Rasul 23 - Eipomek

Paulus arye, Sandeheren deiyok nang ati, nyabuk yupu

¹ Paulus tikukce, aYahudi yala nang, sik yupu bokolina deiyok nang, weik nang ara, Sandeheren nyalamik nang ati, kanye deibukce, sik urasin damuk pia dinmok. Dinmoka ani, ayupu nyabuk. “Na kayapu, Allah arye dinululbuk, na kam unye talak nirya babye, wini talak ababye, diksukumuk unune. Allah arye, ‘Winipnalyame,’ nyapdeipnuk pil nirya ara, akunum teleb kibuka dolamsirye sirya dakmane. Ati, na kanye noutamak ara, ‘Malye winipse do, kum do?’ tenen, pia kum bokoltonulule,” nyabuk.

² Nyabukura, sik Yahudi yala nang Allah arena deiyok nang, sik weik ninye deiyoknye kekebukce, adiparyuk, Paulus dam tikmek nang ati nyabuk. “Paulus katum boklulume,” nyabukura, sik anang arye Paulus si bokdonokik.

³ Bokdonokikbuk, Paulus arye, “Katum boklulume,” nyapmoknye ati nyabuk. “Allah arye, an wenebuka opnamkile. Anda, pun danamuk yo bukni, ‘Urasin teleb kipnamle’ tenen, kurun mek liklamak abilinga atonun ulyame. Ara, nong bol deice ara, urasin teleb atonun ulyam bukni, an kanye talima noutamak ara, malye ning weik aupmakile nyapkine! Allah arye nyabukura, Musa arye sekamsuk yupu, mem yupu nyasilya atonun, ‘Anye bira, yupu bokdeipnun’ tenen, abukmalam bukni, ance ‘El katum boklulume,’ nyapmalama deice arye, an babye, Allah el yupu yanipalama atia!” Paulus arye nyabuk.

⁴ Nyabukura, kekebikce, Paulus dam tikmek nang arye nyabik. “Se! Allah el arena ati weik deiyoknye, elti, malye yupu nyalin malam atia! Ara, yata kat kanye dongopmakila arye ayupu nyapmalam do?” nyabik.

⁵ Nyabikbuk, Paulus tamubuka nyabuk. “Se, na kayapu, min arye, ‘Anye bira anye’ tenen, kum kel kepsa ati, ‘Elda, Allah el arena ati weik deiyoknye ulule,’ kum tenepmanue. Ara, Allah arye nyabukura, el yupu laka nyananye Musa arye sekamuka ara, ani. ‘Anggun ninye deiyoknye ati, malye yupu nyabuka kum derenamlulume.’ (Keluaran 22:28) Nyabuka sekeiyamika ati, arup narye nyapmanu yupu deice arye, malye winipmanua ati, anggun merekuka wenepmanulume,” Paulus arye nyabuk.

⁶ Nyabukce, awekmek nang dipdeyukce, ‘E ton tam nang Saduki nang wekmake, ton tam Farisi nang wekmake’ tenen, kel kibukce, aSandeheren nang kekenmekak ayupu weik arye nyabuk. “Na kayapu, na apu yapu Farisi nang ulamik atonun, na babye Farisi nang atonun unune. Na kayapu, na apu yapu Farisi nang ulamik touk, na babye, Farisinye unune. Nara, kanye teniltona kumce, pia kanye talima lamabuka, ‘Allah arye akunum diamice nang kam bukipnamle sum ara, dan talak winipnamle do?’ tenen, kanye deibuka pia dipra unune. Aning dib tenenuna ati ara, arup arye anggunce yupu lepsisikuka bokolinmanulume,” Paulus arye nyabuk

⁷ Nyabukopura, Farisi nang ap, Saduki nang ap arye, sik yuk-yuk tenelamika ati, weik yupu deice arye nyaldanmekce, awekmek nang nirya bokdeipdayik.

⁸ (Ura Saduki nang arye sik tenyamika ara, ‘Allah arye akunum diamice nang ara, kam kum bukeipnamle. Tonda, Allah el melina nang, im deice pil dona nang malaikat ara, pia kum unyake. Anang ara, kume,’ tenelamike. Tonda, ‘Akunum diplamak nang, sik kanya ara, pia kum unyake,’ tenelamik. Saduki nang atenelamikce peterelamik bukni, Farisi nang ara, ‘Kume, Allah arye akunum diamice nang ara dipkoprop kam bukeipnamle. Tonda, Allah el melin nang, im deice pil donyak nang, malaikat ara, dipkoprop daunyake. Aning nirya aulule,’ tenelamik ati peterelamik.)

⁹ Awekmek nang nyaldanmek akarye bokdeipdayikce, Farisi nang bukni, Yahudi yala nang sik mem yupu peterena deiyok nang tikikce, yupu mikip arye nyabik. “Pia lilipdeipmap akarye tenepmapa ara, ‘Anye Paulus bira malye kum ubuk,’ tenepmabe. Ara akunum diplamak nang kanye arye do? Allah im deice melina pil donanye, malaikat do? Anye Paulus ati nyamtingtoura, yata wiribuka winiptibye do?” nyabik.

¹⁰ Sik yupu pia nyalanauk unmekura, yu pia weik ubukura, kwelanmek ati, ayin talin nang sik weik deiyoknye birye, ‘Paulus nong obuka der seklobicak’ tenen, ilil ubuk ati, el mapu ak nyapdeibukura, sikce awekmek nang noutamak binuka mikip arye doprobik akarye, Paulus sik aik bobiyik.

¹¹ Bobiyikura, inibukba, alukunyan aryuk nun ni kopropa Yesus Paulus dam tikilyayukce nyabuk. “Ilil kum arye mikip aryuk unamlame. Yerusalem mutuku ulalamce nati teleb kibuka lak nyalamnilam touk, Roma mutuku ababye bimince adiparyuk laka nyanamnilyame,” nyabuk.

Yahudi yala nang yupa weik bulubuka, ‘Paulus opnamap’ tenen, talak dolamik yupu

¹² Mapmeka berekukura, Yahudi yala nang yupa weik bulubuka yupu sisiklamika ani, akunum kibikce Allah ati nyapdeibik. Ara, “Paulus min kum opmabye talak nirya ara, dina ap, mek ap, pia kum dinamabe,” nyabik.

¹³ Ayupu talilamik nang ara, yupa weike 40 nang ap, tonda yuk nang ap, neika “Winipnamabe” nyabik.

¹⁴ Winibikce, asisikinmek nang arye, Allah arena ati weik deiyok nang sik dam ap, Yahudi yala deiyok nang sik yupu bokolina deiyok nang wisi nang arye sik dam ap, nyalbiyik. “Nunda Paulus min kum opmabye talak nirya ara, dina ap, mek ap pia si tebuka unamabe.

¹⁵ Ati wini talak ara, anggun ap, anggun Sandeheren nang ap arye, ‘Paulus nun dam boyalulume,’ nyabuka yin talin nang, sik deiyoknye biti moroplulume. Ara, ‘Paulus winibuk ning tuba tamubuka bita lipsisiknamap ati,’ nyabuka, domona yupu deice arye nyapnamlume. Nunda, Paulus aik kum yanmalye talakuk, bisik ak yangalyebuk, akunum kintinibupa ati, bisik noutamuk opnamabe,” nyabik.

¹⁶ Nyabik bukni, Paulus el makal kil el mi arye, “Paulus opnamabe,” nyabuka talilamik yupu kekebukce, ayin talin nang, sik aik wekelbiyukce, “Paulus opnamkiyaka ati yupu talikenyake,” nyabuka lak nyalbiyuk.

¹⁷ Nyabukopura, Paulus arye yin talin nang sik deiyoknye ati nyabuk. “Awel mi ara, an weik deiyoknye ati, ‘Yupu ton nyapnaman,’ tenepmala ati, el dobuka an weik deiyoknye dam bobilyame,” nyabuk.

¹⁸ Paulus arye nyabukura, anye birye Paulus el makal kil el mi dobuka yin talin nang sik weik, deiyoknye el dam dobiyuk. Bobiyukura, ayin talin nang, sik deiyoknye birye nyabuk. “Awelnye bira, an dam ‘Yupu ton nyapnukine,’ tenepmakila ati, nun min arye tapu koubupunye birye, na ak elce ami dobuka, ‘An dam bobinamle’ tenen, moropnue. Ara, ami arye an dam yupu nyapnukil yupu ara, aupmale atia,” nyabuk.

¹⁹ Nyabukura, ayin talin nang, sik weik deiyoknye birye, akamnye taruk talipdanuka yukak delilbiyukce “An tenepmalam yupu dan do? Ayupu nyapnulyame,” nyabuka asipdeyuk.

²⁰ Asipdeyukbuk, akamnye birye nyabuk. “Yahudi yala nang yupa weik arye, ‘Winipnamabe,’ tenebukabikce, ‘Paulus el yupu lilipdenababe,’ nyabuka domon yupu nyapnamkiaka ara, ‘Paulus winibuk ning tuba tamubuka bita lipsisiknamap ati, Paulus dobuka Sandeheren nang dam dobuka bobinulume,’ nyabuka yanuka moropnamakiake,” nyabuk.

²¹ Sik anang ara, yupa weik 40 nang ap, tonda yuk nang ap, ‘Paulus opnamap’ tenen, kalikmakce, bisik bunmaka ati, sik yupu kekebuka kum kekepnulyame. Sikce, ‘Yuk ning nirya tenena kum, Paulus opnamaba ara, adiparyuk optibye’ tenen, “Paulus min kum opmabye talak nirya ara, dina ap, mek ap pia kum dinamabe,” nyabuka, Allah ati akunum nyapdeibik. Ara, moulina ati ayupu nyapdeibik. Wini talak ara, akunum kintinipmakce, winibuka tenenmake. ‘E, nun yupu kekepsilirye, “Ara merekuka, winipnululume,” nyabuka, teleb nyapnamsil do?’ tenen, “Dinuk unmake,” nyabuk. Awelnye birye yin talina deiyoknye biti ayupu nyabuk.

²² Nyabukura, ayin talin nang, sik weik deiyoknye birye nyabuk. “Ance ayupu lakak yanuka nyapmanilama ara, yuk nang dam ton kum nyapnalyame. Ati telebe dabilyame,” nyabuk.

Paulus dobuka Kaisarea mutuku noutamak, Gubernur Feliks dam dopkwetebik yupu

²³ Ayin talin nang sik weik deiyoknye birye nyabukura, el yin talin nang, ara deiyok nang atonun nang, bitinye nang ati nyabuk. “Nun yin talin nang yupa weik 200 nang ap, kuda balye tam bukuka banyak nang, 75 yin nang ap, yo dula mal bobalamak nang ap, yupa weik 200 nang ap kintinipnamlulume. Alukunyan akunum maplukice talak ara, Kaisarea mutuku binamlulume.

²⁴ Tonda, ‘Paulus obicak’ tenen, kalikuka melipmunce ‘Gubernur Feliks dam teleb ubuka bobinuyap,’ tenena ati ning ara, Paulus el bun ning kuda ton wibuka deipnulume,” nyabuk.

²⁵ Ton ayin talin nang weik deiyoknye birye surat sekuka deibuk yupu ani.

²⁶ Nara, Kelaudius Lisias arye, nun pia teleb weik ninye deiyoknye, Gubernur Feliks ati, “Telebe,” nyapkine.

²⁷ Anye bira, na dopkwetepmakinanye bira, Yahudi yala nang arye opmanto ubik bukni, nara akunum lyepdeipsirye, ‘Anye bira Roma mutukunye ulya’ tenen, kel kepsa ati, na ap, na mapu yin talin nang ap arye lyebuka dopropbupe.

²⁸ Sik Yahudi yala nang arye, “El malye winibuk,” nyanmeka ara, ‘Deiyok dan do,’ tenepsirye, ‘Kel kipnun’ tenen, patapnukura, sik yupu bokolin nang, weik deiyok nang ara, Sandeheren nyanyak nang dam Paulus dopdeipse.

²⁹ Deipsirye, na lilibuka asipdesirye, sikce, “El malye ubuk,” nyanmeka deiyok ning ara, Musa sekamuk yupu, Yahudi yala nang sik mem yupu ara, bita kum tenelamika ati ara, weik yupu arye nyaldanmeka deice arye, Paulus ati ayupu nyabik. Ati, asipdesirye, aning kel kepsi. Aning kel kepsi bukni, elda amalye winibuka deice arye, nun ninye deiyok nang arye, yuk nang opnamtibya deiyok ning pia kum upmale. Tonda, ‘Nun ninye tapu koubuka wenena aik dongoptibya’ tenen ning ara, kum eipse.

³⁰ Ara, aminyan talak, tonoknye birye, “Sikda, ‘Paulus opnamabe’ tenen, yupu sisikinmake,” nyabuka, lakak nyapmanil ati, adiparyuk Paulus dobuka an dam dokwetepmakine. Tonda, Paulus ati, “Malye winibuk,” nyabik nang ati narye nyapse. “Paulus ara, malye winibuk ning ara, ani-ani, tenepmalum yupu ara, Gubernur Feliks dam nyalbilulume,” nyapse. Telebe, akunum nyapkine. Ayupu nirya ara, yin talin nang, sik weik deiyoknye birye surat sekuka deibukce, Gubernur Feliks ati dopkwetebuk.

³¹ Aning ati ara, ayin talin nang, Lisias nyapdeibuk touk, Paulus doprobik akarye, alukunyan noutamak anyuk bobanmeka ani, Antipatis mutuku uk bobiyik.

³² Binuka mapmeka berekukopura, sik kuda basam balye tam bukuka balamik nang aryuk, ‘Paulus dobuka bobinamak’ tenen, sik talye yin talin nang arye abana batakuka, sik aik tamubuka biyik.

³³ Ura kuda basam balye tam bukuka balamik nang banmeka ani, Kaisarea mutuku akunum biyikura, sikce Gubernur Feliks ati Lisias sekdeipmok surat ap, Paulus ap, ‘Elce dopdoplirye, dipdenamle’ tenen, arebik.

³⁴ Aribikura, Gubernur Feliks asurat dobuka yinipdeyukura, Paulus ati asipdeyuk. “Anda dan mutuku nang arye deipkik do?” nyabuka asipdeyuk. Asipdeyukura, Paulus arye tamubuka nyabuk. “Nara, Kilikia tam nang arye deipnik,” nyabuk. Nyabukura, Feliks kekebuk akarye, ‘E ara, Kilikia tamnye’ tenen, kel bikuk. Kel kibuk akarye nyabuk.

³⁵ “Ance, ‘Malye winiplum ara, asukum, asukum,’ nyabkik nang ara, sik yakirye nyapnamkiak yupu ara, na kekepnamane,” nyabuk. Tonda, Gubernur Feliks arye el yin talin nang ati nyabuk. “Anggunda, asukum arye Paulus dobuka weik ninye deiyoknye Raja Herodes el weik aik, pia teleb aik dongopmunye akarye pia moubuka kalikmunce dinamlulume,” nyabuk.