Mazmur 5 - Eipomek

‘Allah arye melibuka kalikinamsilʼ tenen, moron yupu

¹ Allah yupu mot nyana deiyoknye biti, Daud birye aMazmur yupu sekuk. Amazmur mot nyan talak ara, mot nyan ning, el si ara suling talibuka, aning deice arye amot nyanamlume.

² Na ni Allah Yahweh, narye anti moropnukin yupu ara, moubuka kekepnamnilame. Na kanye talima daksaknil ati, narye, ‘Se, yata winiptinye do?’ tenen, ikin kanye bonuna ara, ance moubuka tenepnamnilame.

³ Na ni Allah, narye engebuka moronun yupu ara, ‘Moubuka kekepnamnilam’ tenen, moropkine. Anda, na deiyoknye Raja unilyame. Tonda, anda na si erenun Allah ulyame. Ati ara, narye, ‘Melipnilyame,’ nyabuka, morokununye bira, an uka.

⁴ Se na ni Allah Yahweh, beren tam talak arye, na morokunun yupu ara, ance tuba kekenilyame. Beren tam talak nirya ara, an morona ati, teleb ning kintinip deipnirye, anti arelyanganune. Aning akunum arepkinyopura, ‘Allah Yahweh arye yata yupu nyapnunil do?’ tenen, dina ap, moubuka kekena ap unune.

⁵ Na ni Allah, na kele. Anda pia malye un ning ara, ance aning eibuka kanye kum delilyame. ‘Aning ara, na lik,’ tenelyame. Allah an ap, malye wininyak nang ap, neika pia kum unamlume.

⁶ Atonun, sik maknya kintinibikirye, kwalinauk unyak nang ara, an dam yanuka, pia kum tiknamake. Deiyok ara, sik pia malye ninguk talibuka wininyak nang ati, ance, ‘Anang ara, na lik,’ teneplume.

⁷ Sik tilila yupu nyakce nang ara, ance wenebuka opminyakarye, sirya daknulyame. Allah Yahweh, anda sik yuk nang olamak nang ap, talye yupu nyakce nang ap ara, ance, ‘Anang ara, na pia like,’ tenelyame.

⁸ Bukni, ance, “Winipnamsine,” nyalin yupu deice nyapdeiamsulum ning ap, weik tonun bico teneseminya deice arye, ance lyenilyame. Ati, narye, an si erena ati domik aik pum tam wekelyanganamne. An si eren aik pum tam, Pia Teleb Lek Aik ubuk tam ara, eipnirye, an si erebuka kina ati, an dam ara, na urasin tuku deice deipnamne. Winipnamna deiyok ara, narye anti, ‘Se Allah bira, pia teleb ulule’ tenen, ilil upniliba, an siuk erenamkine.

⁹ Na ni Allah Yahweh, ance, ‘Diksukum bisikuk binuka unamle,’ tenepniminyopura, nara, ‘Abisikuk binamne,’ tenen, pia patanulula ati, ance nyapdeipnulum yupu deice arye, abisik peterepnamnilame. Ara, nati, ‘Anye bira nun lik,’ tenen, na mal olan nang unyaka ati, ‘Diksukum un bisikuk peterepnamnilamʼ tenen, moropkine na nio. Winipmanto ara, ninye arye teleb bisik yabukabikirye, pia punguk ulamle touk, nara, ‘Ance melipniminya deice arye, dipkoprob bisik diksukum arye unamne’ tenen, morokunune.

¹⁰ Ara, talye ati kum bukni, sik malye wininyak nang ara, sik kanye talima noutam dipkoprob yupu pia kum ulula ati, anang arye nyakce yupu ara, ‘Diba’ kum teneptibye. Tonda, sik kanye talima noutam ara, ‘Yuk nang ati, pia ikin ning, sik nong deice deibibirye, anang opnamabe,’ tenenauk unyake. Winipmanto ara, ninye weina ati, tuku palipmakca pum tam ara, lakauk kiplobikcopura, yuk nang mangkau arye bakiba, atuku pum tam sakuka olanyaka atonun, amalye unyak nang ara, sik kanye talima noutam ulye ning nirya ara, pia malye un ninguk ulula ati, yuk nang nirya ati, malye kilinyake. Tonda, sik malye ninguk talibuka wininyak nang arye, yuk nang ati, ‘Sikda nunti, kanye deipnusiyak’ tenen, ‘Anggunda telebe. Nunce kanye deipsiyabe,’ nyabuka, tilila talye yupu nyanyak bukni, dipkoprob ning ara, sik kanye noutam arye, ‘Anang ara, nun lik,’ tenenyake.

¹¹ Ati ara, nun ni Allah, anang ara dipkoprob pia malyeuk unyaka ati, ‘Ance anang ati, mikip arye wenebuka opnalam’ tenen, moropkine. Tonda, sik kanye aryuk, ‘Malye ninguk wininamabe,’ tenenyak ning deice arye, sakikirye, malyeuk updeipdanamak’ tenen, moropkine na nio. Tonda, ance nyasilyam yupu yanibikirye, sikce pia malye un ning weik tonun unyaka ati, ance anang ati, ‘Yakuka dokwetepmince, wenepnalam’ tenen, moropkine na nio. Anang wenepnamlama deiyok ara, sikda ance, “Aning ara wininamlume, aning ara pia kum wininamlume,” nyapdeiamsulum yupu nirya ara, sikce yaniltana uk unyaka ati, anang wenepnalame.

¹² Bukni, yata nang do nirya, sikce, ‘Kume, Allah el damuk ubibiba, elcuk melibuka kalikinamsile’ tenen, an dam tuba unyak nang ara, ‘Ance melipminya deice arye, kanye deibuka unamak’ tenen, moropkine. An damuk unyak nang ara, ‘Sikda pia, kanye lon mot nyabikirye, pia teleb kanye deibuka unamak’ tenen, moropkine. Allah an damuk unyak nang ara, ance, ‘Pia melibuka kaliknalam’ tenen, moropkine. Winibuka melipsiminyopura, yata nang do, anti kanye deibikirye, an damuk unyak nang arye, an Allah ati, ‘Se, nun ni Allah bira, pia telebuk ulule,’ tenebikirye, an siuk tuba-tuba erepkikirye, anti, kil-kil kanye bobuka unamake.

¹³ Aning deiyok ara, ani. Ara, ance, “Aning ara wininamlume, aning ara pia kum wininamlume,” nyapdeipsulum yupu nirya ati, sik diksukumuk unyak nang nirya arye, aninguk talibuka unyaka ati, anda nun ni Allah Yahweh arye, anang ati, pia teleb kililyame. Sikda, pia telebuk unyake. Winipmanto ara, sik yin talin nang arye, ‘Yuk nang arye mal dobuka opsikcak’ tenen, sik nong lelin ning, el si perisai, bobikirye balamak touk, ance sik diksukum ninguk talibuka unyak nang ati, pia melibuka kalikimince, anang ati, pia teleb kililyame.