Mazmur 61 - Eipomek

Allah arye, aning-aning nirya tabakuka, aresulul ning ati, Daud birye telebe nyabuka, Allah el si erebuka, mot nyanmok yupu

¹ Mot nyana deiyoknye Daud, elce bilkong ning, el si kecapi dobuka, Allah ati si erenmokce, mot nyanmok.

² Na ni Allah na moronmakin ning nirya ara, ance moubuka kekepnilyame. Tonda ance eipnimince, moubuka kel kipnilyame.

³ ‘Na ni Allah, narye anti, “Melipnilyame,” nyabuka, moropkine ning ara, an dam arye kum morokunune. Pia yukak arye morokunune. Wininuna anya arye, ance na moropnukin ning, kum kekepniminyopura, ‘Yata deiyok ati, kum kekenulul do?’ tenen, teniltonauk unirye, malye kanye bonune. Na kanye talima mitang unulule. Tonda, Allah ance na bobuka, yuk mutuku binuka deipniminba, pia darabuka unamne. Ara, abinuka unamne mutuku ara, ‘Weik arye erebuka, bukuk mutuku pia teleb sukumuk binuka, dobuka deipnamnilame’ tenen, moropkine.

⁴ Aning ati ara, Allah an mikip arye, kalikuka meliniminba, an amu tam unune. Adeice arye, ‘Na mal olan nang arye opnikcak’ tenen, winipmanto ning ara, ance pia kat keil aik dobuka, kintinip deipnimince, lelipdongopnamnilyame. Winipniminba, kanye lamapdongobuka, dakeiyam asa, an amu tam unamne.

⁵ An mikip arye kalikuka melipniminba, na kam unamne talak nirya ara, wininyeba na ni Allah an mikip arye, talipniminya deice arye, telebuk pia darabuka unirye, ‘An pol amu tamuk pia unamne’ tenen, moropkine. ‘Aning ara, dipkoprob nong upnamle’ tenena ati, Selah nyapne.

⁶ Aning ati ara, na ni Allah anti, “Wininamkine,” nyabuka, narye nyalin yupu, an dam akunum nyamkise ning ara, kekepnulume. Aning kekepniminyopura, pia teleb ning arenamnilame. Ara, yata ninye do nirya, sikce an Allah ati, ‘Elda weik mambule’ tenen, diba tenebikirye, Allah ati ilil ulul ninye ati, ance teleb ning arelalam atonun, na babye atonun kibuka, akunum arenilyame.

⁷ Ati ara, nara Israel yala ninye ati, ninye deiyok talibuka, Raja ununye bira, na kam una ati, lo weika arye arepniminba, ‘Naryuk dordeipdanin, banamak ninye nirya talinamne’ tenen, moropkine.

⁸ Tonda, winipnirye amutuku nirya ara, ‘Naryuk pia ati talinamne’ tenen, moropkine. Ara, Allah ance nati, ‘Elda Israel ninye talibuka unamle ninye deiyoknye,’ tenelamnuluma ati, wibuka deipniminba, narye, ‘An dam ninye deiyoknye, pia unamne’ tenen, moropkine. Allah ance bico tenepnimince, erebuka deipniminba, nara an amu tam pia kanye lamapdongobuka unamne. Winipniminyeba, ‘Na mal olan ninye arye, kum yanuka opnamniak’ tenen, moropkine.

⁹ Winipniminyopura, narye Allah an si erena ati, mot teleb-teleb nyanirye, pia an siuk erenamkine. Adeice arye, asum-asum nirya, an si kinamkine. Wininunce anti, “Wininamkine,” nyabuka, nyalin yupu deice nyapdeiamkise ning nirya ara, naryuk wininamne. Narye, batakna kum diparyuk, aninguk wininamne. Daud birye nyabuk.