Rasul 16 - Eipomek

Paulus ap, Silas ap banmarikbuk, Timotius ap ansinibuka binamik yupu

¹ Ura, Paulus ap, Silas ap, bisik mapnin, banmarika ani, Derebe mutuku birik. Derebe mutuku birikura, dabanmarik ani, Listra mutuku birik. Listra mutuku noutamak, Yesus el ulamuk ning, piribuka kel kiyamuknye, el si ara, Timotius, el lin bira, Yahudi yala kil, Yesus diba tenyamuk kil ulamuk. Bukni, el li bira, Yunani yalanye ulamuk.

² Listra mutuku ap, Ikonium mutuku ap, diba tenebuka du weit atonun ulamik nang arye, Timotius ati, ‘Anye bira pia telebnye,’ tenelamikce, elti, teleb yupu nyalamik.

³ Paulus arye Timotius ati, ‘Patanilya ara, narye el dobuka binamne,’ tenebuka ati, elce Timotius dobuka yuk nang dam bobiyukura, sikce Timotius el den bola mouse ning sekik. Awinibuk ning deiyok ara ani, Paulus banamuk mutuku noutamak ulamik nang nirya, Yahudi yala ninye arye, Timotius el li Yunani yalanye ulamuka ara, akunum kel kiyamika atia. Yahudi yala nang arye Timotius ati, ‘Den bol mouse ning sekna kumnye nun like,’ tenebicak tenen, Timotius el den bol mouse ning sekik.

⁴ Winibikopura, sik, Paulus ap, el neika balamik nang ap, biyikura, otam, Yerusalem mutuku Yesus wipdeiamuk Rasul nang ap, ton Yesus dib tenebik nang sik deiyok nang wisi nang ap arye, ‘Yahudi yala kum nang arye winipnamake,’ tenebikce, surat sekik yupu ara, amutuku-amutuku nirya laka nyalbalamik. Laka nyalbalamik akarye sik balamik mutuku diba tenebik nang ati, ‘Ayupu diba tenebuka aning atonun unamak’ tenen, laka nyalbalamik.

⁵ Winilamik ati, amutuku diba tenebuka Allah yupu aik weklamik ninye ara, sik Yesus dib tenebuka pia talibik ning ara, mikip weik kibukura, pia kanye lamabuka ulamik. Tonda, asum-asum nirya ninye tonap, diba tenebik anye tabakikura, sik yupa weik kipropnin balamik.

Teroas mutuku biyuk talak ara, Paulus arye lengdar deice arye eibuk ning ati, nyabuk yupu

⁶ Paulus ap, el neika balamik nang ap arye, ‘Asia tam noutamak Yesus yupu peterelbinamap,’ tenelamik bukni, Allah El Dib Kanye arye yupu sekelongolamuka ati, Asia tam kum balamik bukni, Pirgia tam noutamak ap, Galatia tam noutamak ap, amutuku uk nyalbalamik.

⁷ Balamikce Misia atam, Bitinia otam noutamak ara, wilyamukak biyikura, ‘Bitinia tam binuyap,’ tenebik bukni, Yesus el Dib Kanye arye, ‘Amutuku noutamak kum binamlume,’ nyabuka yupu sekdongobuk.

⁸ Yupu sekdongobuk ati, Misia tam noutamak bana kumce talye balamika ani, Teroas mutuku kulukikce biyik.

⁹ Teroas mutuku biyikura, binuka mapmeka lukunyan noutamak arye, lengdar atonun ning Paulus eibuk deice arye, Makedonia tamnye, tonoknye tikukce, pia morobukce nyabuk. “Makedonia tam yamince nun melipsilyame,” nyabuka morobuk.

¹⁰ Paulus arye alengdar atonun ning deice aning eibukce, laka nyabukura, nun nirya arye tenebupe. ‘Kume, Allah arye Paulus lengdar eibuk deice arye akunum lak nyapmasile atia. Nunce Makedonia tam ninye, Yesus ninye lyen yupu peterepnamabe Allah arye aning akunum, tenepmasila ara, akunum kel kipmapa ati, adiparyuk, ‘Makedonia mutuku peterelbinuyap’ tenen, kintinibupe.’

Pilipi mutuku ulamuk kil Lidia, Yesus ati dib tenebuk yupu

¹¹ Ura, Teroas mutuku arye, weik mek bukna yo wekuka bukuburye kumanya mikip deice arye laut mekwen deice banmapua ani, laut mekwen noutamak Samoteres mutuku beipu. Binuka mapmapua, berekukura, Samoteres mutuku arye mekwen deice banmapua ani, Napolis mutuku beipu.

¹² Napolis mutuku arye tuku bisik arye Pilipi mutuku banmapurye, liki dumbarye sum asukumuk unmapu. Pilipi mutuku ara, Provinsi Makedonia tam noutamak awamuk. Atam noutamak, sik Roma mutuku ninye arye asik dolamikce ulamik mutuku awamuk.

¹³ Asukumuk unmapu ati ara, ‘Sabat sum deice arye, Allah moronak anyuk aupmale’ tenen, Pilipi asik dolamik kup-kup dana-dana wiyamik poka buplan bisibuka buru tam binuka mek dam beipu. Asukum binuka bukuburye, abulubuka wekmek kilapu ati yupu peterebupu.

¹⁴ Akekenmek kilapu noutamak ara, kil tonok, Tiatira mutuku arye yayuk kil, el si ara, Lidia, bukmokce kekenmok. Lidia ara, dekna weik mirin baju, yuk nang ati dekna deiyok kil ulamuk. Ulamuka anya arye, yuk nang arye, el dam abaju dekelyangalamik. Tonda, akil arye Allah el dib tenebuka si erelamuk. Akil ara, Paulus el nyabuk yupu kekenmokak, Yesus arye, ‘Akil diba teneplirye, kekepnamle’ tenen, el talima buplan kukdeibukura, dib tenebuk.

¹⁵ Dib tenebukura, el ap, el aik pum neika ulamik ninye ap, diba tenebika ati, mek dongobikura, elce ‘Na aik yanamak’ tenen, moropsuk. “Anggunce nati, ‘Akil ara, nun ni koprop Yesus dipkoprop diba tenepmale,’ tenepmanuluma ati ara, na aik yamunce, tia talakuk neika unamabe,” nyabuka moropsuk. Weika arye moropsuka ati, el aik wekupu.

Paulus ap, Silas ap dobuka, wenena aik dongobik yupu

¹⁶ Ura, yuk talak ara, sik Yahudi nang bulubuka Allah morolamikak binmabu talak arye, yuk nang arye, ‘Akil nun pil talye donamsil’ tenen, yo bok deice arye dekamik kil tonok bisik noutamak eibupu. Akil ara, tonok isa talyamuka, isa el mikip deice arye aminyan winipnamuk ning ati lak lelamuk. Akil arye yuk nang ati, “Amenyan talak winipnamsile,” nyabuka laka nyalamuka ati, anang arye yo bok weik areamikba, akil el talyamik nang arye dekna weik dololamik.

¹⁷ Akil arye Paulus ap, nun nirya ap ati dobolbalamsukce, weik yupu arye nyalamuk. “Allah pia mikip weik ulirye, aning-aning nirya bisilul deice arye ulul Allah ara, anang ara, el pil melibuka don nang unyakce, ‘Allah arye Yesus ati dib tenebibya deice aryuk lyesulul,’ Yesus arye lyesulul yupu laka nyanmasiake,” nyabuka akil arye pia nyalamuk.

¹⁸ Asum-asum nirya akil arye ayupu pia nyapra balamukce, nunti dobolbalamuk ati, aminyan sirya talak ara, Paulus arye kanye boktobuk ati, tamubukce, akil talima noutamak ulamuk isa ati, yuprobukce yupu nyabuk. “Yesus Kristus, el si ap, el mikip deice ap arye, nyapkine akil talima noutamak kutukuka buru bindoplyam, nyapkine!” nyabuk. Nyabukura, adiparyuk akil talyamuk isa akil batakuka biyuk.

¹⁹ Amelina kil dekamik arye talyamika deiyok nang arye, akil pil dolamukura, yo bok dololamika deiyok ning aisok bura tam biyikura, kum kibukura, kel bikik. Awinipmok ning akunum kel kibikura, yu weik ubukce, Paulus ap, Silas ap, talibuka bobiyikce, ‘Anyaik dolamikak deiyok nang dam laka nyapnuyap’ tenen, amutuku ninye yupu lipsisiklamik aik dam taruk arye lipdakuka delilbiyik.

^20-21 Winibikce, amutuku ninye sik deiyok nang dam abitinye nang dobuka deibikce nyabik. “AYahudi yala bitinya nang arye, malye weik winipmarakba, nun amutuku ninye pia malye kanye bopmapa atia. Anggunda, ‘Winipnamlum,’ nyapmasirak yupu ara, nun amutuku mem ning ati, yupu bisipmasiraka ati, aning ara, nun amutuku nang arye kum winiptibye. Tonda, nun Roma ninye unyaba anya arye, sik nyapmasirak yupu, dobuka nun Roma mutuku ninye arye kum winiptibye,” nyabik.

²² Nyabikura, talye awekmek nang kekebikce, ‘Sik malye winidurak anyak, dib nyapmasiyak,’ tenebik. Utenebikce, asum nyapmek nang yupu uk sik atalye wekmek ninye babye, Paulus ap, Silas ap, ati nyabik. Nyabik ati, amutuku deiyok nang arye nyabikura, Paulus ap, Silas ap, sik deice ongolamik cang baju kwiliklobikce, sik nong kama arye, kulabuka onmek.

²³ Anang arye, sik nong deice weika kama arye kulabuka obik akarye, abitinye nang dobuka, wenena aik dongobik. Dongobik anye, amutuku deiyok nang arye, awenena aik kalikna deiyoknye ak nyabik. “Anda abitinye nang ati, pia moubuka kaliknulyame,” nyabik.

²⁴ Winibuka nyabika ati, awenena aik kalikna deiyoknye birye, ‘Paulus ap, Silas ap, biricake,’ tenebukce abitinye nang dobuka, apenjara aik pum noutamak wilyamik aik dongobukce, sik yane dana-dana pia pikiptalibukce, weik ikin yo pum potokamikak noutamak dongobukce, darapdongobuk.

²⁵ Ura, anyakuk aunmeka ani, lukunyan dukduk talak ubukura, Paulus ap, Silas ap arye, kisal dobuka Allah si erena ati, Allah morona ap, mot lena ap, unmarik bukni, awenena aik pum bisik minop arye wenebuka dongolamik ninye arye kekenmek.

²⁶ Wininmekbuk, adiparyuk mutuku lulukna weik mikip arye lulukuk deice arye, awenena aik abilinga tuku ikuka domikak babye, lulukuka paklobuk. Adip aryuk awenena aik pum nirya mikip arye pakuka singniba, anyaik wenena ati dongamik ninye nirya, sik koupdongamik kawat rantai tapu nirya sekuk.

²⁷ Anirya winibukopura, awenena aik kalikna deiyoknye bukrobukce, anyaik pum bisik buplan nirya talye kukultaknauk upmokbuk eibukopura, ‘Anyaik wenena ati dongamik, nang nirya akunum bindopmake,’ tenebuka ati, el parang ya atonun ning dobukce, ‘Na badamnye opdanun’ tenen, kintinipdayuk.

²⁸ Winibuk bukni, Paulus arye, anye biti weik yupu deice arye nyabuk. “An oldana bataklyame. Nun nirya aunmabe bai tam kum bindopmabe atia” nyabuk.

²⁹ Nyabukura, awenena aik kalikna deiyoknye birye, “Weisa boyalulume,” nyabukce Paulus ap, Silas ap, sik tikmarikak noutamak, bik-bik abuka biyukce, ilil ati el nong nirya sirim talibukce, sik dam tukwak daksakuka dibuk.

³⁰ Winibukce, aminyan talak, elce sik wenena aik pum bisik arye, sik dobuka buru tam bobiyukce asipdeyuk. “Anango, anggunce nyapnurume. Na yata winiptinye deice arye Allah arye lyepnutu do?” nyabuka asipdeyuk.

³¹ Asipdeyukura, sik tamubuka nyaprik. “Anda, nun deiyoknye Yesus diba tenepminyopura, lyepnamkilca. Yesus ati dib tenepminyopura, Ara, an ap, an aik neika umunye ninye ap, lyepnamsilca,” nyaprik.

³² Nyaprikopura, sik bitinye nang arye anye ap, el aik neika ulamik ninye nirya ap ati, “Yesus arye nun malye wininyap ning kum kipdeipsilirye, lyesulule,” nyabuka, Yesus teleb yupu petereprik.

³³ Ayupu laka nyaprikura, alukunyanuk awenena aik kalikna deiyoknye birye, adiparyuk sik dobuka, sik suse mek likuka kwetebuk. Winibukura, adiparyuk el ap, el mapu silip nirya ap, diba tenebikura, mek dongoprik.

³⁴ Mek dongoprikura, awenena aik kalikna deiyoknye birye, el aik koprop pum bisik abitinye nang bobiyukce, sik dina aribuk. Tonda, sik nirya Allah diba tenebika ati, el ap, el aik neika ulamik kili sal ap, pia kanye deibik.

³⁵ Berekukopura, anyaik domika deiyok nang arye, ‘Awenena aik kalikna deiyoknye dam yupu nyalbinuyak’ tenen, sik melin nang ak yupu nyapdeibikura, laka nyalbiyik. “Anggun yupu nyalbilulume. ‘Abitinye nang lobuka bataklulume,’ nyapnululume,” nyabik.

³⁶ Nyabika ati, awenena aik kalikna deiyoknye birye Paulus ati nyabuk. “Anango, anyaik domika deiyok nang arye ‘Abitinye nang lopdeiplulume’ nyapmaniaka ati, anggun talye dabindoprurume. Talye kanye deibuka tunim abuka binamarurume,” nyabuk.

³⁷ Nyabukura, Paulus arye amutuku deiyok nang sik melina nang arye, yupu laka nyalyanmek nang ati nyabuk. “Kume. Nun bitinye nang ara, talye nang kume. Roma mutuku weik deiyok nang arye, sik yupu nyapdeipsika deice arye, Roma mutuku ninye atonun nang kipsike ati, ‘Sikda Roma ninye ururake,’ tenesinyake. Nunda Roma mutuku nang unyam bukni, sik anang arye, ‘Amalye winipmarum deice arye wenepnamsiape,’ kum nyapsik. Sikce yuk ninye dinmasikak talye kama arye opsikce nun dobuka wenena aik pum tabu koubuka dongopsike. Winira sikce talye tunim abuka, ‘Anang dungnubuka dopkwetepnamap,’ tenepmasiak ara, kume. Ara, kum winipmanto. Sik anang aryuk yakirye ninye dinmasicak laka lopdeipnamsiyak atia,” Paulus arye nyabuk.

³⁸ Nyabukura, akekepmek nang melin nang arye, anyasik deiyok nang ati binuka laka nyabikura, sik deiyok nang ara, ‘Se, Paulus ap, Silas ap ara, sik Roma nang ulamrake. Bukni nunce nyapdeipmapa arye anang wenebuka kama arye kulabuka opmonge. Ati sik Roma mutuku weik ninye deiyok nang arye nunti wenebuka opnamsiak do?’ tenen, ilil pia weik ubuk.

³⁹ Pilipi mutuku deiyok nang ilil ubuk ati, awenena aik yanmekce Paulus ap, Silas ap ati, yupu mulilyayikce nyabik. “Se, nun malye upmabe,” nyabuka, awenena aik pum tam arye buru tam bobiyik akarye, ‘Sik aik dolamik noutamak batakuka, yukak bindoptiringe’ tenen, Paulus ap, Silas ap ati, “Minpola yukak berurume,” nyapdeibik.

⁴⁰ Morobikba, Paulus ap, Silas ap, awenena aik pum tam arye buru akunum birikopura, Lidia aik birik. Lidia aik arye sik ap, amutuku diba tenebuka, du weit ato sik ulamik nang ap, bulubuka wekmekura, sik teleb yupu nyaprika deice arye, awekmek nang ati, talima kwa deiprik. Winiprikura, sik ap, yuk nang ap, amutuku batakuka, yuk mutuku birik.