Pilipi 1 - Eipomek

Paulus, ‘Telebe’ nyana ati, nyabuk yupu

¹ Nun kayapu telebe. Nun bitinye Paulus ap, Timotius ap, asurat sekeipsiname. Nun bitinye ara, Yesus Kristus nun talima talisilya deice, el amu tam unyamce, el yupu uk kekebuka, el piluk donyame. Asurat ara, anggun Pilipi mutuku umunce, Yesus Kristus ati diba teneplumce, eluk talibuka, diksukumuk umunye ninye ap, Allah yupu peterena nang sik melina deiyok nang ap, Allah yupu aik pil melina don nang ap, anggun nirya ati, ayupu sekeipsiname.

² Nun Ni Kopropa Allah ap, nun Deiyoknye Yesus Kristus ap, sik bitinye arye, anggun Pilipi mutuku dib tenelamlum ninye ati, bico tenesururakce, anggun kanye aryuk melisirice ning ap, ‘Yu ulana kumce, kanye deibuka telebuk neika unamak’ tenen, arisilye ning deiyok ning ap, arisulule. ‘Aning nirya ara, tuba-tuba weik arye tabakuka arenamsirak’ tenen, anggun Pilipi mutuku ululum ninye ati, Allah morosunune.

Paulus arye Pilipi ninye dib tenena ati, “Na ni Allah telebe,” nyabuka morobuk yupu

³ Na Paulus arye anggun nirya ati, tenesinye talak nirya ara, na anggunti, “Na ni Allah telebe,” nyabuka morosunune.

⁴ Narye anggun nirya ati, Allah morosunun talak nirya ara, weik kanye deibuka, anggunti Allah morosunune.

⁵ Ara, urdem ati kume. Deiyok ara, dib teneplum talak dipdongobuka, anoutam talak deiyok koubuka wini talak ap, Allah el laka teleb yupu, ninye lyen yupu peterepnin banun ning ati ara, pia teleb kubuka melilamnulume. Ati, anggunti tenepsinirye, weik kanye deibuka, Allah morosunune.

⁶ Tonda dipkoprop na kele, anggun talima noutamak, teleb pil deiyok koubsuknye bira, Allah el uka. Allah arye pia apiluk dopnin balamsilirye, melilamsilya ani, aminyan talak sirya daknamsile. Ara, Yesus Kristus arye ninye yupu bokolina ati, yanamle talak ara, Allah arye anggun talima noutamak teleb pil dosilye ning ara, sirya daknamsile ati nyapsine. Aning nirya ara, na dipkoprop weik kel anya, weik kanye deibuka, anggunti Allah morosunune.

⁷ Narye anggunti bico tenesununa ati, arup asurat deice nyapmasin yupu ara, telebe uka. Ara, na kele, tapu koubuka wenena aik dongopnikbuk, aunye talak, Allah el laka teleb yupu, ninye lyen yupu ati peterenye talak babye, Allah arye melinulule. Atouk, malye nang lik tenebuka, Allah yupu ati, “Ayupu ara, talye yupu uka,” nyaninyak bukni, narye, “Kume, deiyok ara ani,” nyabuka, lipsisikuka peterenun talak babye, Allah pia bico tenenululce melinulule. Allah arye, nati wininulul touk, anggun babye atouk, anggun ati pia bico tenebuka, melisulula anya arye, na weik arye kanye delisunune. Allah arye, anggunti melisulule, akunum kel kiyamsise. Ati, ‘Allah arye, anggun talima ak pil dosilye ning ara, teleb ubuka sirya daknamsile,’ tenesunun ara, telebe uka.

⁸ Na talye kum nyapsine. Allah el kele. Yesus Kristus, nun nirya ati, ‘Na mapu’ tenen, pia bicoe tenesilye touk, na babye, anggun Pilipi mutuku ninye nirya ati, pia bico tenesunune. Tonda, ‘Pilipi mutuku ninye ara, na ap, neika utibye’ tenen, patanulule.

⁹ Utenebuka, Allah morosunun ning ara, nyapnusine. Ara, ‘Anggun weik kel kina deice, nong bol deice ninguk kum bukni, anggun talima noutamak ulul ning nirya, pia moubuka tenelamunce, anggun bico tenebuka melilanamlum ning ara, weik upnin banamle’ tenen, Allah morosunune.

¹⁰ ‘Wininamlum’ tenen, Allah morosununa ara, deiyok ara, ani. Ara, dipkoprop teleb winin ning, ‘Pia teleb ning ani’ tenen, moubuka tenepmunce, teleb ninguk wipnamlulume. Winipmunyeura, ‘Malye winina kum arye, diksukumuk wininamlum’ tenen, Allah morosunune. Winibuka pia daulamunyebuk, yuk ninye nirya anggunti, ‘Sik malye wininyak ning ara, ani’ tenen, kum nyapmanto unamake. Winilamunya ani, anoutam talak nirya ap, Kristus arye, tukwak ninye nirya yupu bokolina ati, sirya yanamle talak ap, ‘Atouk telebuk wininamlum’ tenen, Allah morosunune.

¹¹ Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.

“Na pil dobuka wininun ning nirya ara, Yesus Kristus el si erena ati wininune,” nyabuk yupu

¹² Ara, na weit yapu atonun ululum ninye ara, ‘Ayupu kele kipnululuma’ tenen, nyapsine. Ara, sik yuk nang arye tapu koubuka, wenena aik dongopnikba, asukumuk unune. Unun bukni, wenena aik unya babye, Allah el laka teleb yupu, ninye lyena yupu tuba laka nyanibuk, adeice ninye weik tonap, ayupu kekebuka, diba tenebikirye, diba tenen nang weik upnin banyake.

¹³ Ninye weik tonap, ayupu kekelamnik ning ara, Roma mutuku sisinanye, ninye deiyoknye Kaisar, el weik aik kalikna ati yin talin nang ap, el aik pil don nang ap, yuk ninye nirya ap, akunum lakak kel kiyamnike. Akunum lakak kele kipnik ning ara, yuk nang, wenena aik dongopnik ara, talye ati kume. Ara, ‘Paulus arye, Kristus ati diba tenebukce, Yesus el ninye lyena yupu peterelula ati, tapu koubuka, wenena aik bita dongobike’ tenen, akunum kel kiyamnike.

¹⁴ Amutuku talina deiyok nang, wenena aik dongopnikba, yuk nang laka nyalamikopura, amutuku-amutuku unyakce, nun deiyoknye Yesus ati, diba tenelamikura, du weit atonun unyap nang ara, akunum kekebika deice, sik talima kwa dibuk. Talima kwa dibuka, minop talak ara, Allah el yupu mitik mikip arye, peterelamik bukni, wini talak ara, wenena aik dongopnikba, aning akunum kekebika anya arye, amutuku diba tenena nang arye, pia pi dobuka, ilil kum aryuk, Allah el yupu pia mikip weika arye peterenyake.

¹⁵ Ara, ton nang ara, Kristus el yupu peterenyak bukni, nati talima wilipnikce, ‘El yupu kekenyak ninye ara, Paulus el batakuka, nun tam kepropsitinge’ tenen, tenepce arye, Yesus el yupu peterenyake. Yuk nang ara, aning atouk kum bukni, tenepce arye tenena kum, ‘Telebuk neika unamap’ tenen, talye luba kibuka, Yesus Kristus el yupu teleb ubuka peterenyake.

¹⁶ Sikce nati, kanye delininyak ninye ara, Kristus el yupu dobuka, lak akarye peterenyake. Aninye ara, sik kele. Ara, malye nang arye, Paulus dobuka, wenena aik dongobik ning ara, talye ati kume. Ara, ‘Allah arye, Paulus ati tenyamuk touk, Allah el laka teleb yupu, ninye lyena yupu peterena ap, Allah yupu yanina ninye ati, “Deiyok ani,” nyabuk, yupu sekna ap, ning ati ara, Paulus dobuka, wenena aik dongobik’ tenen, akunum kel kiyamik. Kel kibika ati, bico tenena deice arye, ‘Ninye nirya arye, Kristus ati kel kipnamak’ tenen, el yupu peterenyake.

¹⁷ Wininyak bukni, sikce nati talima wilipnikce, ‘Paulus bira, nun like,’ teneninyak ninyeuk ara, ‘Ninye nirya nun tamuk kipsikirye, nun tibuk weik nang tenenamsiyak’ tenen, Kristus el yupu peterenyake. Anang ara, talye luba kibuka peterena kum, sikce, ‘Paulus bira kawat rantai tapu arye, tapu koupdabikce, wenena aik dongamikura, anyaik tuba ulul talak ara, nunce Kristus yupu peterebibyebuk, amutuku talina deiyok nang arye, Paulus el nong deice, ikin ning weik tonap, deipnamak’ tenen, tenepce arye peterenyake.

¹⁸ Wininyak bukni, na kanye ara, ‘Dauplye, aning ara, mambule,’ kum tenenune. Na kanye ara, weik mambul ning ara, Kristus el yupu peterenyaka uka. Ara, teleb kanye bobuka peterebikce ning babye, talima wilipnarye, tenepce arye peterebikce ning babye, yatato wiribuka wininyak do nirya, Kristus el yupu peterenyake. Weik mambul ning ara, anyuka. Ati, anang-anang nirya arye, Kristus ati peterenyaka anya arye, na weik arye kanye deipne. Diba, wini talak kanye deipman touk, weik arye kanye deibuka tuba unamne.

¹⁹ Ara, talye ati kume. Anggunce nati, Allah moronululum ning ap, Yesus Kristus el Kanye arye, melinulul ning ap, deice arye, aikin ning upnilye ning nirya ara, na kanye talima wisinilya deice arye, teleb ulinamnila ati, na kanye deipne nyapsine.

²⁰ ‘Winiptinye’ tenen, na pia patanululbuk, ‘Dipkoprop wininamne’ tenen, kanye deibuka, tuba tenenun ning ara, nyapnusine. Ara, na nyapnamne yupu ap, na wininamne ning nirya ap, deice arye, ‘Malye winipnikca deice arye alye kum dakdanamne’ tenen, pia patanulule. Alye una kum bukni, minop talak na winilamse ning nirya deice arye, Kristus el si ereiyamsa atonun, wini talak babye, ilil kum, balye tam kipnirye, ‘Na wininamne ning nirya deice arye, Kristus el si erenamne,’ pia tenenune. Ara, na kam unarye do, dipnarye do, adeice arye Kristus elce, el si ereipnamle. ‘Na kam una babye, dipna babye, telebe uka,’ tenenune.

²¹ Ara, urdem ati kum nyapsine. Kume, na kanye ara, na kam unye talak nirya ara, Kristus el mikip arilnilce, el melinilya deice arye, na wininye ning deice arye, Kristus el si erenamne. Aning atouk, na dipnyopura, Kristus ap, na ap, ansinibuka neika unamnama anya arye, aning ara, telebe uka. Ara, nati tabakalona ati, ‘Aning nirya ara, telebuka,’ tenenune.

²² Bukni, dipna kum, na nong kam ubuka tukwak mutuku noutam tuba ulamnyopura, teleb pil dopnyeura, duk weik teleb ubuka moupnamle. Bukni, kam una do, dipna do, dan tam ning wiptinye do? Na kanye ara, dipna babye, kam una babye, telebe uka anya arye, na ikin upnila ati, tonok ninguk kum wibuka nyaptinye.

²³ Na kam una babye, dipna babye, ara telebe anya arye, na kanye teniltonauk unune. Pia weik teleb ning ara, ‘Na diptinyeura, tukwak mutuku batakuka, Kristus ap, ansinibuka, nun neika unamtinimnye’ tenen, patanulule.

²⁴ Bukni, narye sikti, ‘Petereptinya deice arye, aninye tuba meliptinye’ tenen, dipkoprop patanmanil ati, tenenuna ning ati ara, ‘Na Paulus tuba kam utinyeba, anang ap, neika utibyeura, narye melipsitinye. Anggunti ara, aning ara, pia teleb,’ tenenune.

²⁵ Aning ara, akunum diba tenepse anya arye, anggun Pilipi mutuku ninye melina ning ati ara, ‘Na kam unun talakuk, melipsitinye,’ akunum tenepsa ati, na ap, neika unamabe. Ati, dipkoprop teleb ning ara, anyuka. Wininamna deiyok ara, ‘Anggun diba teneplum ning nirya ara, anggun talima noutamak wisibuka, teleb upnin bakirye, weik kanye deibuka unamlume’ tenen, melisinirye na ap, neika tuba unamabe.

²⁶ Tonda, wenena aik pum tam arye, lopdeipnikiba, narye tamubuka, anggun Pilipi ninye dam yaniba, anggun ap, Yesus Kristus ap, talima dukdongobuka, neika ubibya deice arye, weik arye kanye deibuka unamlulume. Ati ara, na ap, neika tuba unamabe, tenepne.

²⁷ Bukni, atalak-atalak nirya ara, anyapmasin atouk do, yuk winipnamsil ning do, yatato winipnamsil do nirya, weik mambul tenenamlum ning ara, nyapnusine. Ara, ‘Kristus el laka teleb yupu, ninye lyena yupu nyasilye touk, pia moubuka kekebibirye, ayupu uk teleb-teleb ubuka, diksukumuk unamabe,’ tenenamlume. Winipmunyopura, na dilyasitinye talak babye, dilyangana kum arye, kekenauk upsitinye talak babye, na biknamsine. Ara, ‘Sik Pilipi mutuku ninye ara, sik kanye talima ap, kanye ap, ansinibuka kanye lamabuka unamak’ tenen, kel biknamsine. Tonda, anggun nong ara, yuk-yuk ululum bukni, tonok kanyeuk bobuka, tonoknye ato kibuka, Yesus el laka teleb yupu pil dona ati, pia pi dobuka, neika pil donamlume.

²⁸ Winibuka unamlum talak nirya ara, yuk nang arye, ‘Aning ara, nun like’ tenen, yaninamsiake. Wininamsiak bukni, aninye ati, ilil pia kum unamlulume. Ilil pia kum umunye deice arye, anggun yanisikce nang ati, laka kinamlulume. Diba tenena kum nang arye, kel kipnamak ning ara, ani. Ara, diba tenenyak ninye ara, Allah arye, lyebuka dopropnamle bukni, sik diba tenena kum ninyeuk ara, kume. ‘Se, Allah arye wenebuka oplopnamsile’ tenen, kel kipnamake. Ara, sik malye nang kel kipnamak ning ati nyapsine.

²⁹ Allah anggunti, ‘Diba teneptinge’ tenen, bico tenelamsukce, lo talye arepsukbuk, diba tenelulume. Aning ati ara, anggun nirya, tonok kanye bobuka, Yesus Kristus el yupu ati, pi dobuka pil donamlume. Tonda, lo arepsukbuk, diba teneluluma atouk, Allah arye, ‘Na mapu ara, Kristus diba tenebikca deice, aryuk malye nang arye sik nong deice ikin ning weik delinamake,’ tenyamsuk touk, wininamsiake. Aning ati ara, ‘Yesus el laka teleb yupu pil dona ati, pia pi dobuka, neika pil donamape,’ pia tenenamlume. Aning nirya ara, Yesus pil dopsuka deice arye, tenesulule.

³⁰ Minop talak, na ap, neika ulamubu talak ara, malye nang arye, na nong deice ikin ning deiamneikba, ikin ulamse, anggun elilamnulume. Tonda, wini talak babye, “Malye winin nang arye, Paulus tuba yanibikiba ikin ulule,” nyakibuk kekelulume. Aning kekemunya atouk, anggun babye atonun, diba tenena kum nang, anggun Pilipi mutuku ninye ati, anggun nong deice ikin ning delisinyake. Wininyaka anya arye, na kele, Allah arye, ‘Na mapu ati, wininamake’ tenen, akunum tenyamsuke. Na Paulus arye nyapsine.