Nehemia 2 - Eipomek

Persia tam Raja Artasasta birye, Nehemia weipdeibukce, Yerusalem mutuku bana ati, dopdeibuk yupu

¹ Na Nehemia bira, Persia mutuku ninye deiyoknye Artasasta, el anggur mek din talak, mek makau moubuka boyangalamsinye ulamse ati, Raja arye, Persia mutuku tam talibuka ulamuk talak ara, keting tamun dua puluh tahun noutam arye, el dam nyalbise. Ara, el melin nang arye, ‘Anggur mek dipnul’ tenen, el anggur din mek boyayikopura, amek makau dopropsirye, Raja dam binuka arepse. Yuk talak, el dam balamse talak nirya ara, pin-pin asa ulamse bukni, asup ara, lik kanye bobuka pin-pin kum upmanukba, el dam bisiba eipnuke. Eipnukce, asipdenuke.

² Lik kanye bopsiba elce nati nyapnuk. “Amio, anda yata ati urasin lik kanye bopmanilam do? Uk kum dinmakil bukni, yata deiyok ati, an urasin yuk upmakil do? Na kanye ara, an talima noutam ara, ikin upmakile,” nyapnuke. Nyapnuka ati, na lukdase.

³ Lukdaseryuk, narye tamubuka Raja ati nyapse. “Naio, na patapnil ning ara, anda pia kam unalame. Na ikin upnil ning ara, na ni yapu diamikba, tuku palibuka wilamik mutuku ap, anyasik domik ning ap, yu nang arye dakuka uluplomik touk, tuba malye ulule. Tonda, anyaik buru tam sik bisik wekelbalimik poka bublan ara, dakuka uku dabikba uku dibuke. Aning nirya malye unmala ati, na lik kanye bopne,” nyapse.

⁴ Nyapsiba, Raja arye, nati tamubuka nyapnuk. “Anda yata wiriptinye tenepmalam do?” nyabuka asipdenuk. Ninye deiyoknye birye asipnukopura, na kanye talima pum tam arye, Allah mutuku-mutuku nirya talibuka, im deice tam ululnye biti moropse.

⁵ Moropsirye, Raja biti nyapse. “Naio, ance nati bico tenepnimince, ‘Anye bira telebnye,’ tenepnutumce, ance nyapniminyeba, na Yudea mutuku binirye, na deiyok koun deilin nang weilamik mutuku dipdetinirye, amutuku domik asik tuba tonap moubuka dopnamne. Ati, ‘Telebe,’ tenepnimince, ‘Dabilyame,’ nyapniminyopura, tamubuka bindopnamne,” nyapse.

⁶ Nyapsiba, ninye deiyoknye ap, el kil ap neika bukmarikak arye, Raja arye tamubuka nyapnuk. “Anda na dam tuba pil donilyam anya arye, bisik ara yata wiribuka mapnin binalam do? Winyaminya ani, yata talak tamubuka yanalam do?” nyabuka yupu talipnumu talak ara, Raja arye, ‘Telebe dabinalyame,’ nyapnuka ati, narye, “Na binuka unamne talak ani, winibuka talak damapmanya ani, atalak tamubuka yanamne,” nyapse.

⁷ Nyapsopura, na deiyoknye Raja biti, ayupu ton nyapse. “Naio ‘Teleb ubuka dabinule,’ tenepniminyopura, ance surat ton, sekuka arepnutumba, otam mutuku talinyak ninye deiyok nang, Gubenur nang ati areptinye. Ara, otam mutuku, Efrat mek dam bukni, amek koubuka otam talinyak nang arepneba, sikce, ‘Telebe ur yalule,’ nyapdeipnikcopura, sik mutuku noutam unyak nang arye kum opnamniyake. Teleb aryuk binirye, Yudea mutuku binuka unamne,” nyapse.

⁸ Nyapsirye ayupu ton nyapse. “Tonda amutuku yo kan-kan talibuka ulinye, el si Asaf biti surat ton arepnutumba, asurat bobuka, elti, arepnyopura, elce weik yo webuka arepnutue. Winipminba, elce yo ton nuknilyopura, dobukapnirye, Yerusalem mutuku noutam aik lipsisikuka dopnamne. Ara, amutuku noutam keil aik domikba, ninye mal olan nang kum yanmanto aik, anyaik buru tam poka bublan moubuka dopnamne. Anyasik ara Allah ati arelbalamak aik, el si eren aik dam, ulul mambul aik dopnamne nyapne. Tonda, na un aik moubuka dopnamne,” nyabuka moropse. Moropsebuk, dipkoprob Allah arye melipnuka deice arye, Raja arye, na moropse ning nirya kekepnukce, aning nirya ara, “Telebe,” nyapnukce, aning nirya arepnuke.

⁹ Asurat arepnukba, narye asurat sekeipmok ning bobuka, Efrat mek koubuka, keting wekelbalamle tam, otam taleamik ninye deiyok nang, Gubenur nang dam boyase. Sik dam boyase talak ara, Raja arye nyabukba, el yin deiyok nang ap, sik amu tam yin nang bukni, kuda basam balye deice bukuka balamik nang ap, na ap neika beipu. Deiyok ara, sik deiyoknye Raja arye, “El meliplulume,” nyabukura, melipnik.

¹⁰ Bukni, Horon mutukunye, el si Sanbalat ap, tonda Amon mutuku yin taleamuka deiyoknye, el si ara Tobia ap, sik aning kekebuka ikin kanye bopdikce, ‘El yanmal deice arye, nun mutuku ning nirya yanuka alapnusiaka ati, yanmale. Yata deiyok ati, ‘Sik Israel ninye patalul ning melipnamap’ tenen, yanmak do? Aning ara nun like,’ tenepdik.

Nehemia birye, ‘Kota Yerusalem asik, antanabuka cang keil poka dona ati, keil dikuka antanap dongopnamap’ tenen, deiyok koubuk yupu

¹¹ Na adiparyuk, Yerusalem mutuku bisirye, like winilye sum arye talye mapsa.

¹² Like winilye sum akunum ubukopura, asum lukunyan ara, kum mapsa. Na ap, na mapu yata wiribuka nang do, ton melipnikba, nun neika dilbipu. Narye yuk nang ati, ‘Nara, Yerusalem asik dilbinune. Dipdenirye eipnyopura, tuba tamubuka poka tonap dopnamabe. Anyaik-anyaik nirya, ton lipsisikuka dopnamabe,’ kum nyapse. Allah arye na kanye talima pum tam nyapdeipnukba, teinyamse touk winipse. Winipse talak ara, yuk kuda basam ton, na dam pia kum yanmek. Bukni, na bukmasibuk bobanmanuk kuda basam uk, nun neika banmanumu.

¹³ Alukunyan ara, keting wekelban tam bocamik bisik bublan, ara, Mek pu donak wekuka binmasirye, tonda bublan dam mek pu si Naga, atam binmase. Tonda malye ning nirya donokolbana ati bocamik bisik bublan dam bise. Ara, Yerusalem cang poka domikbuk daksakamuk ati, apoka bublan dakuka uku damik ning nirya ati dilbinmase. Tonda bublan nirya dakuka uku damik ning nirya ara, binuka dipdesirye bikse.

¹⁴ Na adiparyuk keting yangan tam mek pu dam balamik bisik bublan ap, ninye deiyok nang mek kekna ati Kolam Raja balamik bisik ap, binuka dipdese. Asukum ara, bublan dam bise bukni, na welebuka binmase kuda basam ton, asukum binmanto kumak ati, atam kum eipse.

¹⁵ Winipse ati, alukunyan uk mek deice tam welepsirye, Yerusalem cang keil bobuka keil yangapdeibikce, poka domik urasin ara, moubuka bine eipsopura, tamubukapsirye, tuba tamubuka keting wekelban tam binuka dipdesirye, dabanmasa ani, min yuma binmase Mek pu donak bublan damuk tamubuka wekelyase.

¹⁶ Sik aulamik deiyok nang ton, ‘Asukum binmale’ tenen, kel kum bikmanik. Deiyok ara, narye sik Yahudi nang nirya ati, ton kum lak nyapmase. Sik Allah si eren aik talibuka pil don nang babye, tonda amutuku talina deiyok nang babye, tonda apoka pil donamik nang, yuk nang babye, kum lak nyapmasa ati, anang nirya arye, kel kum biknike.

¹⁷ Winipmasa ani, tamubuka yasopura, sik nirya ati yanuka nyapse. “Amapo ikin weik upsilye ning ara, anggun nirya akunum kel biklume. Yerusalem asik nirya ara, minop ulamupu atonun kum unyabe. Yerusalem dana-dana wiamik poka ap, apoka bublan ap, ninye aik nirya ap ara, daklobikce poka bublan nirya dakuka uku dongobik. Winibika ati, wini talak ara, anyasik cang poka tuba tonap lipsisikuka dopnamabe. Winibipyopura, nun nirya tuba tamubuka teleb kanye bobuka unamabe. Tonda, yuk nang arye, tuba kum nalinamsiyake. Wini talak alye weik usulul touk, tuba alye kum unamsile,” nyapse. Nyapsirye ayupu ton lak nyapse.

¹⁸ Wini talak ara, Allah arye bico tenelamnukce melipnukba, Persia mutuku tam ninye deiyoknye dam nyapsiba, ‘Telebe poka dopnamlame. Na weik arye melinamsine,’ nyapnuk yupu ton laka nyapsiba, sik Yahudi deiyok nang arye kekepnike. Kekepnikce, sik nirya arye nyapnike, “Ati ara, telebe, nun neika apoka tuba tonap lipsisikuka dopnamabe,” nyabik. Nyabikce, atalak aryuk, teleb pil deiyok koubik.

¹⁹ Winibik bukni, atalak ara yuk nang arye lak nyalbiyikopura, Horon mutukunye el si Sanbalat ap, Amon mutukunye el si Tobia ap, tonda Arab mutukunye, el si Gesem ap, sik nirya arye ayupu kekebikce, nun nirya ati nalipsikce, malye yupu nyabukabikce, akutunmasike. Nyanmasikce, “Anggunda yata ning arye winipnamalumce do? Tonda, anggunce yatato ning winipnamlumce, ‘Amutuku ninye deiyok talibuknye biti, yanipnamap’ teneplum do?” nyabuka, malye yupu nyapdongopsik.

²⁰ Nyapsikopura, na Nehemia birye sikti, nyapse. “Kume, Allah im deice tam ulirye, aning-aning nirya talilulnye birye tenepsuk touk, winipnamabe. El melisilya deice arye, apil teleb kibuka dolamepya ani, sirya daknamabe. Nunda, Allah el amu tam ubirye, nun el mapu ara, adiparyuk aning-aning nirya lipsisikuka dobibirye, apil dobuka sirya daknamabe. Bukni, anggun anyapmasulum nang tonok ara, Yerusalem mutuku noutam nun neika kum unamabe. Minop talak babye amutuku kum talibuka ulalum ati, ‘Amutuku ara, nun ning anya,’ kum nyapsutume. ‘Anggun yuke,’ nyapsise.” Nehemia birye, sik winilye nang, malye yupu nyabik nang ati, wenebukce nyabuk.