Mazmur 14 - Eipomek

Mot nyana deiyoknye bira, Daud birye malye wininyak ninye arye, malye wininyak ning ati, nyabuk yupu

¹ Allah ati, diba kum tenenyak nang ati ara, ‘Allah dipkoprob kum ulule,’ nyanyak bukni, ayupu nyanyak ninye ara, sik pia walwal nang arye nyanyake. Adeice, sikce wininyak ning aning-aning nirya ara, malye ninguk wininyake. Sik anang ara, tonoknye babye, teleb kum ulule. Sik nirya malyeuk wininyake.

² Allah el si Yahweh, im deice arye, ninye tukwak mutuku unyak ninye ati, ‘Diksukum teleb kibuka, natibuk eninyak do? Na wininye ning ap, narye nyanye yupu ap ati, moubuka kel kinyak do?’ tenen, disulule.

³ Bukni, mutuku-mutuku nirya, unyak ninye nirya ara, pia ton diksukum kibuka, teleb ton kum wininyake. Tonoknye babye, teleb kum winilule. Ninye nirya ara, malye ninguk tenebuka, pil donyake. Allah ati, balye tam kibuka batakikirye, yuk talye ninguk dobolbanyake.

⁴ Ninye malye ning wininyak nang nirya ara, bita kel kum kipnamak do? Malye ninguk talibuka, wininyak nang arye, din ning el si roti dilamak touk, na mapu nirya ara, onyake. Tonda, Allah el si Yahweh ati, ‘Naio melibuka lyesilyame,’ nyabuka, elti, kum moronyake.

⁵ Malye ninguk talibuka wininyak ninye ara, aminyan talak, weik ilil unamake. Ara, Allah ati diba tenebuka, diksukumuk wininyak ninye ati, lyeproplirye, sik kan-kan unamle bukni, Allah ati diba kum tenenyak ninye ara, weik ilil unamake.

⁶ Na Allah ati, diba kum tenebikirye, malye winin ninguk talibuka, wininyak ninye arye, nati diba tenebuka, amu tam unyak ninye arye, ‘Wininamabe,’ tenenyak ning ara, yupu sekelongonyake. Bukni, Allah Yahweh arye, elti, diba tenenyak ninye ati, pia kalikuka melinamle.

⁷ Allah Sion mutuku arye yanamle ning ara, Israel yala ninye nirya, yanuka lyepnamle. ‘Minopce lyepsutue’ tenen, Israel ninye arye, pia moronyake. Wini talak ara, Israel ninye ikinuk unyak bukni, Allah Yahweh arye, ila tuba tonap sik ning nirya, teleb kibuka deiplyopopura, Israel ninye nirya arye, kanye deipnamake. Aning atonun, Yakub birye deibukba, dadeipdanin, yangalamik ninye nirya arye, kanye deipnamake.