Nehemia 4 - Eipomek

Nehemia birye, “Yuk ninye arye, ‘Winina meme,’ nyapnamsiyak ati, moubuka tenipmunce, cang keil poka donamlume,” nyapdeibuk yupu

¹ Yuk nang arye, “Israel nang ara, Yerusalem asik keil dikuka deibikce, poka tamubuka dopmake,” nyabikba, Sanbalat kekebukce, kanye talima pum tam ara, yu weik ubukba, malye kanye bobuk. Yu ubukura, “Israel nang anggunda apil kum doptume, anggunda talye nang uka,” nyabuka, nalinmokce, akutupsuke.

² Tonda el yala nang ap, Samaria mutuku yin deiyok nang ap nirya ati, binuka yupu bobiyukce, el mapu kekenmekak arye nyabuk. “Sik Yahudi nang mikip kum nang anya arye, yata tenebuka apil donmak do? Sikda walwal nang anya arye, Yerusalem asik buru tam keil poka ara, tuba tamubuka teleb ubuka keil deibuka dopting do? Tonda, adobikirye kam ning obuka, Allah el si erena ati, arenamak do? Apil nirya ara pia weik ati, like tonok sum arye, akunum sirya dakuka dopting do? Yerusalem asik ap, keil poka ap, yu nang arye uluplobikce, uku dongamik ning ara, tuba tamubuka teleb kipdeipting do? Kume, kum winiptinge,” nyabuka, nalibuka asipdeyuk.

³ Nyabuk talak uk, Amon mutukunye, el si Tobia dam bukmokce, “Sik yatato ning donmak do? Keil dikuka, deipwelepnin bakirye, akeil poka donmaka ara, bai kam mitik ning ton yalirye, apoka yanuka kapliplyopura, dakuka saknamle,” nyabuka nalinmok.

⁴ Nyaprika ati, Nehemia birye, Allah ati morobukce nyabuk. “Nun ni koprop Allah, nun moromap ning ara, kekepsilyame. Nun ti malye nyapsikirye, malye kisinyak ning ara, ance sik deice uk deipnalame. Ton mutuku nang arye, yuk mutuku nang ati sirya obuka dakikirye, sik talinyak ning nirya alaprobikirye, abona dobuka, sik mutuku tamubuka bobalamak touk, ance amalye yupu nyasinyak nang ati wenebuka sirya obuka daknalyame.

⁵ Ati, ance sik malye unyak ning ara, luba kipmince batakana kume. Tuba tenibuka wenenalyame. Tonda, sik malye wininyak ning ara, lyena kume. Sik malye wininyak ning ara tuba eibuka teninamlyame. Deiyok ara, an aik dam poka donyak nang ati, malye yupu nyaldongosinyak ati nyapne. Ati ance anang sik malye wininyak ning ara, kum namin kipnalyame, na nio,” Nehemia birye Allah ati nyabuka morobuk.

⁶ Aning akunum morobukopura, Nehemia ap, sik Israel nang ap arye, pia pi dobuka pil dolamika ati, sik keil poka ara tuba tamubuka, keil dikuka, deipwelepnin biyikce, cang arye dopnin balamika ani, noutam karin ubuk. Tonap dukdongobuka, keil tukwak deipnin welebikba noutam karin aubuk. Aning ara, sik ninye nirya bulubuka mikip arye, dopnin welebik arye winibuk.

⁷ Winibukopura, Sanbalat ap, Tobia ap, sik Arab nang ap, Amon mutuku nang ap, Asdod mutuku nang nirya arye, kekenmekba, yuk nang arye, “Yerusalem asik keil poka ara teleb kibuka donmake, tonda keil poka kin-kin uamuk ning nirya ara, lipsisikuka memeldongonmake,” nyabikba, anang kekebikce, pia yu kanye weik bobik.

⁸ Aning kekebikce, sik anang nirya bulubuka wekikce, “Yerusalem binuka warikibirye, apil donyak ninye nirya ara, ikin ning sik nong deice deibibirye, sikti, obuka sirya dakibirye yakdonoknamabe. Winibipyopura, sikce apil batakuka bindopnamake,” nyabuka yupu talibik.

⁹ Nyabuka yupu talibik bukni, ‘Nun ni koproba Allah arye melinamsil’ tenen, Allah ati morobupu. Tonda, ‘Sik anang olyasicak’ tenen, keting noutam babye, lukunyan talak babye kalikin nang ton wipdeibupu.

¹⁰ Anoutam talak ara, Yehuda tam nang arye nyabik. “Nun pil don nang ara, pil weik dobupa ati ara, nun mikip ara, akunum mitang kipnin banmasile. Tonda, nun pil donak ara, min arye uluplobik keil telebroba ning, pia weik ubuka ati, nunce apoka ara pil dobuka sirya kum daktibye,” nyabik.

¹¹ Tonda, nun mal olan nang arye, nyapsike. “Sik Yahudi nang ara, walwal nang anya arye, bikuka kum eipmasikce talak aryuk, nunce sik noutamak aunmakibuk duknubuka wekipyopura, sik nirya obuka sirya dapnamabe. Apil donyak ning nirya bataknamake,” nyapsike.

¹² Yehuda nang bukni, ayupu nyapsik nang, dam ulamik nang arye, like tagu barye sum arye, nun dam nyalyangalamsik. “Sik opnamsiyak nang ara, amutuku noutam nirya unyaka ati, dan sukum bitumba, kum opsiting do, kume. Anggun binamlumak nirya, yakirye opnamsiyake,” nyalamik.

¹³ Ati, ‘Opsicak’ tenen, narye Yahudi yala nang nirya, anggun deipgerepdop nang ulamik touk, keil poka amu tam bukni, daklobikba, tuba ubukak nirya kintinip deipsirye, ‘Amalye nang asukum arye wekelyanuka opsicak’ tenen, ‘Pia moubuka kalikinamlulume,’ nyapdeipse. Anyapse nang nirya kintinibik ning ara, sik yin ap, mal ap, parang ya ap, yo tace ap, dobuka kintinibikce, kaliklamik. Tonda, kelapye wirikdeiamikce, kaliklamik.

¹⁴ Aning nirya moubuka dipdebuka kel biksakarye, tikukapsirye, sik Yahudi ninye deiyok taleamik nang ap, sik mambul weik nang ap, sik talye nang nirya ap ati nyapse. “Anggunda sik yuk nang ati, ilil una kume. Allah atibuk teninamlulume. Allah ara, el mikip pia weik ulirye, ninye arye winipmanto kum pil donanye binya arye, el tibuk tenipmunyeura, ilil kum unamsile. Tonda, ‘Elcuk melinamsil’ tenen, tenipbibirye, anggun yala nang ap, anggun tam nang ap, anggun mapu ap, anggun kilmapu ap, anggun kilapu ap, anggun asik nang ap ati, aning-aning nirya ara, pia pi dobuka unamlulume. Anggun malye nang olana ati, kintinip deipnamlume,” nyapse.

¹⁵ Nun nirya kintinibububa, yuk nang arye, “Kume, Yahudi yala nang arye, akunum kel bikmasiyake. ‘Sik opnamabe,’ tenebupe ning ara, akunum kekebikce, akunum kintinipmake. Tonda, Allah arye nun tenebupe ning ara, akunum bisik seksuke,” nyabuka lak nyalbiyikba, nun mal olan nang kekebik. Akunum kekebikba, nun Yahudi yala nang nirya arye, akeil poka lipsisikuka dona ati, keil dikuka, dikdanin welelamupu. Nun pil yuk-yuk awamuk touk, keil dikuka, dikdanin welelamupu.

¹⁶ Asum aryuk deiyok koububurye, dotalak nirya ara, na mapu nirya bokeipsiba, ton tam nang ton pil donmek. Adiparyuk, ton tam nang ara bokuka yin ap, mal ap, yo tace ap, ting ap, kelapye ap dobukabice, nun mal olan nang yangana ati kalikinmek. Yin talina deiyok nang arye, Yahudi yala ninye keil poka dolamik nang pil donmekak, aminyan tam yanuka tikik.

¹⁷ Weik keil poka dona ati, keil yangapdeipna arye, dopnin welena ati, keil ap, yuk don ning ap, bobuka boyangalamik nang ara, yin ton tam taruk bopman diparyuk, ton tam taruk ara, keil boyana arye dolamik.

¹⁸ Aning atonun, keil poka dolamik nang nirya arye, sik parang ya deiyating noutamak kikipdongobuka pil dolamik. Bukni, ‘Olbinuyap’ tenenamak tenen, pong-pong an ning, talibuka pong-pong nyanamoknye bira, na damuk unmok.

¹⁹ Narye, sik amutuku taleamika deiyok nang ap, yuk mambul weik nang ap, tonda talye daulamik nang ati, nyapse. “Adonamap pil ara pia weike. Tonda, asukum arye keil poka dona ati, keil yangabuka, deipnin welebibirye, pil dopnin balamipya ani, otam binuka donamap talak ara, anoutam ara pera weik ati, mining dam pil kum donamaba ati, ‘Lopdeipmapye noutam arye, wekuka opseicak’ tenen ati, kanye moupnamlulume.

²⁰ Pong-pong an ning, el si terompet pong-pong nyabikiba, anggunce lelim kekepmunyopura, ‘Nun mal olan nang akunum yanganmake’ tenen, anggun nirya minop bulupmunce, nun dam yanamlulume. Nun ni koproba Allah arye, nunti melipsiliba, nun mal olan nang ati obuka sirya daknamabe,” nyapse.

²¹ Ati, nun apil donyap nang ara, tonoknye babye kum batakupu bukni, ninye yupa nirya bokuburye, ton tam nang ara yin ap, yo tace ap, uk bobuka kaliklamik. Ton tam nang ara, keil poka piluk dolamupu. Ara, keting panalyangan talak arye diprongobuka, keting wekelban talak babye, anirye kurya tiklamuk talak babye ara, anoutam nirya pil donauk ulamupu.

²² Atalak babye, narye aulamik nang nirya ati nyapse. “Anggun pil talibuka dolulum nang ap, anggun melin nang ap, yuk mutuku kum malbinamlulume. Yerusalem mutuku uk malbinamlulume. Winipmunyeba, lukunyan talak ara, anggunce nunti kalikinamsulume. Winipmamunya bereklyopura, keting duk-duk noutam nirya tamubuka, keil poka pil dolyanamlulume,” nyapdeipse.

²³ Ura, apil dolamupu talak nirya ara, na bidamang ap, na yala nang ap, na amu tam pil dolamik nang ap, tonda na ap ulamuburye, na amu tam kalikin nang ap, nun nirya ongolamupu ongon baju ara, kum kwiribuka bataklamupu. Abaju ongopman diparyuk, tuba pil dopnin balamupu. Tonda, nun nirya arye, yin bobuka balamupu. Tonok talak babye kum bataklamupu. Mek kwelbinun talak babye, nun yin talipmancuk kwelamupu. Ura Yerusalem mutuku bukni, weik cang keil poka antanap dongobuka, dolamupu nang ara, like lima puluh dua (52) sum deice arye, keil yangabuka, deipnin welelamupurye, akeil poka don pil ara, sirya dakupu. Atalak ara, wala si nyalamupu ara, Elul bukni, tanggal 25 deice arye sirya dakupu (ara Oktober 25). Winibububa, nun dana-dana tam nirya ulamik mal olan nang, yala-yala yuk nang nirya ara, aning kekebikopura, ilil weik ubuk. Tonda, sik ilil kum asa arye, ‘Nun dem aryuk Israel ninye obuka sirya daktibye,’ tenelamik ning ara batakik. Aning deiyok ara, sik ayuk mutuku nang nirya arye, ‘Se dipkoprob sik Israel ninye weik mambul pil donmaka ani, sirya daknamaka ara, sik ni koprop Allah tenelamuk deice arye apil dobik. Sik dem aryuk kume,’ tenen, bikikce, ilil weik ubuk.