Rasul 24 - Eipomek

Gubernur Feliks arye Paulus ati, yupu bokeibuk yupu

¹ Anang arye Paulus dobuka Herodes aik dongobikce, kalikmekbuk, pamubarye sum akunum ubukopura, Ananias, ara sik Yahudi yala nang malye ulamik ning dekna ati, Allah arena weik ninye deiyoknye bira, Kaisarea mutuku kuluka yayuk. El ap neika yayik nang ara, Yahudi yala nang sik yupu bokolina deiyok nang wisi nang tonok-tonok ap, ton yupu bokolin tam melibuka yupu nyananye, el si ara, Tertulus ap, sik nirya yayikce, Gubernur Feliks kekenmokak, “Paulus ara, el malye winibuk ara ani-ani,” nyabuka lakak nyabik.

² Ura Gubernur Feliks arye Paulus ati, “Wekelyalyame,” nyabuka yukubukura, Paulus akunum wekukopura, Tertulus arye Feliks el kekenmokak tikukce, “Paulus el malye winibuk ara, ani-ani,” nyabuka malye yupu nyanmok. El nyanmok yupu ara, ani.

³ “Nun ni kopropa, pia telebnye Gubernur Feliks ulyame. Mutuku-mutuku nirya arye, tonda, nun unyap ning nirya deice arye, ‘Ateleb ning nirya ara, Feliks arye pil teleb kibuka dolamsuk deice arye teleb usulule,’ nyabuka anti, ‘Pia telebe,’ nyakinyabe.

⁴ Bukni, weik tonun nyapnibuk, an like upkilkyak ati, narye nun patapsil yupu ton nyapnukina ara, mitika anyuk nyapnibuk na kanye deibuka tonap kekepnulyama ati moropkine,” Tertulus arye nyabuk.

⁵ Nyabukce ayupu ton nyabuk. Anye bira Paulus ara, el malye ulya ara, akunum kel kibupe. Elda malye winilulnye ati ara, mutuku-mutuku nirya, el malye winiprabalamuka deice arye, Yahudi yala nang ninye weik bulyamikura, yu weik ulamukbuk, yupu nyaldalamikce, malye ulamik. Tonda, Yahudi yala nanguk bukni, urasin yuk kipdobikce malye nang ara, Nasarani nyanyak nang ara, el deiyoknye ulule.

^6-7 Anye birye malye winibuk ning ara, aninguk kumde. Tonda, nun Yahudi yala nang, nun malye winilamubu ning dekna ati, Allah arinyap aik ara, anyaik pum kum boyanmanto ning bukni, anye birye aning dobuka anyaik pum deipmanto upsuke. Ati, nunce Paulus talibuka doprobupe.

⁸ Nun ni Felix an babye, el asipdebuka lipsisikdeminyebuk, elce nyapkilyopura, nunce, ‘El malye winibuk ara, ani-ani,’ nyabuka el yupu yanipmaba ara, an babye dipkoprop kel kipnalame. Tertulus arye nyabuk.

⁹ Nyanmokopura, awekmek nang, Yahudi yala deiyok nang babye, “Tertulus arye Paulus ati yanibuka nyanmal yupu ara, dib nyanmale,” nyanmek.

Paulus arye, tomobuka nyabuk yupu

¹⁰ Nyanmeka ani, dakaldongoyikura, Gubernur Feliks arye, ‘Winira Paulus yupu nyapnul’ tenen, taruk erebukura, Paulus tikuk akarye ayupu nyabuk. Na deiyoknye Gubernur Felix na kele. Keting tamun weik arye nun mutuku nirya talyamsulumce, nun Yahudi yala nang ati, nun yupu bokolina deiyoknye ulamsulume. Ati ara, na kanye deipnarye an damak na yupu lipsisikuka lak nyapnukine.

¹¹ Ara, ‘Allah si erepnamne,’ tenepsirye, Yerusalem mutuku bise talak ara, do nirye, nukuka, amul arye utam nirya, pia upnin yangalamupa ani, obarye 12 sum ara, arup unmabe. Yuk sum tonap kume, akunuma. Aning ara, talye kum nyapne, anyapman ning ara, yuk nang ati, lipsisikuka asipdetumura, nyapkitingopura, an babye, kel biktume.

¹² Amalye yupu nyapdeipmaniyak nang arye, nun Yahudi yala nang, nun malye ulamap ning dekna ati, Allah arinyap aik pum, na ap, yuknye tonoknye babye, yupu kum nyapdanumu. Ati aning kum eibik. Tonda, nun Yahudi ninye, Allah si erenyak aik babye, Yerusalem mutuku asik noutamak nirya babye, narye yuk nang bulupdeipnibuk, wekikirye, ‘Na yupu nyapnyopura, yu uplye ati, malye-malye winipnamak’ tenen, kum bulupdeipsa ati, dipkoprop aning babye, kum winipsibuk, ton kum eipnike.

¹³ Aning atouk, tonda sikda si bam bol deice aryuk, “El malye winibuk,” nyabuka talye nyapmaniyak yupu ara, “Dipkoprop winibuke, aning ton winibuke,” nyabuka kum wipdeipmaniake. Deiyok ton kum upmanilabuk, talya nyapmaniake.

¹⁴ Anyapman bukni, tonok yupu ara, laka nyapnusine. Ara, Yesus peterelamuk Bisik na dib tenepsirye, talibuka unya deice arye, nun ni yapu si erelamik Allah ara, na babye, el si erebuka, elti, talibuka unune. Yahudi yala deiyok nang arye, Yesus bisik talibuka dobolbanyap nang ati, sikcuk, ‘Anang ara, sik urasin yuk tam kiprobikce, talye ninguk dib tenena nang,’ nyabuka, nyasinyake. Bukni, Allah arye, ‘Aning ara, wininamlulume, aning kum wininamlulume,’ nyapdeibukura, Musa arye sekamsuk yupu ap, Allah el yupu lak lenang Nabi nang arye sekeiyamsik yupu ap, tonda ayupu atonun neiktoto ulye yupu ara, dib tenebuka talinauk unune.

¹⁵ Tonda, narye Allah ati, kanye tenildena kumce, pia kanye talima lamabuka, dipra unun ning ara, aYahudi yala deiyok nang babye, atonun lamabuka dipra unyake. Ara, Allah el yupu nyasilya atonun, telebuk ulamice nang babye, ayupu yanibuka malye-malye ulamice nang babye, Allah arye akunum diamice ninye nirya kam bukeipnamle sum, ‘Yata talak winipnamsil do’ tenen, dinauk unyabe.

¹⁶ Aning dib tenebuka talinuna ati, ‘Na pia kum tenipdanamne’ tenen, tonda, na kanye talima noutamak arye, ‘Malye winin ning ton duknupnamne,’ kum tenenune. Aning nyana kumce, ‘Na kanye talima lamabuka unyopura, pia telebuk unamne’ tenen, Allah ap, yuk nang ap dinikcak arye, na damang pia moubuka kalikdanuka unune.

¹⁷ Min arye Yerusalem mutuku winilamse bukni, amutuku batakuka yuk mutuku binuka ulamse ani, keting tamun weik tonun akunum mapsopura, tuba tamubuka Yerusalem mutuku tamubuka yase. Yasirye, na yala ninye bona utotoa talina kum ninye ara, Yahudi yala ninye ati, yo bok ap, yuk ning ap, ‘Talya melibuka arepnamne’ tenen, yase. Tonda, Allah el si erena ati, ‘Teleb ning arepnamne’ tenen, yase.

¹⁸ Yasirye, na talima ak malye upnirye lipsisikuka delin pil ara, sirya akunum dakseura, telebuk ulamsirye nun Yahudi yala nang, nun malye wininyap ning dekna ati, Allah arenyap aik weksirye, Allah si erena ati, teleb ning arinmasibuk, sikce eipnike. Anyaik wekseura, sik eipnike talak ara, na ap, yuk nang tonap neika kum wekelbeipu. Tonda, na ap, yuk nang tonap yu upsuk ati, wabuka kum opdapue.

¹⁹ Bukni, Asia tam Yahudi yala nang tonok-tonok arye, “Paulus malye winibuk ning ara ani-ani,” nyapkiting yupu ton auptuopura, an damak lipsisikuka laka nyalyakiting ara, pia telebe.

²⁰ Akumopura, awekmak nang aryuk, na Sandeheren nang kekenmekak tikse talak ara, sikce, “Dipkoprop malye winibuk ning ara, ani,” nyabuka lulupdeipnik yupu ara, wini talak ara, tuba tamubuka lak nyapsiting anyak kekeptibyetoura, ara, telebe. Na kanye ara, na malye kum winipse.

²¹ Bukni, tonok ninguk ara, narye winipse ning ara, lak nyapnusine. Ara, narye Sandeheren nang ati, nyapse. “Na kayapu, ‘Allah arye akunum diplamak ninye nirya kam bukeipnamle’ tenen, diba tenebuka talinya ati, anggunce, ‘An malye winiplume,’ nyabuka nyapmanulume. Ati ara, ‘Asum anggun yupu bokolinmanulume,’ nyabuka, ninye yupu lepsisikra bokolina deiyok nang, Sandeheren nang ati, nyapse. Anyapse ning ati malye tenepmaniak tenepne,” Paulus arye nyabuk.

²² Paulus nyabukura, Gubernur Feliks Yesus Bisik yupu ara, mitik weik akunum kel kiyamuknye, Paulus nyabuk yupu kekebukce, nyabuk. “Yin talin nang, sik weik deiyoknye Lisias yalibuk, yupu talibuka bokeipnirye, an yupu nyapdeipnamkine. Arup ara, yupu kekena ara, akunuma ati ara, anggunda bilulume,” Feliks arye nyabuk.

²³ Nyabukce yin talinanye bira, yupa 100 yin nang talyamuknye ati Feliks arye nyabuk. “Ura, ‘Paulus bilyak’ tenen, moubuka kalikmamunye bukni, el talye bana ap, el kayapu nang arye el pataplye ning arilyangana ap ara, telebuk,” nyabuk.

²⁴ Gubernur Feliks nyabukce yukak biyukura, daulamuka ani, atalak akunum ubukopura, el ap, el kil, Yahudi yala kil, el si ara, Derusila ap, neika tamubuka Kaisarea mutuku yarik. Yarikura, Feliks arye yuk nang ati, “Paulus dobuka boyalulume,” nyapdeibukura, sik kekebuka dobuka yayikura, Paulus akunum yayukopura, Paulus arye, Yesus Kristus, diba tenebuka talina yupu Pileks ati laka nyanmokura, Feliks arye ayupu kekenmok.

²⁵ Paulus arye nyanmoka ani, yupu deiyok winilye nyabuk. Tonok ning ara, ‘Allah yupu nyasilya atonun diksukumuk unyabe,’ nyabuk. Tonda, ‘Nunce malye ning patapsilye ati, malye winibibyak’ tenen, ‘Nun bidamnang aryuk kalikdanyapce, malye ning batakanyap,’ yupu ap, nyabuk. Tonda, ‘Aminyan talak Allah arye ninye weik arye lipdesilirye, yupu bokeipnamsile,’ nyabuka ayupu ap, Paulus arye laka nyanmoka ani, Feliks kekebukce ilil weik ubukura, nyabuk. “Atalak ati ara, akunuma. Yuk yupu ton kum nyapnalyame. Anda tia talak ati dabilyame. Yuk talak ara, talye lo ton upnilyopura, yukupnamkineba, yupu ton nyapnamnilame,” nyabuk.

²⁶ Nyabuk bukni, atalak nirya ara, ton tenelamuk. Ara, Feliks elcuk, Paulus ati, utenelamuk. ‘Paulus ara, amutuku weiknye Feliks arye tapu koupnika ara, lopdeipnamnile ati, yo bok arepnamne, tenepnamnil’ tenen, Feliks arye tenebuk. Atenebuka ati, Paulus binuka daulamuka ani, tuba tamubuka yukulamukura, yupu talilamrik.

²⁷ Apia ulamdika ani, keting tamun bitinye akunum kibukopura, Feliks el pununa ati, yuknye el si ara, Perkius Festus, wipdeibik. Winibikura, Feliks arye, Yahudi yala nang yukuna ati, tonda sikce, ‘El telebnye, tenepnamniak,’ tenebukce, Feliks arye Paulus wenena aik adeiamuk touk batakukura, pia anyaikuk ulamuk.