Mazmur 25 - Eipomek

Mazmur sekuknye birye, ‘Na malye winin ning nirya ati, Allah arye namin kibuka kilipnuturye, na malye wininun ning ati, kumubuka deipnutue’ tenena ap, tonda, ‘Na mal olan nang arye opnikcak’ tenen, ‘Allah arye melibuka, kalikinamnutue’ tenen, morobuk yupu.

¹ Raja Daud birye, Mazmur yupu sekukopura, Allah ati amot nyabuk. Daud birye nyabuk, “Se, na ni Allah Yahweh, na talima nirya ara, an deiceuk delikunune. Na ikin unulul ning ap, na patanulul ning ati, narye antibuk morokunune.

² Diba na ni Allah, narye an siuk erekunune. Tonda, ‘Allah elcuk melinamnil’ tenen, antibuk, diba tenebuka unune. Na nio, ‘Na mal olan nang arye, malye kipdeipnikiba, na alye daknyak’ tenen, ance kaliknamnilam’ tenen, moropkine. Tonda, ‘Na mal olan nang arye, opnikcopura, weik yupu arye nalipnikcak’ tenen, ‘Allah ance kaliknamnilam’ tenen, moropkine na nio.

³ Bukni, na kele, yatanye birye do nirya, ninye arye anti, diba tenepkikirye, ‘Allah elcuk melibuka lyepnamnil’ tenen, an si deice moropkikcopura, an adiparyuk dipkoprob melibuka lyelonamsilyame. Bukni, yata nang do nirya, deiyok kum upmalibuk, tilila yupu deice arye, talye-talye nyapkikce nang ara, ance anang wenepminba, sik anang nirya ara, alye dakanamake.

⁴ Se, na ni Allah Yahweh, ance, ‘Aning ara, wininamlume, aning ara, pia kum wininamlume,’ nyapdeipsulum yupu, ‘Peterepnutumba, moubuka biktinirye, aninguk talibuka wininamne’ tenen, ‘Ance melipnamnilam’ tenen, moropkine na nio. Tonda, ‘Teleb winin ning ara ani, malye winin ning ara, ani,’ nyabuka, peterepnutumba, ‘Aning moubuka biknirye, an bisikuk banamne’ tenen, moropkine na nio.

⁵ Atonun, Allah ance, “Diksukum winin ning ara, ani,” nyabuka peterepnimince, ‘An minop menekuka baminyopura, nara an aminyan tam moubuka dobolbanamne’ tenen, moropkine na nio. Deiyok ara, ancuk, melibuka lyelonilyama ati, Allah an siuk erekunune. Atalak-atalak nirya ara, beren tam arye dukdongobuka, keting noutam nirya ap, lukunyan talak ap ara, ‘Allah ancuk, lyenamnilam’ tenen, morokunune na nio.

⁶ Ati ara, Allah ance nunti, weik tonun bico tenesimince, ‘Anggunda, pia teleb kilinamsine,’ nyapdeiamlum yupu deice arye, akunum nyapdeiamsulum touk ubuka, dipkoprob aning ara, ance tuba tenipsimince, nunti, pia arenalyame. Nun malye ulamupu touk, nun wenena ati, dengna arepsutum bukni, aning kumce, weik tonun bico tenesimince, lyelosilyame. Na nio ance nunti, bico tenena ap, nun malye ning namin kina ap, nunti teleb ulin ning ap ara, ‘Doulamuk talak arye, dipdongobuka, wini talak dukdongobuka, dounamle talak babye, aning atonun wininamsilam’ tenen, moropkine na nio.

⁷ Ati ara, ‘Na wel ulamse talak ara, malye ning talibuka ulamse ning ap, tuba kum teneninamnilam’ tenen, moropkine na nio. Ance nunti, ‘Aning ara, wininamlume, aning ara, pia kum wininamlume,’ nyapdeiamsulum yupu yanipsirye, malye ulamse ning nirya ara, tuba kum teneninamnilam’ tenen, moropkine na nio. Winipsiminyopura, yuk nang nirya eipsikirye, ‘Se, Allah Yahweh, elda pia diksukum koprop unanye ulule,’ nyabuka, bikinamake.

⁸ Nun ni Allah Yahweh ara, pia telebnye ulula ati, el yupu nyasilye touk, pia diksukumuk ulula ati ara, sik malye ninguk, talibuka unyak nang ati, Allah arye, ‘Na tenyamsise ning ara, ani. Teleb winin ning ara, ani,’ nyabuka peteresiliba, bikinyabe.

⁹ Tonda, sik talima erelana kumce, amu tam kibuka talima namina asa unyak nang ara, Allah arye, ‘Teleb winin bisik ani, diksukum winin ning ara, ani,’ nyabuka peteresulule. Atonun, sik maknya kintinina kumce, talima namin asa wininyak nang ati, ‘Na diksukum ban bisik ara, ani. Teleb winin ning ara, ani,’ nyabuka, peterelule.

¹⁰ Nun ni Allah Yahweh ara, elce kanye deibuka peteresulul ning nirya ara, batakna pia kumce, pia bico tenesilirye, ‘Wininamsine, ara pia teleb kilinamsine,’ nyabuka, nyalin yupu deice arye, nyapdeiamsuk ning nirya ara, dipkoprob nong pia unamle. Aning ara, talye-talye wininyak nang ap, elti, diba kum tenenyak nang ati kume. Ara, Allah arye, ‘Aning ara, wininamlume, aning ara, pia kum wininamlume. Diksukum winin ning ara ani,’ nyapdeiamsuk yupu, moubuka talibikirye, aninguk dobolbanyak nang ati, pia bico tenesilirye, telebuk kilinamsile.

¹¹ Se, na ni Allah Yahweh, yuk nang nirya arye, anti, ‘Se, el si ap, elce winiulul ning ap ara, pia mambule,’ tenenamakʼ tenen ati, narye malye weik ulamse ning nirya luba kipnimince, ‘Kum kipdeipnamnilam’ tenen, morokunune na nio.

¹² Dipkoprob ning ara, yata nang do, sik nirya arye, Allah Yahweh ati, diba tenebikirye, elce, ‘Aning ara, wininamlume, aning ara, pia kum wininamlume,’ nyapdeipsuk yupu, moubuka talinyak nang ara, Allah arye sik anang ati, ‘Teleb un bisik ara, ani. Anggunda aning-aning nirya ton wininamlume. Aning wibuka, talepmunce, abisikuk banamlume,” nyabuka peterelule.

¹³ Petereliba, kel bikikcopura, anang ara, teleb kiplyopura, sik wininamak ning nirya ara, nong kipliba, pia telebuk unamake. Tonda, sikce deibikiba, dadeipdanin banamak mapu nirya ara, Allah arye wibuka areamsuk mutuku noutam nirya, sikce talibuka, asukumuk pia unamake.

¹⁴ Yata nang do nirya, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu, moubuka talibikirye, aninguk dobolbanyak nang ara, Allah Yahweh arye anang ati, weik tonun bico teneplirye, kanye delinamle. Winiplyopura, Allah arye, ‘Wininamsine, wininamsine. Tonda, winibuka teleb kilinamsine,’ nyabuka, nyalin yupu deice arye, nyasilye ning nirya ara, anang ati laka nyapliba, bikinyake.

¹⁵ Atalak-atalak nirya ara, narye na ni Allah Yahweh ati, ‘Yata yupu nyapnamnil do?’ tenen, moubuka kalekuka dinirye, yupu kekenune. Aning ara, talye ati kum wininune. Deiyok ara, Allah elcuk, ninye opmantoak ara, akunum lyelonulule.

¹⁶ Na ni Allaho, ance moubuka dinimince, weik tonun bico tenenilyamce, an kanye arye, adiparyuk weik tonun melinilyame na nio. Deiyok ara, na ikin weik unilirye, talima nirya babye dakalsakanulule. Adeice arye, ‘Se, na unun sukum ara, na kwit tonok babye, ton kum ulule,’ tenen, mambul kanye bonune.

¹⁷ Na nio, na talima noutam ara, ikin weik unulul ning ara, weik tonun kipnin balula ati, mambul kanye bobuka ununa ati, ance lopdeipnimince, lyepnutumʼ tenen, moropkine na nio! Tonda, ‘Na imun kanye bobuka, ununak arye lobuka, bataknutumce, pia telebak bobinamnilam’ tenen, moropkine na nio.

¹⁸ Se, na ni Allaho, moubuka dipdenimince, ‘Na ikin weik unulul ning ap, imun kanye bobuka unun ning ap ara, melibuka lyepnutum’ tenen, moropkine. Winipnimince, ‘Na malye weik winilamse ning nirya ara, namin kibuka, kum kipdeipnamnilam’ tenen, moropkine.

¹⁹ Tonda, moubuka dipdenimince, na ona ati bulubuka, na dam yanganyak nang ara, eipmince, ‘Yata barye nang unmak do?’ tenen, nuknalame. ‘Aning ara, moubuka tenipdemince, melipnamnilam’ tenen, moropkine na nio. Tonda, na mal olan nang arye, nati, ‘Anye bira nun like,’ tenebikirye, yu pia weik upliba, ‘Anye nun lik,’ teneninyake. Aning babye, moubuka dipdenalame na nio.

²⁰ Ati ara, ‘Na kam un ning ati, moubuka kaliknimince, lyepropniminyopura, kam tuba unamne,’ tenen, moropkine. Tonda, ‘Yu nang arye, malye kipdeipnikiba, alye daknyak’ tenen, ‘Melibuka lyepropnutum’ tenen, moropkine na nio. ‘Yu nang arye, na opnikcak’ tenen, narye an damuk duknuna ati, ‘Ancuk kaliknamnilam’ tenen, morokunune.

²¹ Na nio, ance, ‘Aning ara, wininamlume, aning ara, pia kum wininamlume,’ nyapdeiamsulum yupu ara, narye moubuka talinirye, dobolbanune. Tonda, yuk nang ati, talye yupu pia kum nyanune. Narye yuk nang nirya ati, dipkoprob uk wininuna deice arye, ‘Ancuk melibuka lyelonamnilam’ tenen, moropkine na nio. Deiyok ara, narye antibuk, ‘Allah elcuk, melibuka lyepdopnamnil’ tenen, anti diba tenebuka, dinauk unune.

²² Tonda, na ni Allaho, nun Israel yala nang nirya ara, ikin ulul noutam unyaba ati, kum winipmanto unmapce, imun kanye bobuka unyabe. Ati, na ni Allaho, ancuk, nunti, melibuka lyelonamsilam’ tenen, morokinyabe na nio.