Mazmur 92 - Eipomek

“Allah ati, teleb,” nyan mot, Mazmur deice sekuk yupu

¹ Allah ati, teleb nyan mot sekuk Mazmur yupu. Aning ara, Sabat sum deice arye, mot nyanamika ati sekuka, arebuk.

² Nun ni Allah Yahweh ati, “Anda pia telebe,” nyabuka, el si erena ara, pia ati wininamabe. Aning ara, teleb uka. Ara, Allah Yahweh anda, aning-aning nirya talibuka, pia deice tam erebuka, mikip weiknye ulyama ati, an si erena ati, aMazmur mot yupu nyanamabe. Aning ara, teleb uka!

³ Beren tam talak nirya ara, Mazmur yupu deice arye, ance nun Israel nang ati, “Pia weik arye, bico tenesinirye, teleb kilinamsine,” nyabuka, nyalin yupu deice arye, nyapdeiamsulum ning ati, ‘Yuk nang biknamak’ tenen, sik kekenak arye, “Nun ni Allah, telebe,” nyanamabe. Aning atonun, lukunyan talak nirya ara, ance, ‘Wininamsine,’ nyasilyam yupu ara, aning batakna kum aryuk, dipkoprob nyasiminye touk, tuba winisilyama ati, “Nun ni Allah telebe,” nyabuka, an si erenamkiabe.

⁴ Ara, aMazmur mot yupu nyanamap talak ara, lelim nyan ning, el si gambus ap, kitar atonun ning, el tapu ara, 10 biribuka, amot nyanamabe. Tonda, mot nyana ati, lelim nyan ning, el si ara kecapi ap, adeice arye amot nyanamabe.

⁵ Amot yupu nyanamaba deiyok ara, ani. Ara, nun ni Yahweh, ance pia teleb pil dosiminya ati, kanye deibuka unyapce, amot ara, nyanamabe. Diba, an taruk deice arye, pia teleb pil melibuka dosilyama ati, pin-pin kanye bobuka, amot nyanamabe.

⁶ Se, nun ni Yahweh, an weik mikip deice mambul pil dosiminyeba, eibipye ning ara, nunce ‘Se,’ tenen, kanye losulule. Nun akunum bikinyabe. An kanye talima noutam teneplum ning ara, pia mambul ulula ati, nunce pia kum biktibye. Weik mekwen kaurwe, kum wekmanto ulye touk, ance teneplum ning ara, kum bikmanto ulule.

⁷ Ance tenelyam ning nirya ara, sik walwal nang arye, aning ara anye tenebuka, pia kum biktinge. Diba, sik walwal nang ara, ance winilyam ning nirya ara, ‘Allah arye pil dolul deiyok ning ara, ani’ tenen, pia kum biktinge.

⁸ Tonda, sik pia malye winin ninguk talibuka, yuk nang ati, yu arye onyak nang ara, weik daunyake. Winipmanto ara, dolkua, minopce talye bilikuka, palamle touk, sik yu nang ara, pia weika arye tabakanyake. Diba, tukwak mutuku noutam ara, talima pum tam arye, malye tenebuka wininyak nang ara, pia weik tabaknin bakirye, bona weik talin nanguk wininyake. Bukni, sik talima noutamuk, malye unyak nang ap, yuk nang ati, sik yu deice arye onyak nang ap, aminyan sirya talak ara, Allah arye anang nirya weneplirye, obuka sice buklopnamle!

⁹ Bukni, nun kele, anda nun ni Yahweh, im deice pia ati unalame. Aning-aning nirya, pia deice tam umince, mikip weik deiyoknye ulyame.

¹⁰ Ninye nirya moubuka biklulume! Allah Yahweh ati, ‘Elda nun like,’ tenenyak nang nirya ara, aminyan talak dipnamake! Diba nun ni Yahweh, anti yanikikirye, ‘Nun like,’ tenekinyak nang nirya ara, aminyan talak ance sikti, wenebuka opminyeura, sik nirya kum danamake! Mandipna kanye bobikirye, malye-malye ninguk wininyak nang nirya ara, aminyan talak, ance sikti, yakuka dopkwepminyeura, sik kanye teniltonauk kibikirye, bai tam bikbik abuka bikirye, mutuku yuk-yuk, dana-dana tam mutuku binamake.

¹¹ Diba na nio, malye wininyak nang weik daunyak bukni, ance nati, pia melinilyama deice arye, mikip kinulule. Winipmanto ara, sapi basam yim weik ning, el kisok deice tace belelamle ning, mikip ulye touk, ance nati, mikip kilinilyame. Tonda, ance, ‘Anye bira, ninye deiyok kibuka, na mapu Israel yala nang taliplirye, sik ninye deiyoknye unamle’ tenen, akunum wipnimince, aning lakilina ati, na kisok deice, minyak zaitun mek akunum likdeipnulume.

¹² Tonda, nati, ‘Nun lik’ teneninyak nang ara, ance sikti, obuka amu tam akunum deiplum nang ara, na asing arye akunum eibuka bikamse. Tonda, yuk nang arye, na dam yanuka nyapnike. ‘An opnamap tenelamkik ati, Allah arye akunum wenebuka obukba, pia engebuka ngalukunyake,’ nyabuka, laka nyapnikba, akunum kekepse.

¹³ Diba, sik malye tuba wininyak nang ara, kum danamak bukni, ance nunti, “Aning ara, wininamlume. Aning ara, pia kum wininamlume,” nyapdeiamsulum yupu uk talikirye, diksukum telebuk wininyak nang nirya ara, pia telebuk wininamake. Sikce unamak ning nirya ara, telebuk unamle! Ara, pia teleb cang yo, el si ara kurma yo palamle touk, unamake. Ara, winipmanto, Libanon mutuku noutam ara, weik yo, el si aras yo mikip arye tiklirye, cang ap, urasin teleb ap, ulamle touk, ance sik diksukum wininyak nang ati, telebuk winiliminyeba, pia telebuk unamake!

¹⁴ Winipmanto ning ara, teleb yo yala bobuka, an si eren aik dam koubikiba, weik palamle. Winiplyeba, dola kwelamak touk ance melisiminyeba, sik diksukum wininyak nang ara, telebuk wininamake. Diba, an si eren aik dam, mitik yo koubiceba, weik palamle atonun, sik diksukum wininyak nang ara, ance areamsulum mutuku, Israel nang unyap mutuku noutam nirya ara, telebuk wininyabe.

¹⁵ Sik diksukum wininyak nang ara, wisi akunum dayikce, telebuk winikirye, sikce talibuka dolamak pil nirya babye, nong upnamle. Winipmanto ara, teleb yo koubikiba, teleb kibuka palamle touk, yo imbik ulamle touk, anang babye, tuba teleb winina ap, mikip una ap, unyake.

¹⁶ Wininyaka deice arye, yuk nang nirya eibikirye, ‘E, dipkoprob nun ni Yahweh arye, “Aning ara, wininamlume. Aning ara, pia kum wininamlume,” nyabuka, peteresilye touk, el babye diksukumuk pia teleb winilule,’ tenebikirye, sik bita bikinyake. Diba, na ni Allah Yahweh, elda pia malye un ning tonok babye, pia kum winilirye, diksukum winin ninguk talibuka winilule. Elce nati, pia melibuka kalikinulule. Winipmanto ara, weik mutuku bun keil atonun ulule. Ati, el dam binuka winibibyeura, ikin ning, nun dam kum yanganamsile.