Rasul 22 - Eipomek

Paulus arye, awekmek nang nirya ati, nyabuk yupu

¹ “Ura, na ni yapu ap, na kayapu nang ap, telebe nyapsine. Sik talye kisibuka nyapnika ati, winira na dipkoprop nyapse yupu ara, lipsisikuka nyapnusine ati, kekepnululume!” Paulus arye nyabuk.

² Ibrani yupu deice nyanmoka ati ara, sik pia yupu tunim abik. Tunim abikopura, Paulus arye ayupu nyabuk.

³ Nara, Yahudi yalanye unune. Kilikia tam noutamak, Tarsus mutuku arye deipnik bukni, Yerusalem mutuku asukumuk na ni ap, na nin ap, melilamnirikura, sik mikip deice arye nepse. Ulamse ani, nepsopura, weik kel keamuknye Gamaliel arye, nun ni yapu diba tenebuka talyamik mem yupu ara, elce peterelamnukura, kel kiyamse. Aning kel kiyamsiryeura, anggun awekmalum nang atonun, ‘Allah pia talinamap’ tenen, anggun kanye talima tenen ning ap, anggun nong ap, Allah ati arimunce umunya atonun, na babye winilamse.

⁴ Yesus arye, “Winipnamlulume,” nyabuka peterelamuk Bisik ati, dib tenebuka pia telebuk ulamik ninye nirya ati, narye ikin ning sik nong deice pia delilamse ani, sik amutuku deiyok nang arye Yesus ati dib tenelamik ninye ati weik arye olamik. Tonda, sal ababye, kilapu ababye, tapu kulamsirye wenen aik pum tam dongolamse.

⁵ Winilamse ning nirya ara, Allah arena deiyok nang, sik deiyoknye ap, Yahudi yala nang, sik yupu lipsisikuka delina deiyok nang ap arye, sik babye, nyapsitinge. Aninguk kume. Tonda, anang aryuk, Damsyik mutuku unyak nang, nun Yahudi yala nang, ‘Nun kayapu nang arye melipnamniake. Melibicopura, elce Yesus yupu dib tenena nang tapu koupnamle’ tenen, surat dobuka arepnike. Aripnikura, dopropsirye, ‘Yesus ati diba tenebuka, el bisik balamik nang tapu koupnirye, Yerusalem mutuku tamubuka boyanyopura, sik wenebikirye opnamak’ tenen, Damsyik mutuku dolbanmasi.

⁶ ‘Damsyik mutuku dolbinaman’ tenen, banmasiani, keting dukduk arye Damsyik mutuku dam bisopura, im deice arye weik dirina na nong dam dana-dana nirya til daknuk.

⁷ Dirinarye til dangumapnukura, lukdanukapsirye tuku deice pupsirye, ninye yupu atonun yupu kekepsa ara, nyapnuk. “Saulus, Sauluso, ikin ning nati, deliniminya ara, yata ati do?” nyapnuk.

⁸ Nyapnukura, ila tamubuka asipdese. “Se, naio, anda yatanye do?” nyabuka asipdese. Asipdesibuk, elce tamubuka nyabuk. “An ikin ning delinilyamnye bira, na Nasaret mutuku ulamsinye, na Yesus uka unune,” nyapnuk.

⁹ Na ap, neika beipu nang ara, dirina ara, eibik bukni, ninye yupu atonun arye nyapnuknye, el yupu ara, sik kum kekebik.

¹⁰ Anyanmok yupu kekebuka, ‘Na talyeto winilamse’ tenen, malye kanye bopsirye, “Se, naio, yata wiripnaman do?” nyabuka asipdese. Asipdesibuk, nun ni koprop arye nyapnuk. “Tiklyame. Tikukapmince Damsyik mutuku biminyeura, Allah min arye, ‘Winipnamle’ tenen, tenebukce wiamkuk ning ara, lak nyapnamkiake,” nyabuka lak nyapnuk.

¹¹ Weik dirina deice arye na asing melangdang apnukura, na asing kupnuke ati, na ap, neika banmapu nang arye, na taruk talibuka Damsyik asik dam bobinik.

¹² Winipnikura, unmasi bukni, tonoknye, el si ara, Ananias na dam yayuk. Ananias ara, Allah arye nyapdeibukura, Musa sekamuk yupu, mem yupu ara, elce diba tenebuka pia moubuka talibuka ulamuka anya arye, Damsyik mutuku Yahudi yala nang ulamik nang nirya arye Ananias ati, ‘Ara pia telebnye,’ tenelamikce, elti, kisal dolamik.

¹³ Ananias bira, na dam yanuka tikukce nyapnuk. “Na weit Sauluso, an asing teleb kibuka, dina deiyok ning doproplyame,” nyapnuk. Nyapnukura, adiparyuk, Ananias eipse.

¹⁴ Eipseura, Ananias arye nyapnuk. “Nun ni yapu si erelamik Allah ara, ‘Na piluk donamle’ tenen, akunum wipdeipkuke. Ara, Allah akunum tenebuk ati aminyan winipnamle ning kel kipnalame. Tonda, Allah ulamle atonun telebuk ulamukce, Allah el piluk dolamuknye, Yesus Diksukum Ululnye eipnalame. Tonda ‘Diksukum Ululnye elcuk nyaplyeura, kekepnalam’ tenen, Allah arye wipkuke.

¹⁵ Yesus ati lak lenanye kipminyak arye, ‘Mutuku-mutuku nirya unyak ninye ara, Yesus ati kekepnamak’ tenen, an eipnalam ning ap, kekepnalam yupu ap, lak nyanamlyame.

¹⁶ Ati, yata ati tonap, pia talye unamlam do? Ara, antikmince, Allah si moropminyopura, mek dongopkiceura, an tenepminye touk malye winiminye ning nirya ara, Allah arye kum kipdeipkilirye, lyepnamkile. Ananias arye nyapnuke.” Paulus arye lak nyabuk. Nyabukce, ayupu ton dukdongobuka nyabuk.

¹⁷ Ura, amutuku tamubuka bisi talak ara, Yahudi yala nang, sik malye ning dekna ati Allah arilbalamik aik, Allah el si eren aik weksirye, Allah moronmasi talak ara, lengdar deice atonun arye nun ni kopropa Yesus nyapnukura, el ton eipse.

¹⁸ Eipseura, nyapnuk. “Wini talak minopce Yerusalem mutuku batakuka yukak bindoplyame. Amutuku nang nati laka nyanamlam yupu ara, kekebuka kum dopropnamaka atia,” nyapnuk.

¹⁹ Nyapnukura, kekepsirye, narye tamubuka nyapse. “Naio, sik Yahudi yala nang Allah yupu peteren aik nirya, wekuka balamsirye, anti diba tenelamik nang, tapu kubnarye sik nong deice kama arye olamsa ara, amutuku nang ara, sik akunum kele.

²⁰ Tonda, Stefanus ara, anti laka nyalamukba, aminyan el nong onmekopura, el ining banmok talak ara, na babye sik damakuk tikmasirye, sik deice ongolamik cang baju, el si juba kwiribuka, deipmekak kalikmasirye, ‘Stefanus onmek ak, ara merekuka onmake,’ tenepse. Ayupu nirya ara, na Paulus arye, Yesus ati nyapse.” Paulus arye, sik Yahudi yala deiyok nang ati nyabuk.

²¹ Nyabuk akarye, ayupu ton nyabuk. “Nyapsibuk, nun ni kopropa Yesus tamubuka nyapnuke. ‘Dabilyame. Yahudi yala kum ninye unyak mutuku, pia karin mutuku dabinamlyame’ tenen, ‘Wibuka dopkwetepnamkine,’ nyapnuk,” Paulus arye nyabukabukce, awekmek nang ati, laka nyanmok.

²² Paulus laka nyanmok ati, ayu ubukura, wekmek nang kekenauk unmek bukni, Paulus arye, “Yesus arye, ‘Yahudi yala kum ninye unyakak dopkwetepnamkine,’ nyapnuke,” nyabukura, sik anang ayupu kekebikak arye, yupu weik arye, nyanmek. Ara, “Anye bira, pia malye ulula ati, el pia wininamle ara, nun like. Onauk uptibye,” nyabuka, weik yupu nyanmek.

²³ Apia weik yupu arye surikuka nyanmeka anye arye, yu weik ubuk ati, sik deice ongolamik cang baju, el si juba ara, nirya kwiribik. Tonda, keting arye sisal semuk tuku doprobik akarye, yu weik ati, im sukunmek.

²⁴ Wininmekbuk, ayin talin nang, sik deiyoknye birye, el mapu ati nyabuk. “Paulus dobuka, nun aik pum dongoplulume,” nyabuk. Nyabukura, bobiyikopura, ayin talin nang weik deiyoknye birye, nyabuk. “Elda yata wiribuka deice, yupu weik arye nyanmak do? Ara, kekepdenuyaba ati ara, el nong kulabuka asipdepya deice arye, nyapsilyeura, ‘Deiyok ara, ani’ tenen, kel biknuyabe. Ati, Paulus kulaploplulume,” nyabuk.

²⁵ Paulus kulaplopnuyik talak ara, el taruk dana-dana darabuka kitipmekba, ayin talin nang, sik ninye deiyok nang atonunye ati, Paulus arye nyabuk. “Roma mutukunye, ara yupu lepsisikuka bokol linanye arye, ‘Amalye winibuka deice arye kulaplopnuyabe,’ kum nyaptunye bira, sapi bola tapu arye talye libuktum do? Roma mutuku deiyok nang arye talisinyaka deiyok nang ara, sik mem yupu nyasinyaka deice arye talye kulaplopnutum do? Kum do?” Paulus arye yin talinanye ati, nyabuk.

²⁶ Nyabukura, ayin talinanye, ninye deiyoknye atonunye kekebukce, ayin talin nang, sik weik ninye deiyoknye dam laka nyalbiyuk. Laka binuka nyabukce ayupu nyabuk. “Anye bira, dipkoprop Roma mutukunye atonun ulula ati, yata wiripnalam do?” nyabuka asipdeyuk.

²⁷ Nyabukura, ayin talin nang, weik deiyoknye Paulus dam tamubuka biyuk akarye, Paulus ati asipdeyuk. “Anda lak nyapnio. Dipkoprop Roma mutukunye atonun ulyam do? Kum do?” Nyabuka asipdeyukura, Paulus arye tamubuka nyabuk. “Diba, na unune.”

²⁸ Nyabukura, ayin talin nang, weik deiyoknye birye nyabuk. “Nara, yo bok weik dekuka areamse deice aryuk, ‘Roma mutukunye atonun unalame,’ nyapdeiamnik,” nyabukba, Paulus arye tamubuka nyabuk. “Winiplum bukni, na nong koprop ara, na ni kopropa, elda Roma mutukunye ulamuk akarye deipnuke. Roma ninye arye na deipnirik ati, na Roma mutukunye koprop unune,” nyabuk.

²⁹ Paulus arye ayupu nyabukura, ‘Paulus bokuka asilelbinamabe’ tenen, kintinibuka dam wekmek nang, ayupu nyabuka kekebikopura, adiparyuk kisikdakuka yukak tikilbiyik. Tonda, ayin talin nang, sik weik deiyoknye ababye, ‘Roma mutukunye koprop kawat rantai tapu arye kitipdongopmanue’ tenen, kel kibukce, ilil ubukura, lukdayukce, ‘Se,’ tenebuk.

³⁰ Mapmeka, berekukura, ayin talin nang sik deiyoknye birye, “Sik Yahudi yala nang arye, ‘Paulus malye ubuk,’ nyanmeka ara, deiyok dipkoprop dan do?” nyabuka, ‘Asipdenamne’ tenen, patanmokura, el mapu ati, “Paulus lopdongoplulume,” nyabukura, batakdongobik. Tonda, elcuk sik Yahudi yala nang Allah ati arena nang, weik deiyok nang ap, Yahudi yala nang, sik yupu bokolina deiyok nang ara, Sandeheren nyalamik nang ap ati, “Anggun buluplulume,” nyabukura, bulubuka wekikbuk, ayin talin nang deiyoknye birye, Paulus dobukce awekmek nang urasin dam tikibukopura, Paulus asukumuk tikuk.