Rasul 14 - Eipomek

Paulus ap, Barnabas ap, Yesus laka teleb yupu Ikonium mutuku petereprik yupu

¹ Paulus ap, Barnabas ap, Ikonium mutuku akunum birikopura, Antiokia mutuku ulamrik touk, sik Yahudi yala nang sik Allah yupu peteren aik wekrik. Anyaik wekrikce, sik Allah yupu pia teleb ubuka peterelamrik ati, Yahudi yala nang ap, ton Yahudi yala kum ninye ap, weike diba tenebik.

² Sik diba tenebik bukni, yuk Yahudi yala nang arye, ara, Yesus ati diba kum tenebik nang ara, ‘Paulus ap, Barnabas ap, nun lik ati, yuk nang anyak malye yupu nyaptibyeura, abitinye nang arye sik petererurak ning ati yanipnamak,’ tenebikce, Yahudi yala kum ninye ati minina yupu nyalamika deice arye yu kililamikak Yahudi yala kum ninye arye Paulus ap, Barnabas ap, ati, yuk anye bobik.

³ Paulus ap, Barnabas ap, sik peterelamrik talak nirya ara, Yahudi yala nang arye, yuk yala nang ati yu kililamik bukni, abitinye nang ara, ilil kum asa arye mikip aryuk sik abitinye nang arye, Yesus yupu peterelamrik. Sikce, “Yesus elda ninye nirya ati bico tenesilirye, talye melisululnye,” nyabuka yupu peterelamrik. Peterelamrik talak ara, ‘Ayupu kekelamik nang dib tenepnamak’ tenen, Yesus arye el mikip Paulus ap, Barnabas ap, sik anang nong deiceuk deibukura, sikce ninye kum winipmanto pil dolamrik. Tonda, amambul pil dolamrikopura, aning elilamik nang arye, ‘Se, dipkorop anang deice arye, Allah arye pia mambul pil donmasile’ tenen, bikamik.

⁴ Anya asik dolamikak ulamik ninye tonok bukni, noutamak bokdobikce, ton tam nang ara, Yahudi yala nang sik yupu kekelamik. Ton tam nang ara, Paulus ap, Barnabas ap, sik peterelamrik yupu diba tenebuka kekelamik. Winilamika ati, amutuku ninye kanye yuk-yuk tenebikce bokolalamik.

⁵ Bokololamikce Yahudi yala kum ninye babye, Yahudi yala ninye babye, sik ap, sik ninye deiyok nang ap, tonok-tonok yupu sisiklamikak arye, ‘Ikin ning sik bitinye nang nong deice deibibirye, keil dobuka sik nong deice donokuka opnamabe,’ tenelamikce yupu talilamik.

^6-7 Utenelamik bukni, Paulus ap, Barnabas ap, sik anang tenelamik ning kel bikrikce, ‘Opsicak’ tenen, bik-bik abuka birikak arye, Likonia tam noutamak, Listra mutuku ap, Derebe mutuku dam ap, amutuku noutamak nirya ‘Yesus arye ninye lyesulule,’ nyabuka, Yesus el laka teleb yupu peterepra balamrik.

Paulus ap, Barnabas ap, Listra mutuku petereprik yupu

⁸ Listra mutuku peterelamrik talak ara, tonoknye, yan pakupromuknye ulamuk. Anye bira, el deiamik talak arye, yan tatang pakupromukce dibukura, pia kum balamuk

⁹ Paulus peterenmok talak ara, anye birye el yupu moubuka kekenmok. Kekenmokbuk, Paulus arye anye bukmok akuk dinmokce, ‘Anye bira Yesus yupu dib tenepmantonye ulule. Ati ara, Yesus dib teneplyopura, el yana lipsisikuka teleb kipdeiptinye’ tenen, Paulus arye kel kibuk.

¹⁰ Kel kibukce, dinmoka ani, weik yupu arye anye biti, “An yan tukwak yanibuka tiklyame,” nyabuk. Nyabukura, anye bira el bukmokak arye im kurukuka tikukce, mankau asa tikuka biyuk.

¹¹ Ura, abulubuka wekmek nang arye, Paulus awinibuk ning sik eibikce, sik Likonia yupu deice arye, weik yupu nyabuka deiyok kibikce, apia nyalamik. “Se, nun allah-allah si erenyap ning, ninye nong atonun, arye abitinye nang akunum yanmasirak ani,” nyabuka weik yupu nyalamik.

¹² Nyalamikce Barnabas ati sik isa si, erelamik ning el si ara, Seus nyalamik. Paulus ara, yupu nyana deiyoknye ulamuka ati, elti, ara, sik isa si Hermes nyalamik.

¹³ Seus el si erelamik asik ara, Listra asik domikak buru tam domik. Anyaik deiyoknye ara, Seus el arena deiyoknye bira, elce yim sapi ap, get-geta ning lumubukabukce, tapu kwanibuka deipmek ning ap dobuka, amutuku aik aruma domikak kup-kup tam wiyamik poka buplan dam, tikilyayik. Ara, talye ati kume. ‘Akam ning obibya deice arye, Paulus ap, Barnabas ap ati, kibuka si erepnamap’ tenen, aning dobuka tikilyayik.

¹⁴ Winibikura, yuk nang arye laka nyabikura, Barnabas ap, Paulus ap, ayupu kekeprikce, awinipnuyak ning ara, ‘Yata ati winipnuyak do?’ tenen, sik malye kanye boprikce, sik alip tam ongolamrik baju kwilikuka batakrikce ‘Sik awinipmak ning bataknuyak’ tenen, anang wekmek noutamak bik-bik abuka birikce, yupu weik tonun nyaprik.

¹⁵ “Anggun awininmalum ara, yata ati do? Nunda talye ulamak ninye atonun unyame. Nun talye tukwak nanguk unyame. Nunce anggunti, ‘Yesus arye ninye lyesulule,’ nyabuka, Yesus el laka teleb yupu boyanmasiname. Anggun amutuku ninye, talye ning si eremunya ara, batakmunce, donga ibuka, ‘Allah dipkoprop ululnye si erenamluma’ tenen, nyapsiname. Allah dipkoprop, elce im tam ap, tuku tam ap, laut mekwen ap, aulye ning noutamak ulul ning nirya ap, kwepdeibuknye bira, el uka. Ati, el siuk erenamlulume.”

¹⁶ “Minop talak ara, ninye mutuku-mutuku nirya, ‘Aning teleb,’ tenebuka ulamik ning nirya ara, elilamuk bukni, ‘Batakalulume,’ kum nyapsuk. Talya mankau kiyamuk.

¹⁷ Winilamuk bukni, ‘Elda yatato Allah ulul do?’ tenen, laka lena ati ara, kum bataksuke. Elce nun bico ati teleb kwepdeipsuk ning ara, ani. Dua noutamak arye mok aresulule. Tonda, nun dinyap ning ara, atalak-atalak dina ati, yuk-yuk wibuka aresulule. Tonda, nun dinyap ning weika arye arisulule. Tonda, nun talima kanye delinyap ning nirya arisilibuk, ‘Kanye langdipsilyeura, pin-pin arye unyabe,’ nyalamabe. Aning-aning nirya arisilya deice, ‘Allah arye dipkoprop bico tenesulule’ tenen, kel kinyabe,” Paulus ap, Barnabas ap arye, awekmek nang ati nyaprik.

¹⁸ Ayupu nirya nyaprik bukni, awekmek nang sikce, ‘Asapi basam ap, domba basam ap, obibya deice arye, abitinye nang sik kibibirye, sik si erepnamabe,’ tenebik ning ara, kum batakmanto unmek. Wininmek anya arye Paulus ap, Barnabas ap, sik yupu weik nyaprik deice aniryuk, anang sik tenepmek ning batakik.

¹⁹ Aminyan talak, Antiokia mutuku ap, Ikonium mutuku ap arye, Yahudi yala nang yanmekce, sik yupu nyabika ati, awekmek nang kekebikce, ‘Anang dib nyanmasiake,’ tenebikce, sik babye, anang nyabik yupu uk dib tenebikce, Yahudi yala nang tam kipdobik. Yahudi nang tam kipdobik akarye, keil dobuka Paulus el nong deice donokuka, obikce, ‘Akunum dipmale,’ tenebik akarye, el nong dobuka sik asik domikak buru tam libuka binuka deibik.

²⁰ Deibikce, ‘Akunum dipmale,’ tenepmek bukni, sik Yesus diba tenebik nang arye, Paulus el nong dam bulubuka dana-dana wekikura, Allah morobikopura, Paulus bukuka tikukce, anyasik noutamak tuba tamubuka wekuk. Wekukce mapmoka berekukura, Paulus ap, Barnabas ap, amutuku batakuka ‘Derebe mutuku binunam’ tenen, birik.

²¹ Derpe mutuku birikopura, ‘Yesus aryuk ninye lyesulule,’ nyabuka Yesus el laka teleb yupu petereprikura, ninye weik dib tenebikce, Yesus el winilamuk ning piribuka kel kibikce talibuka ulamik.

²² Aminyan talak, amutuku winilye Listra mutuku ap, Ikonium mutuku ap, Antiokia mutuku ap, Yesus diba tenebik nang ati amutuku tamubuka peterepra balamrikce, anang kanye talima kwa dilamrik. Anang talima kwa dilamrik akarye, amutuku nang Yesus diba tenebuka pia talibik ning ara, atalibika atonun, ‘Pia kanye lamabuka unamak’ tenen, sik kanya talima kwa dilamrik. Winilamrikak arye ayupu nyaprik. “Nun diba tenenyap ninye Allah aryuk, pia talipnamsil talak ara, ikin ning pia weik ulamsilya noutamak arye Allah el dam weknamabe, talye parapkabuka kil-kil kanye bon deice aryuk kum wektibye,” nyaprik.

²³ Nyaprik akarye Paulus ap, Barnabas ap arye, ‘Apiluk donamak’ tenen, sik Allah diba tenebik nang, ‘Sik deiyok nang unamak’ tenen, ninye yuk-yuk amutuku nang, amutuku nang, nirya wibuka deipnin balamrik. Anang wibuka deiprik talak ara, sik bitinye nang arye winiprik. Allah morona ap, Allah si erena ati, din si tebuka kwaning dina kum bulang arye, amutuku nang nun ni Yesus diba tenebika ati, adiba tenebik nang dobuka, ‘Yesus elcuk sik pataplye ning pia melinamle’ tenen, wibuka deipnin balamrikce, Yesus ati areprik.

²⁴ Winiprik akarye, Pisidia mutuku noutamak peterepra balamrika ani, Pamfilia tam birik.

²⁵ Ubirikce, Perga mutuku Allah yupu akunum petereprik akarye, Atalia mutuku birik.

²⁶ Atalia mutuku kulukdik akarye, mek bukna yo deice wekuka bukrikce, laut mekwen deice balamrika ani, Antiokia mutuku tamubuka birik. Ara, winiryuk sirya dakdongobuka petereprik pil ara, min kum pil dolamrik talak, binurik talak ara, sik Antiokia mutuku nang arye, ‘Allah el melyamlye deice aryuk apil doptiring’ tenen, minopce wipdeiamik. Ati ara, tuba tamubuka Antiokia mutuku uk birik.

²⁷ Birikce, sik nyaprikura, amutuku diba tenebik nang bulubuka wekikura, sik Allah arye meilyamukbuk sik dolamrik pil nirya ara, laka nyaprik. Tonda, “Allah arye talye Yahudi yala kum ninye ati, ‘Diba tenepnamake,’ tenebuk talakuk, akunum upmale. Ati, Allah melipmalbuk akunum diba tenenmake,” nyabuka, ayupu ton laka nyaprik.

²⁸ Laka nyaprikce, asukumuk ulamrik. Ara, sik ap, Yesus el ulamuk ning piribuka kel bikik akarye, pia diba tenebuka talyamik ninye ap, Antiokia mutuku ninye ap, neika weik anun pia ulamik.