Mazmur 20 - Eipomek

Ninye deiyoknye raja birye, Allah morobuk yupu

¹ Ninye deiyoknye Raja Daud birye Mazmur mot sekuk. Ara, Allah yupu mot nyana deiyoknye arena ati, sekuka arebuk.

² Anggun nirya ikin upsilye talak nirya ara, ‘Allah Yahweh eipsilirye, yanuka melinamsil’ tenen, na raja Daud birye Allah ati moronune. Nun apu koproba Yakub, minop talak si erelamuk Allah ara, elce anggunti pia kalikuka melisilyakarye, lyenamsil’ tenen, moropne. Winipmanto ara, Allah arye, ‘Pia telebuk unamak’ tenen, ‘Sik nirya dobuka, weik mutuku kon deice deipsutu’ tenen ati nyabuka moropne.

³ Tonda, ‘Allah arye el si eren aik pum tam bukni, Pia Lek Teleb Aik pum tam arye, el mikip deice arye, melinamsil’ tenen, moronune. Atonun, ‘El ulul mutuku, Sion mutuku arye, el mikip dokwetepsutu deice arye melinamsil’ tenen, moronune.

⁴ Tonda, nun ni Allah, el si erebuka kina ati, anggunce kam ning obuka, elti, areamlumce, uku dongolamlum ning nirya ara, ‘Allah arye tuba tenelirye, kanye delinamsil’ tenen, moronune. Diba, sik malye un ning kum daneibuka kilina ati, sikce kam ning obuka, elti, areamlumce, uku dongolamlum ning nirya ara, ‘Allah arye tuba tenilirye, kanye deilinamsil’ tenen, moronune.

⁵ Tonda, ‘Allah arye anggun talima noutam weik tonun patasulul ning, adiparyuk arepnamsil’ tenen, Allah morosunune. Atonun, sikce, ‘Wininamabe, apil ton doptibye,’ tenen, patapsiliba, yupu talilum ning nirya ara, ‘Allah arye melipsilya deice arye arepnamsil’ tenen, Allah morosunune.

⁶ Allah arye anggunti akunum melibuka lyepsilyopura, ‘Nun nirya arye, kanye deibibirye, weik yupu arye, ‘Telebe,’ nyaptibye’ tenen, Allah moronune. Tonda, nun ni Allah el si erena ap, si erebuka kina ap ati, cang weik kain, el si spanduk dobuka, aning deice el si sekibirye, kain erebuka ikibibiba, ninye nirya arye eipnamake. Allah Yahweh arye, anggunce elti, moronamlum ning nirya ara, ‘Adiparyuk arepnamsil’ tenen, Allah ati morosunune.

⁷ Winida na akunum kel bikse. Allah arye, ‘Anye bira, ninye deiyok kiplirye, na mapu koproba, Israel yala nang nirya ara, taliplirye, sik rajanye unamle’ tenen, wipdeiamnuka ati, dipkoprob melipnilirye, pia lyelonamnile. Allah ara, im deice arye, Pia Teleb Lekak arye, na moronun ning kekepnilirye, melinamnile. Allah, el mikip weik, sirik taruk deice melinamnila deice arye, na mal olana ati, yu nang nirya obuka, sirya daknamnarya!

⁸ Ton talye nang ara, sik ninye mal olana ati, tuku deice balamle ning, el si kereta perang ati, weik tonun kanye delinyake. Ton nang ara, sik kuda basam ati, weik tonun kanye delinyake. Sik ato nang ara, ‘Aning arye, nunce yuk nang nirya ati, optibirye, sirya daktibye,’ tenenyake. Bukni, nun Israel yala nang arye, aning atonun kum teninyabe. Nunda, nun ni koproba Allah Yahweh ap, el si ati, weik tonun kanye delinyabe. Elce melisilya deice aryuk, nun mal olan nang obuka, sirya dakanamabe!

⁹ Nun mal olan nang ara, nunce obibiba, sik anang ara, yan dum dukliba, sakuka tuku deice poulbinamake. Bukni, nun Israel yala nang ara, opsitinga babye, tamubuka bukibirye, tikilongonamabe.

¹⁰ Ati nun ni Allah Yahweh, ance wipdeipnulum ninye deiyoknye, na raja ati, melipniminya deice arye, ‘Nun mal olan nang nirya optibirye, sirya dakanamap’ tenen, moropkine na nio! Ati ara, nunce Allah anti, ‘Naio melipsilyame!’ nyabuka, moropkipye talak nirya ara, ‘Kekepsimince, melibuka lyelonamsilam’ tenen, moropkiabe, na ni Allah.