Rasul 10 - Eipomek

Kornelius arye Peterus ati, yukubuk yupu

¹ Kaisarea ulamuknye, el si ara, Kornelius, elda Roma mutuku yin deiyok nang, 100 nang yupu bokolinanye ulamuk. Sik ninye yupa 600 nang yupa yuk-yuk kibuka, sik si bokuka delilamik atonun, el yupa si ara, Italia nyalamik.

² El ap, el mapu silip nirya ap, Allah el nyalilamuk yupu pia talibuka ulamik. Tonda, el mapu silip nirya ap, Allah ati dib tenebuka ulamikce pia talibuka ulamik. Tonda aning-aning nirya patalamuk ninye ara, sik patalamuk ning nirya elce weik arilamuk. Tonda, asum-asum nirya Allah morolamuk.

³ Winilamuka ani, tonok sum arye sintam kibukura, tuba bukmok talak arye, lengdar malamaka atonun ning eibuk. Eibukce im deice Allah pil donanye malaikat laka eibuk akarye, anye bira Kornelius dam yayukopura, nyabuk. “Korneliuso,” nyabuk.

⁴ Nyabukura, Kornelius, ilil weik ubukura, tunim abukce, anye bira el nonguk pia dinmok. Pia dinmokce, “Naio, yata wiripnun do?” nyabuk. Nyabukba, im deice Allah pil donanye malaikat birye tamubuka nyabuk. “Ance Allah morolyam ning ap, ance bona utotoa talina kum ninye talye arilyam ning ap, Allah elikilirye, tenekulule anya arye Allah arye weik kanye deipmakile.

⁵ Ati, ance ninye ton dopdeipminyeura, Yope mutuku bikirye, tonoknye el si Simon, ton yuk si ara, Peterus nyanyaknye bira, doboyanamnyake.

⁶ El Peterus ara, yuknye ton asik unmale. Simon domba bola kintinibuka baju wilulnye ap, neika ururake. Simon, el aik ara, laut mekwen lilun tam aik dobuka ululnye atia.” Im deice pil donanye malaikat arye Kornelius ati nyabuk.

⁷ Malaikat nyabukce akunum biyukopura, Kornelius arye el pil melina nang bitinye nang ap, yin talyamuknye Kornelius melipmoknye ap, yukubuk. Ayin talyamuknye babye, Allah arye, ‘Wininamlume,’ nyalilamuk yupu pia talibuka ulamuk.

⁸ Kornelius arye anang yukubukura, yayikura, winiryuk winipmok ning ap, eipmok ning nirya ap laka nyabukak, kekebikopura, elce anang ati, Yope mutuku dopdeibuk.

⁹ Dopdeibukura, sik anang arye banmeka ani, bisik binuka mapmeka berekukura, tuba dukdongobuka banmeka ani, keting dukduk kibukura, sik anang Yope mutuku aik dam bai tam ara, Peterus bira, el aik pum bisik arye kupsakuka yayukce, buru tam yo moropdeiamikak, abisik welebukce, aruma deice amsuna atonun pala kibuka domik aik, ‘Allah moropnun’ tenen, welebuka bulbiyuk.

¹⁰ Moronmoka ani, din patanmokura, sikce el din danmek talak ara, tuba bukmokcuk, lengdar malamaka atonun ning eibuk.

¹¹ Im deice arye im dana-dana likdobukura, dinmokbuk, pala baju arye yangabuka mouse dana-dana talipmok akarye nimalye kulukuyanganmok.

¹² Kouluku yanganmok ati, dinmokura, yan dumbarye deice arye balul ning ap, mun arye lilibuka balul ning ap, maka yala im alip tam balul ning ap, anirya acang kain pum bisik aupmokbuk eibuk.

¹³ Peterus aning eibukura, ninye yupu atonun arye Peterus ati nyabuk. “Buklyame. Bukmince aupmal ning eipmince, wibuka opmince dabuka diplyame,” nyabuk.

¹⁴ Nyabukura, Peterus arye tamubuka nyabuk. “Kume. Ara, kum winiptinye. Ato malye yala ning ara, ‘Yahudi yala nang kum diptibye’ tenen, din ning ara aning pia kum dinune. Aning ara, pia mem ning anya arye ‘Allah arye derepnilyak’ tenen, batakaldongonune,” nyabuk.

¹⁵ Nyabukura, ninye yupu atonun arye tuba tamubuka tonap, nyabuk. “Yahudi yala nang arye, ‘Nun aning kum diptibye,’ nyalamik ning ara, Allah arye akunum teleb kipdeipmalce, ‘Wini talak ara, anggun diptume,’ nyapmasila ati, ance aning ati, ara, ‘Aning ara, Yahudi yala nang kum diptinge aning ara, mem ning,’ nyaminya ara, bataklyame. Pia kum nyanamlyame,” nyabuk.

¹⁶ Awinibuk ning nirya ara, asum tonok bukni, like winilye arye winibukce, adiparyuk sirya tamubuka im deice welebuk.

¹⁷ Welebukura, Peterus arye el lengdar atonun dinmok ning ati, ara ‘Yata wirina ati do? Aning eipmana anya arye yata wiripnaman do?’ tenen, pia tenenauk unmoka ani, Kornelius arye dopdeibuk nang ara, ‘Simon aik ani,’ nyabikura, kekebikce, Simon asik dam poka buplan bisik dam tikilyayik.

¹⁸ Tikilyayikce nyabik. “Simon Peterus anyaik unmal do?” nyabuka yukubikce asipdeyik.

¹⁹ Asipdeyik talak ara, Peterus arye el lengdar atonun dinmok ning ati, tuba tenenmokbuk, Allah El Dib Kanye arye Peterus ati nyabuk. “Simono, ninye winilye nang arye anti enmakiake.

²⁰ Ati, tikminyak arye tuku tam koulukuka bilyame. Narye anang dopdeipse anya arye, ‘Anang ap neika binuyap do, bataknun do?’ tenena kumce, anang ap talye ur bilulume.”

²¹ Allah El Dib Kanye arye Peterus ati ayupu nyabukura, Peterus arye anang tikmikak koulukuka yayukce nyabuk. “Anggun enmanulumnye bira na akunume. Anggun yata ati yanmalum do?” nyabuka asipdeyuk.

²² Asipdeyukura, sik ayayik nang arye tamubuka nyabik. “Kume, Roma mutuku yin deiyok nang, 100 nang yupu bokolin deiyoknye, el si ara, Kornelius arye nyapdeipmasil ati yanmabe. Kornelius ara, Allah nyalilamuk yupu nirya pia talibuka ulule. Ati, Israel nang nirya arye elti, kibuka si erenyakce kanye deilinyake. Tonda, Allah el im deice pil donanye malaikat arye Kornelius ati nyabuk. ‘Peterus arye an aik yangana ati, moropminyeura, an aik yalirye, el nyapdeipnamkil yupu, anyuk moubuka kekepnamlyame,’ nyabuka, Kornelius ati nyapdeibukura, Kornelius birye ayupu kekebukce dopdeipmasilba, nun ayanmabe,” nyabik.

²³ Ayayik nang arye Peterus ati nyabikura, Peterus arye, “Na aik yalulume. Neika mapnamabe,” nyabuk. Nyabukura, mapmeka berekukura, anang ap, Peterus ap, ansinibuka banmek. Tonda, Yope mutuku nang Yesus ati akunum dib tenebikce, sik du weit atonun ulamik nang ap, Peterus ap, neika tabakuka banmek.

²⁴ Banmeka ani, bisik binuka mapmeka, berekukura, banmeka ani, Kaisarea mutuku biyik.

²⁵ Ura, Peterus arye Kornelius aik wekelbiyukura, Kornelius arye pia kanye deibuka, kipnamuka ati, Peterus yan dam kisok tuku dinikdongobuka, nong mapdongobuka, kibuk.

²⁶ Kornelius arye winibukura, Peterus arye nyabuk. “Kume, tiklyame. Na babye, talye tukwaknye binya ati, nati kinina ara, bataknilyame,” nyabuk.

²⁷ Nyabukura, Peterus ap, Kornelius ap, sik yupu talinmarika ani, aik pum wekrikce, abulubuka wekmek nang eibuk. Peterus anang eibukce, ayupu nyabuk.

²⁸ “Anggun dipkoprop kele. Nun Israel nang nun mem yupu deice arye yuk-yuk mutuku ninye, ara, Yahudi yala kum ninye ara, ‘Sik pia malye ninye,’ tenenyaba ati, neika una ap, uruna una ap kum unyabe. Winibuka unyaba anya arye, anda Kornelius Yunani yalanye ulyame ati ara, an aik min yanuka kum wektinye tenepse. Aning tenepse bukni, Allah arye winiryuk nyapdeipmanil yupu deice arye na kel kipse. Ara, yata yala nang do nirya, ‘Sik nininga atonun, malye unyake,’ kum nyaptinye.

²⁹ Aning ati ara, ance dopdeipmalum nang, anang arye na aik yayikce ‘Yasilyame,’ nyapmanungu yupu ara, kum bisipmane. Kekepsirye talye mangkau arye anang melibuka yanmane. Ati ara, anggunda yata ati, ‘Ninye boyanamak’ tenen, wibuka dopkwetepmanulumbuk, na dam binuka boyanmaniak do? Yata deiyok ati, amutuku boyanmanulum do?” nyabuka, Peterus arye anang ati nimalya arye asipdeyuk.

³⁰ Asipdeyukura, Kornelius arye tamubuka nyabuk. “Kume. Or winilinye sum ato keting sintam deice arye Allah moropse. Moronmasi talak ara, minopce dirina weik cang baju ongamuknye, na donga tam tikilyayuk.

³¹ Tikilyayuk akarye nyabuk. ‘Korneliuso, Allah arye an moronmalam yupu kekepmakile. Tonda, ance bona utotoa talina kum ninye ati talye arilyam ning ati elikilirye, tenekulule. Allah arye kanya deilikulule.

³² Ati, ance ninye dobuka dopkwetepminyeura, Yope mutuku bikirye, tonoknye el si ara, Simon, ara, Peterus nyanyaknye bira, dobuka yanamnyake. El Peterus ara, Simon domba bola kintinipdeibuka baju wilulnye ap, neika ururake. El Simon el aik ara, laut mekwen lilun tam aik dobuka ululnye atia,’ nyapnuke.

³³ Nyapnuka ati, adiparyuk ninye wipdeipsirye, ‘An Peterus dobuka boyanamkiak’ tenen, ninye wibuka dopkwetepse. Winira, akunum yanmalama ati, telebe nyapkine. Ati, winira Allah el unmalce dinmasil damuk unmabe. Ara, ‘Allah arye anang nyapnamle’ tenen, nyabukura, kekeplum yupu nirya ara, ‘Nun nyapsiminyeura, kekepnuyabe. Allah arye yata yupu nyapnamsil do?’ tenen, bulubuka wekmabe.” Kornelius arye Peterus ati nyabuk.

³⁴ Nyabukura, Peterus birye deiyok koubukce nyabuk. E, winira na bikmane. Dipkoprop Allah arye nunti nun mutuku ap, nun urasin ap, ato ning disilya elisilya deice arye, ‘Na mapu kopropa,’ kum tenesulule. Allah arye, ‘Ton yala nang ara telebe, ton yala nang ara pia malye ati, na mapu kum unamake’ tenen, bokuka yuk-yuk kum kilisulule. Allah arye tenesilya ara, ‘Ninye mutuku-mutuku nirya ara, atonunuk unyaka ati ara, yata mutuku ninye do nirya, na mapu uptinge,’ tenesulule.

³⁵ Bukni, yuk-yuk mutuku ninye nirya, talima diksukum ubuka unyak nang ap, ton Allah el nong ap, Allah el nyalilul yupu ap ati, ‘Ara mambul’ tenen, dib tenebuka unyak nang ap, ‘Sik nirya na tam yatinge,’ tenesulule.

³⁶ Allah arye Israel nang ati aning teleb yupu nyabuk. “Anggun malye ululum ning ati, Allah deresilya ara, nun malye winin ning Yesus elcuk namin kipdeipsilya deice arye, nun ap, Allah ap, neika teleb kibuka unamabe. Yesus Kristus arye nun ap, Allah ap, ati teleb kibuka ansinilisulule, Yesus Kristus ara, aning-aning nirya talilul deiyoknye bira, eluk ulule.”

³⁷ Ara, Yudea tam noutamak akunum ulamuk ning nirya, anggun akunum kele. Galilea mutuku arye deiyok kouamukce, Yohanes arye mek dongon yupu peterelamukbuk, anyapce,

³⁸ Allah arye Yesus Nasaret mutukunye, akunum wipdeibuka ati, ‘Na piluk donamle’ tenen, el mikip ap, Allah El Dib Kanye ap, Yesus nong deice deibukura, Yesus arye pia teleb piluk dopra balamuk. Dopra balamuk akarye, Isa Mutuku Dongonye kouke pum tam weklamukak ulamik ninye weik kwetelilamuk. Aninye weik kwetelilamuk deiyok ara, Allah ap, Yesus ap, sik neiktoto ulamrik arye, Allah el mikip el nong deice deiamuk arye aninye kwetelamuk.

³⁹ Yerusalem mutuku ap, Israel ninye sik mutuku-mutuku nirya ap, amutuku noutamak arye el winilamuk ning nirya, nun asing arye elilamubu. Elilamubu ning ati yuk nang ak lak nyanyabe. Sik amutuku nang arye Yesus dobuka sekelin yo deice deibuka obikba dibukura, eibupu.

⁴⁰ Akunum dibukopura, weipmek bukni, like bitinye mabukce, winilye sum Allah arye kam bukeibukce, el mikip arye Yesus nun dam peterepdabisuke.

⁴¹ Amutuku ninye nirya arye Yesus kam bukibuk ning ara, kum eibik bukni, Allah arye min arye wibuka deiamsuk nanguk eibupe. Ara, Yesus dibukce kam bukuk talak ara, el ap, neika dina ap, mek ap, dipmapu nang ara, nun uka Yesus kam bukuk anyak eibupu.

⁴² ‘Tuba kam unyak ninye babye, akunum dibik ninye babye, wiplirye, yupu bokoldelinanye deiyoknye unamle’ tenen, Allah arye wipdeibuknye bira Yesus uka. Yesus arye nunti, “Dan ninye do nirya, ayupu laka nyabuka peterelbilulume,” nyapsuke.

⁴³ Minop talak Allah arye nyalilamukura, sik seklamikce ayupu lak nyalamik nang nabi ulamik. Nabi-nabi nang nirya arye, sik seklamik yupu ara, tuba nyalisulule. Ara, yata-yata nang do nirya, elti, diba tenebiceura, el si deice aryuk sik malye wininyak ning ap, kanye talima malye tenenyak ning ap, nirya kum kipdeipsilirye, namin kisulule. Elcuk lyesulule. Peterus arye ayupu nirya nyabuk.

⁴⁴ Peterus arye ayupu tuba nyanmok talak ara, dib tenebikura, Allah El Dib Kanye arye ayupu kekenmek nang ati sik nong deice yayukce, sik talima noutam wekuk.

^45-46 Musa arye nyapdeibuk touk, sik den bam bol mouse ning akunum sekik nang, ara Yahudi yala nang, Yesus diba tenelamikce, Peterus ap neika yanmek nang ara, anirya eibik. Eibik bukni, anyaik wekik nang ara, Yahudi yala kum nang ulamik bukni, Allah El Dib Kanye yanuka, weik arye sik talima pum tam wekuka deice arye, nong deice deibukura, anang arye yuk-yuk mutuku ninye nyanyak yupu deice arye, Allah si erebik. Allah el si erebikura, Peterus ap, neika yanmek nang arye aning eibika ati, sik lukdayikce, ‘Mambule’ tenen, kanye pum tam teninmek. Aning eibikopura, ‘Mambule’ tenebik deiyok ara, ‘Allah arye bico tenesilya deice arye, el talye arisulul Dib Kanye, ato talye Yahudi yala kum ninye ara, sik den bola mouse ning kum seklamika ati, Allah arye yata wiribuka areptu do? Amalye wininyak ning ton sik babye, Allah El Dib Kanye kum doproptinge,’ tenebika ati teniltonmek.

⁴⁷ Teniltonmek bukni, aminyan talak, Peterus arye nyabuk. “Yata nang arye, ‘Kume,’ nyapsitingura, anang dobuka mek kum dongoptibye do? Nunda Allah El Dib Kanye akunum doprobupu touk, sik anang babye, Yahudi yala kum nang bukni, Allah El Dib Kanye akunum dopropmaka ati, mek dongoptibye,” Peterus arye nyabuk.

⁴⁸ Ati, Peterus arye nyabuk. “Anang ara, Yesus Kristus ati dib tenepmaka anya arye Yesus el si deice arye, mek dongoplulume,” nyabukura, sikce anang dobuka mek dongobik. Mek dongobikura, amutuku nang sikce nyabik. “An ap neika mitik anun ton unamabe,” nyabuka morobikura, mitik anun ton Peterus asukumuk unmok.