Mazmur 55 - Eipomek

Ikin ning areninyak nang ati, ‘Allah arye melibuka kalikinamnil’ tenen, morobuk yupu

¹ Raja Daud birye, aMazmur mot yupu sekuk. Ara, ‘Israel nang peterena ati, Allah yupu mot nyana deiyoknye biti, sekuka arebuk. Amot ara, kitar atonun, el si kecapi deice arye, nyanamake.

² Se, na ni Allah, narye moropnukin ning ara, kekepnutumce, melipnutum’ tenen, moropnukine. Narye anti, ‘Melipnilyame,’ nyabuka, moropnukin ning ara, ‘Dauaplyeʼ tenena kum bukni, ance moubuka kekepnulilam’ tenen, moropkine na nio.

³ Ati, ‘Ance moubuka kekepnimince, na moropnukin ning melibuka arepnimince, lyepnamnilam’ tenen, moropnukine. Se, na ni Allah. Na ikin unulul ning ati, ‘Yata wiriptinye do?’ tenen, tenen ning ara, ikin kanye bobuka, teniltonauk unulule. Na ikin unulul ning ati, talima uk dinululba, imun kanye bobuka unune.

⁴ Na deice, ikin weik ning dobuka, delininyak nang ara, sikce yupu weik deice arye malye nyanyake. Sikda, malye ning talibuka unyak nang arye, nati kanye imun ning delininyakce, yupu weik deice arye, malye nyanyake. Sikce, ikin weik ning bobuka, na nong deice delinikceba, ikin kanye bonune. Sik kanye pum tam ara, nati yu weik uplyeba, ‘Anye bira, nun pia lik ati, elti, opnuyabe,’ nyaninyake.

⁵ Aning ati ara, ilil upnilyeba, na talima dakalsanulule. Tonda, ‘Sikce opnikceba, dadipnamne,’ tenen, ilil weik unulule.

⁶ Ilil weik unulula ati, na nong nirya ara, dipna atonun unulule. Winipmanto ara, weik mek oplirye, aning-aning nirya bolamle touk, ilil weik unulula deice arye, yuk ning nirya ara, kum tenepmanto unune.

⁷ Imun kanye bobuka ununa ati, narye, ‘Se, winipmanto ara, yalma maka pol atonun upnutuba, adiparyuk lakuka bindoptinye’ tenen, patanulule. ‘Yal ma maka pol atonun upnutuba, minopce lakuka, ninye una kumak bitinirye, didik septinye,’ tenenune.

⁸ Diba, nara yalma maka pol atonun deice arye, lakuka bindoptinyeura, pia karin mutuku bitinye. Pia karin mutuku lakuka bitinyeura, ninye pia una kum mutuku, pata mutuku noutam, ninye pia kum unyakak, dungnubuka uptinye,’ tenen, patanulule.

⁹ Winipmanto ara, weik kumanya ap, mok ap, liman ap yalyeba, ilil usilye touk, ‘Yu nang arye opnikcak’ tenen, ‘Minopce, bikbik abuka bindoptinirye, duknupdoptinyeura, teleb ubuka uptinye,’ tenenune.

¹⁰ Diba na ni Allah, anda aning-aning nirya talemince, Pia Mikip Weiknye ulyame. Na deiyoknye ulyame. Ati, narye anti moropkine. Sik yu nang arye nyanyak yupu nirya ara, ‘Ance sik yupu kum kipdeipnulam’ tenen, moropkine. Deiyok ara, na unye weik asik noutam ara, sik yu nang arye, yuk nang ati ona ap, malye nyana ap, malye kilina ap, imun kanye un ning ap, weik tonun winibikceba, elinune. Ati, ‘Ance sik anang wininyak ning nirya kum kipdeipnalam’ tenen, moropkine na nio.

¹¹ Sik yu nang arye, keting noutam talak babye, lukunyan talak babye, anyasik dana-dana tam domik keil poka deice tam bakirye, ‘'Yata malye winin ning ton winiptibye do?’ tenen, dipdebanyake. Ayu nang arye, sik malye winin ning ati, nun weik asik noutam ara, malye winin ning ap, ninye ona ap, yupu arye nyalana ap, imun kanye bobuka un ning ap, pia weik aulule.

¹² Nun weik asik noutam ara, ninye ap, aning-aning nirya ap, pia malye weik akunum kipnin balule. Tonda, nun weik asik noutam ara, ninye arye aning-aning nirya dekenyak sukum, el si pasar ara, malye nang arye, yuk nang nirya ati, yanibikirye, tilila yupu weik nyanyaka deice arye, yuk nang nirya ati, ikin ning weik delinyake.

¹³ Bukni, na on nang, sikcuk, yep-yep abuka nyanikirye, malye kum kininyake. Na on nang aryuk, yanipnikirye, malye kipnitinga babye, narye, ‘Dauplye,’ teneptinye. Bukni, talye daunyak yu nang aryuk, ‘Anye nun lik’ tenen, mandipna kanye bobuka, malye kipdeipnikirye, kum yaninyake. ‘Yu nang arye yanipnikirye, ikin ning delilamniake,’ teneptinirye, sik kum eipnamniting sukum, binuka duknuptinye.

¹⁴ Bukni, wini talak ara, anda na tamnye, na kwit koproba ulyamnye birye, ikin ning delinilyame. Tonda, an ap, na ap, keting tamun weik arye akunum kanye deipdanuka, teleb kibuka neika ulamupu.

¹⁵ Diba, an ap, na ap, teleb yupu talilamnumurye, talye urdem teleb arye, neika ulamnumu. Tonda, na ap, an ap, nun Israel yala nang ap, weik tonun tabakuka, Allah el si eren aik binuka, Allah el siuk, neika erelamnumu.

¹⁶ Bukni, na ni Allah, ‘Ikin ning weik, na nong deice delininyak nang, sik wenena ati ara, ance dibin ning dobuka, sik deice deipnalam’ tenen, moropkine na nio. Ance sikti, wenepminyeura, dibikceba, adiparyuk akunum diamik nang unyak mutuku, el si ara, Sheol mutuku noutam binuka, aunamak’ tenen, moropkine. Aning ara, talye ati kum bukni, deiyok ara, sik kanye talima noutam ap, sik aik noutam ap ara, pia malye winin ninguk aulula ati, ance anang ati, wenepnamlyame, na nio.

¹⁷ Anang ati wenebuka opnamlum bukni, na ikin weik unilye talak nirya ara, narye anti, ‘Se, na ni Allah, ance melibuka lyepnilyame,’ nyabuka moronamkine! Na kel bikne, moropnyeura, Allah Yahweh arye, nati, dipkoprob lyepropnamnile.

¹⁸ Diba, yata talak nirya ara, beren tam talak babye, keting duk-duk babye, lukunyan babye, narye, na kanye imun ning ati, engepnerye, ngaluknyeura, na kele, na ni Allah arye, na moronun yupu kekepnilirye, dipkoprob melibuka lyepdopnamnile!

¹⁹ Ara, na on nang kan-kan arye lyepdopnilyeura, teleb kipdeipnilyeba, talye kanye bobuka, telebuk unamne. Yu nang weik arye bulubuka, nati yanipnikirye, ikin ning weik na nong deice deilininyaka ati, ‘Anang ara, malye kipnamne’ tenen, pia dobuka pirilenune. Aning nirya ara, Allah arye melibuka lyepdopnamnilarya!

²⁰ Allah ara, minop talak dodarapce, aning-aning deice tam erebuka ulamukce, mikip weiknye ulirye, aning-aning nirya talilule. Allah ara, na moronun ning kekepnilirye, nati ikin delinyak nang ati, weneplirye, anang bobuka, pia amu tamuk dadeipnamlarya! Deiyok ara, sik ayu nang arye, sik malye tenenyak ning ap, malye wininyak ning ap, ‘Se, nun malye unyaba ati, Allah arye biksuturye, na nin kipsuturye, aning nirya kum kipsutu’ tenen, kum moronyake. Tonda, ayu nang arye, Allah ati, ‘Nun malye wininyap ning ati wenebuka opsilyak’ tenen, ilil pia kum ulule.

²¹ Na kwit koproba ara, na ap, el ap, yuk nang ap arye, ‘Olana kumce, talye kanye bobuka, telebuk neika unamabe,’ nyabuka, nyalin yupu deice arye nyapdanamupu. Bukni, elce nati, ‘Deiyok winipnamname,’ nyabuka, nyalin yupu deice arye, nyapdanumu ning ara, akunum batakukce, malye kilinulule.

²² Anye birye, kekena pia teleb yupu nyanulul bukni, el kanye talima pum tam ara, ‘Narye anye biti, olbinyeura, anye opnamne,’ tenenulule. Diba, anye birye, pia namin yupu deice arye, teleb yupu nyanulul bukni, elce nyanulul yupu ara, dipkoprob ninye ona ati, parang ya atonun ulule. Nemalye aryuk, talye yupu uk nyanulule.

²³ Na kayapu nang, anggun nirya ara, kekepnululume! Anggun ikin usulul ning nirya dobuka, nun ni Allah Yahweh, el deice deipnamlume! Winipmunyeura, bico tenepsilirye, el mikip deice arye, melibuka lyelonamsile. Pia dipkoprob nyapsine. Allah arye, ‘Aning ara, wininamlume, aning ara, pia kum wininamlume,’ nyabuka, yupu talibikirye, pia diksukum kibuka wininyak nang ara, pia kum bataknamsile. Elce melisilya deice arye, nunce elti, ‘Diba,’ tenenyap ning ara, min kum upsutue. Tuba diba tenenauk unamabe.

²⁴ Bukni, nun ni Allah ara, sik malye wininyak nang ati, weneplirye, pia amu tamuk deipnamle. Ara, anang ati wenebuka oplye ning ara, sik dobuka, weik tuku pum tam, ninye wenelula noutam dopkwetepliba, daunamake. Ato malye nang ati ara, wenebuka opnamle bukni, nara, Allah Yahweh ati, pia diba tenepnirye, na kanye talima, el deiceuk deipnamne. Ara, sik yu nang arye, ‘Yuk nang optibye,’ tenenyak nang ap, ‘Yuk nang ati, malye kilinamabe,’ tenenyak nang ap ati, weneplirye, opnamle! Winipyeura, sik anang ara, keting tamun weik tonun ton, kam unamake. Bukni, sik kam unamak talak ara, minop weneplirye oplyeba, dibinauk upnamake.