Ratapan 2 - Eipomek

Allah arye, Yerusalem mutuku noutam ulamik nang ati, yu ubukba wenebuk yupu

¹ Se, Allah arye nun Yerusalem mutuku ulamupu nang ati, pia yu ubukba wenepsuke. Winipmanto ara, Allah el yu ara, weik dua bum arye lilongolamle touk ubuka, nun dam yanuka lelipdongopsuba, pia alye usulule. Min talak Yerusalem weik asik ara, urasin pia teleb mutuku ulamuk bukni, wini talak ara, Allah arye amutuku ara, urasin pia malye kipdeibuk. Ara winipmanto, im deice pia teleb ning auptuba, im deice arye tukwak mutuku dopkweteptu atonun, pia amu tamuk deipsuk. Ara, Allah el yan dikdik sena uamuknye, aning ati, ‘Na like,’ tenen, bataktu atonun kipsuke. Deiyok ara, Allah aning-aning nirya talebuka, pia mikip weiknye birye, nun Israel nang ati, yu ubukura, uapsuka deice arye, amu tam nang atonun kipdeipsuke. Atalak aryuk, elce wibuka deibukba, el si erena ati dolamik aik ap, Yerusalem mutuku nirya babye bataksukce, pia el balye tam kepsuke.

² Tonda, Allah arye, aning-aning nirya talilirye, pia mikip weiknye ulule. Elce, nun apu koproba Yakub, elce deibukba, dadeipdanin yangalamika ani, deibikba, Yehuda tam ulamik nang, amutuku noutam ulamik nang, sik aik dolamik ning ara, bico kum tenebukce, yu ubukura, sik aik tonok babye, ton kum batakuk. Sik aik nirya ulubuka, sice buklobuk. Ara, Allah el yu pia weik ubukura, uapsuka deice arye, amutuku asik dolamuburye ulamupak nirya ara, ulubuka bataksuke. Winipmanto ara, ninye arye, ‘Yu nang ati, malye kipsicak’ tenen, sik asik dana-dana tam, cang keil poka dobuka dolamik bukni, yin talin nang arye, aning nirya ulubuka bataklamaka touk, nunda teleb ulamupu bukni, Allah arye tonok aik babye, ton kum batakuk. Anirya ulubuka batakuk. Allah elce Yehuda yala ninye ati, ninye deiyok nang kibuka ulamik Raja nang ap, sik amu tam yuk-yuk pil ati, deiyok kibuka ulamik nang ap ati, nun amutuku nang nirya ati ara, ‘anggun malye,’ tenepsukce, amu kipdeipsuk.

³ Ati, nun Israel nang nirya ara, min talak mikip ulamupu bukni, wini talak ara, Allah arye yu ubukura, uapsuka deice arye, nun Israel nang ara, mitang kipdeipsuke. Tonda, nun Israel nang ona ati, nun mal olan nang arye ona ati, warikilyangasikce talak babye, Allah elce kum melisulule. Winipmanto ara, el sirik tam taruk, mikip weik winilye ning ara, min talak ara, aning arye kaliklamsuk bukni, wini talak ara, akunum bataksukce, kalekuka kum melisulule. Tonda, nun apu koproba, Yakub birye deipsukba, deipdanin yanga birye unyap nang deice ara, Allah el yu ara, nun deice deipsukba, uku dilamle atonun usulule. Auku buk weleplirye, nun un ning yala-yala nirya ap, nun tam nang ap, nun dam ulye ning nirya ap ara, uku dibuka sirya dakalye touk kibuka, el yu deice arye akunum kum kipdeipsuke.

⁴ Nun mal olan nang arye, sik mal ara, yin deice deibuka, nun marana ati, kintinibikce touk kibuka, Allah arye nun menenga ati, akunum wenebuka kum kilisulule. Ura, Yerusalem mutuku ukceba, nunce anggunti, weik arye bico tenenyap nang, nun mapu silip nirya ara, Allah elce anang nirya obuka, sirya dakeipnamsile. Ara, Allah arye nunti, yu uplyeba uapsilirye, Yerusalem mutuku unyap nang ara, wenebuka sirya dakasulule. Ara uku buk beleplirye, aning-aning nirya diplirye, kum kililamle touk uplirye, Yerusalem mutuku deice, weik ikin ning akunum arepsilyeba, dibuka sirya dakmasile.

⁵ Allah arye, aning-aning nirya talilirye, pia mikip weiknye ulule. Elda nun mal olan nang atonun kibuka, akunum wenebuka ikin ning weik aresulule. Elce nun amutuku noutam unyap ninye nirya, nun Israel ninye ara, yanuka oplopmasile. Allah elce nun talisilye nang, deiyok nang, sik Raja nang ara, sik pia teleb ubuka dolamikce ulamik aik, anyaik si ara, istana nirya ap, nun weik asik dobuka unyabak ap, amutuku unyap nang kalikna ati, weik pala keil dobuka, cang keil poka domikce, ‘Yu nang arye yanuka opsikcak’ tenen, kalinyakak ap nirya ara, dakuka bataksuke. Allah elce nun Yehuda mutuku unyap nang deice ara, weik kanye imun ning ara, pia weik kipdeipmasile. Winipmasila ati ara, nun Yehuda tam noutam unyap kilapu ap, nun sal ap nirya ara, ikin kanye bobuka, enganauk unmabe.

⁶ Bai tam talye palamle yo webuka bataklamaka touk, nun ni Allah arye, lo arebukba, nun mal olan nang arye, Allah el si eren aik babye, dakuka batakik. Ara, Allah el mapu tonok, nun Israel ninye, bulubuka wekibirye, el si erenyap aik ara, akunum daklopsike. Winibik deice arye, nun Israel nang, nun ni Allah si erebuka kina ati, didik sen sum, Sabat sum ap, Allah el si erebuka kina ati, asum ara, weik sum anye, asum babye, weik sum ton asukum nyabuka kintinibupu sum ara, ‘Lubakibikirye, kwalya kwalina kum unamakeʼ tenen, ikin ning weik, nun deice deipsuke Tonda, Allah el yu ubuka deice arye, nun mutuku Raja nang ap, imam ap babye, sik nirya arye nyanyak yupu ara, elce ton kum kekelule. ‘Sikda dauplyeʼ tenen, kum kekeplirye, batakasulule.

⁷ Allah el lek ning arena ati, keil pala taplakuka yangabuka deibikce, kam ning obuka arelyangalamikba, imam nang arye, aning dobuka, adeice uku sekuka, Allah ati arelamik ning, el si mesba, aning babye, ‘Na likeʼ tenen, batakuka mangkau kililule. Aning atonun, Allah el si eren aik, pia pum tam teleb lek babye, batakuka mangkau kililule. Allah ara, aning-aning nirya talilirye, pia mikip weik deiyoknye, elce nunti, namin kipsukce, lo arebuk ning ara, nun mal olan nang yayikce, nun mutuku deiyok nang arye unyak aik, istana ap, nun unyap aik dana-dana tam, weik cang keil poka dobuka, antanap dongobupu ning ap, aning nirya ara, dakuka bataknamsiake. Ati ara, nun mal olan nang yayikce, obuka sirya daksik ning ara, min talak nun Israel nang arye, Allah el si eren sum upneba, anyaik wekuka, el si erena ati, kilina ap, pin-pin kanye deibuka mot nyana ap, ulamikce touk, nun mal olan nang babye, talye luparabuka anyaik noutam wekikce, “Nunce sik Israel nang nirya ara, akunum obububirye, sik mutuku ara, alubuka dopropmabe,” nyabuka, winilanuk unmik.

⁸ Winibuka nyabik ning ara, talye ati kume. Deiyok ara, Yerusalem mutuku asik dobupak arye, weik cang keil poka dobuka, antanap dongobupu ning ati ara, Allah arye, ‘Sik Israel nang wenena ati, narye aning nirya dakuka bataknamne,’ tenyamuk. Utenebuk ati, Allah arye, weik cang poka domupuak nirya ara, cang tapu arye kiklipdeyukce, ‘Sik mal olan nang ati, lo areplyeura, sikce apoka nirya ara, dakuka sice buklopnamake,’ tenyamuk. Aning tenebuk touk, ubuk weik cang keil poka dobuka, antapdongobupu ning babye, amutuku asik dobuka ulamupu nang kalikna ati, dobuka deiamupuba, kaliklamsik cang asik ap nirya ara, dakuka batakupuba, nun weik asik oldemuk ubuk. Winipmanto ara, ninye arye weik imun kanye boyakirye, ‘Seʼ tenen, enganauk ulamak touk, anyasik nirya ap, apoka ap ara, malye weik ubuk.

⁹ Winibukba, anyasik antanap dongobuka wiamik poka noutam bukni, ninye weik wekelyangan bisik bublan nirya ara, kat ning el si besi arye, kintinyamik ning nirya ara, dakuka tukwak batakik. Tonda abublan dam wekelyanganak ati, kintinilamupu ning nirya ara, nun mal olan nang arye, aning nirya dakuka batakik. Winipsekura, nun mal olan nang arye, nun ninye deiyoknye Raja ap, el amu tam pil yuk-yuk deiyok kibuka, ulamik weik nang ap nirya ara, anang bobuka, sik pera mutuku ulamik ninye, yuk mutuku nang, sik mutuku bobuka deibikba, amutuku nang arye talinyake. Adeice arye, Allah elce nyapdeibukba, sekamuk ning ara, ton kum peteresinyake. Tonda, Allah el yupu nyapdeiplyeba, laka nyana deiyok nang, sik nabi-nabi nang ara, wini talak Allah arye, sik dam ton yanuka kum nyalule. Tonda, lengdar malamaka deice arye, Allah Yahweh arye, ‘Winipnamlume-winipnamlume. Aminyan talak ara, aning ton yanamle ati, winipnalumeʼ nyabuka, min talak nyalamuk touk, tuba ton kum lak nyalula ati, anabi nang arye, nun Israel ninye ati, ton kum laka nyasinyake.

¹⁰ Wini talak ara, Yerusalem mutuku unyak wisi-wisi nang, deiyok koubuka yupu nyasinyak ning ara, Allah el yupu talibuka, pil donyak nang arye, nun Israel yala nang ati, yupu nyasinyak nang nirya ara, atalak ara talye tunim abuka, tuku deiceuk bunyake. Aning ara, sikce, ‘Se, yata ning ati winipsuke do?’ tenen, ikin kanye bobuka, talima uk diplyeba, laka kina ati ara, sik anang arye, tuku bum dobuka, sik kisok deice deibuka unyake. Tonda, pia malye baju uk kinikuka unyake. Tonda, amutuku unyak wel kilapu nirya babye, Se, yata wiripnuyap do?’ tenen, sik urasin ara, tuku deiceuk luknupdongobuka bunyake.

¹¹ Na Yeremia bira, kum batakanune. Tuba-tuba engenauk unune, na asing nenulule. Na talima uk dinilyeba, na talima dakalsanulule. Na mikip pia kum upnuke. Winipmanto, na talima ara, sekuka tukwak saklamle touk upnuke. Ara, talye ati kume. Deiyok ara, na mutuku nang nirya kum kibuka atia. Tonda, nun din ning kum ubsuka deice arye, nun mapu ap, mitik mapu nirya ap ara, sik mikip kum uplyeba, Yerusalem mutuku bisikak dipmanto unyakce, bobinuka sakanyake.

¹² Winikirye amapu nirya ara, pia mitanguk ulula ati, amapu nirya arye, sik nin yapu ati, “Se nun nin yapu, nun din ap, mek ap ati, adiparyuk arepsilyame,” nyabuka, engena deice arye moronyake. Sik amapu arye, winipmanto, ninye olakceba, suse dila weik wamlye nang arye, bisikak sakuka poulbikirye, dipmanto ulamak atonun unyake. Amapu arye wininmace bukni, amapu sik isin kum kipnin balamlyeba, sik nin yapu arye, iribuka bolamice deiceuk dibinyake.

¹³ Se, anggun Yerusalem mutuku ululum nango. Tonda, anggun Yerusalem mutuku ululum kilmapu ara, pia kanye imun ning bobuka ululume nango, anggun dam weik kanye imun ning yayukba doproplum ning ara, yuk mutuku nang dam yalyeba dololamak atonun ning ara, kum doproplume. Sik yuk mutuku nang ara, mitik aryuk ikin ning dolonyak bukni, anggun Yerusalem mutuku nang ara, anggunda welto kilapu, ninye min kum domikce kilapu atonun ululum bukni, dipkoprob pia weik ikin ning, kanye imun ninguk, akunum doproplume. Ati ara, yata ning deice dektibya kuma. “Winipmanto ara, weik laut mekwen weik ap, kaurwe ap, pala weik ap, deibuka atonun, weik kanye imun ning, ikin ning anggun dam yayuk ning ara, nukmanto kume. Ara, Yerusalem mutuku weik asik nirya, akunum sice buklobukba eipmalume. Awinipsuk ning ara, dipkoprob yatanye birye tamubuka teleb kipdeipsuktuba, tamubuka teleb kiptu do? Kume, aning ara, dipkoprob kum kipmanto!

¹⁴ Yehuda yala nang, sik dam dotalak winipnamle ning ati, Allah arye laka nyaplyeba, sik kekebikirye, laka nyasinyak nang, nabi-nabi nang arye nyanyak yupu ara, talye tilila yupu uk nyanyaka ati, nong kum upnamle aryuk, talye yupu uk nyasinyake. Anggun Israel nang, malye upmunye bukni, anabi nang arye, anggun malye ululum ning ara, ‘Ani,’ nyabuka, kum laka nyasikceba, anggun malye ululum ning nirya ara, batakmunce, tamubuka yamunyeba, Allah arye kum lyelosulule. Sik anabi nang arye, anggun dam laka nyasinyak yupu ara, ‘Dipsuksum una ati bisik ara, ani,’ nyabuka kum nyasinyake. Aning kum bukni, tilila yupu deice aryuk, malye un tam bisik ban ning ati ara, laka nyasikceba, anggun abisikuk balulume.

¹⁵ Yuk nang arye, Yerusalem mutuku asik dobuka ulamlum nang ati, sik amutuku bisik baceura, anggunce malye nyabuka, taruk bokuka, akutusinyake. Ara, “Allah arye, sik wenena ati, ikin ning, sik nong deice deibuka ati, ikin kanye bobuka unyake,” nyabuka, akutubuka malye nyasinyake. Sik abisik banyak nang arye, aning eipsikirye, sik kisok kwakdu-kwakdu nyabikirye, malye yupu nyasinyake. Ara, “Aton dipdelulume! Yerusalem mutuku asik ara, min talak pia urasin teleb mutuku ulamukba, ninye mutuku-mutuku nirya arye, ‘Se, amutuku ara, pia teleb ati, kanye deibabe,’ nyabuka ngaluklamik. Bukni, wini talak eibab mutuku ara, dipkoprob amutuku do?’ nyabuka, nyek-nyek nyabuka nalikirye, akutusinyake.

¹⁶ Anggun Israel nang, anggun olan ninye, yuk mutuku nang nirya arye, anggun asok deice dipdesikirye, ‘Aning ara, pia malyeuk unyake,’ tenepsikirye, yu tenesinyake. Sik anang arye anggunti, si dirik-dirik apsikirye, nalibuka akutubuka nyasinyake. “Amutuku asik dobuka ulamikak ara, akunum obuka, kum kipdeibupu! ‘Asum ara, min yatuba, winiptibyeʼ tenen, pia dinauk ulamupu. Wini talak ara, anyaik malye uplyeba, adinauk ulamupu sum ara, asum akunum upleba, eibabe. Ati kanye deibabe,” nyanyake.

¹⁷ Min talak dodarapce, Allah arye, ‘Malye winibikceba, narye sik wenena ati winipnamne,’ tenebuka kintinyamukce, “Anggun dam ati winipnamne,” nyabuka, laka nyalilamsuk ning ara, wini talak akunum winipsuk. Allah elce nunti, bico tenena kum aryuk, dakuka bataksukce, atu buklopsuke. Ara, Allah elce nun mal olan nang, sik deice mikip arebukba, yan obuka bisipsike. Allah elce nun mal olan nang ati, ‘Kanye teleb kipdeiplirye, lo arepnyeba, Israel nang obikirye, malye kipnamake,’ tenyamuk touk, elce mikip arebukba, nun mal olan nang arye, nun ulamupu mutuku nirya ara, dakuka atu buklopsikce, teleb kanye bobuka ukirye, dipdanuka karye onyake. Elce, sik mal olan nang deice, mikip weik areamukba, sikce nunti, obuka malye kipsikce, nyek-nyek nyabuka nalisikirye, kanye delinyake.

¹⁸ Se, Yerusalem mutuku ati, weik cang keil poka domik ning nirya ara, Allah ati, moronamlulume. Allah ara, aning-aning nirya, talilirye, Pia Mikip Weiknye ulula ati, anggunce elti, ‘Se, melipsiminyak arye, lyepsilyame,’ nyabuka, moroptumura, na kanye deiptinye. Ara, anggun Israel nang, asing maka ara, tuba inipmalya, lukunyan nirya ara, mek yibalamle touk ulamukce, Allah el tonok, “Se, melisulule,” nyabuka, engepmunce moroplulume. Batakna kum aryuk, anggunda pia enganauk unamlume. Dikdik ton kum sepnamlume. Winilamunyeba, anggun nong nirya ara, mitanguk upnamsile.

¹⁹ Tonda, lukunyan noutam ara, mabuka bukuka, tuba-tuba ululumce, anggun kanye pum tam tenelulum ning nirya ara, Allah damuk nyapdeipnululume. Ara, anggunce Allah ati, “Se, melipsilyame,” nyabuka, anggun taruk erepmunce, moropmunyeba, elce anggun mapu din patalyeba, bisik akak lokuka poulbikirye, dipmato unyaka nirya ara, “Bico upkilyeura, lyepdopnamsilame,” nyabuka moropnamlume.

²⁰ Se, nun ni Allah, ance aning-aning nirya talimince, pia mikip weiknye ulyama ati, nun dam ikin ning deipsulamak, doprobupurye, ikin kanye bobuka unyap ning ara, an eipmince tenipdenalame. Yuk mutuku nang ati ara, aikin atonun ning ton, sik nong deice deiamlum do? Nun deice deipsulum ning ara, weik ikin ning ulul do? Na nio, ebuka tenipdenamlyame. Sik mapu deiamik kilapu arye, sik mining mapu obuka dinyake. Aning ara, pia kum winiptinge! Tonda, imam nang ap, nabi nang ap ara, Allah an si erenak, anyaik pum tam, pia lek aik noutam aryuk, yu nang arye yanuka, obuka batakanyaka ara, teleb do na nie? Na kanye ara, aning kum winipmanto ning tenepne. Na nio, aning weik ikin ning arepsulum ning ara, An min arye ton winilamlum ning winiplum do? kume tenepne.

²¹ Tonda, bisik noutam butbuta deiceuk, wisi nang babye, wel nang babye, ninye banyak bisik noutamuk, sakuka poulbanyake. Aning atonun, wel nang ap, wel kilapu ap nirya ara, nun mal olan nang arye, ninye on ya arye obuka batakanyake. Allah ance nunti, yu upkuk sum yanmala ati, anda nunti ton, bico kum tenesilyame. Ance lo arepsulumba, nun mal olan nang arye, talye lubakibuka oltaknauk usinyake. Aning nirya ara, ance teneplum touk winiyake.

²² Se nun ni koproba Allaho, ance nun ilil tenenyap ning, nun mal olan nanguk nyapmimba, “Weik kwalya kwalibikirye, din ning neika dinyaka atonun winipnuyabe,” nyabuka, yukulamak touk kibuka, ance nun mal olan nang yukupminyeba, sik nirya dana-dana arye yangakirye, nunce deiamupu mapu, nunce kalikinyap mapu ap, bico tenenyap mapu ap nirya ara, yanuka obuka batakasinyake. Nun ni Allaho, an yu upkukba, uminye sum ara, tonoknye babye, bai sakuka bikbik abuka, kum bitue. Nun mal olan nang arye, nun mapu silip nirya ara, akunum obuka, sirya daknamake.