Mika 5 - Eipomek

Allah arye nyalin yupu deice arye, “Betlehem mutuku noutam tiknamlanye bira, ninye lyena deiyoknye unamle,” nyapdeiamuk yupu

¹ Allah Yahweh arye nyabuk. Betlehem Efrata, anda Yehuda mutuku noutam mitik asik domkikba, mitik mutuku ulyame. Bukni, Betlehem mutuku noutamak arye, ninye deiyoknye tonok wibuka deipniba tiknamle. Tiklirye, Israel ninye nirya talinamle. Anye bira, minop talak aning-aning nirya min kum uamuk talak ara, el akunum ulamuk. Atiknamle ninye deiyoknye elda, pia minop talak noutam arye, dipdongobuka pia aulamuk.

² Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.

³ Aninye lyena deiyoknye, akunum yanuka kutukuka tiklyopura, Allah Yahweh el mikip weik anye el nong deice deipliba, el mapu nirya ati taliplirye, kalikuka meliliba, teleb ubuka unamake. Allah Yahweh el si ara, weik mambul si ulule. Ati, atalak ara, aweik ninye lyena deiyoknye birye, Allah el si mikip deice arye, Israel yala ninye nirya melinamle. Winipmanto ara, domba basam weina deiyok nang arye, sik domba basam ati, teleb din ning arebikirye, teleb arye weilamak touk, anye birye Israel ninye nirya ati, pia teleb kibuka mikip arye, kalikuka melinamle. Winiplyopura, sik nirya kanye lamapdongobuka ubikirye, teleb kanye bobuka unamake. Ara, urdem ati kume. Deiyok ara, aninye deiyoknye bira pia mikip weik unamla ati, im sirya, mutuku sirya ap, tukwak mutuku, im sirya, mutuku sirya nirya unyak ninye, anye eibikirye kibikcopura, el anye biti, ‘Se, elda dipkoprob mambul weiknye ulule’ tenen, elti, si erenamake. Ati, elce talinamle Israel ninye nirya ara, teleb kanye bobuka, pia lamapdongobuka unamake. Deiyok ara, elce talinamsila atia.

⁴ Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.

⁵ Atalak ara, Asyur mutuku ninye babye, Nimrod mutuku ninye nirya babye, ‘Israel ninye opnamap’ tenen, sik Israel yala ninye unamak mutuku yanuka weknamake. Bukni, winibuka wekicopura, Israel ninye arye sik Asyur mutuku ninye ap, Nimrod mutuku ninye ap ati, obikirye bisipnamake. Ara, Asyur mutuku nang obuka dakna ati, Allah arye wipdeipnamle mikip weiknye birye deiyok kiplirye, Israel ninye arye Asyur mutuku nang nirya ara, malye kibikirye, parang ya dobuka, sik Asyur mutuku ninye bobuka, amu tam delinamake. Tonda, Nimrod mutuku babye, ayin talin nang arye, parang ya arye obuka sirya dakikiba, aninye sik amu tam deibikirye, sik mutuku talinamake. Winibicopura, sik Israel ninye nirya, telebuk ubikirye darabuka, kat asa unamake.

“Aminyan talak, Israel ninye mitik tonunuk unamak bukni, mikip weik unamake,” nyabuk yupu

⁶ Aminyan talak ara, Israel yala ninye mitik tonun dem, sirya tuba unmak ninye ara, yuk mutuku ninye kan-kan unamake. Winipmanto ara, mok ceplirye, ninye koulamice ning dam saklirye, teleb kibuka palamle ning atonun unamake. Tonda, kurye dei saklirye, palamle ning ayala-ayala nirya deice saklirye, namin upliba, teleb kibuka palamle ning atonun unamake. Mok ap, kurye dei ap ati, ninye arye, ‘Aning ara kum saknamle,’ nyanmatinga babye, tuba saklamle atonun, Israel ninye dipkoprob telebuk unamake. Sik nirya, Allah el dam anyuk kanye deibuka unamake.

⁷ Tonda aminyan talak, Israel yala ninye mitik tonun dem, sirya tuba unmace ninye ara, yuk mutuku ninye kan-kan dabinuka unamak bukni, pia mikip weik ninye unamake. Winipmanto ara, weik yu kuse el si singa kus ara, mikip pia weik ulule. Bai tam noutamak ara, yuk kam ning ton, yala weik aulul bukni, sik mikip ara mitik uka. Singa kuse ara, el mikip pia weik. Singa kuse yu weik ning arye, domba basam weklamaka kan-kan binuka weklirye, talye lukparabuka domba basam obuka diplirye, el si arye, kalibuka bataklamle touk, sik Israel ninye arye, yuk mutuku ninye kan-kan bikirye onamake. Ninye arye, yu weik singa kuse ati, yupu kum seklamak touk, yuk mutuku ninye arye, Israel ninye ati, yupu sekmanto kum unamake. Singa kus arye domba basam olamle talak, domba basam arye lyepdanmanto kum ulamak touk, atalak ara Israel ninye arye olbinamak ninye, sik bidamang ati, kum lyepdanamake.

⁸ Atalak ara, Allah pia weik arye, el mikip dobuka Israel ninye deice deiplyopura, Israel ninye arye, sik mal olan nang nirya obuka, sirya daknamake. Winibikirye, sik mal olan ninye nirya ati, malye kibikirye, pia kum kipdeipnamake.

“Aminyan talak ara, Israel ninye kan-kan, malye winin ning winipnamle ning nirya ara, Allah arye kum kipdeipnamle,” nyabuk yupu

⁹ Allah Yahweh arye, Israel ninye ati nyabuk. Aminyan talak ara, ninye deiyoknye ton erepdeipsiniba, anggun mal olan nang nirya obuka sirya daklirye, kum kipdeipnamle bukni, atalak noutam babye, anggun Israel ninye malye-malye ning tuba aupmasil ning babye, narye kum kipdeipnamsine, nyabuk. Ara, ninye olbana ati, anggun kuda basam balye deice bukuka balamlum kuda basam ara, kum kipdeipnamne. Tonda, anggun mal olan nang olbana ati, tuku deice balamlum ning, tapu kirikuka anggun kuda basam arye, tuku deice libuka balamlum ning, el si ara kereta kuda nirya babye kum kipdeipnamne.

¹⁰ Tonda, anggun malye winin ning wenena ati, anggun dolulum asik weik cang keil poka wibuka, poka domik ning ara, dakuka bataknamne. Tonda, ‘Yuk mutuku nang arye nun olyasicak’ tenen, kalikna ati kintinip deiamikce dolamik keil aik nirya ara, narye daklopnamne. Winipniba, aning nirya kum kiplirye, talyeuk upnamle.

¹¹ Tonda, asing keten nang arye dibilamice ninye, sik kanya elilamak ning nirya ara, narye kum kipdeipnamne. Asing keten nang nirya oplopnamne. Aning atonun lengdar mabikirye, eipmace ning ati, nyabikiba, “Dotalak ara, winipnamkile,” nyabuka, talye laka nyanyak nang nirya babye, pia oplopnirye, kum kipdeipnamne.

¹² Winipnye talak ara, talye ning bukni, anggunce, “Nun ni,” nyabuka, anggun taruk arye kintinibuka deipmunce, isa si erelulum ning nirya ara, kum kipdeipnamne. Tonda, mutuku ati, “Asukum ara, memak,” nyabuka, kintinibikirye isa si erelulumak nirya ara, kum kipdeipnamne. Tonda, anggunce isa si erena ati, cang yo ikuka delilulumak nirya ara, dakuka uluplopnirye, kum kilinamsine. Winipnyopura, aminyan dorunamle talak noutam ara, tuba tonap talye ning ati, “Nun ni Isa el siuk erenamabe,” pia kum nyanamlulume. Anggun taruk arye kintinibuka delilulum ning ati, si kum erenamlulume. Aning ayala-ayala nirya, kum kipdeipnamna ati nyapsine.

¹³ Aning atonun, anggunce isa el si Dewi Asyera, isa kil si erena ati, anggun ululum mutuku noutam arye, cang ayukumna yo atonun yo ikukapmunce, isa si Asyera ati, si erelulumak nirya ara, daklopnirye kum kipdeipnamne. Tonda, isa si erena ati, isa el aik dobuka deiplumak ap, aisa si erena ati, weik aik dolulumak nirya ara, dakuka uluplonamne. Winipniba aning nirya ara, pia kum danamle.

¹⁴ Atalak ara, yata mutuku ninye do nirya, sikce winibuka malye unyakce, na yupu ati, ‘Nun like’ tenen, yaniltaninyak ninye mutuku-mutuku nirya ara, nati yu unyinyak ninye nirya ara, opnirye kum kipdeipnamne deice arye, na yu unilye ning ara, adiparyuk yu aknapnamnile. Ara, tukwak mutuku noutam unyak ninye nirya, sikce malye wininyaka deice arye, wenebuka oplopnamne. Allah arye Israel ninye ati, nyapdeibukba, nabi Mika birye kekebukce sekiamuk.

¹⁵ Atalak ara, yate mutuku ninye do nirya, sikce winibuka malye wininyakce, na yupu ati, ‘Nun likʼ tenen, yaniltaninyak nang mutuku nirya ara, nati yu ulul nang nirya ara, opnirye kum kipdeipnamna deice arye, na yu unilye ning ara, adiparyuk aknapdopnamle. Ara, tukwak mutuku noutam unyak ninye nirya, sik bidamnye arye, malye unyak deice arye, wenebuka oplopnamne. Allah arye Israel nang ati nyabukba, nabi Mika birye, kekebukce sekeiamuk.