Pilemon 1 - Eipomek

Paulus arye, Pilemon ati, “Telebe,” nyabuka deiyok kouamuk, deiya kiyamuk yupu

¹ Telebe, na ka, Pilemon, na Paulus arye asurat sekuka dopkwetepkine. Narye, Yesus Kristus, el teleb yupu peterelamsa ati, tapu koubuka, wenena aik dongopnikba, aunune. Na ap, nun weit atonunye Timotius ap arye, asurat sekeipkiname. Anda, nun ka kopropa ati, nun pil neika pil donyapnye uluma ati, kanye deibuka kanye deipkunume.

² Asurat ara, an ap, Yesus ati diba tenebuka anya arye, nun weit kil atonun kil Appia ap, tonda Arkipus ap ati, asurat sekname. Arkipus ara, yin talin nang pia piribuka, pil dolamak atonun, elce Yesus el yupu peterelbana ati, nun ap neika pil dolule. Tonda Allah diba tenyamikce, an aik bulubuka Allah yupu kekelyanganyak ninye ap, anggun nirya ati, asurat sekeipsiname.

³ Ura, na mi Pilemono, nun ni Allah ap, nun Deiyoknye Yesus Kristus ap, sik bitinye arye, an Pilemon ap, an aik bulubuka Allah ati, si erenyak nang ap ati, bico tenesururakce, sik kanye aryuk, talya melisirice ning ap, ura, nun patasilye ning urdem aryuk arisururak ning ap, tonda 'Yuk nang ap, yu ubuka walana kumce, kanye deibuka, telebuk neika unamak' tenen, sik bitinye arye arisururak deiyok ning ap, arisururake. 'Aning nirya ara, tuba-tuba weika arye tabakuka, arinamsirak' tenen, anggun nirya ati, Allah moronune. Na Paulus arye nyapsine.

Paulus arye, ‘Telebe,’ nyana ap, Allah morona ap, ati nyabuk yupu

⁴ Nirya talak nirya, narye Allah moronye talak nirya ara, ‘Allah arye melinamkil’ tenen, an Pilemon ati, Allah morokunune. Atalak nirya ara, anti teneipkinirye, an si sisibuka Allah ati, “Telebe,” nyanune.

⁵ Wininuna deiyok ara, yuk nang arye an ati, laka nyapnikceura, akunum kekebuka kel bikikinune. Allah arye wiamuk ninye, el mapu nirya ati, ance talima arena ap, nun Deiyoknye Yesus ati, weik arye diba teneluluma ap ati, “Telebe,” nyabuka, Allah moronune.

⁶ Pilemon Allah ati diba tenyamlum ning, ‘Yuk nang ati pia peterenalam’ tenen, Allah morokunune. Aning deiyok ara, ‘Winipminyopura, Yesus Kristus ap, kanye dukdongobuka, neika unyab buk, aning-aning nirya, teleb ning arisilye ning nirya ara, pia moubuka kel kinamlam’ tenen, Allah morokunune.

⁷ Na weit kopropa atonunye Pilemon, ance na talima pia kwa daknulumce, kanye deibuka, pia pin-pin kilinilyame. Ara, talye ati kume. Deiyok ara, ance Allah el mapu ati, sik kanye kwa dilamlum ning ap, sik ikin ulamik ning ati, melilamlum ning ap, adeice arye, anang ati bico tenebuka, kanye deiyamlume. Winiminya deice arye, pin-pin kilinilyama anya arye, na kanye deipkine.

Paulus arye, Onesimus ati, morobuk yupu

⁸ Aning ati ara, an ap, na ap, Kristus ap, kanye talima dukdongobuka noutamak ubirye, manya deibuka, “An adiparyuk, teleb winin ning ara ani,” nyabuka, “An adiparyuk winiplyame,” nyabuka, mikip asa arye dukeibuka, balye tam arye nyapkitinye bukni, aning kum nyapnukine.

⁹ Aning kum bukni, anda Allah el mapu nirya pia talima aribuka, teleb ning winiminya ak, kel kipkisa ati, bico tenekununa deice, nimalye arye moropkine. Nara, akunum wisi dase. Tonda, Yesus Kristus el yupu, ninye lyen yupu peterenuna ati, tapu koubuka wenena aik dongopnikba, tuba anyaikuk unune.

¹⁰ Wininuna anya arye, na mi atonunye Onesimus ati, moropkine. Tapu koubuka deiamneiba, wenena aik ulamse talak noutamak arye, peterelamsibuk, Onesimus kekebukce, diba tenebuka anya arye, na mi atonun ulule.

¹¹ Minop talak ara, elce anti, dipkoprop pil neika teleb ubuka kum dolamkukbuk, yukubuka kum duk dopdomlum bukni, wini talak ara, ‘Elce na ap, an ap, nun bitinye ati, pil teleb ubuka dosilula deice arye, duk atonun ning akunum donimyeura, pil melibuka dosulule.

¹² Onesimus ati, weik arye bico tenenunce, na pia talimanye unelul bukni, tamubuka an dam dopkwetepkine.

¹³ Allah el pia teleb yupu, ninye lyen yupu peterelamsibuk, yu nang arye kekebikce, wenena aik dongopnikba, tuba unun talak ara, ance kum yanuka melipnutum anya arye, an pununa ati, ‘Onesimus birye melipnutuba, pia taliptinye’ tenen, patapnukura, tenepse.

¹⁴ Aning patapnukura, tenepse bukni, ance nati, “Telebe,” min kum nyapneminopura, talye kanye bobuka, luba kibuka, anye Onesimusda kum dopropnune. Narye anti, utenepkisi. ‘Ara, yata teleb un ning do, elce nati teleb melina ning do, na nyana deice kum bukni, el bidamnye tenena deice aryuk melipnutue,’ tenepkise. Na mikip aryuk kum nyapkitinye. An kanye aryuk melipnutum toura, aninguk telebe tenepnamne.

¹⁵ Na walwal bukni, minop talak, Onesimus arye an batakuka, tia talak ati binamuka deiyok ara, ‘Aminyan talak tamubuka yalirye, pia neika unamruma ati ubuk do, kum do?’ tenenune. Min kum arye an batakuka, bindobuk bukni, wini talak ara, anggun bitinye neika pia unamruma anya arye, ‘Aning ara, telebe uka,’ tenenune.

¹⁶ Anggun bitinye, neika unamruma ara, minop talak yo bok deice arye, Onesimus dekuka talipmunba, an piluk talye dolamuk touk, wini talak aning atouk kum unamle. Aning ara, mitik teleb bukni, pia teleb ning ara, wini talak an weit koprop atouk, an talimanye akunum kipkile. Onesimus birye, na pia talima aribuka, bico tenenun bukni, ara mitik uka. Wini talak an arye elti, weik arye kanye deibuka, bico tenenamlame. Elda talye tukwaknye bukni, tonda elce nun Deiyoknye Yesus ati, akunum diba tenebukura, Yesus talima dukdongopsukba, neika unyaba anya arye, an weit koprop atonun, an kanye deilinanye ulule. An talimanye unamkile.

¹⁷ Aning ati ara, na ka koproba Pilemono, ance nati, ‘Anye bira, nun neika pil donyame,’ tenepnulumopura, ance nati, “Telebe,” nyabuka melyamnulum touk, Onesimus an dam yalyopura, el babye yukupropmince, elti melinamlyame.

¹⁸ Onesimus arye anti, malye kibkuk do, an bona ning ap, an yo bok ap, upula doprobuk bukni, tamubuka kum arepkuke ning, tuba aublyopura, na deiceuk deipnamnelyame. Narye, aning nirya arepkince, punupnamkine. Aning nirya anti, tamubuka arepnamkine.

¹⁹ Diba, na Paulus arye, na taruk deice aryuk asurat sekeipkiniba, dinamlyama anya arye, diba tenepnulame. Aning nirya ara, narye punubuka arepnamkine. Narye peterepkisiba, diba tenepluma anya arye, “An nong ababye arepnutume,” nyapkitinye bukni, aning kum nyapnukine.

²⁰ Aning kum nyapkin bukni, an ap, Allah dukdongobuka, neika ubirye, ‘Na weit atonun ulyama anya arye, adeice arye melipnutue’ tenen, moropkine. Tonda, ‘Na ikin unilye ning ati, makupnutum deice arye, na talima kwa dipnutue melipnutum’ tenen, moropkine.

²¹ Na kele, na moropmakin yupu ara, an dipkoprop kekebuka unamlame. Aning ati ara, na kele, asurat deice laka moropmakin ning kum bukni, ton tabakuka, teleb un ning tonap, melibuka wininamnurume.

²² Pia patanilye ning ara, ance nati, Allah moromemnye touk, ‘Allah melinilya deice arye wenen aik pum bisik arye lopdeipnitingba, anyaik batakuka, an dam tamubuka yatinye’ tenen, pia tuba tenenune. Ati, ‘El yanamle do?’ tenen, an ninye asik nang man aik kintinipnamnilyame.

²³ Epafras, el babye Yesus Kristus pil dolamukba, tapu koubuka wenena aik dongobikura, na ap, aunume. Elce anti, “Telebe,” nyapkile.

²⁴ Aning atonun, na neika pil donyap nang, Markus ap, Aristarkus ap, Demas ap, Lukas ap, arye, “Telebe,” nyapreipmakiake.

²⁵ Telebe, ‘Nun Deiyoknye Yesus Kristus arye, bico tenepsilirye, el kanye aryuk melisilye ning, weik arye arilnamkil’ tenen, Allah morosunune. Na Paulus arye nyapkine. Telebe, asukumuk deipne.