Pilipi 2 - Eipomek

“Yesus Kristus arye, talima nimalye ubuka ulamuk touk, anggun babye, wininamlulume,” nyabuk yupu

¹ Na kayapu, Kristus ap, talima dukdongobuka neika umunye deice arye, anggun kanye talima noutamak melibuka kwa dibuka, mikip weik arisulule. Tonda, Kristus arye anggunti, bico tenebuka melisilya deice arye, anggun talima kwa disulule. Tonda, Allah El Dib Kanye anggun talima ak ulula deice arye, anggun kanye talima tonok kilisiliba, nimalye neika ansinibuka ululume. Tonda, anggun talima noutamak, bico tenelamunce, talima dukdongobuka ululume. Ululumce, nimalye teleb kibuka melilalulume.

² Diba, na kele anyapmasin ning nirya ara, dipkoprop winiluluma ati, na kanye moubuka delisunune. Ara, anggun kanye tenena ara, tonokuk bobuka, bico tenelamunce, anggun kanye talima ansinibuka, ‘Nun pil ara, aninguk wininamap’ tenen, tonok piluk tenebuka wininamlulume. Winipmunyopura, dipkoprop na weik arye, kanye weik deipnamsine.

³ Yata winin ning do nirya, ‘Nauk ereipnitinge,’ tenena ap, kwalina ap, maknye kintinilina ap, deice arye, pil kum donamlume. Aning ara, pia kum bukni, anggun adiparyuk talima namin kibuka, amu tam umunce, anggunce yuk ninye nirya ati, ‘Kume na kwit eluk ereiptinge. Nara, mitik mambul bukni, eluk ara weik mambule’ tenen, tenelanamlulume. ‘Weiknye bira na uka,’ tenena kume.

⁴ Anggun nirya, anggun babye, patan ning atibuk kum tenenamlume. Anggun nirya adiparyuk yuk ninye nirya ati, ‘Aning ara, sik babye, mambule anya arye, sik patalamlye ning ton arenamne,’ tenelanamlulume.

⁵ Yesus Kristus, el kanye talima tenelamuk touk, anyuk tenebuka wininamlulume. Elce tenelamuk ara, nyapnusine.

⁶ Yesus ara, dipkoprop Allah ulye touk ulamuk bukni, ‘Allah atouk ununa ara, kum bataknune, na’ tenen, ‘Anyuk talibuka pia unamne,’ kum tenelamuk.

⁷ Aning kum tenelamuk bukni, Allah atonun ulamuka deiyok ning batakuka, talye pil melin nang atonun ubuka, ninye nong ap, urasin atonun dayukce, tukwak mutuku kolukuk.

⁸ Ninye nong atonun dayukce, talima darapdongobuka, amutamak ulamukce, el li Allah el yupu uk kekebuka ulamuk. Winibuka daulamuka ani, el li birye tenyamuka atouk, malye nang arye obikba, dibuk. Aning ara, talye dipna kume. Malye nang arye ninye on ning pia malye ninguk wibuka, wanwanun yo deice deibuka, obikba, dibuk. Yesus arye, ‘Teleb daopnenyake,’ tenebuke.

⁹ Utenelamukce, aning nirya winibuk ati, Allah arye Yesus dobuka, aning-aning nirya deice tam akunum erepdeibuke. Erepdeibukce, weik mambul si Yesus aribukba si dobuk. Yata ning do nirya, el amutamuk ulule. Weik si dobuka, ara, ‘Aning-aning nirya taliplirye, Weik Deiyoknye unamle’ tenen, weik si aribukura, dobuk. Yata weik si do nirya, asi-asi nirya deice tam, si pia teleb ninguk wibuka dobuk.

¹⁰ Allah arye Yesus erepdeibukura, pia mambul si dobuka deiyok ara, ani. Ara, im deice unyak nang ap, tukwak mutuku nirya unyak ninye ap, tukwak amu tam ulul ning nirya ap, babye, yata kam un ning do nirya, sirya talak ara, ‘Yesus el si kekebikirye, kutam tuku dinikdongobuka si erepnamake. Narye anang nirya dobuka, Yesus el amutamuk bulubuka deipnamne,’ Allah arye tenyamuk. ‘Winipnamne’ tenen, Allah arye Yesus erebuka deibuk.

¹¹ Tonda, yata mutuku ninye do nirya, ninye mutuku-mutuku nirya, Yesus el si kekebikirye, “Yesus Kristus elda, Weik Ninye Deiyoknye Allah ulule,” nyabuka lakak nyapnamake. Anyapnamaka deice arye, nun ni Allah, el si weik erepnamake. ‘Allah ara, weik mambule,’ tenepnamake. ‘Winipnamak’ tenen, Allah arye, Yesus ereipdeibuk. Na Paulus arye, nyapsine.

“Kurya im deice tiklirye, dirina ulamle touk, anggun babye, dirina ninye unamlume,” nyabuk yupu

^12-13 Aning ati ara, na kayapu, minop talak dipdongobuka, anoutam talak nirya, na yupu kekebuka, teleb kibuka winimunya atonun, pia wininamlume. Tonda na ap, neika ulamubu talak babye, wini talak nun yuk-yuk unyap talak babye, Allah el yupu uk kekebuka, el yupu uk talibuka dobolbalulum touk, apia wininamlulume. Allah arye, ‘Apil winibuka donamak’ tenen, teleb kibuka tenyamsuk touk, ‘Aninguk pataplya ati, apiluk tenebuka donamak’ tenen, anggun kanye talima noutamak melibuka pil dosulule. Winibuka anggun talima noutamak pil dosulul anya arye, anggunce atouk, yuk-yuk tenepmunce, ‘Allah arye lyepnamnil ara, weik mambule,’ tenenamlume. Tonda, ‘Na mikip kumnye birye malye winipnun’ tenen, kanye pia moupnamlulume, na Paulus arye, nyapsine.

¹⁴ Anggun pil donamlum ap, anggun wininamluma nirya ap, noutamak, kanye lik-lik asa una ap, kanye bokoltosilibuk, malye nyana ap, walana kum aryuk telebuk pil dobuka unamlulume.

¹⁵ Winibuka wininamluma deiyok ara, nyapnusine. Ara, winipmunyopura, Allah el mapu kipsilyeba, umunce, malye winina pia kum upmunyopura, ‘Yuk nang, malye yupu anggun deice kum deipsitinge’ tenen, nyapsine. Wini talak unyak ninye ara, pia malye ning talibuka, malye ninguk tenebuka, malye-malye unyak bukni, na nyapmasin touk diksukumuk upmunyopura, yuk nang, sik malye wininyak ning ara, anggunak bol kum doupnamsile. Im deice noutamak kurya tiklirye, dirina weik ulamle atonun, anggunce Allah el kam una yupu talibuka, peterena ap, el yupu dobolbana ap, umunye ning ara, wini talak pia malye wininyak ninye kan-kan noutamak, dirina atonun unamlume.

¹⁶ Ayupu nirya nyapmasin touk, Allah el kam una deiyok yupu talibuka, dipkoprop moubuka kekemunce, telebuk utumopura, ‘Na talyeuk pil kum dolamse, nong lakak upnamle’ tenen, aminyan ara, na weik kanye deipnamsine. Ara, Kristus arye, ninye mutuku-mutuku nirya ati, yupu bokeiplirye, wenebuka opnamle talak ara, na weik kanye deipnamsine ati, nyapsine.

¹⁷ Bukni, na opnikca babye, telebe uka. Anggun nirya ati, teleb kanyeuk bobuka unamne. Anggun babye, atonun, nati teleb kanyeuk bobuka unamlulume. Ara, winipmanto yupu nyapnusine. Allah si erena ati, kam ning obuka arilamibirye, ‘Pia teleb upnul’ tenen, sirya dakana ati, aning deice teleb mek dikuka delilamap atouk ning ton nyapnusine. Ara, Allah diba teneluluma deice, el piluk dolulum ara, Allah ati arinyap ning atouk ulule. Malye nang opnicopura, Allah ati arinyap ning deice dikilongolamap mek atouk ulule. Ara, ‘Allah arin ning pia teleb upnul’ tenen, teleb mek dikuka, delilamap ning ara, na opnicopura, amek atonun uptinye.

¹⁸ Narye anggun nirya ati, teleb kanyeuk bobuka, unamne. Ara, anggunce Allah diba teneluluma deice arye, el piluk dolulume. Aning ati ara, Allah diba teneluluma ara, akunum teleb ulul bukni, ‘Pia teleb upnamle’ tenen, sirya dakana ati, na opnitinga babye, na ap, anggun ap, kanye deipdatibye.

Timotius ap, Epafroditus ap ati, nyabuk yupu

¹⁹ Nun Deiyoknye Yesus Kristus arye, “Teleb ur winiplyame,” nyapnutopura, narye, ‘Wininamne,’ tenenun ning laka nyapnusine. Ara, ‘Timotius ara, anggun Pilipi ninye, anggun mutuku minopce dopkwetepnamsine. Timotius dobuka, anggun mutuku dopkwetepnibuk, elce anggun melibuka daulamlye ani, tamubuka na dam yanamle.’ Yalirye, “Anggun Pilipi ninye wininyak ning ara, ani-ani,” nyabuka, laka nyapniliba kekepnirye, ‘Na kanye deipnamne,’ tenenune.

²⁰ Timotius arye, ‘Sik Pilipi ninye ara, sik pataplye ning ap, sik wininamak ning nirya ap ati, dipkoprop melinamne’ tenen, pataplibuk pia tenelule. Timotius arye, anggun melina ati, pia tenesilye touk, yuk nang ton kum unyake. El ulul atonun nang, na ap, kum unyabe, el tonoka. El Timotiusuk, aning atonun tenelule. Yuk nang ton kume.

²¹ Ara, urtalya ati kum nyapsine. Sik yuk nang nirya ara, Yesus Kristus el pil ati, mambul kanye bobuka, ‘Pil donamape,’ kum tenenyake. Sik yuk nang nirya arye, talye ning, sik babye, tenebice ninguk tenebuka, winyaka ati nyapsine.

²² Sik yuk nang wininyak bukni, Timotius eluk ara, anggun kele, el pil dolamuka deice arye, el ulul ning akunum lakak upsuke. Ara, tonok teleb mi arye el li ap, pil teleb ubuka pil dolamle atonun, Timotius ap, na ap, neika pil dolamnumu. Ara, Allah el laka teleb yupu, ninye lyena yupu peterelbana pil ati nyapsine.

²³ Aning ati ara, amutuku nang na winipnamniak ning akunum lakak uplibuk, kel kipnyopura, adiparyuk Timotius dobuka, anggun dam dopdeipnamsine. ‘Winipnamne’ tenen, patanululbuk pia tenenuna ati, nyapsine.

²⁴ Tonda, na ap, nun Deiyoknye Yesus ap, talima dukdongobuka unyamce, tenenune. Ara, Yesus arye winibuka tenepnutopura, na babye, anggun dam dilyanamsine.

²⁵ ‘Yanamne,’ tenenun bukni, tonda, na kwit Epafroditus ara, anggun dam tamubuka dopdeipnamsine. Anggunce, ‘Epafroditus bira, Paulus el patana ning ati melibuka winipnamle’ tenen, minopce na dam dopdeiamnulume. Epafroditus ara, na weit atonun ulirye, Yesus el laka teleb yupu, ninye lyen yupu ati, melibuka neika pil dolamnumu. Tonda, yin talin nang arye, ‘Aning opnuyabe,’ tenebice nang ati, pia darabuka olbisilalamak atonun, Epafroditus ap, na ap, nun neika, pia pi deibuka, mikip arye, Allah yupu peterebuka balamnumu. Ara, Yesus el yupu ati, “Deiyok ani,” nyabuka, pia moubuka lakak peterelamnumu.

²⁶ Epafroditus arye anggunti, ‘Se, na kayapu’ tenen, bico tenesulule. Tonda, yuk nang arye, “Nun kayapu, Epafroditus ara, uk weik dinmale,” nyabuka laka nyabikura, anggun Pilipi ninye kekeplume. Yuk nang arye, Epafroditus ati, ‘Uk dipkuk ning ara, Pilipi ninye akunum kekebik,’ nyabikura, Epafroditus kekebuk. Kekebukce, ‘Se na kayapu nang mambul kanye bopnikcak’ tenen, el babye, mambul kanye bopmale. Ati Epafroditus dobuka, anggun dam dopdeipnamasine. Aning tenenuna ara, telebuka. Na Paulus arye, nyapsine.

²⁷ Yuk nang arye, “Epafroditus uk weik dinmale,” nyabik yupu ara, talye yupu kume. Dipkoprop, uk weik dilamukbuk, dipmanto ulamuk bukni, Allah arye elti, bico tenebukce, melibuka kwetebuk. Tonda na kanye ara, Allah arye, ‘Na mi Paulus ikin akunum unmal bukni, el kwit Epafroditus diplyopura, ikin weik tonap, upnamle,’ tenepnuke. Anya arye, Allah arye Epafroditus kwetebuke. Allah arye Epafroditus el kwetebukura, nati bico tenepnuka arya.

²⁸ Epafroditus arye, ‘Na uk dipnuk ning ara, Pilipi ninye kekebika ati, se’ tenen, mambul kanye bopmale. Aning ati ara, na kanye pia teleb tenepnarye, Epafroditus anggun mutuku dopdeipnamsine. Dopdeipnyeba, anggun dam yalibuk, eipdamunyopura, anggun kanye deipnamlume. Tonda, elce melisilyebuk, anggun kanye deipmumya deice arye, narye anggunti, ‘Se, na kayapu nang teleb unyak do, kum do?’ tenelamsirye, ikin wamnuk ning ara, caknam upnamnile.

²⁹ Epafroditus yalyopura, anggun Yesus ap, dukdongobuka umunye ninye arye, anggun weik kanye deibuka, taruk aribuka, telebe nyabuka ansininamlume. Tonda atalak-atalak nirya ara, Epafroditus ap, el atouk nang ap, ati, si erenamlume. Ara, urdem ati kume.

³⁰ Anggunce nati kum melipmanto ulamnuluma anya arye, el dopdeipnumunba, ‘Kristus el piluk dopnun’ tenen, Epafroditus arye na melyamnuka deice arye, dipmanto ubuk. Kristus el pil dona ati, dipmanto ubuka anya arye, wini talak ara, elda anggun dam yalyopura, elti, weik kanye deibuka, kinamlulume. Na Paulus arye, nyapsine.