Mazmur 37 - Eipomek

“Malye wininyak nang ati, ‘Se’ tenen, malye kanye bobuka, kum unamlulume,” nyabuk yupu

¹ Raja Daud arye nyabuk. Sik malye winin ninguk, talibuka wininyak ninye arye, malye winibikiba eipmunyopura, anggunce, ‘Se, yata wiripnamap do?’ tenen, malye kanye bobuka, kum unamlulume. Aning atonun, sik malye ninguk talibuka, malye weik wininyak ninye, eipmunce, ‘Se, sik malye wininyaka deice arye, talinyak ning ara, nun babye ton taleptibye’ tenen, ‘Seʼ tenen, mambul kirikna meme. Sik malye wininyak ninye arye, wininyak ning nirya ap, talinyak ning nirya ap ati, ‘Se, na babye ton doproptinye,’ tenena pia meme.

² Ayupu nyapmasina deiyok ara, talye ati kum nyapsine. Deiyok ara, ani. Winipmanto, sik amalye wininyak ninye ara, maning like tonok betekuka tiklirye, teleb kibuka papmalya ani, keting tin deiplirye, ting-ting apyopura, adiparyuk koulolamla atonun, sik malye winin ninguk, talibuka wininyak ninye nirya ara, ouku pia kum upre banamake. Tonda, ninye arye, wa wibuka din yala ning kouamikiba, mok kum celamlirye, adin bok ning deice kum opliba, el bok koululolamle touk, amalye wininyak ninye babye, ouku pia kum upra banamake. Pia kum unamake.

³ Anggunda, malye wininyak ninye ati, ‘Anang ara, teleb wininyake,’ kum tenenamlum bukni, tukwak mutuku noutamak unamlum talak nirya ara, ‘Allah elcuk melinamsil’ tenen, anggun ni koproba Allah Yahweh atibuk, diba tenepmunce, diksukum piluk donamlulume.

⁴ Anggunce, ‘Nun ni koproba Allah Yahweh, elda pia mambulnye ulula ati, el tibuk pia kanye deibuka unamabe,’ tenepmunce, Allah arye, ‘Aning telebe,’ tenelye ninguk, talibuka unamlulume. Winibuka winimunyopura, anggun talima pum tam arye, pia ‘Se,’ tenepmunba, teninmamunye touk, Allah arye arenamsile.

⁵ Ati ara, anggun nong nirya bobuka, Allah elti, arepmunce, utenenamlulume. ‘Allah elcuk kalikuka melinamsil’ tenen, el tibuk, weika arye dib tenepmunyopura, Allah arye anggunti, melinamsil ning ara, laka nyapnusine. Ara ani.

⁶ Yuk nang arye anggunti, deiyok kum upmasilibuk, lululan yupu deice arye, ‘Sik malye unyake,’ nyabuka, ikin ning anggun nong deice delinamsiak bukni, anggunce Allah ati, diba tenepmunyopura, aminyan talak anggunce diksukumuk winilulum ning nirya ara, Allah arye lakak kipdeipnamsile. Winipsilyopura, yuk ninye nirya arye, ‘Se, sikda dipkoprob teleb nanguk unyake’ tenen, biknamake. Winipmanto ara, keting duk-duk talak, keting mil pia weika arye ulamle touk, aminyan talak Allah arye, anggun teleb umunye ning lakak kipsiliba, ninye nirya arye eibikirye, kel biknamake. Anggunce telebuk winilamlumba, yuk nang arye, diba kum tenelamsiki bukni, aminyan talak Allah arye, anggun teleb winilamunye ning nirya ati, lakak kipdeipnamle talak ara, ninye nirya arye, kel biknamake.

⁷ Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.

⁸ Anggun diba tenelulum ninye nirya arye, yu una ap, yuk nang ati derelana ap, kum unamlume. Atenemunye ning nirya ara, batakmumce, balye tam kibuka, teleb winin bisikuk banamlulume. Anggun yu upsiliba derepdamunce, ‘Se, yata ati do?’ tenepmunyopura, aminyan talak ikin ning ap, malye winin ning ap, upnamsile. Ati ara, yu una ap, derelana ap, pia kum unamlume.

⁹ Anyapmasin yupu nirya ara, talye ati kum nyapsine. Deiyok ara, ani. Sik malye winin ninguk, talibuka wininyak ninye ara, Allah arye tenebuk talak, akunum uplyopura, Allah arye amalye wininyak ninye nirya ati, adiparyuk kum daneipnamle. Bukni, yata ninye do nirya, anggunce, ‘Kume, Allah Yahweh, elcuk melipnamsilarya,’ tenebuka unyak ninye ara, Allah arye arepliba, sik anang arye, amutuku nirya talibuka unamake.

¹⁰ Ati ara, tenipnamlulume. Sik malye winin ninguk, talibuka wininyak ninye ara, Allah arye kum kipdeipliba, epdenamap bukni, ton kum eipnamabe. Like mitik tonun ton, daulamepya ani, Allah tenebuk talak akunum uplyopura, amalye winin ninye nirya, kum daneipnamle.

¹¹ Bukni, sik kanye talima erena kumce, kanye lamapdongobuka, amu tamuk ubuka, diksukum wininyak ninye ara, anyarepnamle mutuku talibikiba, Allah arye aning nirya, talye tabakuka arepliba, pia telebuk kibuka unamake. Yuk ninye ap, kanye talima dukdongobuka neika unamake. Pia malye kanye bobuka, kum unamake.

¹² Malye winin ninguk, talibuka wininyak ninye nirya arye, diksukumuk wininyak ninye ati, ‘Sik anang ara, yata wiriptibya deice arye optibye do?’ tenenyake. Tonda, ‘Anang ara, yata wiribuka opnamap do?’ tenen, sik malye wininyak ninye arye, anggun teleb winimunye nang ati, yu kanye bobikirye, malye yupu nyasinyake.

¹³ Bukni, sik amalye wininyak nang ati, Allah elcuk tenelya ara, ‘Akunum dipna dam unamak nang’ tenen, Allah arye amalye wininyak ninye ati, nalibuka akutulule. Ara, talye ati kume. Elce, ‘Aninye ati, ninye yupu lipsisikuka bokeipnirye, aninye wenebuka opnamne talak ara, akunum dam upmala,’ teneplirye, aninye ati, akutulule.

¹⁴ Sik amalye wininyak nang arye, ‘Talye bona utotoa talina kum ninye ap, aning-aning nirya kum talinyakce, aning nirya patalul ninye ara, opnuyap’ tenen, ninye on parang ya dobuka kintininyake. Tonda, ‘Sik bona utotoa talina kum ninye nirya oplopnuyap’ tenen, mal pina kum-kum tam, yin tapu deice dinikinyake. Wininyaka deiyok ara, ani. Ara, ‘Diksukum winin ninguk talibuka, unyak ninye nirya ara, nun like. Aninye nirya ara, oploptibye,’ tenenyake.

¹⁵ ‘Diksukum wininyak ninye ap, bona utotoa talina kum ninye ap, opnuyap’ tenen, kintinilonyak bukni, sik mining abolamak tace ning arye, sik bidamnye aryukuk olilanamake. Tonda, sik abonyak yin nirya ara, lakuka saknamle.

¹⁶ Ati ara, narye nyapnusin yupu ara, moubuka kekeplulume. Allah atibuk, diba tenebuka wininyak ninye arye, talinyak ning ara, mitik tonun ulule. Bukni, sik malye winin ninguk talibikirye, talye lukparabuka unyak nang arye, talinyak ning ara, pia weik ulule. Sikda bona weik talin nang unyake. Bukni, Allah el kanye ara, ‘Diksukumuk wininyak ninye ara, pia telebuk unyake. Sik malye wininyak ninye arye, bon ning weik talinyak bukni, pia malyeuk wininyaka ati ara, na lik,’ tenelule. Ati, Allah arye utenelule. ‘Sik bona utotoa talina kum unyak bukni, diksukumuk wininyak ninye ara, teleb unyake. Malye ubica deice arye, bona uto-utoa talin nang unyak ninye ara, pia malyeuk unyake,’ tenelule.

¹⁷ Anyapmasin yupu ara, talye ati kum nyapsine. Deiyok ara, ani. Sik malye wininyak nang, sik mikip deice arye talinyak ning nirya ara, Allah arye, aninye weneplirye, kum kipdeipnamle. Bukni, Allah atibuk, diba tenebuka diksukumuk wininyak ninye ara, Allah el mikip weiknye birye, aninye ati, erebuka melilamliba, telebuk unamake. Allah arye diksukum wininyak ninye melibuka kalikilula ati, nyapsine.

¹⁸ Sik diksukumuk wininyak ninye ara, malye winin ning tonok ning babye, kum wininyaka anya arye, Allah el si Yahweh arye, aninye ati, pia moubuka elilulce, bikilule. Ati ara, Allah arye, sik anang ati, arenamle ning ayala-ayala nirya ara, pia kum kum danamle. Allah arye, sik menenga ning arepliba, aninye ap, aning ap, pia aunamle. Aninye ara, kum kum danamake, pia aunamake.

¹⁹ Diksukumuk wininyak nang, sik dam, weik imun ning yanamle talak ara, pia ikin upliba, sikce, ‘Se, yata wiripnuyap do?’ tenen, imun kanye bobuka, sik diba tenyamik ning, kum batakanyake. Pia ikin ning weik uplya babye, batakna kumce, pia kanye deibuka, telebuk unamake. Tonda, sik din patan talak unyaba babye, aninye sik unamakak ara, din ning tuba aupnauk unamle.

²⁰ Bukni, sik malye winin ninguk, talibuka wininyak ninye ara, sik dam kanye imun ning yanamle talak ara, pia ikin upliba, Allah arye aninye nirya, pia kum daneipnamle. Tonda, nun ni koproba Allah Yahweh ati, ‘Nun like,’ tenenyak ninye ati, Allah arye kum kipdeiplirye, sirya daknamle. Winipmanto ara, dolkua palamlya noutamak arye, kita ning mouplyopura, urasin pia teleb ulamle bukni, keting panaplirye, buppu weik uplyopura, minopce kolouplirye, akait ning akapsaklirye, kum ulamle touk, sik anang babye, kum danin banamake. Ara, daunmaca ani, uku pakanmalyak, tulum weleplirye, kum ulamle touk, sik malye wininyak ninye ara, minopce kum upra banamake.

²¹ Malye ninguk, talibuka wininyak ninye arye, yuk nang sik ning ati, ‘Na kwit, an ning ton areamniminyeba, aminyan talak, na ning dobuka, an ning punupnamkine,’ nyabuka, tilila yupu nyaltakanyak bukni, dipkoprop, sikce tia talak ati, dolonyak ning nirya ara, tamubuka kum arinyake. Bukni, sik diksukum wininyak nang ara, sik kayapu nang arye pataplyopura, sik patan ning kanye teleb arye, tabakuka arinyake. Bico tenebuka arinyak ning ara, mitik tonun arye, kum arinyak bukni, weika arye tabakuka arinyake.

²² Allah arye telebuk kibuka, delinamle ninye ara, sikce amutuku nirya talibuka unamake. Bukni, Allah arye, ‘Sik anang ara, malyeuk wininyaka anya arye, na like,’ tenenyak nang ara, amutuku noutamak, kum unamake. Yakuka yukak deiplirye, aminyan talak, aninye nirya, kum daneipnamle.

²³ Yata ninye do nirya, diksukum bisikuk banyak ninye ara, Allah arye aninye ati, melibuka kalikilule. Allah arye aninye ati melipliba, sik wininamak ning nirya ara, telebuk upliba, nong upnamle. Deiyok ara, Allah arye aninye pia moubuka talilirye, telebuk unamake.

²⁴ Winipmanto ara, Allah arye melibuka talinamle ninye ara, banamak bisik noutamak arye, yan dum keil duknamle bukni, tukwak sakuka, poulbikiba kum opnamle. Deiyok ara, ‘Aninye sakuka oplyak’ tenen, Allah arye anang ati, sik taruk moubuka talilule.

²⁵ Ara, talye kum nyapne. Na kam ulamse talak arye, dipdongobuka wisi deipse talak nirya unirye elinuna ara, Allah elti, diba tenekirye, diksukumuk wininyak nang ara, sik anang ati kum batakalule. Pia moubuka, tuba kalikilule. Tonda, sik anang deibikba, dadeipdanin yanganyak mapu nirya ara, Allah arye batakliba, ‘Yuk nang arye arenamsiak’ tenen, talye luba kibuka dilamak nang atonun, kum unamake. Allah arye aninye ap, sikce delinyak mapu ap ati, aning-aning nirya, talye tabakuka arelule.

²⁶ Allah atibuk diba tenebuka, diksukumuk wininyak ninye arye, sik yuk nang ati, “Na ning tia ati, dopropmaminya ani, tamubuka arepnamnilyame,” nyabuka, weika arye arinyake. Tonda, sikce yuk nang ati, talye arinyak ning ara, mitik anun kum arinyak bukni, aning nirya tabakuka arinyake. Ati ara, sikce delinamak mapu ara, Allah meliplirye, amapu nirya ara, telebuk unamake.

²⁷ Ati ara, malye unyak ning, aning-aning nirya batakmumce, teleb ninguk, talibuka wininamlulume. Winipmunyopura, adeice arye, anggunce deipmunyeba, dadeipdanin banamak ninye arye, aunyab mutuku nirya, talibuka unamake.

²⁸ Aning ara, talye ati kum nyapsine. Deiyok ara, ani. Sik diksukumuk wininyak ninye ara, Allah el si Yahweh arye, sik aninye ati, weik arye bico tenelirye, pia melilule. Tonda, yata ninye do nirya, nun ni koproba Allah ati, ‘Elda weik mambulnye ulula anya arye, el amu tamuk ubirye, elce nyalul yupu moubuka talibibirye, diksukumuk wininamabe’ tenen, telebuk wininyak ninye nirya ara, Allah arye, pia kum bataknamle. Aninye ap, sikce deibikceba, dadeipdanin banamak ninye babye, Allah arye aninye nirya ati, pia kalikuka melinamle. Bukni, sik malye winin ninguk, talibuka malyeuk wininyak ninye ap, sikce deibikceba, dadeipdanin banamak ninye nirya babye, Allah arye aninye ati, wenebuka oplyopura, sik nirya kum upra banamake.

²⁹ Allah ati diba tenebuka, diksukumuk wininyak ninye ara, pia ati amutuku talibuka unamake. Tonda, sikce deibikceba, dadeipdanin banamak ninye nirya babye, aunyab mutuku noutamak nirya, talibuka pia ati unamake.

³⁰ Diksukumuk winilulnye birye, yupu nyalula ara, moubuka teneplirye, weik kel yupu uk nyalule. Aning atonun, anye birye nyalul yupu nirya ara, teleb yupu uk nyalule. Ara, ninye arye winilamak touk ubuka, diksukum kibuka, yupu lipsisikuka bokolilule. Talye yupu ap, tenepce arye nyan yupu ap ara, pia kum nyalule.

³¹ El anye bira, Allah arye, “Aning ara, wininamlulume, aning ara, pia kum wininamlulume,” nyapdeiamsuk yupu ara, pia moubuka, kanye talima pum tam deibukce ulule. Allah el dipkoprob yupu uk, tenebuka winilula ati ara, el winilul ning nirya, telebuk winilule. Winipmanto ara, alap arye pitikuka saknabuk, kum olamla atonun, telebuk ulule. Aning atonun, toupne dama arye, dongobikiba, kum kwirilsaklamle touk, ulule. Malye winin ning talibuka, kum winilula ati ara, elda mangkau kanye bobuka, malye kum winilule.

³² Malye winin ninguk, talibuka wininyak ninye arye, sik diksukumuk wininyak ninye ati, ‘Se, anang ara, nun like ati, lo dan talak ton uptuba, aninye optibye do?’ tenen, tuba kalikinyake. ‘Anang optipya’ tenen, patalyeba, duknunyakce, sik diksukum wininyak ninye ati, pia dinauk unyake.

³³ ‘Diksukum wininyak ninye optipya’ tenen, pia kalikinyak bukni, Allah el si Yahweh arye, sik diksukum wininyak ninye ati, ‘Ara, ‘Naʼ tenen, ninye unyake’ tenen, tuba-tuba melibuka kalikilula ati, sik malye ninguk, talibuka wininyak ninye arye, yanuka kum optinge. Tonda, malye wininyak ninye arye, sik diksukumuk wininyak ninye ati, tomobuka ninye yupu lipsisikuka bokolina deiyok nang dam, bobinamak bukni, ‘Anang tapu koubuka, wenena aik dongobibyeba, aminyan talak, sik deiyok nang arye oplopnamak’ tenen, unamake. Bukni, Allah arye, sik diksukum wininyak ninye ati, pia melibuka kalikilula ati ara, sik yupu lipsisikuka bokolina deiyok nang arye, aninye kum oplopnamake.

³⁴ Ati ara, ‘Allah Yahweh elcuk melinamnile,’ tenepmunce, el nyapdeiamsuk yupu, anyuk moubuka talimunce, pia pi dobuka dukdongobuka wininamlulume. Winipmunyopura, Allah arye anggun erebuka deipsiliba, anggunce amutuku nirya talibuka unamlume. Tonda, aminyan talak, Allah arye, sik malye winin ninguk, talibuka wininyak ninye ati, weneplirye opliba, pia kum kipdeipnamle talak ara, anggun asing arye eipnamlume.

³⁵ Narye ton elilamse ning nyapnusine. Malye winin ninguk, talibuka winilamuknye bira, pia yu weik ulamukce, yuk ninye nirya ati, bico tenena kum diparyuk, ikin ning weik, sik nong deice delilamukba, elilamse. Winipmanto ara, ninye arye, yo yala pia telebak koubikiba paplirye, pia teleb kibuka tiklirye, weik arye palamle touk, amalye winilamuknye birye, malye weik winilamuk bukni, elce, ‘Aning winipnamne,’ tenyamuk ning nirya ara, nong ubukba, bona utotoa talinanye weik ulamuk.

³⁶ Bukni, el amalye ninguk, talibuka winilamuknye, minopce dibukba, el aik dam ton binuka epdese bukni, amalinye ton, pia kum ulamuka anya arye, kum eipse. ‘Anye bira, tuba kam ulul do, kum do?’ tenen, el anye biti epdese bukni, ton kum epdanumu. Elda akunum dibukba, kum ubuka atia. Ati, ‘Se, sik malye wininyak ninye ara, pia aunamake,’ tenena meme.

³⁷ Sik malye wininyak ninye uk, tenena meme. Teleb ning ara, sik diksukumuk wininyak ninye ati, moubuka dinamlulume. Sikda, malye winin ning, tonok ning babye kum wininyaka anya arye, yuk ninye arye, ‘E, sik malye wininyake,’ kum nyapmanto unyake. Na dipkoprob nyapsine. Kanye talima lamapdongobuka arye ululnye bira, yuk ninye nirya ati, ‘E, kanye deipdabirye, kanye talima dukdongobuka, teleb kibuka neika winiptibye,’ tenelula ati ara, Allah arye anye atonun ninye nirya ati, melilamliba, aminyan talak, sikda pia telebuk unamake.

³⁸ Bukni, sik malye winin ninguk, talibuka wininyak ninye nirya ara, Allah arye wenebuka oplirye, kum daneipnamle. Aminyan talak, sik teleb kibuka kum unamake. Tonda, sikce deibikceba, dadeipdanin banamak ninye ap, sik yala ninye nirya ap ara, kum upre banamake. Aminyan talak, sik nirya kum upnamake.

³⁹ ‘Nun ni Allah ara, pia mambulnye ulule’ tenen, diksukumuk wininyak ninye ati, Allah el si Yahweh aniryuk lyesulule. Tonda, weik imun ning, sik dam yanamle talak ara, Allah arye sikti, melibuka lyepnamle. Winipmanto ara, ninye arye, ‘Nun mal olan nang arye opsicak’ tenen, keil aik pum tam duknubuka balamak touk, sik diksukumuk wininyak ninye arye, ikin ning, sik dam yalyopura, ‘Allah aniryuk melibuka lyepnamsil’ tenen, Allah el dam anyuk banyake. El amu tamuk ubicopura, Allah Yahweh arye, aninye ati pia melilule.

⁴⁰ Allah el si Yahweh aniryuk, sik diksukumuk wininyak ninye nirya ati, pia melibuka lyelosulule. Tonda, malye ninguk, talibuka wininyak ninye arye, sik diksukumuk unyak nang ati, ‘Ikin ning sik nong deice deibibirye, opnamabe,’ tenesinyaka babye, Allah arye nunti, melibuka lyebuka dolyanamsile. Ara, talye ati kume. Deiyok ara, sik diksukum wininyak ninye arye, ‘Kume, nun ni koproba Allah Yahweh, elcuk lyepnamsil’ tenen, el dam anyuk bikirye, el amu tamuk unyake. Ati ara, Allah arye aninye ati, wibuka lyepnamle. Raja Daud mot nyalamuka deice arye, ayupu nirya nyabuk.