Rasul 26 - Eipomek

“Paulus arye, el malye winibuk,” nyapdeibik yupu ati, Ageripa el kekenak sekdandobuk yupu

¹ Festus el yupu akunum nyabukura, Raja Ageripa arye Paulus ati nyabuk. “Winira, ance, an binalam ati melina ati ara, yupu nyapsiminyeura, kekepnuyabe,” nyabuk. Nyabukura, Paulus arye, ‘Na aryuk yupu sekdanirye, sik yupu deice bisipnamne,’ tenebukce, el taruk moup deibuk akarye, ayupu nyabuk.

² Na ni Raja Ageripao, arup ara, an dam tiknarye, sik Yahudi yala nang nirya arye, “An malye ublume,” nyapdeipnik yupu sekeldana ati, na yupu laka nyapnune. Ati, na kanye deipne.

³ Na weik kanye deipman ning ara, ani. Ara, Yahudi yala nang arye, sik wininyak ning ap, sik yuk-yuk tenepdobikirye wapdanuka malye nyaldanyak yupu ap, ara akunum moubuka bita kel biklume. Ati ara, na nyapnaman yupu nirya min kum kekapminye talak ara, ‘Nimalye arye kekenamanilam’ tenen, moropkine.

⁴ Ara, na wel talak arye, na winilamse ning nirya ara, sik Yahudi yala nang, sik kele. Na deiamnik talak arye, na mutuku noutamak na tam nang ap, neika ulamupa ap, tonda, Yerusalem mutuku ulamse ap, sik Yahudi yala deiyok nang nirya sik kele.

⁵ Minop arye akunum kel biknike ati ara, nun nirya Yahudi yala nang bukni, Allah nyalye yupu moubuka talinarye, wininyap ning ara, mem yupu ati, pia moubuka talinyak nang yupa ara, Farisi nang unyake. Sik Farisi nang unyak touk, na babye, Farisinye ulamse. Ayupu nirya ara, sik Yahudi deiyok nang babye, ‘Ayupu nun ton nyapnuyap,’ teneptingtoura, sik babye, kel kiyamnika ati, sikce laka nyapting bukni, kum nyapnuyake.

⁶ Ara, Allah arye nun apu yapu ati nyalilamuk yupu, na babye, ‘Dipkoprop winipnamsile,’ tenenun. Ara, ‘Akunum diyamikce nang aminyan talak kam bukeipnamle’ tenen, dinauk unune. Aning dib tenenuna ati ara, arup arye, anggunce yupu bokeipmanulume.

⁷ Nun Yahudi yala nang ara, 12 yala nang nirya arye, keting noutam babye, lukunyan babye, Allah el si erebuka el pil dobirye, Allah arye ayupu nyalilamsuk yupu uk, ‘Akunum diamice nang kam bukeipnamla ara, awinipnamle ning ara, nun babye, eiptibye’ tenen, dib tenebuka pia dinyabe. Na ni Raja Ageripao, sik Yahudi yala nang bukni, sikda Yahudi yala deiyok nang aryuk, adib tenebuka elinyap ning ati, “Paulus arye ayupu peterelya deice arye, el malye winilamuke,” nyabuka malye yupu nyalininyake.

⁸ Anggun nirya ara, ‘Allah arye akunum diamice ninye kam kum bukeiptue. Ara, kum winipmanto ning,’ teneluluma ara, yata deice arye atenelulum do? Yata ati ayupu diba kum teneptum do?

⁹ Ara, menopa arye na babye, aning dib tenebuka darabuka ulamse. Ara, Nasaret mutuku deiamiknye, Yesus, el si erelamik ning ap, el peterelamuk yupu ap, el mapu ap, elti, winilamik ning nirya ap ati, ‘Na winilamtinye ning nirya arye, aning yaniptinirye, kum kipdeiptinye,’ tenelamse.

¹⁰ Utenelamse ati, na tenepse touk, Yerusalem mutuku noutamak arye, aninguk winipse. Yahudi yala nang Allah arena ati, weik deiyok nang arye, “Winiptume,” nyapdeipnika deice arye, Yesus ati dib tenelamik nang, Allah el mapu weik dobuka wenena aik dongolamse. Tonda, sikce, “Anang opnuyabe,” nyabik talak ara, na babye, Allah el mapu yanina ati, ‘Bita merekuka onmaka ara, daoplopmakce,’ tenebuka nyalamse.

¹¹ Ton, atalak-atalak nirya, tonda amutuku-amutuku weiktonun, Yahudi yala nang Allah si erelamik aik balamsirye, na yupu nyamsa deice arye, sikce Allah el mapu ati wenelamikce, ikin ning weik sik nong deice delilamik. Tonda, sik tenelamik nang ati, “Ara talye,” nyalamsirye, ‘Sik diba tenelamik ning bataknamak’ tenen, pia mikip arye pirilelamse. Aninguk kume. Tonda, Yesus diba tenyamik nang ati, pia yu weik upnuk ati, ‘Anang deice pia weik kanye talima imun ning deipnamne,’ tenelamsirye, yuk-yuk mutuku ton anyasik-anyasik nirya balamse. Paulus arye nyabuk.

Paulus arye, el Yesus dib tenebuk ning ati, lak lebuk yupu

¹² Paulus arye nyabuk. Aning balamse touk, Allah arena ati weik deiyok nang arye, “Nunti ninye opdeipsilyame,” nyapdeipnika deice arye, ‘Damsyik mutuku binun’ tenen, bise.

¹³ Na ni Raja Ageripao, Damsyik mutuku bisi bukni, keting dukduk kibukopura, na nong bisikuk banmasi talak ara, weik dirina im deice arye yayuk anye ap, na ap neika banmapu nang ap, nun dana-danatil daksukak eipse. Keting dirina ara, mitik dirina bukni, adirina ara, pia weik dirina ubuk.

¹⁴ Adirinarye, til daksukura, asing bir-birapsukak, nun nirya tuku deice ak pouplobupe anyak, ninye yupu atonun yupu, Ibrani yupu deice arye ayupu nyapnukura, kekepse. “Saulus, Sauluso, ikin ning yata ati delinmanilam do? Ance yo dula kukdongopminyeura, uk pia weik dilamkile, ati, yata deiyok ati tuba mandipna pia weiknye ulyam do?” nyapnuk.

¹⁵ Nyapnukura, narye tamubuka asipdese, “Naio, anda yatanye do?” nyabuka asipdese. Asipdesibuk, nun ni Yesus arye, “An ikin ning delinmanilamnye bira, na Yesus uka,” nyapnuk. Tonda nyapnuk.

¹⁶ Winira, an yan tukwak yanibuka tikuklyame! Ara, narye an dam benbenepmakina deiyok ara, ‘Na pil melina ap, nati yuk nang yupu lak lena ap, unamnilam’ tenen, wipdeipmakince, tenepce asipdenmakine. Narye wininye ning, akunum diminye ning ap, aminyan talak, lengdar deice atonun arye peterepnamkin ning ap, ance yuk nang ati, na yupu laka nyanamlyame.

¹⁷ Tonda, an tam nang Yahudi yala nang babye, Yahudi yala kum nang babye, olinamkiaka ning ara, narye lyepnamkine.

¹⁸ Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.

¹⁹ Nyabukopura, Paulus arye ayupu ton dukdongobuka nyabuk. Aning ara, Paulus arye ayupu ton nyabuk. Aning ati ara, na ni Raja Ageripao, im deice arye lengdar atonun dopkwetepnukura, eipsirye nyapnuk ara, kum batakse. Yesus arye nyapnuk touk tuba wininune.

²⁰ Ara, minopce Damsyik mutuku ulamik ninye ap, anyapce Yerusalem mutuku ulamik ninye ap, Yudea tam nang ap, tonda Yahudi Yala kum ninye ap ati, ayupu peterelamse. “Anggun nirya anggun malye ululum ning batakuka, anggun kanye yuk punupmunce, balye tamubuka, Allah el tamuk kipdopnamlulume. Anggun kanye tenena winiryuk ning punupmaluma atonun, yuk talak babye, anggun winin ning nirya pia funguk unamlume. Ara, yata nang do, nirya eipsikirye, ‘Sik malye ulamik ning nirya akunum batakika ati, wini talak nirya ara, diksukumuk unmak ani,’ tenepsikirye, kel kipnamsinyak ati, ayupu nyapne.” Ayupu nyapsirye peterelamse.

²¹ Nyabuka peterepsa ati, Yahudi yala ninye nun malye unyap dekna ati, Allah arenyap aik dam unmasi bukni, Yahudi yala deiyok nang arye, talipnikce opmandanike.

²² Bukni, minop talak danyapce, ubuka wini talak babye, Allah melilamnukba, ulamsa ani, wini talak babye tuba wininune. Wininuna ati ara, arup uk ara, atikman akarye, talye bona utotoa talina kum ninye babye, sisinanye babye, sik kekena ati, ayupu dipkoprop yupu uk lak nyanmasine. Ara, Allah el yupu ap, aminyan winipnamuk ning ap, ati lak nyalamik nang Nabi nang ap, Musa ap arye, “Dipkoprop winipnamle,” nyalamik yupu uk peterelamse. Narye tenepse yupu uk tabakuka kum nyanmasine. Na nyanmasin yupu ara, sik minop talak ulamik nang arye nyalamik yupu atonun yupu nyanmane.

²³ Ara, Allah arye, ‘Tukak mutuku ninye lyepnamle’ tenen, wipdeiyamuknye Mesias el kanye imun ning bobuka ulamlya ani, diplirye, elda minopce kam buknamle. El dipmalya ani, minop kam buklinye birye, el tam nang, Yahudi yala nang ap, Yahudi yala kum ninye ap ati, “Allah arye lyepnamsile,” nyabuka, laka nyaplyeura, ayupu sik kekebikirye, sik talima noutamak ara, dirina atonun upnamle. Musa ap, Allah el yupu laka nyalamik nang Nabi nang ap arye ayupu uk nyapdeiamik. Paulus arye Raja Ageripa ati, ayupu nirya nyabuk.

Paulus arye, Raja Ageripa ati, nyabuk yupu

²⁴ Paulus el ulamuk ning tuba laka nyabukopura, Festus weik yupu arye, Paulus yupu bisibuka sekdongobuk. “Paulus, an kanye ara, kum upmakile ani. An weik kel kiplum deice arye, kanye walwal upmakil anyak, motonanye atonun nyanmalama arye,” nyabuka weik yupu arye nyabuk.

²⁵ Nyabukura, Paulus tamubuka nyabuk. “Nai Festuso, na motonanye kum unune. Na nyanman yupu ara, telil yupu kume. Pia diksukum yupu uk nyanmane,” Paulus arye nyabuk. Nyabukura, ayupu tonap nyabuk.

²⁶ “Nun ni Raja Ageripa ara, ayupu nirya el akunum kel kiyamuka ati, narye elti, talye tilila kum nyaptinye. Na dipkoprop kele. Aulamuk ning nirya kum duknubuka ati ara, anirya ulamuka ani, el walwal arye kum elilamuka kume. Anirya el elilamuka ati, el akunum kele kiayamuke.

²⁷ Na ni Raja Ageripao, Allah el yupu laka nyalamik nang Nabi-nabi nang nyalamik yupu ara, diba tenelalum do? Na tenepmana ara, ‘Dip tenepmanto akunum ulyame,’ tenepmakine,” Paulus arye Raja Ageripa biti nyabuk.

²⁸ Nyabukura, Raja Ageripa arye Paulus ati nyabuk. “Amitik talak arye, an yupu nyanmanilama deice arye, ‘Ayupu nyapnibuk kekeplirye, diba teneplyopura, Yesus dib teneplirye, Yesus el melinanye kipnamle’ tenen, nyanmanilam do?” nyabuk.

²⁹ Ageripa nyabukura, Paulus arye tamubuka nyabuk. “Mitik talak arye do? Weik talak arye do? Ura narye Allah moronya ara, anuk kume. Na yupu nyanmanbuk kekenmalum ninye ap, ‘Na unye touk unamlum’ tenen, Allah moronmane. Bukni, tonok ning ara, ‘Na tapu koupnik touk, sik babye, kounamake,’ nyabuka Allah kum moronune,” Paulus arye nyabuk.

³⁰ Paulus nyabukura, Raja Ageripa tikukba, anyapce, Gubernur Festus tikuk. Akaren uk, Bernike ap, sik neika bukmek nang, sisinanye ap nirya tikik.

³¹ Tikikce, anyaik batakuka yukak akunum biyikura, anang kekenak kum bukni, sik yupu talipdanmeka ani, sikce ayupu nyabik. “Ninye malye ubiceura, nun wenena aik dongolamaba deiyok ning babye, tonda, ninye olamaka deiyok ning, babye anye Paulus bira pia kum winilamukce, wini tuba kum winilule,” nyabik.

³² Nyabikce, Raja Ageripa arye, Festus ati ayupu nyabuk. “Paulus ara, ‘Kaisar aryuk na yupu lepsisikuka bokeipnutue,’ nyabuka kum moroyamtu toura, nunce anye biti talye lobuka bataktibye. Bukni, Paulus arye Kaisar si nyabuka, el si deice arye, kunum morobuka ati, Paulus kum lobuka batakloptibye,” nyabuk.