguk palibukba, yuk nang nirya ebikce, ‘Kume, anang sik bol ap, sik baju ap ara, teleb nang arye, bol pepmanto kum unmaka ati, sik dam kum bitibyeʼ tenen, yukakuk leibuka balamik.

¹⁵ Atalakuk, bisik balamik nang arye, sik imam nang ap, nabi nang ap ati, nyanmik. “Atam yangana meme! Aning, sik nong deice ara, bol pipmanto kum ning, pia malye ining aupmala ati, anang sik dam bana kume. Anggunda bindoplulume, nun dam yangana meme!” nyalamik. Tuba malye kum ulamik nang arye, ayupu nyalamika ati, amutuku talibuka ulamik nabi nang ap, imam nang ap nirya ara, Israel nang ulamik mutuku arye batakuka, bai sakuka bindobik. Yuk pera mutuku noutam arye, talye banauk ulamik. Talye banauk ulamik ara, yuk pera mutuku ulamik nang eibikce, sik ton nyalamik. “Anggunda nun lik ati, nun mutuku noutam ara, anggunda pia ouku mana kume. Nun mutuku noutam ara, dipkoprob kum unamlume,” nyalamik.

¹⁶ Ara talye ati kume. Deiyok ara, Allah Yahweh elcuk, imam nang ap, nabi nang ap, yakdonokukba, sikda yuk-yuk mutuku noutam banauk ulamik. Allah arye anang nirya ati, tuba kum talinamle. Tonda, sik malye weik ulamik imam pil don nang ap, Allah yupu laka nyalamik nabi nang ap, amutuku talibuka yupu nyalamik nang ap, minop talak ninye deiyok kibuka ulamik bukni, Allah arye anang wenebuk talak arye, dipdongobuka dotalak nirya ara, yuk nang arye sikti, ‘Anggunda nun lik,’ tenelamikce, “Anggunda nun deiyok nang ati, telebe,” nyabuka, kum kilamikce, anang ati, si erebuka ton kum kilamik.

¹⁷ Imun kanye bobuka ulamupu talak ara, nun tuba kam ulamupu Israel yala nang arye, ‘Yuk mutuku nang ati, nun melipnamsiak do?’ tenen, tuba-tuba kalikuka dinauk ulamupubuk, nun asinguk dilamsuke. Bukni, talye atibuk kalikuka dilamupu. Deiyok ara, ‘Sik melibuka lyepropnamsik ca,’ tenelamupu mutuku nang nirya ara, nunti kum yanuka melilamsike. Yuk-yuk mutuku nang, tonok nang babye, “Tonda yuk nang arye, nunti yanuka melipnamsiak ca,” nyanyap bukni, sikce ton kum yanuka melilamsike.

¹⁸ Nun aik arye kupsakuka bisikak, ton kum banyabe. Ara, kupsakuka bisik babyeura, ‘Nun mal olan nang arye opsikcakʼ tenena atia. Sikce tuba kaliknauk usinyake. ‘Nun dibin talak ara, akunum dam kiple. Nun dipna sum ara, akunum nukdeipubu ati, asum akunum kiple do?’ tenen, ilil ulamsuke.

¹⁹ Anang arye nunti, ‘Anang ara, obuka sirya daknamabeʼ tenen, dobolbalamsike. Ara winipmanto, Ambun ma maka lakuka balamle ning ara, sik piribuka balamle bukni, nun mal olan nang arye dobolamsik ning ara, pirina kum aryuk, minop dobolbalamsike. Sik anang arye, nunda mutuku tam balamupu talak babye, tonda mutuku pata mutuku noutamuk balamupu talak babye, sikda nunti dobolbanauk ulamsikce, nun dam yanuka, obuka batakamsike.

²⁰ Allah Yahweh, elce, ‘Anye bira, ninye deiyok kibuka, ‘Naʼ tenen, nang Israel nang talibuka Raja unamleʼ tenen, wipdeiamuknye bira, nun mal olan nang arye tomobik. Nun Raja ati ara, nunce, ‘Kume, elda erebuka, nun deice tam atonun kiplyeba, nunda el amu tamuk unamabe. Elcuk kalekuka melinamsile. Winipsilyeura, yuk mutuku nang yala-yala nirya, sik noutam ubibya babye, telebuk unamabe,ʼ tenelamupu. Utenelamupu bukni, el babye, nun mal olan nang arye yanuka tomobik. Ara, ninye arye tuku pum tam weik bisik palibikceba, bai tam kam ning mangkau yangalamicak, atuku pum saklyeba tomolamak touk, tomobik.

²¹ Anggun Edom mutuku tam ululum nang ap, Uz mutuku ululum nang ap ara, sikce nunti, ‘E moubuka, sik Israel nang ara, akunum ikin weik deice arye unyake,ʼ tenebuka, akutusululum nang ara, aminyan talak kum kipnamlarya. Ara, Allah arye, teleb karin lo areplyeba, anggun dam babye, ikin ning ton areplyeba, dopropnamlum ca. Sik babye, yu mek dibikceba, mikip arye pil doplyeba, nong banang malamak touk upnamlum ca.

²² Bukni, anggun Sion mutuku nang ara, anggunce malye ulamluma, adeice arye menenga ning, kanye ikin ning yayukba doproplume. Atalak noutam arye, anggun mal olan nang arye, anggun amutuku ulamlum nang tapu koubikce, sik mutuku tamubuka deibikce, ikin pil dilamik. Bukni, anggun wenen talak ara, akunum sirya dakmanto kiple. Ati, yuk mutuku nang arye dipkoprob ton ap, yuk mutuku pia kum bobuka delilbinamake. Bukni, Allah Yahweh arye, anggun Israel nang, anggun mal olan nang, sik si Edom tam nang ati ara, Allah elce pia namin kina kumce, yu weika arye wenenamle. Tonda, sik Edom tam nang arye, malye na weika arye dungnubuka ulamlume. Anggun Edom tam ninye nirya, anggun malye winin ning duknukuka ulamlum bukni, Allah Yahweh arye, aning nirya elilula ati, elcuk anggun malye winin nang ara, lake kipsilirye, wenepnamsilarya. ‘Elce kum wenepnamsilʼ tenena kume.