Rasul 20 - EipomekPaulus men arye akunum binamuk bukni, tuba tamubuka Makedonia mutuku ap, Troas mutuku ap, biyuk yupu 1 Efesus mutuku ninye arye Yesus yupu ati, yu ubukura, yupu waldana ap, malye-malye una ap, awininmek ning nirya akunum winibikce, tunim abikopura, Paulus arye Efesus mutuku ninye Yesus winilamuk ning piribuka kel kiyamikce, dib tenebik ninye, yukubuk. Yukubukura, yayikbuk sik talima kwa dina ati yupu nyapdeibukce, “Telebe na bine. Anggun daulamlulume,” nyabuka, amutuku batakuka Makedonia mutuku biyuk. 2 Makedonia mutuku biyukopura, amutuku noutamak nirya balamuk talak ara, amutuku diba tenebik nang, sik talima mulina yupu weik peterepda balamuka ani, aminyan talak, laut mekwen arye dana-dana nirya sekdongamuk mutuku, Yunani mutuku noutamak biyuk. 3 Yunani mutuku biyukopura, wala winilye pia anyuk ulamuka ani, elce, ‘Siria mutuku binamne’ tenen, kintinibuka deiamuk talak ara, sik Yahudi yala nang arye, ‘Paulus opnamap’ tenen, yupu sisiklamika anyak, Paulus kekebuk akarye, ‘Na Makedonia mutuku noutam bisikuk tamubuka binamne,’ tenebuk. 4 Tenebukce amutuku biyuk talak ara, el ap, neika biyik nang si ara, ani. Berea mutukunye Pirus el mi Sopater ap, Tesalonika mutuku nang bitinye nang ara, Aristarkus ap, Sekundus ap, Derebe mutukunye Gaius ap, tonda, Timotius ap, ton Asia tam bitinye nang ara, Tikikus ap, Teropimus ap, anang ap, Saulus ap, sik nirya neika Makedonia tam noutamak mapnin balamik. 5 Makedonia noutamak mapnin balamik bukni, anang nirya ara, Makedonia tam batakuka, minopce binmekce, Teroas mutuku anyuk unmekce, ‘Sik anang yata talak yanuyak do?’ tenen, Paulus ap, nun ap ati, dinmasik. 6 Bukni, nun yuk, Yahudi yala nang Nena Kum Roti Kwalya akunum yubupopura, Pilipi mutuku arye, mek bukna yo pum wekuka bukuburye balamupa ani, pamu sum akunum ubukopura, Teroas mutuku biburye, mince binamik nang ap, epdapu. Epdaburye, nun nirya asukumuk, liki tekbarye sum ton aulamubu. Wel mi el si Eutikus alip aik arye sakuka obukba, dibukmok bukni, Paulus arye kam bukibuk yupu 7 Teroas mutuku aunmapua ani, naku barye sum akunum ubukopura, anaku barye sum inibukopura, ‘Nun nirya dina neika dipnuyap’ tenen, bulubuka tonok aikuk wekupu. Wekupubuk, Paulus arye, ‘Ambusum akunum binamane,’ tenebuka ati, Paulus arye amutuku diba tenebik nang ati, kibukce, Allah yupu pia peterenmoka ani, lukunyan dukduk kibuk. 8 Nun nirya bulubuka wekmapu aik, alip aik ara, weisa weik upmek. 9 Upmekbuk, tonok wel mi, el si ara, Eutikus, jendela bisik pum bukmokbuk, Paulus arye Allah yupu pia nyanmok arye, ami ara, kekenmok bukni, wi talibuka dung-dung anmoka ani, wi pia weik ubukopura, jendela bisik pum mapmoka ani, kanye kum bobuk anye arye, mabuka wi dukuyuk talak ara, aik dukuka domika ara, winilye aik anya arye, ami ara, sakukabukce, tukwak pulbiyukura, obuk. Obukopura, anang asik dam kulukikce binuka tongobik bukni, anye bira akunum dibuk. 10 Dibukopura, Paulus kutukukak arye, ami dam yayukopura, ami nong deice iribuka mabukce, Paulus arye nyabuk. “Anggunda, ‘Se, ami akunum dipmal,’ tenepmalumce malye kanye bopmaluma ara, bataklulume. Wini talak ara, el akunum kam bukle,” Paulus arye nyabuk. 11 Anirya akunum winibukopura, Paulus tamubuka alip aik welebuk akarye, dina bokuka deipsukura, nun dibupe. Dibupu ura, Paulus yupu tonap, nyanmoka ani, berekukura, el biyuk. 12 Asakmoknye sik aik bobiyikce, ‘Se, anye bira, akunum kam bukmale ati, aning ara, telebuka,’ tenebikce kanye deibik. Paulus Teroas mutuku arye, Miletus mutuku biyuk yupu 13 Nun yuk minopce mek bukna yo binuka wekuka bukuburye, Paulus ap, nun neika binamubu mutuku ati, mekwen deice arye Asos mutuku beipu. Paulus arye, “Na tuku bisik binamna ati, anggun minopce mekwen deice bilulume,” nyapdeipsuka ati, winipmapu. 14 Nunda, minopce Asos mutuku binuka unmapua ani, Paulus aminyan yayukura, epdaburye, el ap, amek bukna yo pum bisik wekuka bukukura, nun neika mekwen deice biburye, laut mekwen arye dana-dana sekdongamuk mutuku, Pulau Metilene mutuku beipu. 15 Binuka mapmapua, berekukopura, amutuku batakuka laut mekwen deice biburye, laut mekwen arye dana-dana sekdongamuk mutuku ton, Pulau Kios mutuku beipu. Binuka mapmapua, berekukura, amutuku arye mekwen deice banmapua ani, mekwen sekdongamuk mutuku ton, Samos mutuku beipu. Binuka mapmapua berekukopura, mekwen deice banmapu ani, laut tam batakuka tukwak tam, Pulau Miletus mutuku beipu. 16 Paulus arye weik sum Pentakosta tuba upmal talak anyuk ara, ‘Yerusalem mutuku bitinyopura, ara, pia telebe’ tenen, patabuk ati, witenebuk. ‘Asia tam noutamak binyopura, na Pentakosta sum, Yerusalem binamne, tenepse sum dam kiplyak ati, Efesus mutuku ara, kirikuka binamne,’ tenebuk. Witenebuk ati, Miletus mutuku uk beipu. Efesus mutuku dib tenebik nang, sik deiyok nang wisi nang ati, Paulus arye nyabuk yupu 17 Miletus mutuku akunum beipu ura, Paulus arye Efesus mutuku dib tenebik nang, sik deiyok nang wisi nang ara, yakceura, ‘Na ap, yupu talipnamabe’ tenen, yuk nang ati nyapdeibukura, ayupu laka bobuka Efesus mutuku nyalbiyik. 18 Nyalbiyikbuk, awisi nang akunum yayikura, Paulus arye anang ati nyabuk. “Ura na Asia tam min arye yanamse talak arye, nun neika ulamubu talak nirya, anggun elilamnulumce, na winilamse ning nirya ara, anggun kele. 19 Yahudi yala nang arye, ‘Paulus opnamabe’ tenen, yupu talilamnik ning ara, pia ikin ulilamnika deice arye winipdenik. Winipdenik bukni, kanye talima erena kumce, kanye lamabuka pil dolamsirye, pia engena deice arye nun deiyoknye Yesus, el melina ati, el piluk dolamse. 20 Anggun kele. Yata yupu do anggun melipsutuba kel bikmanto yupu duknubuka kum winilamse. ‘Yata nyapniting do?’ tenen, na nong dipdongobuka kum winilamse. Kume. Ninye nirya kekelamikak ap, tonda, sik aik yuk-yuk nirya wekra balamsirye, lakauk peterelamse. 21 Yahudi yala nang ap, Yunani yala nang ap ati, ‘Moubuka tenepnamak’ tenen, nyalamse. ‘Anggun malye ulalum ning ap, anggun talima noutamak malye tenelulum ning ap, batakmunce donga tamubuka, Allah tam kipmunyeura, nun deiyoknye Yesus ati, dib teneplulume,’ nyabuka laka nyalamsise.” Paulus arye nyabuk. 22 Nyabukce, ayupu ton nyabuk. “Ara wini talak ara, Allah El Dib Kanye arye, na talima noutamak, ‘Yerusalem mutuku bilyame,’ nyabuka palipdeipmanila deice arye, Yerusalem mutuku binamane. Amutuku binyopura, yata wiripnamnil do, na walwale. 23 Tonok ning ara, kele kipne. Yuk-yuk mutuku sik asik dokcak nirya, wenena aik deipnamniak ap, kanye imun ning winipnamnil ning ap, abanamnak nirya wininamnile. Allah El Dib Kanye arye, ‘Moubuka tenipnamle’ tenen, mikip arye lak nyanmanila ati, ayupu ara, kel kipne. 24 Nun deiyoknye Yesus arye, pil arepnuk ara, Allah el kanye aryuk nun bico ati, Yesus deice lyepsilirye, talye melisulul yupu, el laka teleb yupu peterena pil arepnuke. ‘Apil nirya doptinirye, sirya daktinyopura, anyuk ara, pia teleb,’ tenenune. Yesus arepnuk pil ara, ‘Pia dopra balamnya ani, sirya daknamne’ tenen, na ona babye, dipna babye, telebe uka. Na kam una ara, ‘Na’ tenen, tenena kum arye, ‘Urtalya, daopnitinge,’ tenenune.” Paulus arye nyabuk. 25 Nyabukce, ayupu ton dukdongobuka nyabuk. “Winira na kele. Anggun nirya, anggun kan-kan balamsirye, ‘Allah lyepsilirye, ninye kanye talima talinamsil,’ nyabuka, el yupu peterelamsise ninye nirya, tuba tamubuka tonap, pia na kum eipnamnulume. 26 Aning ati ara, ayupu nyapsine, anggun ap, yuk nang weik tonap, noutamak nirya, Allah yupu akunum peterepnin balamsise ati, arup ara, anyuk nyapsine. Allah arye, na peterelamsise nang ati, yupu bokuka deipsilirye, opsilibuk, pia dipmunyopura, Allah arye aning ara, na deice kum deipnamnile. Aning ati kum wenepnamnile. Aning ara, na deiyok kume. Ara, talye kume. Pia dipkoprop nyapmasine. 27 Ara yata ati do? Allah minop arye tenelamukce nyasilye yupu nirya, ‘Aning nyapnun do, aning kum nyapnun do?’ tenen, teniltolamsirye kum peterelamsise. Ayupu nirya talye mangkau arye parapkabuka lakak peterelamsise atia. 28 ‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume. 29 Yu weik bai kam yalyopura, ninye arye ayam weilamice ak wekuka, obukablirye, diplyopura, sekuka mitik anun batakalul atonun, na bindopnyopura, tilila yupu peteren nang, anggun noutamak yakcopura, anggun melibuka weilulum ninye ati, sikce kanye lamapdongobuka yanuka kum unamake. Sikti lila nang arye telila yupu peterenamsiake. 30 Ara, yukak anyuk kume. Tonda, anggun umunya noutamak nang arye ton, erebuka tikikirye, Yesus el yupu kekenyak ninye, ‘Nunti dobolyanganamsiake,’ tenebikirye, dipkoprop Allah yupu dobikirye, talye wamlibuka talye-talye kiplopsikcopura, telila yupu kwalibuka peterenamsiake. 31 Winipnamsiaka ati, anggunda pia moubuka dinamlulume. Keting tamun winilye deice arye, keting noutam ap, lukunyan ap, na engena deice arye, ‘Pia moubuka tenenamlulume’ tenen, pia laka nyalamsisirye, peterelamsise yupu ara, ‘Anggun talima on ning opsilyak’ tenen, ‘Moubuka dinamlulume,’ nyabuka peterelamsise yupu ara, pia tenenamlulume.” Paulus arye nyabuk. 32 Nyabukce ayupu ton nyabuk. “Ura akunuma, tonok yupu ton nyapnusine. Allah yupu ara, Allah el kanye aryuk nun bico ati, talye melisulul yupu ara, ayupu mikip deice arye anggun talima darapdongobuka talipsilirye, talima wisipsilyopura, Allah arye kintinipsuk ning dopdopnamabe. Ara, Allah arye kintinibuka wibuka deiamuk nang nirya, ara, anggun nang babye, Allah arye kintinipdeibuka arepnamsil ning ara, nun adib tenenyap nanguk dopdopnamabe. Ati ara, Allah ap, Allah el yupu mikip deice ap arye, sikcuk anggunti ‘Melipnamsirak’ tenen, anggun nong dobuka Allah arepsine. 33 Ara, yata ninye do, yata nang do nirya, anggun dekna weik ning, perak ap, emas ap, baju ap, anggun bona nirya uamuk ara, na ton, ‘Aning dobuka boptinye’ tenen, pia kum patalamnuke. 34 Na winilamse ning ara, anggun kele. Na ap, nun neika pil dopra balamubu nang ap, na taruk mikip deice aryuk pil dopropnopura, yo bok dololamsirye, nun patalamsuk ning ara, deklamse. ‘Yuk nang arye talye arenamniyak’ tenen, morona deiceuk kum ulamse. 35 Na pil dolamsa ap, na winilamse ning ap, deice arye peterelamsise. Pia teleb ning ara, anyuk. Na ikin pil dolamse touk, nun ato pil dobibya deice arye, bona utotoa talina kum ninye, ap, mitang ninye ap, ati melinamabe. Aning ababye peterelamsise. Nun tukak unamap talak nirya ara, Yesus el nyapsuk yupu ara, pia dib tenenamabe. Ara, ‘Sikce nun arepsiceura, mitik-mitik kanye delinyap, bukni, nunce yuk nang ati aribibyopura, pia weik kanye delisulule. Pia teleb ning ara, yuk nang arena ati, mitik malye ning ara, nun dolona atia.’ Utenenauk unamlulume.” Paulus arye, Efesus mutuku diba tenebik nang, sik deiyok nang yukubukura, Miletus mutuku yayikura, ayupu nirya laka nyabuk. 36 Ayupu nirya Paulus akunum nyabukopura, el ap, anang ap, sik nirya neika gutam tuku dinikdongobikura, el Paulus arye Allah morobuk. 37 Allah morobukura, sik anang nirya arye Paulus elti, bico tenebikce, “Telebe dabilyame,” nyabuka iribikce engenmek. 38 Sik pia malye kanye bobik ning ara, elce, “Na ton pia kum elinamnulume,” nyabukura, anyabuk ning ati, pia malye kanye bobuka engenmek. Anirya akunum winibikce, Paulus el binuyuk mek bukna yo dam neika biyik. |
© 2023, Wycliffe Bible Translators, Inc. All rights reserved.
Wycliffe Bible Translators, Inc.