Mazmur 62 - Eipomek

‘Allah elcuk nunti, melibuka lyelosulule,’ nyabuka, mot deice nyabuka, sekuk yupu

¹ Raja Daud birye, Mazmur mot sekuk. Ara, ‘Allah yupu mot, el si Jedutun lelim nyalamle touk nyanamak’ tenen, sekukce, Allah yupu mot nyana deiyoknye biti, arebuk.

² Na kanye pum tam arye, ‘Na ni Allah aryuk lyepnamnile’ tenepnirye, ilil tenena kumce, talye kanye bobuka unune. Ara, na ni Allah, elcuk melibuka lyepnamnila ati, el tibuk diba tenenune.

³ Winipmanto ara, weik mutuku kon keil deiya dam duknupniba, na mal on nang arye, kum yanuka opnitinga atonun, Allah ara, el mikip weik deice arye, nati melibuka lyelonulule. Yuknye birye, pia kume. Diba, Allah arye pia weik tonun melibuka kalikinulula ati, na ilil pia kum unamne. Tonda, ilil ati, na nong nirya, sirim kum talipnamnile.

⁴ Bukni, sik yu nang ara, yata talak arye, yuk nang ati, opnamlum do? Winipmanto ara, basam poka daksakmanto uplyopura, ninye arye ayo nirya ulultaklamak touk, anggunce sik lik tenelulum nang ati, tuba-tuba onauk wininamlum do?

⁵ Sik yu weik nang ara, ‘E, yuk nang arye, aninye deiyok nang ati, ‘Telebe,’ nyabuka, si erebuka kinyaka ati, ‘Aning ara nun likʼ tenen, ‘Ati ateleb nanguk opnamabe,’ tenebikirye, pia tenenauk unyakce, yupu talinyake. Tonda, talye yupu nyana ap, kwinisa don yupu ap ara, sikce, ‘Aning ara, telebe uka,’ tenebikirye, kanye deibuka, pin-pin kanye bonyake. Sik si bambol arye nyakce yupu ara, tenepce arye, kekena teleb yupu nyanyak bukni, dipkoprob sik kanye talima noutam ara, ‘Anang ara, nun pia lik,’ tenebikirye, lik yupu nyanyake.

⁶ Wininyak bukni, nara, ‘Na ni Allah, elcuk lyepnamnil’ tenen, yupu nyana kumce, talye kanye bobuka, tunim anauk unune. Deiyok ara, narye, ‘Kume, Allah elcuk melibuka lyepnamnile,’ tenepnirye, el deiceuk na kanye talima deipnirye, elti, pia dib tenenune.

⁷ Allah elcuk weik mutuku kon keil atonun ulula ati, elcuk nati, kaliknilirye, lyelonamnile. El Allah damuk unyopura, kalikiniliba, nara telebuk unamne. Ati, ilil kum unamnile.

⁸ Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.

⁹ Ati ara, anggun tukwak mutuku noutam ululum nang, mutuku sirya, im sirya nirya ara, Allah atibuk, diba tenebuka, el deiceuk anggun kanye talima delinamlume. Tonda, anggun kanye talima noutam, ikin usulul ning nirya ara, el tibuk laka nyanamlume. Diba, Allah ara, nun lyena deiyoknye usulule. Elce melibuka kalikinamsile.

¹⁰ Mikip kum nang nirya ara, tonok isin atonun unyaka ati, sikce pia kum lyepsitinge. Atonun, sik pia mambul weik nang babye, sikce kum lyepsitinga ati, sik bidamang lengdar deice arye, elilamak ning atonun unyake. Talye bona utotoa talina kum nang babye, weik nang babye, sik nirya ara, mambul nang kume. Winipmanto ara, bona dobuka, ‘El ikin ara yata barye kilo do?’ tenen, timbangan deice deibikcopura, sik ikin ara, pia mitik diamuk ulule. Sik tukwak nang ara, weik mambul nang kume. Diba, talye bona utotoa kum nang babye, weik bona talin nang babye, sik nirya ara, mambul kum ati, winipmanto ara, ‘Ikin ulul do?’ tenen, timbangan deice deiptibya babye, sik ikin ara, pia kume. Sik nirya ara, tonok isin atonun unyaka ati, sikce kum melibuka lyepsitinge.

¹¹ Tonda, ‘Yata ning arye melipnutu do?’ tenen, ‘Yuk nang ati, ikin ning, sik nong deice deipnyopura, sikce namin kin yo bok weik arepnitinga deice arye, aning melipnamnile,’ tenena kume. Atonun, ‘E, yuk nang, sik bona, ‘Naʼ tenen delinyak sukum weknirye, aning nirya ubula dopropnyopura, aning nirya arye melipnamnile,’ tenena kume. Tonda, aning atonun, aminyan talak sik bona weik upnin baliba, bona talin nang umunyopura, ‘E, na yo bok ap, bona ap, weik aupmanilba, talinuna deice arye, bona talinanye akunum ununa ati, aning arye melibuka lyelonamnile,’ tenena pia kume.

¹² Nun ni koproba Allah arye, uku tonok talak arye akunum nyapdeipsuke. Tonda, uku bitinye ap, tuba weik talak ap, akunum nyapdeipsukba, na ton kekelamse. Allah arye nyapdeipsuka ara, ani. “Dipkoprob mikip weik uning nirya ara, na Allah aryuk talinune. Yuk ning nirya ara, mikip kum ulule,” nyabuka, nyalilamsukba kekelamse.

¹³ Tonda, na ni Allah, na akunum bikse. Allah Yahweh, ance akunum nyapdeiamnulume. “Narye weik bico tenepsinirye, anggunti, ‘Winibuka, pia teleb kipdeipnamsine,’ nyabuka, nyalin yupu deice nyapdeiamsulum ning nirya ara, dipkoprob pia wininamsilame. Tonda, yata nang do nirya, sikce winilamik touk, ance aning dipdelumce, nun winilamap touk, deken ning aresilyame. Ara, teleb wininyak nang ati, teleb kililyame. Malye wininyak nang ati, wenebuka ikin ning aresilyame.