Nehemia 9 - Eipomek

Israel ninye arye, “Nun malye ulamupu ning ara ani, ani,” nyabuka, lak kibuka lak nyabikce, amalye ning batakuka, Allah ati morolamik yupu

¹ Wala tekbarye ubukce, like dua puluh empat sum akunum ubukopura, Israel ninye nirya arye, ikin kanye bobikce, din dina kumce, si tebuka unmek. Winibuka unmekce, malye baju arye nong ongobuka, atu butbuta dobuka, sik kisok deice dikdeipdanuka unmek. Winilamika deiyok ara, sik malye ulamik ning ati, ‘Se malye winilamupu,’ tenen ati, winilamik.

² Atalak ara, Israel yala ninye arye, ‘Nun malye ulamupu ning lak kibuka nyanamabe’ tenen, yuk mutuku yala nang ap, ansinibuka kum unmek. Yuk mutuku nang ara, bokuka wiliprobik. Atalak ara, Israel ninye nirya tikikce, sik malye winilamik ning ati, lak nyanmek. Tonda, sik apu yapu malye winilamik ning ap ati, lak kibuka laka lenmek.

³ Sik atikmek talak noutam aryuk, Allah arye Musa biti nyalamukba, sekiamuk Mem Yupu noutamak dobuka yininmek. Sik yininmek buku ara, Allah el si Yahweh arye, “Aning ara wininamlulume, aning ara kum wininamlulume,” nyapdeiamukba, sekiamuk yupu yininmek. Keting winilye deice arye winibuka akunum yinibikopura, sik malye winilamik ning ati, keting winilye deice arye, laka nyanmek. Akunum lak nyabikopura, sik ni koprop Allah, el si Yahweh ati, el si erebukabikce, si erebik.

⁴ Lewi yala nang tikina ati, yo morobuka lapdeiamika ara, Yesua ap, Katmiel ap, Bani ap, Sebanya ap, Buni ap, Serebya ap, Bani ap, Kenai ap, tikmek. Sik anang binuka tikikce, yupu weik asa arye, sik ni Allah, el si Yahweh ati, moronmek.

⁵ Atalak ara, Lewi yala nang arye deiyok koubuka, Allah ati moronmek. Moronmek nang sik si ara ani. Yesua ap, Kadmiel ap, Bani ap, Hasapnia ap, Serebya ap, Hodia ap, Sebanya ap, tonda Petahya ap arye, moronmek. Moronmekce, nyanmek, “Anggun nirya tiklulume. Anggun ni koprop Allah, el si Yahweh ati, si erepnamlume. Yahweh ara, minop arye aulamuka ani, wini talak babye, doyanamle talak babye, apia unamlanye, Allah el si erenamlume,” nyanmek. Sikce nyanmek yupu ara ani. “Nun ni Allah, an si weik mambule. An ap, an si ap ati, pia telebe. ‘Ninye mutuku-mutuku nirya, an si biketinge’ tenen, nyapkiyabe. Yuk-yuk ning, ance arisilyam ning nirya ati, ‘Aning ara mitik mambule’ tenen, ‘Telebe,’ nyaptibye bukni, an tonok ati ara, pia weik arye an si erenyabe. Yuk teleb ning nirya ara, an amu tam uliba, anda weik si erenanye deice tam ulyama anya arye, ‘Anda weik mambule,’ nyapkiyabe. Yuk ning nirya ara, mitik mambul uka. Ati ara, anti pia si erenamkiyabe,” nyabuka si erenmek.

⁶ Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.

⁷ Nun ni koprop Allah, an Yahweh aryuk, nun apu koprop Ur-Kasdim mutuku ninye noutamak ulamuk bukni, ‘Anye bira telebe’ tenen, Abram wipdeiyalume. Winiplumce, Abram boyanalume. Winiplumce, el si winiryuk si, Abraham nyabuka, si doplume.

⁸ Abraham wipdeipluma deiyok ara, anti dib tenelamkukce, pia kum bataklamkukba elilaluma ati, wipdeiplume. Winiplumce, Abraham biti, “Ance deipminba, dadeipdanin banamak nang ati, teleb mutuku arepnamsine,” nyapdeiamlumce nyalin yupu areplume. Abraham biti, ‘Amutuku-amutuku nirya arepnamsine,’ nyapdeiamlum mutuku, amutuku unyak nang sik yala si ara, Kanaan mutuku nang ap, Het mutuku nang ap, Amori mutuku nang ap, Feris mutuku nang ap, Yebus mutuku nang ap, Girgasi mutuku nang ap, ulamik. Ance Abraham biti, “Ayala nang nirya, sik talibuka unyak mutuku-mutuku nirya dobuka, an mapu ati arepnamne. Ara, ance deipminba, dadeipdanin banamak mapu ati, arepnamne,” nyapdeiplume. Allah anda, pia diksukum ulyamnye binya arye, ance nyamsulum touk akunum winipmasilame. Sik Lewi yala nang arye nyabik.

⁹ Nyabikce, ayupu ton dukdongobuka nyabik. Allah ance nun apu yapu Mesir mutuku noutam pil dolamikce, ikin kanye bobuka ulamik talak ara, an elilamlumce kel bikamlume. Tonda, nun apu yapu laut mekwen Teberau dam engebuka malye yupu nyanmekba, kekamlume.

¹⁰ Kekeplumce, Allah ancuk Firaun ap, el amu tam deiyok nang ap, el mutuku nang talye nang nirya ap, diplamikba, ance ninye winipmanto kum pil weik dolamlume. Winilamluma ara, ‘Amutuku nang arye aning eipkikirye, Se, dipkoprob Allah aryuk apil donmasile’ tenepnamak tenen, winilamlume. Winilamluma deiyok ara, sik Mesir mutuku nang arye, ilil kum asa weik ulamikce, an mapu ati, ikin ning sik nong deice delilamikbuk, ance weik mambul pil dolamlume. Ninye winipmanto kum pil dolamluma deice arye, an si weik kipdalumba, atalak ulamik ninye nirya kel bikamike. Winipluma ati, wini talak babye, ninye mutuku-mutuku nirya arye, an si erebikirye, ‘Aning ara weik mambule,’ tuba tenenyake. Ton ning ara, an si ati weik arye erekinyake.

¹¹ Minop talak, nun apu yapu Israel nang, sik dinmekak arye, weik laut mekwen cepdobukba, tuku mikuka deice ak, koubuka yanamik. Bukni, ‘Israel ninye opnuyap’ tenen, dobolbanmek nang, Mesir ninye ara, an mikip deice arye, mek siklipdongobuka oplume. Ninye arye keil dobuka, weik mek mekwen noutam donokikiba, mek pum bisik saklirye, mek lontik abuka dilamle atonun, Mesir ninye laut mekwen noutam kintinip deipmalum bisik wekelyayik talak ara, ance mambul pil domluma deice arye, anang sik nong deice mek siklipdongobuka, dibuk. Anang nirya obuka sirya daklume.

¹² Tonda, nun apu yapu arye, ‘Dan bisik binuyab do?’ tenen, ‘Sik kanye walwal uplyak’ tenen, sik melina ati, ance keting noutam talak ara, weik dua dopdeiamlumba, ayukumna yo atonun tikamukce, menekuka balamukba, sik aminyan tam balamik. Lukunyan talak ara, weik uku buk areamlumba, dirina weik akman bisikuk, nun apu yapu eibuka balamik.

¹³ Tonda, an im deice arye koulukuka, Sinai mutuku deice tikilyanmalumce, Israel ninye kekenak ati nyapdeiamlume. Atalak arye, ance, “Aning ara wininamlume, aning ara kum wininamlume,” nyabuka, im deice arye diksukum yupu uk nyapdeiamsulume. Anyapdeiamsulum yupu nirya ara, dipkoprob teleb yupu uk ulule.

¹⁴ Tonda, ance, “Tek barye sum ara, na Sabat sum, weik sum ati, asum noutam ara, pil nirya dona kumce, telebuk unamlulume. Teleb koprop uk unamlume. Tonda, “Aning ara wininamlume, aning ara kum wininamlume,” nyabuka, an pil donanye Musa deice nyapdeiamlumba, Musa birye sekeiamsukce, laka nyamsuke.

¹⁵ Winilamlumce, nun apu yapu, sik din patalamuk talak ara, im deice arye mana kwaning weik dolkwetelamlumba, bulubuka dilamik. Tonda, mek patalamuk talak ara, kat keil deice arye, mek areplumba, panabuka yayukba dibik. Tonda, minop talak ara, an taruk ereplumce, ance nun apu yapu ati, ‘Na si deice arye, teleb mutuku arepnamsine,’ nyalin yupu nyapdeiamsulume. Aminyan talak ara, ance sikti, ‘Wini talak amutuku akunum arepsina ati, adiparyuk amutuku wekelbimunce, talibuka unamlume,’ nyapdeamsulume.”

¹⁶ Ance aning-aning nirya weik winilamsulum bukni, nun apu yapu, mandipna kanye bomikce, ance, ‘Aning ara wininamlume, aning ara kum wininamlume,’ nyapdeiamsulum yupu kum kekelamikce, ‘Aning nirya ara nun like,’ tenelamikce, an yupu batakuka kum dobolbalamike.

¹⁷ Ance sikti, bico tenebuka, teleb una ati winilalum ning ara, luba kiyamike. Tonda, sik dam ninye winipmanto kum pil dolalum ning nirya ara, tuba kum tenilamikce, luba kiamik. An nyalalum yupu yanibikce, mandipna kanye bobikce kwalilamikce, ‘Mesir mutuku tuba tamubuka bobisiliba, sik amu tam talye pil don nang unamap’ tenen, sik bidamnye arye, ninye deiyoknye wipdeibik. Malye weik winilamik bukni, Allah anda ninye nirya malye wininyak ning namin kina deiyoknye ulyame. Min pola kum wenesilyamce, an kanye aryuk weik bico tenepsimince, weik arye melisilyame. Bico tenesiminye ning ara, weik arye bico tenesilyame. Winilyama arye, nun apu yapu kum bataklamlume.

¹⁸ Winilamluma babye, sikce tamubuka sapi basam mi urasin atonun memepdeibikce, “Nun Mesir mutuku arye bobuka yanamsuk Allah ara, atia,” nyabuka el siuk erenyakce, Allah an si yanipkike. Tonda, ance, ‘Aning ara pia na like,’ teneminye ning ara, sikce aninguk winilamik. Tonda, sikce an nong deice malye yupu nyalamkik ning babye, luba kiplumce, kum bataklamlume.

¹⁹ Nun ni Allah, ance weik bico tenelamsulumce, winipsulum ati, nun apu yapu, mek kum ati, ninye kum ulamikak mutuku noutamak yangalamik talak ara, kum bataklamlume. Sik ti bico tenebuka tuba melilalume. Winilamluma ara, keting noutam balamik talak ara, weik dua ayukumna yo atonun ubuka, tikna arye, menekuka banmanabuk, aminyan dobolbalamik. Aning atonun, lukunyan talak ara, weik uku buk dirina uamukce, ayukumna yo atonun tikamuk. Adirina deice arye, sik binaman bisik eipna arye balamik. Malye ulamika babye, adua ap, auku buk ap, tuba tamubuka kum dopromlume.

²⁰ Tonda, ance sik kel kina ati, an Dib Kanye sik dam dopdeiplume. Tonda sik din ati, im deice arye, manna kwaning dopdeiyalumba, bulubuka dilamik. Sik mek patapne talak ara, sik mek dina ati arelamlume.

²¹ Nun apu yapu ara, mek kum ati, ninye kum ulamik mutuku bisik balamik talak ara, keting tamun empat puluh tahun deice arye, ‘Anang dibicak’ tenen, ance sikti, pia kalikuka melilamlume. Amok ap, mek ap kum ati, buppu weik arye ninye kum ulamik mutuku balamik talak nirya ara, sik patalamuk ning nirya melibuka arepnin balamlume. Ance sikti, ton kum bataklamlume. Tuba meilyamlumba, sik baju ton kum kwilikamuk. Sik yan ton nebuka uk kum dilamuk. Teleb uk ulamik.

²² Aninguk kum bukni, tonda, ance meilyamluma deice arye, sik wekelbinamik mutuku talibuka ulamik nang nirya obuka sirya dakikce, wekelyayik. Wekelyayikce, amutuku talibuka ulamik. Mining damuk kum bukni, pera mutuku babye, areplamlumba, dololamik. Hesibon mutuku ninye deiyoknye, Sihon talibuka ulamuk mutuku binuka alapdobikce, talibuka ulamik. Tonda, Basan mutuku ninye deiyoknye Og, elce taleamuk mutuku binuka doprobikce, talibuka ulamik.

²³ Ance meliamluma deice arye, Israel ninye sik mapu pia weik arelalumba, kurya im deice tiklamle atonun, aninye arye mapu weik delilamikba, yupa weik kipnin balamik. Tonda, ance nun ni yapu ati, “Teleb mutuku arepnamsine. Amutuku wekmunce talibuka unamlume,” nyapdeiamsulum mutuku, sik delilamik mapu ati areplume. Areplumba doprobikce, amutuku telebuk pia ulamik.

²⁴ Sikce delilamik mapu amutuku wekelbiyikce, talibuka ulamik. Ance mikip areamlumba, amutuku taleamik nang, Kanaan yala nang ara, Israel nang arye, obuka kumdanipna arye, sik mutuku talibuka ulamik. Ara, ance meilyamluma deice arye, sik Kanaan tam ninye deiyok talibuka ulamik nang ap, sik amu tam talye ulamik nang ap, nun apu yapu arye anang nirya obuka sirya dakna arye, sik tenelamik touk, wenebuka oltaklamik.

²⁵ Israel nang arye, amutuku weik keil poka dona ati, keil dikuka deipwelepna arye, antanap dongobuka dolamikce, weik aik alapdobik. Tonda, teleb wa tuku ap, teleb tuku ap, binuka alapdobik. Tonda, bona utotoa talin nang arye, talibuka ulamik aik ap, aik noutamak talibuka delilamik ning ap, teleb ning ap, binuka doprobik. Tonda, amutuku nang arye, palyamik mekwen ap, sik talilamik mek pu ap, anggur tapu wa tuku ap, zaitun yo koulamikba duk moulamuk mutuku ap, yuk yala yo duk moulamuk yo ap, binuka talye parapkabuka doprobik. Alubuka doprobikce, dilamikba, sik nong teleb nelamikce, sik teleb kanye bobuka ulamik. Ance nun apu yapu weik arye meliamlumba teleb arye pin-pin kanye bobuka ulamik.

²⁶ Aning-aning nirya telebuk ulamuk bukni, nun apu yapu arye, an nyalalum yupu nirya ara, bisibuka yanibikce, ‘Allah nyasulul yupu ara nun like, aning kum wininamabe,’ tenelamikce, malye ninguk winilamike. Ance, ‘Wininamlulume,’ nyabuka, Mem Yupu nyalalum ning atonun, pia ton kum dukdongobuka winilamik. Winilamik ati ara, an yupu lak nyan nang arye, “Nun malye winilamap ning ara, batakibirye, nun ni koproba Allah, el yupu uk kekebuka unamabe. El dam tuba tamubuka bibirye, el ap talima dukdongobuka unamabe,” nyalamik nang nirya, obuka bataklamik. Tonda an ap, an si ap ati, pia malye yupu nyabuka, weik malye kilamikce, ance, ‘Aning ara na lik ati, pia kum wininamlume,’ nyapdeiamsulum ning ara, aning ton winilamike.

²⁷ Winilamika ati, ance sik mal olan nang ati, mikip sik deice deipnaba, anang arye nun apu yapu yanuka olamik. Obuka sirya daklamikce, Israel nang sik nong deice ikin pil delilamikba, Israel ninye, sik kanye imun ulamukba, “Se, Nun ni Allah, ance melipsilyame,” nyabuka morolamik. Moropnopura, an im deice arye kekebuka kum bataklamlume. Sik ti pia bico tenelamlum ati, Israel nang melina ati, yuk nang deice mikip kipdeipnaba, Israel sik mal olan nang binuka, obuka sirya daklamik. Obuka sirya daklamika deice arye, Israel ninye lyelolamlume. Ara, tonok talak aryuk kume. Atalak-atalak nirya, aning atonun lyelamsulume.

²⁸ Sik ti, tuba melibuka lyelolamlumba, nun apu yapu, sik ikin uamuk ning kum ubukopura, kanye deibuka ulamik talak ara, adiparyuk tuba tamubuka, sikce malye ning ton tuba winilamik. Ara, ance, ‘Aning ara malye winin ning ati ara, na like,’ nyapdeiamsulum ning ara, tuba tamubuka winilamik. Winibika ati, ance Israel ninye bataklumce, yuk mutuku nang dam mikip arepnaba, sik mal olan nang arye olyangalamikce, Israel nang tuba tonap talilamikce, ikin ning sik nong deice delilamikba, ikin kanye bobuka engelamik. Sik imun kanye bobuka engelamikce, “Se, Nun ni Allah, ance melipsilyame,” nyabuka morolamik. Moropnopura, an im deice arye kekebuka namin kilamlumce, sikti, pia bico tenelalum deice arye, Israel nang melina ati, sik noutamak bukni, yuk nang dam mikip deipniba, sik mal olan nang binuka, obuka sirya daklamik. Obuka sirya dakne deice arye, Israel ninye lyelolamsulume. Ara, tonok talak aryuk kume. Atalak-atalak nirya aning atonunuk lyelolamsulume.

²⁹ Israel ninye malye weik ulamik talak ara, sikti, ance asilen ning areplumce, “Narye, ‘Aning ara wininamlume, aning ara kum wininamlume,’ nyabuka nyapse Mem Yupu, tuba tonap kekebuka dobolbanamlume. Winipmunce, teleb unamlum bukni, kumopura, wenenamsine,” nyapdeiamlume. Nyabuka wenelalum bukni, mandipna kanye bobuka kwalilamikce, an nyalalum yupu yanibikce, sikce tenepne ninguk winilamik. Ance nyalalum yupu talye yaniplobuka bisina uk ulamik. Bukni, yatanye do nirya, ance, ‘Aning ara wininamlume, aning ara kum wininamlume,’ nyapdeiamsulum yupu, moubuka kekeplirye, dobolbilyopura, anye bira dipkoprob kam unamle. Bukni, atalak ara, Israel nang arye, mandipna weik ulamikce, ‘Allah el yupu ara pia kekena kumce wininamabe,’ nyaltaklamikce, an tam donga anipna arye, yuk tam kilolamik. An yupu kum moubuka taleamika deice arye, pia malye weik ulamike.

³⁰ Winibuka winilamika ani, ance aketing tamun, aketing tamun yupa weik noutam ara, sik malye ulamik ning ara, eibuka bikamlum bukni, sikti, yu asa arye, minop wenebuka kum oplomlume. Winilalumce, ‘Sik malye wininyak ning ara, sik bidamnye arye kel biktinge’ tenen, an Dib Kanye dobuka, nabi nang arepnaba, an yupu lak nyalamika deiyok nang, sik talima noutamak pil dolamukba, anabi nang deice arye, ance nyalilalumba, anang arye Israel ninye ati, ‘Winina meme,’ nyabuka wenelamik. An yupu lak nyabuka peteren nang arye, peterelamikce, wenelamik bukni, sik Israel nang, nun apu yapu arye, tuba kum kekelamik. Kum kekelamik ati, ance tamubuka yuk mutuku nang mikip areplumba, Israel nang olyangalamik. Ara, sik Israel nang ulamik mutuku tam nang arye, sikti, yanuka olamik.

³¹ Sik yuk mutuku nang arye, Israel nang ati olyangalamik bukni, ance sikti, pia bico tenelalumce, kum bataklamlume. Ance, ‘Anang ara, pia malye nang anya arye, adiparyuk oplopnamne,’ tenelamtum bukni, sikti, pia kum bataklamlumba, yuk mutuku nang arye obuka, sirya kum dakamik. Nun ni Allah, anda dipkoprob ninye ati pia bico tenepsimince, tuba wini talak babye melisilyame. Nun malye winilamap touk, kum wenebuka osilyame. Mitik tonunuk wenesilyame.

³² Ati ara, wini talak ara nun Israel nang arye malye winilamububa, ance pil weik dolamsulumce, lyelolamsulum ning ara, ‘Aning ara mambul kume. Aning ara, daopnyake’ tenen, kum bataknamsilyame. Malye winilamupu buk, ance ikin ning delilamsulum ning ara, tuba tenenamsilyame. Ara, nun wini talak unyap nang ikin usilye ning ap, nun ninye deiyok talibuka ulamik Raja nang ati, ikin ulamuk ning ap, nun yupu bokolina deiyok nang ati, ikin ulamik ning ap, an si eren aik pum tam pil dona deiyok nang ap ati, ikin ulamik ning ap, an yupu lak nyana deiyok nang ati, ikin ulamuk ning ap, nun apu yapu ati ikin ulamuk ning ap, tuba tenenamsilyame. Ura an mapu nirya ati, ikin ulamuk ning nirya ara, ‘Aning nirya ara mambul kume,’ kum tenenamsilyame. Sik Asyur mutuku ninye deiyok nang arye, nunti talibuka, ikin ning nun nong deice delilamsikce, anirye dipdongobuka, wini talak babye ikin usulul ning ati, ‘Aning ara ikin kum tenenamsilyam’ tenen, morokinyabe. Nun ni Allah, anda mikip weiknye ulyame. Tonda, anda aning-aning deice tam ululnye ulyame. Tonda, yuk weik ning aupmalebuk, anda weik mambulnye tonok ulyame. Yuk ning nirya ara, mitik mambul uka. Ance bico tenelamsulum deice arye, “Bico tenesununa anya arye, winibuka wininamsine,” nyapdeiamsulum ning nirya ara, dipkoprob winilyame. Tonok ning babye kum batakasilyame. Ance pia tuba melisilyame. Ati nun ikin usulul ning ara, tenepsimince, melinamsilame na nio.

³³ Na nio, nun tenenyap ning ara, nyapnuyabe. Nunda malye-malye weik winilamububa, ance nun wenena ati, ikin ning arelamsulum ning ara, diksukumuk ulalume. Anda malye un ning tonok ning babye kum ulalume. Ance, ‘Wininamsine,’ nyabuka nyalilamsulum yupu nirya ara, dipkoprob tuba winisilyame. Tonok ning babye kum bataklume. Nunda, malye weik ulamupu.

³⁴ Nun kele, nun deiyok talipsik Raja nang ap, sik amu tam bukni, nun yala deiyok nang ap, an si eren aik pum tam pil dona deiyok nang ap, nun apu yapu ap nirya arye, ance nyapdeiamsulum yupu moubuka kum kekelamikce, malye weik winilamik. Malye ulamik ati, ance, ‘Winina meme. Aning ara tuba winipmunyopura, wenepnamsine,’ nyamsulum bukni, sikce aning nirya ara, kum kekelamik. Tonda, ance, ‘Aning ara wininamlume, aning ara kum wininamlume,’ nyapdeipsulum yupu ara, nun deiyok nang nirya kekena kumce, kum dobolbalamik.

³⁵ Nun ninye deiyok nang aning talibuka, teleb ulamik talak noutam babye, ance arelamsulum ning, pia teleb ning dobuka winilamikce, pin-pin asa aryuk ulamik. Teleb ulamik bukni, atalak babye, Allah anti, moubuka pia kum tenelamik. Pia teleb mutuku, pala weik mutuku arelamsulum ning ara, tuku teleb uamuk mutuku anya arye, aning-aning nirya teleb ubuka palamuk. Teleb uk ubuka ulamik bukni, atalak noutam babye, an amu tam ulamikce, an pil tonok babye kum dolamik. Tonda, sik malye-malye winilamik nang ara, kum bataklamik.

³⁶ Nun ni Allah, disulule. Nun apu yapu arye, pia malye weik ulamik bukni, na ni nun wini talak unyap nang ara, an kele. Nunda yuk mutuku deiyok nang arye talisinyakce, ‘Nun pil talye pil doplulume,’ nyabuka, ikin pil arukusinyake. Amutuku noutam ara, ikin aryuk unyap bukni, ance nun apu yapu ati, amutuku dipkoprob areplume. Ara, ‘Na mapu, Israel nang ara, amutuku palamle ning nirya, libuka pin-pin asa arye dinamake. Tonda, amutuku yo duk nirya dakukabikirye, teleb kanye deibuka unamake,’ tenen, nun apu yapu ati, teleb mutuku arelamlume. Bukni, wini talak apil donyap ning nirya ara, yuk mutuku deiyok nang pil atibuk donyabe. Ati ance eilisilyame.

³⁷ Ara, nun kele. Nun pia malye weik winilamupa deice arye, wenesilyame. Atuku deice wa winyaka nirya ara, weik paplirye, weik arye nong uliba linyap bukni, nun talisinyak deiyok nang, yuk mutuku deiyok nang aryuk alubuka dolonyake. Nun wenena ati, ance adeiyok nang dobuka, nun deice nyapdeamsulume. Anang arye, sik tenebikce touk, nun ap, nun weinyap ning ap ati, mikip arye talisinyakce, ikin ning nun nong deice deilisinyake. Ati Nun ni Allah, aning-aning nirya ara, nun pia kanye imun usulule. Sik Lewi yala deiyok nang arye, ayupu nirya nyabikce, Allah ati morobik.

³⁸ Aning nyabikopura, ayupu ton dukdongobuka nyabik. “Aning nirya ara, nun ni Allah, nun Israel ninye nirya arye, nyalin yupu nyapnuyabe. Ara, nun Lewi yala deiyok nang ap, Israel ninye yupu bokolina deiyok nang ap, ninye deiyok talinyak nang ap, Allah an si eren aik pum tam pil dona deiyok nang ap nirya arye, ayupu nyabibirye, surat deice sekeipnuyabe. Sekeibibyopura, adeiyok nang nirya arye, sik lak kilin ning ton, asurat deice deipnamabe. Deiyok ara, ‘Ayupu nirya nun dib tenenyaba anya arye, aninguk wininamabe,’ tenena ati, sik si asurat deice seknamabe. Ayupu ara, wini talak aryuk nyapmabe. Nun nirya arye, an nyapdeiamsulum yupu, Mem Yupu moubuka kekebibirye, ayupu talibuka dobolbanamabe. Nyapdeibape.” Sik Lewi yala deiyok nang ap, sik Israel yala nang ap nirya arye, neika nyabikce, ayupu sekdeibik.