Mazmur 90 - Eipomek

“Allah elda, ninye unyakak ati, melinanye ulule,” nyabuk yupu

¹ Allah el pil donanye Musa arye, Allah ati morobukce, mot sebuk. Diba na ni Allah Yahweh, anda nun damak umince, minop arye melilyangalamsuluma ani, pia ati, melipnin banamsilame.

² Tonda, mutuku-mutuku nirya, min kum kwepdeialum talak arye aulalume. Tukwak mutuku ap, mutuku-mutuku nirya ap, min kum kwepdeialum talak ara, anda akunum aulalume. Allah an Kam Una Deiyoknye anya arye, pia ati, aunauk unalame. Atalak arye diprongobuka, dounamle talak babye, kam pia ati unalame.

³ Na ni Allah, ancuk ninye isin arelamsulum ning ara, tuba tamubuka dopropsiminba, dibinyabe. Dibipyopura, nun nong bobuka, kwepdeiamsulum tuku deiceuk, binuka deipsicopura, atuku atonun dananyabe.

⁴ Na ni Allah, ance tenelyam ning ara, keting tamun yupa pia weik, seribu tahun kiplyeura, ‘Ara tonok sum atonun uple,’ tenelyame. Tonda, keting tamun yupa weik, seribu tahun uplye babye, tonok sum atonun tenelule. Tonda keting tamun yupa weik, seribu tahun uplye babye, ara tonok lukunyan atonun tenelule.

⁵ Ance ninye isin arepsulum ning, tamubuka dopropsiminye talak ara, winipmanto ara, lengdar mabikirye, kanye nep-nep alamak atonun unyabe. Tonda, maning kwapu bongobuka, tikaplya ani, sesal selolamleto, nun ninye babye, lik tonok kam unmapya ani, adiparyuk dibinyabe.

⁶ Ara, beren tam talak dolkua nirya papliba, el urasin teleb ubuka tiklamle bukni, keting deipliba, keting buppu arye, sintam ara, kolulamle. Dolkua koluldolamle tonun, nun ninye babye, adiparyuk dibinyabe.

⁷ Na ni Allah, nunce malye winibipyopura, an yu upkiliba, nun isin arepsulum ning ara, minopce tamubuka dopropsiminyeura, talima nebum-nebum alamsil tonun, unyabe. Malye winibibya deice, ance nunti, yu tenepsiminye talak ara, adiparyuk kum danalisilyame.

⁸ Na ni Allah, nun malye wininyap ning nirya ara, ancuk kel bikisilyame. Tonda, ‘Ninye arye kum dinmaniake’ tenen, malye wininyap ning nirya ara, an asing arye eibuka, akunum bikisilyame. Anda dirina weiknye ulyama anya arye, nun malye wininyap ning, kum dungnuptibye.

⁹ Malye weik wininyaba deice arye, Allah an yu upkiliba, nun kam una ati, lo ara, mitik bumanguk arisilyame. Aketing tamun, aketing tamun nirya, upnin balamipya ani, sirya talak ara, isin arepsulum ning, tamubuka dopropsiminyeura, malye nyabuka ngalukibirye, adiparyuk dibinyabe.

¹⁰ Nun kam una ati, keting tamun lo arepsulum ning ara, tujuhpuluh tahunuk (70) kipdeipsulume. Mikip arye unyap nang ara, keting tamun delapan puluh tahun (80) unyabe. Bukni, aunyab talak nirya ara, teleb ton kum unyabe. Kanye imun ning ap, uk din dina deiceuk, upnin balamipya ani, sirya talak ara, ance isin arepsulum ning ara, tamubuka dopropsiminyeura, dibinauk unyabe. Nunce tenenyaba ara, ‘Pia kamuk unamaba,’ tenenyap bukni, minopce dibinyabe.

¹¹ Yatanye birye ton, Allah ance nun malye wininyap ning ati, yu tenesiminye ning ara, moubuka kel biktu do? Ati ara, Allah ance, ninye tukwak ninye malye wininyap ning ati, weik yu weik ukulule anya arye, tukwak ninye nirya ara, antibuk, ilil weik unamsile.

¹² Ati ara, na ni Allah ancuk nunti, “Anggun kam unamlum talak ara, lo weik kum anya arye, moubuka nukuldenamlulume. Ara, ‘Malye ubipyak’ tenen, atalak-atalak nirya ara, pia moubuka wininamlulume,” nyabuka peterepsiminba, nun kel bikibirye, aninguk talibibirye, moubuka wininamabe. Winibibya deice arye, kel bikna deiyok ning, kel bikibirye, unamabe.

¹³ Na ni Allah Yahweh, dan talak nirya arye, ance nunti, tonap yu kanye bonamsilam do? ‘Nun ti yu tenesiminye ning ara, batakmince, tamubuka bico tenepsimince, lyepropsutume’ tenen, moropkine. Nunda an amu tamuk unyaba anya arye, bico tenepsilyame.

¹⁴ Na ni Allah, ‘Ance nunti, bico tenepsimince, an teleb winin ning, asum-asum lukunyan nirya, weik arye arenamsilam’ tenen, moropkine. Winipsiminba, nun kam unamap talak nirya ara, antibuk si erebuka ubirye, pin-pin asa, mot senamabe. Bico tenepsimince, melipsiminyeura, kil-kil kanye bobuka, telebuk unamabe.

¹⁵ Na ni Allah, nun malye winibupu dekna ati, ikin ning areamsulumba, dololamupu ning nirya ara, ‘Apununa ati, kanye teleb bon ning, weik arye arenamsilam’ tenen, moropkine.

¹⁶ Na ni Allah, ance ninye winipmanto kum pil dolyam ning ara, an amu tam pil donyap nang, nun damak winipsiminba, eibuka kel kipnamabe. Ance, ninye kum winipmanto pil, weik mambul pil ton, nunce deipnamap mapu ati, opminba eibuka, kel kipnamake.

¹⁷ Diba, na ni Allah Yahweh, ance nun bico tenepsimince, melipsiminyeura, kanye deibuka telebuk unamabe. Tonda, ance nunti, melipsiminyeura, ‘Nun pil donamaba nirya ara, teleb aryuk nong upra banamsile’ tenen, moropkine. Nun babye mikip adiparyuk, kum winiptibye anya arye, ‘Allah ance mikip arepsiminba, pil teleb ubuka donamabe’ tenen, moropkine. Musa arye Allah ati morobuk.