Rasul 18 - Eipomek

Paulus arye Korintus mutuku biyuk yupu

¹ Ara, Atena mutuku noutamak Paulus arye peterelamukura, ton tam nang diba tenebik, ton tam nang ara, dib kum tenebik. Anirya akunum winibukopura, Paulus arye Atena mutuku batakuka Korintus mutuku biyuk.

² Korintus mutuku biyukopura, tonoknye, el si ara, Akwila ara, Pontus mutuku nang arye deiamiknye, Korintus mutuku unmokba, Paulus arye eibuk. Akwila ap, el kil Pereskila ap, Italia mutuku ulamrikbuk, Roma nang sik weik ninye deiyoknye, Kelaudius elce “Sik Yahudi nang yuk mutuku bindoplulume,” nyabuka ati, sik Italia mutuku batakrikce, Korintus mutuku yanuka unmarikak, Paulus arye eibuk.

³ Paulus ap, anang bitinye ap, yupu talipdayikura, Paulus arye uruna ati sik aik biyuk. Anang bitinye ara, tia dolin aik tenda aik wilamrik touk, Paulus babye, tia dolin aik tenda wilamuka ati, sik neika ulamikce, tenda aik ati wilamik.

⁴ Winilamika ani, Sabat sum nirya arye, sik Yahudi nang Allah yupu peteren aik Paulus weknarye, Yahudi yala nang ap, Yunani yala nang ap, sik kanye tenen ning batakikirye, winiryuk kanye talima yuk punubikirye, ‘Yesus dib tenepnamak’ tenen, Paulus arye lipsisikilamukce Allah yupu peterelamuk.

⁵ Ara, Silas ap, Timotius ap, Provinsi Makedonia mutuku arye Korintus mutuku yarikopura, Paulus ara, yuk pil nirya batakukce, Yesus yupu uk peterelamuk. Paulus peterelamukce, Yahudi yala nang ati, “Allah arye ninye nirya lyena ati, wibuka dopkwetepsuknye bira, ‘Nun Mesias bira anye,’ nyanyapnye bira, yuknye kume, Yesus el uka,” Paulus arye ayupu nyabuka peterelamuk.

⁶ Peterelamuk bukni, sik Yahudi yala deiyok nang arye, Paulus peterelamuk yupu yanibuka batakikce, elti, lulubikura, Paulus arye anang sik wenena ati, el baju juba deice palyamuk butbuta, bukwetebukce, anang ati ayupu nyabuk. “Allah arye wenebuka opsilyopura, sik ining anggun taruk tatang deiceuk upnamsile. Aning ara, na deiyok kume. Wini talak aryuk, talye kanye bobuka, Yahudi yala kum nang ati, peterelbinamne.” Paulus arye, sik Yahudi nang ati nyabuk.

⁷ Paulus arye ayupu akunum nyabuka sirya batakukura, sik Yahudi yala nang, sik Allah yupu peteren aik pum arye, buru tam biyukce, anyaik damuk, tonoknye, el si ara, Titus Yustus, el aik domukak biyukce, anyaiknye ap, neika ulamrik. Titus Yustus ara, Yahudi yalanye bukni, Allah si erelamuknye ulamuk.

⁸ Ayahudi yala nang, Allah yupu peteren aik deiyoknye, el si ara Krispus, el ap, el aik neika ulamik nang ap, nun deiyoknye Yesus ati, diba tenebik. Tonda, Korintus mutuku ninye, Paulus yupu kekelamik ninye weik, sik kekelamikce, diba tenelamikura, mek dongolamuk.

⁹ Ara, tonok sum lukunyan arye, lengdar deice atonun arye, Yesus arye Paulus ati nyabuk. “Na ap neika pia unyama ati ara, ilil una kum mikip aryuk auminya ato sik, ilil pia kum unalame. Tonda, tunim abuka kum unalame, na yupu uk pia peterenamlame.

¹⁰ Korintus mutuku anyasik donyak noutamak arye, na mapu weik unmaka ati, yuk nang arye kum olyanamkiake,” Yesus arye Paulus ati nyabuk.

¹¹ Ayupu nyabuka ati, Paulus ara, amutuku uk ulamukce, keting tamun tonok ton nirya mabukce, ton keting tamun ara, noutam akuk ulamuk. Atalak nirya ara, Paulus arye amutuku ulamik ninye ati, Allah yupu peterelamuk.

¹² Ura, winibuka peterelamuk bukni, Galio arye Akaya mutuku talibuka Gubernur ulamuk talak arye, Yahudi yala deiyok nang neika nirya arye, ‘Paulus opnuyap’ tenen, el yupu yaniplobikce, sik yupu bokolin deiyok nang yupu talipmekak, Paulus dobuka bobiyik.

¹³ Sik bobiyik nang arye, Paulus ati ayupu nyapdeibik. “Anye birye, amutuku nang ati, sik kanye talima noutamak tenenyak ning batakikirye, ‘Yuk kanye punupnamak’ tenen, Allah si erena ati, ‘Winibuka, winibuka unamlulume’ nyasilya deice arye, nun Allah arye nyalilamsuk yupu Paulus arye bisipmasile,” nyabik.

¹⁴ Nyabikura, Paulus arye, ‘Yupu nyapnun’ tenen, si akalukuyuk kipman, Galio arye Yahudi yala nang ati nyabuk. “Kume. Anggun Yahudi yala nang arye, ‘Anye bira, pia malye upmale,’ nyaptumura, na teleb kibuka kekeptinyopura, lepsisikuka deipsitinye.

¹⁵ Bukni, anggunda, talye ninye si ap, sik yala yupu deiyoknye nirya ap, Allah arye anggun yuk nyalilamsuk yupu ap ati, nyaldanmaluma ati, anggunuk lipsisikdanamlulume. Nara, ato talye yupu ara, na kum lipsisiknusine,” Galio arye nyabuk.

¹⁶ Nyabuka ati, Galio arye el mapu ati nyabukura, anang arye Yahudi yala ninye ati, “Bura tam bindoplulume,” nyabuka yupu bokolin aik pum tam arye dopkwetebikura, bai tam biyik.

¹⁷ Bura biyikce, yupu bokolin deiyok nang yupu talipmek aik dam arye, Sostenes, ara, Yahudi yala nang Allah yupu peterelamik aik deiyoknye ati, talibikce, el nong obik. Sostenes onmek bukni, Galio ara, ‘Sik yuk daoplace,’ tenebukce, tunim abuka bukmok.

Paulus arye Antiokia mutuku tamubuka biyuk yupu ap, tonda Pereskila ap, Akwila ap arye, Apolos petereprik yupu

¹⁸ Paulus ara, Korintus mutuku mitik weik anun ton ulamuka ani, aminyan talak, amutuku diba tenebuka, du weit atonun ulamik nang ati, “Telebe, daululume,” nyapdeibukce, Siria mutuku binamika ati, el ap, Pereskila ap, Akwila ap, mek bukna yo pum wekuka bukikce, kumanya mikip deice arye, mekwen deice balamik. Bukni, Paulus ara, min arye Allah ati, “Winipnamne,” nyamuka ati, sik Siria mutuku binuyik talak ara, Kengkeria mutuku biyikce, Paulus arye yuk nang ati, “Na potong kopnululume,” nyabukura, el potong kobik.

¹⁹ Mutuku si Siria mutuku binamik ati, mekwen deice banmeka ani, bisik noutamak Efesus mutuku obiyikopura, Paulus arye Pereskila ap, Akwila ap ati, “Anggunda asukum ururume,” nyapdeibukopura, eluk sik Yahudi yala nang Allah yupu peteren aik wekukabukce, ‘Sik Yahudi yala nang Yesus ati dib tenepnamak’ tenen, Yesus yupu laka nyabuka peterebuk.

²⁰ Peterebukura, sik Yahudi nang arye, “Anda nun mitik tonun ton neika unamabe,” nyabuka morobikbuk, Paulus arye tamubuka, “Kume. Nara, yuk mutuku ton binamne anya arye neika kum unamabe,” nyabuk.

²¹ Bukni, binuyuka ati, panabayuk talak ara, Paulus arye amutuku nang ati nyabuk. “Ara Allah arye, ‘Tamubuka bilule,’ tenepnilyopura, tamubuka yanamne. Kumopura, kume.” Paulus nyabukce, Kaisarea mutuku bana ati, Efesus mutuku mek bukna yo wekuka bukukce, laut mekwen deice biyuk.

²² Biyukce, yuk nang ap, mekwen deice pia banmeka ani, Kaisarea mutuku dam mekwen kup-kup mek bukna yo lukuka delilamikak binuka lukeibikopura, Paulus elda, Yerusalem mutuku welebukce, amutuku diba tenebik nang ati, “Telebe,” nyabuka, kisal dobukce, asukumuk uruna ati unmoka ani, adiparyuk Antiokia mutuku biyuk.

²³ Antiokia mutuku biyukopura, amutuku uk mitik tonun ulamuka ani, Antiokia mutuku anirye, otam mutuku, Galatia tam noutamak ap, Pirgia tam noutamak ap, amutuku-amutuku noutamak yuk-yuk peterepra balamuk. Peterepra banmuk, talak ara, Paulus el peterelamuk yupu arye, amutuku ulamik anye Yesus ulamuk ning piribuka kel kibuka ulamik nang ati, sik talima mikip kibuka kwa deipnin balamuk.

²⁴ Ura, Paulus tuba peterepra balamuk talak ara, tonok Yahudi yalanye, el si ara, Apolos, mutuku si ara, Aleksandia deiamiknye bira, Efesus mutuku yayuk. Apolos ara, aning-aning nirya kel kiyamuk akarye, weik kel kopropnye ulamuk. Tonda, Allah yupu nirya weik arye kel kiyamuk.

²⁵ Sikce Yesus el Bisik peterelamik ati, elce, ‘Ayupu ara, dipkoprop mambul yupu,’ tenebukce, Yesus winilamuk ning ap, Yesus el peterelamuk ning ap, mikip arye, yuk nang ati, Yesus el nyalamuk touk, Apolos ababye dipkoprop yupu uk lipsisikuka peterelamuk. Bukni, Yohanes arye mek dongona ati, peterelamuk yupu uk kel bikamuk.

²⁶ Apolos arye, sik Yahudi yala nang Allah yupu peteren aik wekuk akarye, ilil kum asa mikip arye deiyok koubuka peterebuk. Peterebukura, Pereskila ap, Akwila ap, el yupu kekeprikura, ‘Nunce el melipnanam’ tenen, “Nun aik yalyame,” nyabuka moroprik ati, sik aik biyukura, Allah ap, Yesus El Bisik ap, ati, teleb kibuka lipsisikuka lak nyalamrik.

²⁷ Ara, aminyan talak, Apolos arye, ‘Na Akaya mutuku binaman’ tenen, patanmokura, Efesus mutuku dib tenebik nang arye, “E ara, merekuka,” nyabikce, el talima mupdeibike. Winibikce, ‘Akaya mutuku dib tenebik nang arye, Apolos ara, sik mutuku bilyeura, kanye deibuka kipnamak’ tenen, surat sekuka dopkwetebik. Apolos Akaya mutuku biyukopura, Allah arye, Akaya mutuku ninye bico tenyamuk ati, talye melyamuka deice arye, amutuku nang arye dib tenebuka ulamik. Adip tenelamik ninye ati, Apolos el peterelamuk yupu deice arye, anang ati weike melilamuk.

²⁸ Akaya mutuku ninye wekmeka noutamak arye, Apolos ap, sik Yahudi yala deiyok nang ap arye, yupu weik nyapdayik. Nyapdayikce, min arye Allah nyalilamukura, el yupu laka nyan nang Nabi nang seklamik yupu ara, Apolos yupu mikip arye nyanmoka arye, “Allah arye, ‘Ninye Lena Deiyoknye, Mesias dopkwetepnamsile,’ nyalamiknye bira, dipkoprop Yesus el uka,” nyabuka teleb kibuka laka peterebuk. Ayupu ap, ton el nyalamuk yupu nirya ap arye, sik Yahudi yala nang deiyok nyalamik yupu bisibuk. Apolos arye Yahudi yala deiyok nang, sik yupu bisibuka deice arye, Akaya mutuku diba tenelamik nang ati weika arye melilamuk.