Pilipi 4 - Eipomek

¹ Na kayapu. Na weit yapu atonun ninyeo, pia bico tenesunune. ‘Se, kanye eibratibye’ tenen, pia tenesunune. Anggun nirya ati, na kanye pia weik deipsine. Yesus arye dekna ning arepnamnil ning deiyok ara, anggun tia. Ara, Yesus el laka teleb yupu peterelamsisibuk, anggunda diba tenelamluma ati, dekna ning arenamnile. Yesus el weik mikip deice arye, nun nong talye nong dobuka, el nong pia teleb ulye touk, nun nong im deice ninguk kwepdeipnamsile. Aning ati ara, na arup nyapmasin touk, nun Deiyoknye Yesus talima dukdongobuka umunce, diksukumuk ubuka, kanye lamapdongobukauk unamlulume.

² Ara, yuk yupu ton nyapnusine. Ara, anggun bitinye kilapu Eyodia ap, Sintike ap ara, Yesus ap, talima dukdongobuka uptringce, ‘Wininaname’ tenen, ‘Tonok kanyeuk bobuka, telebuk unamrake’ tenen, nyapsine. ‘Wininamrurume’ tenen, anggun si Eyodia ap, Sintike ap, anggun bitinye ati moropsine.

³ Tonda, asurat dopropnalamnye, na kum bataknulumce, pil neikauk pia dolamnumunye, na kwit anti moropnukine. Ara, abitinye kilapu ara, Allah el laka teleb yupu, ninye lyen yupu pil dona ati, na ap, sik ap, pia pi dobuka, neika pil dolamubua ati, ance sik bitinye kilapu ati melipnamlyame. Aning atouk, na kwit Kelemen ap, na ap, neika pil dolamubu ninye nirya ap, ati, melinauk unamlyame. Anyapmakin ninye nirya sik si ara, Allah el kanye talima pum tam Pia Kam unamak Ninye ati, si seklamuk buku noutamak akunum sekdeipsuke.

⁴ Yesus ap, talima dukdongobuka, kanye deibukauk unamlulume. Anyapmasin touk ila tamubuka tonap, nyapnusine. Yesus ap, talima dukdongobuka, kanye deipdanuka unamlulume. Neika unamlum talak nirya ara, kanye deibuka unamlulume.

⁵ Anggun talima namin ubuka, yuk nang nirya ati bico tenebuka, neika teleb umunyopura, adeice arye yuk nang nirya eipsikirye, nun Deiyoknye Yesus dolyanamsil talak ara, ‘Akunum dam upmasile’ tenen, lakak kel biknamsiake.

⁶ Yesus nun dolyanamsil talak ara, akunum dam upsil anya arye, yata ning do nirya ati, ilil upsiliba, ‘Se, yata upnamap do’ tenen, teniltonauk kum unamlulume. Ilil upsiliba, teniltona kum unamlum bukni, aminyan winipnamsil ning noutamak nirya ara, Allah ati moronamlulume. Ara, Allah ati telebe nyabuka, anggun patapsilye ning nirya ara, lakak nyapmunce, Allah pia moronamlulume.

⁷ Allah pia morolamunyopura, Allah arye kanye teleb bobikirye kanya, lamabuka dakiyam asa un ning arenamsile. Kanye tunim abuka una deiyok ning arisilya deice arye, anggun ap, Yesus Kristus ap, kanye dukdongobuka unamlulume. Atalak nirya ara, anggun ilil una kum aryuk, mankau kanye bobuka telebuk unamlulume. Allah arye, ‘Kanye teleb bopnamak’ tenen, teleb un ning aresilya ara, talye ninye kanye aniryuk kum kel kiptibye.

⁸ Telebe na kayapu, asurat sirya dakana ati ayupu nyapnusine. Ara, yata teleb ning do nirya, pia dipkoprop mambul ning ap, kwalina kumce diksukum una ap, malye ning pia kum mingne ning ap, ninye nirya arye, ‘Aning dipkoprop teleb,’ tenenyak ning ap, apia teleb ning niryauk ara, tenenauk unamlulume. Yata ning do nirya, awinin ning ati ara, ‘Allah arye kanye delilule,’ tenenyap ning nirya ara, aninguk tenebuka unamlulume. Malye winin ning yala-yala nirya ara, kum tenenamlulume.

⁹ Tonda, narye peterelamsibuk, diba tenebuka doproplum ning ap, na nyapdeiamsise yupu ap, narye teleb winilamsibuk elilamlum ning ap, anirya tenebuka dobolbanauk wininamlulume. Anyapmasin touk, diksukumuk winilamunyopura, kanye bon ning arisilya Deiyoknye, Allah ap, anggun neika dukdongobuka unamlume.

Pilipi ninye arye, Paulus ati areamik ning ati, Paulus arye, “Telebe,” nyabuk yupu

¹⁰ Winira yuk yupu ton nyapnusine. Yesus ap, kanye dukdongobuka, neika unirye na kanye deipne. Kanye deipne deiyok ara, anggunce nati, ‘Se, Paulus el pataplye ning ati, yata wiribuka meliptibye do,’ tenelamnulum bukni, dipkoprop melipmanto talak lo kum uamuka ati, kum melyamnulume. Bukni, wini talak ara, tuba tonap, ‘Paulus melinamabe,’ tenepnuluma ati, na kanye deipsine.

¹¹ “Kanye deipsine,” nyapmasina ara, ‘Aning-aning patanilye ati, nyapnyeura, arepnamniak’ tenen, kum nyapsine. Aning kumde. Yata winin talak do nirya, aupnile ning ara, weik ning do, mitik ning do, aupmanil touk, talye kanye bopnirye unune. Aning ara, akunum kel kiyamse.

¹² Yata winin ning do nirya, awablye ning pia kum uplibuk, pia patanulul talak babye, awablye ning tuba weik upnilibuk, kum patapnilye talak babye, na akunum ulamse ati, akunum kel kiyamse. Ati talye kanye bobuka unune. Yata winin talak do nirya, talye kanye bobuka, una ati tenena deiyok ning ara, akunum kel kiyamse. Din ning weik aupmalibuk, weik din talak babye, din ning kum uplirye, din pia patapnilye urdemuk unye talak babye, akunum bikamse.

¹³ Yata winin ning do nirya, Kristus ap, kanye dukdongobuka unirye, el mikip arinilya deice arye, aning-aning nirya winiptinye.

¹⁴ “Winiptinye,” nyapsin bukni, na ikin upnuk talak noutamak, anggunce melilamnuluma ara, telebuka.

¹⁵ Aninguk kume. Anggun Pilipi mutuku umunye ninye ara, anggun kele. Allah el laka teleb yupu winiryuk kekebuka diba teneplum talak ara, ‘Yuk mutuku ton peterelbinun’ tenen, Makedonia mutuku batakuka, binuse talak ara, anggun Pilipi ninye ap, na ap, nun bidamnang aryuk melilalamubu. Yuk mutuku diba tenyamik ninye nirya, tonok babye, kum melilamnike. Anggun Pilipi mutuku Ninye aryuk melyamnulume.

¹⁶ Tonda, Tesalonika mutuku ulamse talak, aning-aning patalamnuk talak noutamak ara, na melina ati, anggun Pilipi mutuku ninye ton talak ton, ila tamubuka ton talak ton, na patalamnuk ning dolilamnulume.

¹⁷ Anyapmasin yupu ara, ‘Tuba-tuba arenamniak’ tenen, kum nyapsine. Aning kum bukni, na kanye deipnirye nyapmasina deiyok ara, anggunce melipnuluma anya arye, aminyan ara, ‘Allah arye dekna dolamak atonun ning arenamsile’ tenen, kel kipnulum tenena, ati nyapsine.

¹⁸ Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.

¹⁹ Tonda, narye el si erenun Allah ara, elce aning-aning nirya, mambul ning, pia teleb ning weike talibuka ulya atouk, anggun Yesus Kristus ap, kanye dukdongobuka, neika umunyopura, anggun patapsilye ning nirya pia arenamsile.

²⁰ Ninye mutuku-mutuku nirya, ‘Nun ni Allah ati, elda weik mambul tenebikirye’, ‘El si weik pia erenamak’ tenen, Allah moronune. Aning ara, ‘Dipkoprop pia wininamak’ tenen, akunuma, Amin nyapne.

Telebe nyana yupu

²¹ Yesus Kristus diba tenebuka, el ap, kanye dukdongobuka unyakce, sik Pilipi mutuku diksukum ubuka unyak ninye nirya ati, “Paulus arye telebe nyapdeipmasile,” nyapdeipnamnululume. Tonda, Yesus diba tenebuka, na ap, neika pil donyap nang, nun weit yapu atouk nang arye, anggun Pilipi ninye ati, “Telebe,” nyasinyake, nyapsine.

²² Tonda, na aunman mutuku unyakce, Yesus diba tenebuka diksukumuk unyak ninye nirya arye, anggun Pilipi mutuku ninye ati, “Telebe,” nyasinyake, nyapsine. Tonda, Roma mutuku nirya talilya, weik ninye deiyoknye, Raja Kaisar, el pil don nang ap, el asik nang ap, unyak bukni, sik kan-kan Yesus akunum diba tenebik nang arye, anggun Pilipi mutuku nang ati, “Telebe,” nyasinyake, nyapsine.

²³ Nun weik deiyoknye Yesus Kristus bico tenepsilirye, talye melisilye ning arisilibuk, anggun ap, Kristus ap, kanye dukdongobuka umunce, anggun kanye noutamak wisibuka, pia unamsil talak nirya ara, ‘Anggun kanye ap, Yesus ap, kanye dukdongobuka unamlume’ tenen, Allah morosunune. ‘Apia winibuka unamsil’ tenen, akunuma, “Amin,” nyapne. Telebe, na Paulus arye akunum nyapsine. Asukumuk deipsine.