Mazmur 39 - Eipomek

Daud birye Allah ati, ‘Melipnilyame!’ nyabuka morobuk yupu

¹ Raja Daud birye, ayupu Mazmur mot sekuk. Ara, Allah yupu mot nyana deiyoknye arenamika ati sekuk. Aning ara, Allah yupu mot, el si Jedutun lelim nyalamle touk, winibuka nyanamlume.

² Narye nyapse. ‘Kume, ‘Mangkau arye malye winipnyakʼ tenen, narye wininamne ning nirya ati, ‘Aning ara teleb do, kum do?’ tenen, moubuka teninamne. Ara talye ati kum bukni, deiyok ara, ‘Mangkau arye malye yupu ton nyapnyak’ tenen, moubuka teninamne. Ati, talye lukdanuka talye-talye yupu pia kum nyanamne. Min yuma moubuka tenipnirye, teleb ninguk nyanamne. Winipmanto ara, kuda basam arye, mikip dobukaplirye, bikbik abuka bindoplyak’ tenen, el si bambol tapu koulongolamak touk, narye moubuka tenipdenirye, yupu nyanamne. Ara, sik malye winin ning talibuka wininyak nang ara, na dam unamak talak nirya ara, na nyanamne yupu ara, moubuka tenipnirye, teleb ninguk nyanamne.

³ Min talak ara, yupu nirya nyana kumce, talye tunim abuka unmase. Atalak noutam ara, narye teleb winin ning babye, pil kum dolamse. Talya tunim abuka ulamsirye, yupu babye kum nyalamse. Winilamsa ati ara, ikin upnukba, imun kanye bobuka, minop talak ulamase.

⁴ Winibuka ulamasa ani, na kanye talima noutam ara, ilil upnukba, tuba teninauk unmasirye, weik ikin kanye bopmase. Winipmasa ani, aminyan talak ara, narye yupu nyapsirye, Allah ati moropse.

⁵ Ara, ‘Se, na ni Allah Yahweh, yata talak ton kam unamne do? Na kam unamna talakk ara, ouku weik tonun ton, lo unamne do, mitik tonunuk do? Bukni, nun tukwak nang ara, keting tamun mitik tonun dem kam unyaba ati, ance aning lake nyapniminba, moubuka biknirye, telebuk wininamne.

⁶ Na kele, ance nati, ‘Anye bira, keting tamun mitik tonun dem kam unamle,’ akunum tenepnulume. Ati ara, na kam unamne keting tamun nuktinyopura, mitik tonunuk kipnamle. Tonda, ance teneplum ning ara, ‘Ninye tukwak unyak talak ara, pia mitik tonun kam unyake,’ tenesilyame. Winipmanto ara, ninye tukwak nang nirya, kam unyap keting tamun ara, tonok ulule. Ninye isin ara, mok puru yo bok deice palipmalya miklamle touk ulule. Pia mitik tonun dem ulule.

⁷ Dipkoprob nun tukwak nang nirya ara, ouku mitik tonunuk unyabe. Winipmanto ara, minop kum danin balamle touk, nunda kam ulamepya ani, adiparyuk minop dibinyabe. Dipkoprob nun tukwak nang nirya ara, ouku mitik tonunuk unyabe. Winipmanto ara, minop kum danin balamle touk, nunda kam ulamepya ani, adiparyuk minop dibinyabe. Ninye tukwak nang nirya ara, ‘Aning-aning weik tonun bulubuka dopropnirye, aning nirya talipnamne’ tenen, pil weik tonun donyap bukni, dipkoprob ning ara, ‘Aminyan talak yatanye birye, na taleamse ning nirya dopropnamle do?’ tenen, pia kum teninyabe. Aning ara, nun walwale.

⁸ Ati ara, wini talak ara, yata ning ati, pia moubuka teninauk unun do? Kume, wini talak ara, narye, Na ni Allah atibuk moubuka tenenune. Elcuk, nati melibuka lyelonamnile,’ tenenune.

⁹ Ati, na ni Allah, narye malye winilamse ning nirya ara, namin kipnutumce, kum kilinamnilam’ tenen, moropkine na nio. Tonda, walwal unyak nang arye, nati, “E, anye bira, walwalnye, aning-aning kum bikamuknye ulamuk,” nyabuka, nalipnikcak’ tenen, ‘Ance sik yupu seknalam’ tenen, moropkine na nio.

¹⁰ Na ni Allah, ance ikin ning arepnuluma ati, narye yupu ton kum nyapnune. Talya tunim abuka unamne.

¹¹ Bukni, ‘Ance na wenena ati, ikin ning arepnulum ning ara, dopropmince kum kipdeiptum’ tenen, moropkine na nio. Ance na wenena ati, ikin weik ning arepnuluma deice arye, na talima uk dinilirye, pia mitanguk unulule.

¹² Nun tukwak nang nirya ara, malye ubibiba, ance, ‘Sik bikinamak’ tenen, wenepsimince, ikin ning aresilyame. Winisiminye talak ara, nunce, ‘Se, aning ara, pia teleb ning,’ tenen, talinyap ning ara, malye kipdeipmince, nun talinyap ning nirya ara, minopce kum danasulule. Winipmanto ara, sikce, baju deibikiba, dilirye, minop malye kipnin balamle touk unyabe. Diba, nun tukwak mutuku unyap nang ara, isin aryuk unyaba ati, nun adiparyuk dibinyabe. Winipmanto ninye isin ara, mok puru yo bok deice palipmalya ani, miklamle touk usulule.

¹³ Ati ara, na ni Allah Yahweh, na moropkin yupu ara, kekepnilyame. ‘Ikin uniliba, engena deice arye morokunun yupu ara, kekepnamnilam’ tenen, moropkine na nio. Tonda, ‘Engepnirye, na asing maka sakanilya deice arye morokunun ning ara, luba kum kipnamnilam bukni, minop kekepnamnilam’ tenen, moropkine na nio. Tonda, ‘Engepnirye, na asing maka sakanilya deice arye, morokunun ning ara, luba kum kipnamnilam bukni, minop kekepnamnilam’ tenen, moropkine na nio. Tonda, nara, na punun nang ap, na apu yapu ap, ninye asik nang atonun ubuka, keting tamun mitik tonun dem mapnarye, diplamak touk, na babye, minopce dipnamne.

¹⁴ Na ni Allah, na wenena ati, ance tuba dinimince, ikin ning arepnulum ning ara, bataktumce, luba kipnutumopura, tuba tonap teleb ubtinirye, kanye deiptinye. Kumopura, na ikin unilya deice arye, minopce dipnyopura, tunim apnamne. Amutuku noutam ara, dipnirye bindopnyopura, tunim aplirye kum danamle.