Rasul 15 - Eipomek

Paulus ap, Barnabas ap arye, Yerusalem mutuku deiyok nang ati, yupu talilbirik

¹ Antiokia mutuku neika ulamik talak ara, Yudea tam nang arye ninye tonok-tonok Antiokia mutuku biyikce, amutuku diba tenelamik ninye ati, deiyok kobikce ansinibuka ayupu peterelamik. “Allah arye Musa ati nyapdeibukura, Musa arye Yahudi yala nang ati, ‘Anggun den bam bola mouse ning sekenamlulume,’ nyabuka sekuk. Aning ati ara, Musa peterelamsuk touk, anggun Yahudi yala kum nang babye, anggun den bol mouse ning sekenamlulume. Anggun den bol mouse ning kum sekmunyopura, Allah arye kum lyepnamsile,” nyabuka anang aryuk peterelamik.

² Ayupu peterelamik ati, Paulus ap, Barnabas ap ara, yu ubukura, sikce, ‘Kume nun deiyoknye Yesus arye ayupu kum peterepsuke,’ nyaprik. Nyaprikce, ‘Den bam bol mouse ning sekena mambule,’ nyabuka ayupu peterelamik nang ap, abitinye nang ap arye, yu kipdeipdayikce yupu weik nyapdayik. Aning ati ara, amutuku dib tenyamik nang arye, ‘Paulus ap, Barnabas ap, ton yuk diba tenelamik nang ap, Yerusalem mutuku dopkwetepnamap’ tenen, wipdeibik. Deiyok ara, ‘Anang Yerusalem mutuku bikirye, Yesus arye wipdeiyamuk Rasul nang ap, Yerusalem mutuku diba tenelamik nang, sik deiyok nang ap, nun yupu nyapdapu yupu ati, yupu talinamaka’ tenen, wipdeibik. Ara, ‘Den bam bol mouse ning sekena ning ati ara, yata wiripnamap do?’ tenebikce, ‘Yerusalem mutuku bikirye, yupu talipnamak’ tenen, wipdeibik.

³ Ara, Antiokia mutuku diba tenebuka ulamik ninye arye, ‘Anang Yerusalem mutuku binamak’ tenen, dopkwetebikura, Fenisia tam noutamak ap, Samaria tam noutamak ap, bisik mapdin balamik. Amutuku noutamak bisik mapnin balamik talak ara, Yahudi yala kum ninye, sik malye winilamik ning batakuka donga tamubuka, Yesus diba tenebuka doprobikce talyamik ning uk, ayupu laka nyapnin balamik. Ayupu laka nyalbalamikbuk, amutuku noutamak diba tenebuka ulamik ninye kekebikak arye, ‘E, Yahudi yala kum ninye babye, Yesus ati akunum dib tenebik’ tenen, bikikce pia kanye deibik.

⁴ Anang wideibikce, dopkwetebikba balamika ani, Yerusalem mutuku biyikura, Yerusalem mutuku diba tenelamik nang ap, Yesus arye wibuka deiamuk Rasul nang ap, amutuku diba tenebik nang, sik deiyok nang ap, sik nirya arye ayayik nang ati, “Telebe,” nyabuka kibik. Kibikopura, Barnabas ap, Paulus ap arye, awekmek nang ati, Allah arye sik bitinya ati melyamuka deice arye, sik dolamrik pil nirya laka nyaprik.

⁵ Lak nyaprik bukni, yuk diba tenebik nang, sik yupa ara, Farisi nyalamik nang arye tikuka ayupu nyabik. “Sik Yahudi yala kum ninye babye sik den bam bol mouse ning adiparyuk dipkoprop sekenamake. Tonda sik babye, Allah arye ‘Wininamlulume aning ara, kum wininamlulume,’ nyapdeibukura, Musa arye sekamuk yupu deice arye, mem yupu tuba nyasilye touk, ayupu nirya dib tenebuka aning dobuka pia talibuka unamake. Anggunce anang ati nyanamlume,” Farisi nang arye nyabik.

⁶ Sik nirya nyabikura, Peterus ap, ton yuk nang, Yesus arye wibuka deiamuk Rasul nang ap, amutuku diba tenebik nang, sik deiyok nang ap, ‘Yahudi yala kum nang ara, den bam bol mouse ning adiparyuk sekenamak do? Kum do?’ tenebikce, ‘Ayupu moubuka tenipdebirye yupu talipnamap’ tenen, bulubuka wekik.

⁷ Yupu weik talipmekce, Peterus babye, sik yuk nang babye, yupu pia lipsisikuka talinauk unmeka ati, Peterus tikukce, ayupu talipmek nang ati nyabuk. “Na kayapu, anggun kele. Nun neika ulamupa noutamak, minop arye Allah wibuka deipnuke. Ara, Allah arye, na wibuka deipnuka deiyok ara ani. Ara narye Yahudi yala kum ninye ati, ‘Yesus arye ninye lyesulule,’ nyabuka peterenamna deice arye, Yesus el laka teleb yupu kekenamake. Ayupu nyapniba, kekebikirye, ‘Yesus arye lyepnamsil’ tenen, dib tenenamake. ‘Apil donamle’ tenen, Allah arye wipnuke.

⁸ Allah arye nun kanye talima tenenyap ning kel kilisulule. Allah El Dib Kanye arepsuk touk, anang babye, dib tenebik deice arye Allah El Dib Kanye sikti, akunum aribuk. Aning winibuka deice arye, ‘Sik Yahudi yala kum ninye babye, diba tenebiceura, na mapu kiptinge’ tenen, Allah arye akunum laka nyapmasile.

⁹ Nun babye, sik babye yuk-yuk kum tenesulule ati ara, sik diba tenebika deice arye Allah arye sik talima ak malye ning uamuk ara, dopdonokukce, teleb kipdeibuk.

¹⁰ Nun apu yapu ap, nun ap, Musa arye sekamuk yupu mem yupu ara, dobolbana ati pirildelamubu bukni, ikin wamsuk ati aning nirya kum winipmanto ulamubu. Allah arye Yahudi yala kum ninye ati, ‘Musa sekamuk yupu nirye kekebikirye talibuka dobolbinamake. Awinibice deice aryuk lyenamne,’ kum nyamuk bukni, anggunce sik Yahudi yala kum ninye ati, ‘Ayupu talibuka dobolbinamake,’ nyanmalume. Nyanmaluma deice arye Yahudi yala kum ninye sik nong deice pia ikin ning delinmalume. Aning ara, nun Yahudi yala nang babye, kum winipmanto ulamubu. Ati, yata deiyok ati aikin ning sik nong deice delinamlum do? Winipmunyopura, Allah derepnamsile. Ati, winimunya deiyok arye Allah ati benbenep denamalume. Aning ara, yata ati do?

¹¹ Ara pia kume. Nun dib tenenyaba ara, nyapnusine. Ara, nun deiyoknye Yesus arye, nun bico ati talye melibuka arisulul ning deice anyuk, nun diba tenebibyeura, Allah arye lyesulule. Mem yupu talibuka ikin pil dobipye deice arye kum lyesulule. Aning ara, pia atonun, Allah arye sik Yahudi yala kum ninye babye, bicoe tenelul deice aryuk lyelule.” Peterus arye akekenmek nang ati nyabuk.

¹² Ura, Peterus nyabukura, Barnabas ap, Paulus ap arye, yupu tonap, nyaprik. Ara, sik Yahudi yala kum ninye ulamika noutamak arye Allah meilyamuk deice arye, Barnabas ap, Paulus ap arye, ninye kum winipmanto pil dolamrik. Apil dolamrikopura, sik elilamik nang arye, ‘E, dipkoprop Allah arye abitinye nang deice arye pil donmasile’ tenen, kel bikamik. Apil dolamrik ning nirya laka nyanmarik talak ara, sik awekmek nang nirya arye, ‘Se’ tenen, tunim abuka kekenauk unmek.

¹³ Barnabas ap, Paulus ap, yupu akunum nyanmarika ani, tunim arikopura, Yakobus arye nyabuk. Na kayapu, na yupu kekepnululume.

¹⁴ Nun ka Simon Peterus birye akunum laka nyapmasile. Allah arye Yahudi yala kum ninye mutuku noutamak, ‘Na’ tenen, ninye ton unamak’ tenen, minopce wipdeiyamukba, sikce Yesus ati dib tenebike. Dib tenebik deice arye, elce ninye mutuku-mutuku nirya ati, bicoe tenesilya ning ara, akunum laka nyabuka peterepsuke. Anirya ara, Simon arye akunum laka nyapmasil atia.

¹⁵ Peterus winiryuk nyapmasil yupu ap, Allah yupu laka nyan nang sekamik yupu ap, ansinibuka upmale. Allah yupu laka nyalamik nang, nabi-nabi nang arye sekamik yupu ara, ani.

¹⁶ ‘Aminyan talak, na tamubuka yanirye Daud el domukak lokuka biyuk aik ara, tamubuka tuba dopnamnarya. Anyaik akunum pun deibuka loknamal aik ara, teleb kibuka dopnamne.

¹⁷ Winipnyopura, yuk ninye mutuku-mutuku nirya ara, minop talak arye min wibuka deiamse ninye, Yahudi yala kum ninye arye, ‘Allah arye lyepnamsil’ tenen, epdenamniakca. Na Allah ati dib tenebikcopura, lyepnamne.

¹⁸ Allah elcuk aning nirya pil dolule. Min arye aning lakak nyabukura, ninye kel kinyaka deiyoknye bira Allah el uka. Elce ayupu nyapdeiyamuk.’ (Amos 9:11-12)

¹⁹ Yakobus ayupu nyabukce, dukdongobuka ayupu tonap nyabuk. “Aning ati ara, na kayapu na tenepmana ara, sik Yahudi yala kum ninye ara, sik malye wininyak ning batakikirye, balye tamubuka Yesus diba tenenyak ninye ara, nun yahudi yala ninye arye, ‘Musa sekamuk yupu ton talibuka wininamlulume,’ nyabibya arye sik nong deice ikin ning tonap kum delinamabe.

²⁰ Aning kum winipnamap bukni, teleb ninguk winipnamap ara, surat sekibirye sik dam dopkwetepnamabe. Pia kum winipnamak ning ara, winibuka nyapnamabe. Yata din ning do, ninye arye si talye erenyak ning ap, ‘Talye si erepnamabe’ tenen, obuka arinyak ning ap ara, nun kum dipmanto ning ara, sik Yahudi yala kum ninye babye, adin ning yala nirya pia kum dinamake. Tonda, ubula arye talye yolana nirya pia kum wininamake. Tonda, minop ngang colopdongobuka obikcopura, ining kum saklamle ning nirya nong kalibuka pia kum dinamake. Tonda, ining mek yala nirya pia kum dinamake. Winibuka nyapnamabe,” Yakobus arye nyabuk. Nyabukce, ayupu ton nyabuk.

²¹ “Nunce, ‘Aning-aning kum wininamlulume,’ nyabuka surat sekuka nyanamap yupu ara, urdem ati kume. Ayupu nirya ara, Musa sekamuk yupu ulul atia. Minop talak arye wini talak nirya ara, Musa sekamuk yupu peterelamikura, nun mutuku-mutuku nirya nun yahudi yala nang Allah yupu peterenyap aik noutamak, sabat sum nirya deice arye tuba peteresikibuk, ayupu tuba kekenyapa ati nyapne,” Yakobus arye nyabuk

Yerusalem dib tenena deiyok nang arye, Yahudi yala kum ninye ati, surat dopkwetebik yupu

²² Yakobus arye anyabuka ati, aminyan talak, Yesus arye wipdeibuk Rasul nang ap, amutuku dib tenelamik nang ap, sik deiyok nang ap, sik nirya neika tenebikce, ‘Nun aunmap nang noutamak arye yuk nang ton wipdeipnamabe Paulus ap, Barnabas ap, ansinibuka Antiokia mutuku binamak,’ tenebik. Utenebikce Yudas el si ton, Barsabas nyalamiknye ap, Silas ap, wipdeibik. Abitinye nang ara, amutuku dib tenebik nang arye, abitinye nang ati, kanye delilamikce, ‘Sikda pia teleb nang,’ tenelamika ati, abitinye nang wipdeibik.

²³ Yesus arye wipdeiamuk Rasul nang ap, amutuku diba tenelamik nang, sik deiyok nang ap arye, ‘Asurat dobuka arilbinamak’ tenen, awipdeibik nang ati, surat arebik. Asurat noutamak sik sekik yupu ani. Yahudi yala kum ninye, Antiokia nang ap, Siria tam ap, Kilikia tam ap, amutuku-amutuku noutamak Yesus diba tenebuka ululum ninye ati asurat sekeipsiabe. Anggun ap, nun ap ara, Yesus dib tenebupu anya arye du weit atonun unyabe. Nunce Telebe nyapsiabe.

²⁴ Anggunda ikin kanye bobuka unmalum ning ara, kekepmabe. Ara nunce, “Wininamlulume,” nyabuka kum dopkwetebupu bukni, nun unyap noutamak nang arye yuk nang arye, anggun dam yayik akarye, sik peterelamik yupu deice kekeplumce, ‘Anango, se, yata wiripnamap do?’ tenen, pia ikin kanye bobuka unmaluma ara kekepmabe.

^25-26 Ati, nun nirya kanye tonok deice arye tenebibirye, ‘Ninye wibuka, anggun Yahudi yala kum ninye dam ninye ton dopkwetepnamsiabe,’ tenebupu. Ara, nun kayapu nang koprop, Barnabas ap, Paulus ap, sik anang ati pia bicoe usulule. Sik anang ara, sik kanye tenena ap, sik talima ap, sik nong nirya, ‘Nun deiyoknye Yesus, el yupu peterepnemirye el piluk donanam’ tenen, Yesus areprik. Yuk nang arye, ‘Yesus yupu petererumunya ara, nun lik’ tenen, abitinye nang ati, olamik bukni, abitinye nang ara, kum batakaldongolamrik. Tuba apiluk dorurake. Ati, ‘Anang ara, anggun dam dopkwetepnamsiabe,’ tenebupu. Tonda, ‘Nun mutuku wibuka deibupu nang ap, anang ap, ansinibuka neika sik dam yanamake,’ tenebupe.

²⁷ Nun kan-kan arye dopkwetepmap nang bitinye nang ara, Yudas ap, Silas ap, nunce asekmap yupu dipkoprop atonun, sik yupu deice arye laka nyapnamsiraka ati, dopkwetepsibibuk anggun dam nyalyanamsirake.

²⁸ Allah El Dib Kanye ap, nun nirya ap, nun kanye talima ansinibuka neika upnamabe tenebupe ati, ikin ning tonap tabakuka anggun nong deice tabakuka tonap, kum deipnamabe. Bukni, amambul ning dem ara, pia kum wininamlume.

²⁹ Yata din ning do nirya, yuk nang arye, ‘Nun ni’ tenen, si talye erenyak ning, ‘Kibuka si erepnamabe’ tenen, obuka arebice ning ara, nun dib tenenyap nang kum dipnamtibye ning ati, anggun Yahudi yala kum nang babye, adin yala nirya pia kum dinamlume. Tonda, ining mek yala nirya pia kum dinamlume. Tonda, ngang kotokuka obikcebuk diplyopura, ining kum saklamle ning nirya, nong pia talye kalibuka kum dinamlume. Tonda, pia talye-talye ubula kilapu kum yoldanamlulume. Aning pia kum winipmunyopura, telebuk kibuka unamlume. Telebe, ayupu asukumuk sekdeipsiape.

³⁰ Ara, awibuka deibik nang dopkwetebikura, sikce Antiokia mutuku biyikura, sik nyabikura, Antiokia mutuku diba tenebik nang nirya bulubuka wekikopura, Yerusalem deiyok nang arye min sekik surat arebik.

³¹ Asurat arebikura, awekmek nang surat dobuka yinibikce, asurat noutamak teleb kwa dina yupu kekebik deice arye pia kanye deibik.

³² Yudas ap, Silas ap, sik babye, Allah arye nyalamuk yupu lak nyana deiyok nang ulamrik anya arye, sikce amutuku diba tenelamik nang ati, talima kwa dina yupu ap, talima mikip kilina yupu ap, yupu weik nyalamrik.

³³ Amutuku uk mitik weik tonun tonap, ulamika ani, ‘Anang sik bokolina deiyok nang dam tamubuka binamak’ tenen, amutuku dib tenebuka, sik du weit atonun ulamik nang arye, teleb yupu nyapdeibikce, “Telebe, dabilulume,” nyabuka, ayupu laka nyalyanamik nang tamubuka bokeibik.

³⁴ Bukni, Silas arye, ‘Asukumuk unamne,’ tenebukce amutuku uk mitik ton ulamuk.

³⁵ Tonda, Paulus ap, Barnabas ap, Antiokia mutuku asukumuk weik tonun ton ulamdika ani, sik ap, ninye weik tonap arye, Yesus yupu laka nyana ap, peterena ap, ulamik.

Paulus ap, Barnabas ap, malye kanye bobuka, yupu nyapdarikce, yuk-yuk bokdanuka bindoprik yupu

³⁶ Aminyan talak, Paulus arye Barnabas ati nyabuk. “Nun bitinye binuname. Nun bitinye nang arye Yesus yupu peterelanumu mutuku nirya, tamubuka binimirye, ‘Sikda yata wiribuka unmak do? Teleb ubuka diba tuba tenenyak do? kum do?’ tenen, dipdenaname. Uruna kipdanuka peterelbinaname,” Paulus arye Barnabas ati nyabuk.

³⁷ Barnabas arye, ‘Yohanes ara, yuk si ton el si Markus nyalamiknye bira, el ap, neika bitibye’ tenen, patalamukura, tenelamuk.

³⁸ Barnabas arye aning teninmokce, nyabuk bukni, Paulus arye, ‘Kume. Anye bira, tonap tabakna ara, bataklyame. Yohanes ara, Pamfilia tam arye bataksukce, nun pil sirya kum dakamnumu talak bataksukura, nirya ansinibuka pil kum dobupa ati, nunce el dobuka, neika kum bitibye,’ tenebukce nyabuk.

³⁹ Winibuka, yuk-yuk tenelanmarik ati, yu weik ubukura, yupu deice arye wapdarikce, adiparyuk, yuk-yuk bokdarik. Bokdarikce, Barnabas arye Markus dobuka, mek bukna yo wekuka bukrikce, ‘Siprus mutuku binamne’ tenen, laut mekwen deice birik.

⁴⁰ Bukni, Paulus arye Silas wibukce yukak biyuk. Ara, amutuku diba tenelamik nang arye, ‘Yesus el melina deice aryuk apil donamdak’ tenen, abitinye nang ati Allah morobikce Yesus ati arebikura, birik.

⁴¹ Sik balamrika ani, Paulus ap, Silas ap, Siria tam ton, Kilikia tam ton balamrikce, amutuku diba tenebuka ulamik ninye ati, sik diba tenebuka pia talibik ning ara, ‘Atalibika atonun, mikip arye darabuka unamak’ tenen, Paulus arye amutuku nang ati, talima kwa dilamuk.