Obaja 1 - Eipomek

Allah Yahweh arye, nabi Obaja dam yayukce, Edom mutuku deice ikin ning aminyan talak deipnamuk ning ati, nyabuk yupu

¹ Ayupu ara, Allah Yahweh arye, na nabi Obaja dam lengdar deice arye yanuka, laka nyapnukak, kepkepse. Allah arye nyapnuk. Nara Allah Yahweh, aning-aning nirya talibuka, deice tam erebuka, mikip weik ununye birye, Edom mutuku unyak nang ati, aminyan winipnamle ning ati, yupu laka nyapnukine. Aminyan talak, anggun dam ara, ikin ning weik deipnamsin ning ati, na Allah Yahweh arye, akunum yupu nyapdeipkin ning ara, ani. Tonoknye ton, wibuka dopdeipseba, anggun ululum mutuku dana-dana tam nirya akunum biyukce, anye birye nyabuk yupu ara, ani. Ara, “Anggun mutuku yuk-yuk ululum nang nirya ara, moubuka kekepmunce, kintinipnululume. Nun nirya ansinibibyeura, sik Edom mutuku noutam unyak nang nirya ati, olbinamabe,” nyabuk.

² Tonda Allah Yahweh arye, anggun Edom mutuku nang ati nyapsuke. Na Allah Yahweh arye, anggun Edom tam nang ati, mitang kipdeipnamsine. Yuk tam nang nirya ara, mikip arepniba, anggunti malye kibuka opnamsiake. Tonda, malye kipdeipsinyeura, yuk mutuku-mutuku nang nirya arye, anggun Edom nang ati eipsikirye, yap-yap abuka, nalipsikirye akutunamsiake. Sik nirya arye, anggun Edom tam nang ati, ‘Anang ara, nun pia like,’ nyanamsiake.

³ Anggun Edom tam nang ara, ‘Nunda pia teleb nang unyabeʼ tenen, tilila yupu nyalamluma deice arye, akunum kanye erebuka, maknya kintinililalulume. Ara, anggun weik asik, weik keil mutuku kon deice dobuka deiplumce, mikip kipdeiplume. Winibuka deiamluma ati ara, anggunce, ‘Yo, nunda, yata mutuku nang arye, nunti opsikirye, nun mutuku kon deice unyabak arye dobuka, utam lu mutuku tuku deice deipsiting do? Kume aning ara, kum winipmanto,’ tenemunce, pia maknya kintinibuka, kwalilulume.

⁴ Dipkoprop, bip maka, weik cang yo dup, aik dombukaplirye, im noutam lakuka balamle atonun, anggun Edom mutuku nang ara, yuk nang arye, talye yanuka kum wekmanto mutuku ululume. Tonda, im alip tam kurya tiklamle atonun, yuk mutuku nang arye, talye yanuka kum yanmantoakuk ululume. Aning winilulum bukni, dipkoprob aminyan talak ara, na Allah Yahweh arye, anggun Edom tam ululum nang dobuka, outam tukwak dopkwetepnamsine.

⁵ Ubula don nang do, ninye on nang, yu nang do, lukunyan noutam sik aik yakirye, anggun deiamunya ning ara, ‘Aning doropnuyabe,’ tenepmakce ninguk dorobikirye, ton yuk uamlye ning ara, sik patana kum ati batakasinyake. Aning atonun, anggun anggur tapu duk, wa wibuka koualum ning ara, anggur duk dakna pil don nang arye, anggur duk daksiceura, mitik tonun ton, kum bataknamsiake. Aning ara, winisinyak bukni, anggun Edom tam nang ona ati, aminyan talak yanamak nang yakceura, anggun tam nang nirya ara, adiparyuk obuka sirya daknamsiake. Tonoknye babye ton, kum bataknamsiyake.

⁶ Se, moubuka tenipdelulume! Anggun apu koproba Esau birye deipsukba, dadeipdanin yangalulum nang, anggunda Edom yala nang ululume. Anggun opnamsiaka ati, yanamak yu nang arye, anggunce, ‘Naʼ tenen, deiamunye bona nirya ara, ‘Dan do?’ tenen, epmunyak arye, eipmunyeura, aning-aning nirya, alubuka doprobikirye, sirya daknamake. Diba, anggun Edom tam nang, anggun ona ati yanamak nang arye, anggun bona yala-yala nirya, duknubuka, ‘Naʼ tenen, deiamunye ning babye, adiparyuk alubuka dopropnamsiake.

⁷ Yuk-yuk mutuku nang arye, anggun Edom mutuku noutam umunye nang ati, ‘Kume, nunda yanuka melipnamsiabe. Neika binuka, anggun mal olan nang ati, ‘Nun ap neika olalbinamabe,’ nyabuka, nyalin yupu deice nyapsik nang ara, talye yupu uk nyaltakasinyake. Sik amutuku-amutuku nang nirya arye, anggun Edom mutuku ululum nang nirya, yakdonoknamsiake. Anggunda, anggun mutuku bukni, pia sirya, wililonakuk dopkwetepnamsiake. Winipsikceba, yuk nang arye oplopnamsiake. Se, anggun Edom mutuku ululum nang, anggun kayapu nang koproba arye, yuk mutuku nang ansibikirye, opnamsiake. Ara, talye nang ati kume. Anggun Edom nang ap, anggun kayapu nang ap, neika bukuka, din neika dilulum nang arye, wena wepmakcak, anggun youpnamsile. Winipsilyeura, anggun aning-aning nirya arye, anggun Edom mutuku nang ati, “Se, dipdenamlume. Edom mutuku nang arye, ‘Nunda weik kel nang unyabe,’ tenyamik bukni, wini talak ara, “Sikda dipkoprob walwal nanguk unyake,” nyabuka nalinamsiyake.

⁸ Allah Yahweh arye, ayupu ton nyapsile. “Atalak ara, sik Edom mutuku nang ati, na Allah arye wenepnamne. Amutuku noutam weik kel nang nirya ara, kum kipdeipnamne. Diba, sik Edom noutam, amutuku-amutuku deice unyak nang, weik arye kel kibuka, pil don ning nirya ara, kum kipdeipyeba, aulamikak dila babye, ton kum saknamle. Aninye nirya ara, sirya daknamnarya!

⁹ Se, anggunda bicoe! Edom mutuku noutam, weik asik domlum ning, Teman mutuku babye, amutuku noutam ninye on nang, sik yin talin nang nirya babye, ilil pia weik uplyeura, kum winipmanto upnamaka ati, narye anang nirya, obuka sirya daknamne. Ati ara, anggun apu koproba Esau birye, deiamukba, dadeipdanin yangalamik nang, Edom mutuku unyak yin talin nang nirya ap, talye daunyak nang nirya ap ara, mal olakirye obikiba, sik nirya dipnamake. Na Allah arye nyapsine.

Allah arye, “Edom mutuku nang, anggunce malye-malye winilamlum ning ati, wenepnamsine,” nyabuk yupu

¹⁰ Na Allah arye, anggun Edom nang ati, yupu tonap nyapsine. Anggun apu koproba, Esau birye deiamukba, dadeipdanin yangalamika ani, wini talak ululum nang, anggun apu koproba, Esau el weit koproba, el si Yakub bira, elce deiamukba, dadeipdanin yangalamik nang ati, anggun Edom mutuku nang, anggun kayapu nang koproba bukni, anggunce anggun kayapu Yakub, el yala nang arye deiamik nang ati, pia malya kibuka, ikin ninguk, sik nong deice delilulume. Tonda, Yakub el yala nang weika arye olamlume. Ati ara, yuk mutuku yu nang yakirye, anggun Edom tam ululum nang ati, mal pibuka yap-yap apnamsiake. Winipsikceura, anggun Edom tam nang ara, imun kanye bobuka, alye weik dakdanamlume. Tonda sirya ara, na Allah arye, anggun Edom mutuku nang ara, pia kum kipdeipnamsine.

¹¹ Minop talak ara, weik asik, Yerusalem mutuku wekelban bisik bublan dam ara, yuk karin mutuku yu nang arye dakuka uluplobikce, abisik wekuka, Yerusalem mutuku ulamik nang obik talak ara, anggun Edom mutuku nang ara, karenak aryuk tikuka, asing aryuk dililamlume. Tonda, Yerusalem mutuku nang, sik dekna weik bona, ‘Naʼ tenen, deiamik ning nirya ara, sik yu nang arye alubuka dorobikce, abona bokona ati pil donmek talak ara, anggun Edom nang ara, asing aryuk eibuka batakalulume. Ati, na Allah arye anggunti tenepsisa ara, ‘Anggun babye, ayu nang pia malye nang atonunuk ululume tenepsise. Ara, anggun Edom tam ululum nang, anggunce anggun apu koproba, Yakub birye deiamuk nang ati, kum meliamlume.

¹² Anggun kayapu nang, sik Yehuda tam ulamik nang, ikin ning sik deice yayukba, dorobik talak ara, anggun Edom tam ululum nang arye, ‘Nun kanye ara, pia deibabe. Ikin doprobik ning ara, pia kum tenenamabe,’ tenyamlumce, anggunce nalibuka akutulamlume. Tonda, anggun kayapu nang, Yehuda nang, ikin ning dorobik talak ara, anggunce, ‘Merekuka ikin ning dopropmakeʼ tenen, kanye ara, pia kum deipnamtum bukni, anggunce kanye deiamlume. Tonda, anggun kayapu nang, sik Yehuda yala nang, ikin ning dobukabikce, kanye imun ubukaura, sik Edom mutuku nang arye, ‘Nun dam ara, ikin ning ton kum usilyeba, dolonyabe. Sikuk ikin ning nirya ara, yalyeba dolonyakʼ tenen, kanye erebuka, maknya kum kwalilamtum bukni, aning wilinlamlume.

¹³ Tonda, anggun Edom tam ululum nang ara, na mapu koproba Israel nang, sik dam kanye imun ning yayukba, doprobik talak ara, anggun aik bublan bisik, kum weknamtum bukni, anggunce talye luba kibuka weklume. Tonda, na mapu koproba, kanye imun ning dorobikce, sik malye kanye bobuka unmik talak ara, anggun Edom tam nang ara, anggun kanye deibuka umunce, weik yupu kum nyapnamtum bukni, kanye deibuka, ‘Merekuka opmake, sik ning nirya kum kipdeipmaka ara ani,’ nyabuka, kanye deiplume. Tonda, Israel tam nang, kanye imun ubuk talak ara, anggun Edom nang arye, Yehuda tam nang, sik bona ton, pia kum dopropmatum bukni, aning ara weika arye, alubuka dolamlume.

¹⁴ Aning kum bukni, Yehuda tam nang, sik mal olan nang arye yanuka, warekmekba, bai sakuka, ‘Yuk mutuku bikbik abuka binuyabʼ tenen, banmek nang ati, anggun Edom mutuku nang arye, batakna kumce, bisikak tikuka, anang ati weika arye oplume. Tonda, anggun Edom mutuku nang arye, Yehuda tam nang, sik kanye imun upmoka ati, kam ulamik nang ara, duknupmek bukni, sik mal olan nang ati, anang tomobuka, kum arepmatum bukni, anggunce Yehuda tam nang ati melina kumce, sik kam tuba ulamik nang ara tomobuka, sik mal olan nang ati areamlume.

Allah arye, tukwak nang mutuku-mutuku nirya ati, yupu bokeiplirye, wenepnamle ati, nyabuk yupu

¹⁵ “Aning-aning nirya ara, kum winipmatume,” nyapmasina ara, talye ati kum nyapsine. Diba, na Allah Yahweh arye, pia dipkoprob yupu nyapsine. Tukwak unyak nang mutuku-mutuku nirya, yupu bokeipnirye, wenepnamne sum ara, akunum dam upmale. Ati, anggun Edom mutuku nang arye, yuk mutuku nang ati, malye weik winilamlum ning ara, anggun awinyamluma atonun, deken ning babye wenebuka arepsiniba, weik ikin ning dopropnamlume. Ara, anggunce malye ulamlum ning ara, anggun nong deice deipnamsine. Weik arye wenebuka, opnamsina ati nyapsine.

¹⁶ Ura wini talak ara, anggun Yehuda nang ati nyapsine. Aning babye, talye ati kum nyapne. Deiyok ara ani. Na Allah ara, na Pia Teleb Lek mutuku deice ara, na si eren aik ubuk mutuku, Sion mutuku kon, na mapu koproba, Israel yala nang dopdeipsiseba, ululume. Amutuku kon ululumce, anggun malye winilulum ning nirya ati, anggun wenena ning akunum arepsise. Winipmanto ara, laka kina ati, pia yu mek ara, arepsiba, anggunce akunum diplume. Bukni, aning atonun, yata mutuku nang do nirya, tukwak mutuku-mutuku nirya unyak nang arye, sik babye, weik kanye imun ning wenebuka arepnamne. Winipmanto ara, sik malye wininyak ning ati, laka kina ati, yu mek ara arepniba, sikce amek dinamake. Adipnamak mek ara, pia yu weik mek ulule. Ati, awenen ning ulye ara, pia kum batakuka binmanto ulule. Ati sik anang nirya ara, pia amek delamikca ani, adiparyuk sirya daknauk unamake. Aning winilamikcea ani, ‘Asukum ara aniʼ tenen, laka kina babye, pia kumce, kum kipdeipnamne. Winipdeipnirye, anang nirya ara, pia sirya dakeipnamne. Anang, sik mutuku-mutuku nirya ara, ninye pia kum unyakak atonun, pia asik oldemuk uplyeura, bataklamaka touk upnamlarya!

¹⁷ Bukni, Sion mutuku kon unamak nang kan-kan noutam ara, ninye mitik tonun, ton lyepdopnamne ati, ton tam nang ara, kam tuba unamake. Tonda, Sion mutuku ara, ‘Naʼ tenen, pia teleb lek mutuku unamle. Winiplyeura, Yakub birye deibukba, dadeipdanin yangalamik nang, sik mal olan nang arye, amutuku alubuka dobukabikce, anang yakuka dopkwetebikba, bindobik bukni, aminyan talak ara, Yakub el tam nang arye, sik apu yapu yakuka, dopkwetebik nang, sik Edom tam nang ati, tamubuka yaknamake. Winibikceura, amutuku batakuka bindopnamake. Winibikceura, Yakub el tam nang, sik mapu koproba arye, sik apu yapu taleamik mutuku, amutuku uk, tamubuka yanuka talibikirye, pia asukumuk unamake.

¹⁸ Wininamak talak ara, sik na mapu koproba, Israel nang, Yakub birye deiamukba, dadeipdanin yangalamik nang ara, weik uku dilamlirye, aning-aning nirya, dibuka sirya daklamle touk winipnamake. Ara, Esau yala nang arye, deiamikba, dadeipdanin yanganyak nang ara, talye yo kolulamle touk ubik ati, uku arye diplyeba, sikda pia kum danamake. Esau tam nang nirya ara, winipmanto wa winmakce, uku arye dibuka, sirya daklamle atonun unamake. Esau birye deibukba, dadeipdanin yanganyak nang babye, pia kum bataknamne. Uku arye dibuka, sirya daknamle ati, tonoknye babye, kam tuba kum upnamake. Aning nirya ara, na Allah Yahweh arye, akunum nyapmasina ati, aning nirya ara, dipkoprob nong upnamle!

¹⁹ Aning nirya akunum winiplyeura, atalak ara, Yehuda mutuku noutam unyak nang bukni, iknapye dam tam, (arah selatan tam) unyak nang arye, Edom mutuku dobuka unamake. Tonda, keting kumulban tam mutuku, weik Laut Tengah kup-kup mutuku taleamik nang ara, Pilistin nang ulamik bukni, Israel yala nang arye, sik Pilistin nang ati, obuka sirya dakiceura, amutuku tuku talinamake. Winibikceura, na mapu koproba, sik Israel nanguk, iknapye mutuku nirya ara, doprobikirye, sik kipdopnamake. Ara, Efraim mutuku nirya bukni, dipdongobuka, weik asik Samaria mutuku nirya babye, amutuku tuku nirya ara, sikuk doprobikirye, sik kipdobikceura, amutuku talibuka unamake. Winipnamak talak ara, sik Benyamin yala nang ara, Gilead mutuku talibuka unamake.

²⁰ Israel yala nang tapu koubuka donokamikba, dabu tam (arah utara) mutuku arye binuka, pia pera mutuku, Hala mutuku daulamikca ani, tamubuka yanamak ning ara, Fenisia mutuku arye dipdongobuka, weik Laut Tengah kup-kup, Sarfat mutuku nirya ara, sikuk yanuka amutuku doprobikirye, talibuka unamake. Aning atonun, sik Yerusalem mutuku nang nirya babye, tapu koubuka bobinamikba, pia pera mutuku, Sardis mutuku daulamika ani, tamubuka yanamak ning ara, Yudea uamuk mutuku bukni, iknapye tam dabinuka, sik mutuku koproba doprobikirye, asik dobuka, Negeb mutuku talibuka unamake.

²¹ Amutuku malye kibuka dopropnamaka deiyok nang arye, Yerusalem mutuku tamubuka welepnamake. Esau birye deiamukba, dadeipdanin yangalamik nang, Edom mutuku unyak nang ati, adeiyok nang arye, olbinamake. Winipnamak talak ara, Yerusalem mutuku nang arye, Edom tam nang nirya ati, binuka oplopnamake. Winipnamaka ati ara, dipkoprob ning ara, nara Allah Yahweh, amutuku-amutuku nirya ara, sik Deiyoknye kipnirye, atam nirya talibuka unamne. Ayupu nirya ara, Allah arye, nabi Obaja biti, yanuka lengdar deice arye, laka nyapdeibuk.