Mazmur 139 - Eipomek

“Allah elda weik kel bikna ap, aning-aning nirya kalikuka dina ap, deiyoknye ulule,” nyabuk yupu

¹ Sisinanye Raja Daud, mot sena deiyoknye birye nyabuk. Diba, na ni Allah Yahweh, ancuk na talibuka wininun ning nirya ati, pia moubuka dinimince, kel kinilyame.

² Tonda, na buknye talak do, mapnye talak do, bukuka banmanye talak do nirya? Na wininun ning aning-aning babye, na ni ancuk biknilyame. Ara, Allah anda pia yukak ulyam bukni, na teninmanye kanye ap, na kanye talima noutamak tenenun ning ap ara, ancuk eibuka biknilyame.

³ Aning atonun, na pil donye talak babye, dikdik senun talak babye, banmanye talak babye nirya ara, ancuk dinimince, biknilyame. Na wininman ning ap, pil donun ning ayala-yala nirya ara, ancuk biknilyame.

⁴ Se, na ni Allah Yahweh, anda na kabul tenepnirye yupu kum nyapmanye talak arye na, ‘Anyapnaman’ tenepmanye yupu nirya ara, minopce ance kekebuka eipnimince, akunum biknilyame.

⁵ Aning atonun, Allah ance nati, atalak-atalak nirya, ‘Malye ning arye, na mi ati, malye kipdeiplyak’ tenen, warikuka antanap dongopnimince, kalikinilyame. Tonda Allah an mikip weik deice erebuka umince, na melina ati, an taruk arye, na nong deice talipnulumba, nara an amu tam, teleb ubuka unune.

⁶ Allah ance tenebuka, biklyam ning ara, narye aning nirya, kum tenebuka kel kipmanto unune. Allah an tenelyam ning, ‘Kel biktinye’ tenen, tenipdetinya babye, dipkoprob pia kum kel biktinye.

⁷ Allah an mikip weiknye winimince, mutuku-mutuku nirya dilyama anya arye, narye, ‘Nara, dungnubuka yuk mutuku binune’ tenen, an dam arye batakuka bitinya babye, dan tam dungnubuka bitinye do? Kume, aning ara, kum winipmanto. Tonda Allah an dam arye, ‘Kwarabuka yukak binune,’ teneptinirye, bitinya babye, yata wiriptinye do? Kume. Anda mutuku-mutuku nirya moubuka dilyamnye, ulyama anya arye, aning ara pia kum winipmantoe.

⁸ Aning atonun, ‘Im deice tam welebuka dungnul binune,’ teneptinirye, bitinye mutuku babye, Allah an babye tuba asukumuk aulyame. Tonda, ninye dibikirye, banyak sukum, ‘Na dipnyopura bitinirye, dungnubuka binuka mapnamne,’ tenebuka, bitinye mutuku babye, na ni Allah, anda amutuku noutamak aulyame.

⁹ Tonda, na maka pol atonun ning deice arye lakukaptinirye, keting yangan tam mutuku bitinya babye, keting wekelban tam weik pera mutuku dabitinya babye, amutuku noutamak babye, an pia aunmince, dinamnilame.

¹⁰ Amutuku noutamak ara, binuka unmatinya babye, an taruk mikip adiparyuk melinamnilame. Atonun, an sirik taruk adiparyuk talipnimince, teleb kilinamnilame.

¹¹ Tonda winipmanto, ikin ning na dam yalye talak ara, narye imun kanye bopnirye, ‘Se, kunuknak arye lelipdongopnamnil’ tenen, “Ilil pia weik unmanile,” nyaptinye. Tonda, ‘Wini talak ara, na dirinak unun bukni, aminyan talak ara, ikin ning na nong deice yaniliba, kanye imun upnilyopura, kuna akuk unamne,’ teneptinye. Aning nirya teneptinya babye, ance tuba melipnutume.

¹² Ara, talye ati kum nyapne. Deiyok ara, an dam, kunukne ning ton pia kum ulule. Tonda, kunukne noutamak babye, anda keting noutam talak atonun upliba, moubuka elilyame. Aning-aning nirya eililyamnye anya arye, lukunyan noutamak babye, dirina atonun ululnye, ulyame.

¹³ Tonda, Allah ancuk na nong noutamak wamnuk ning nirya ara, kwepdeipnulume. Tonda, ancuk na nin mun pum kum bomnuk talak arye, ance minopce kwepdeiamnulume.

¹⁴ Ati ara, narye Allah anti, weik kanye deibuka kibuka, si erenamne. Ara, talye ati kume, na ni Allah ance, na nong deice upnuk ning nirya ara, ‘Winipnamle’ tenen, pia teleb ubuka deiamnuluma atia. Tonda, na ni Allah an pil dolyam ning nirya ara, ninye arye kum winipmanto pil dolyama ati, narye an si atibuk, mambule tenebuka, narye kibuka si erenamkine. Tonda, ance nati, pil dopnulum deice arye, na moubuka kel kipnirye, namin asa arye, an amu tamuk unamne.

¹⁵ Allah ance, na yok nirya kwepdeipnulum talak ara, moubuka dinmanulumce, dukdongobuka, darapdongamnulume. Ara, na nin mun pum tam, min kum ulamse talak arye, apil dopnulume. Winibuka kwepdeiamnulumba, na nin mun pum arye dungnubuka nelamse. Na adungnubuka nelamsak ara, Allah ance dina ara, kum duknupmanto ulamuke. Adiparyuk eibuka, bikamnulumce, akwamnulume.

¹⁶ Na min mun pum tam ulamse talak ara, ance minopce eibuka, bikamnulumce, akwamnulume. Akwamnulumce, ‘Anye bira, el kam unamle talak noutamak ara, winibuka-winibuka wininamle,’ tenelamnulum ning nirya ara, an kam una buku deice, na si sekuka deiamnulume. Tonok sum noutamak akunum winipnuk ning ap, aminyan talak winipnamniyake ap babye, min kum deiyok koupnuk talak arye, atalak-atalak wininamse ning nirya ara, minop talak, ance akunum tenebuka bikamnulume. Tonok pil ara, min kum deiyok kiamlum talak arye, atalak-atalak winipnamuk ning nirya ati ara, na ni ance, minop talak tenebuka akunum bikamlume.

¹⁷ Allah Yahweh, ance tenenilyam ning ara, narye anirya kum bikmanto, pia weik mambul tenenune. Tonda aning nirya, narye nuktinya babye, pia weik anya arye, anirya nukuka, kum sirya daktinye.

¹⁸ Tonda, mek wininga weik batakmuk nirya ara, naryuk nukdetinya babye, pia kum nukmanto ulule. Atonun, ance tenelyam ning ara, pia kum nukmanto ulule. Na mapmanya buknye talak babye, antibuk, pia tuba tenikunun ati, an ap neika ansinibuka, dukdongobuka unyame.

¹⁹ Na ni Allah, na patapnilye ning ara, nyapnamkine. Ara, ance tenepmince, malye winin ninguk, talibuka unyak ninye nirya ara, obuka bataklame. Tonda, sik ninye on nang ara, ‘Ninye weik arye, tonap tabakuka optibye’ tenen, patalul nang nirya ara, na ni Allah ance, sik anang arye, ‘Ninye opnamak,’ tenenyak nang nirya ara, na damak arye dobuka, yuk tam pia pera mutuku dadobuka bobinamlame. ‘Se, na ni Allah, elce winiptue’ tenen, pia patanulule.

²⁰ Sik amalye winin ninguk talibuka, unyak nang nirya arye, Allah an si ati, pia malye nyalikinyake. Tonda, Allah an kanye deiplum mutuku si deice arye, pia dipkoprob malye nyabuka, tilila yupu uk nyaltakanyake.

²¹ Diba na ni Allah Yahweh, anti, sikce an nong deice malye yupu nyalikinyak nang nirya ara, narye sik aninye ati, yu unulule. Tonda, Allah an damak malye yupu nyalikinyak ninye, sikce, ‘Allah ara, nun like’ tenen, yaniltakinyak nang ati ara, ‘Yata deiyok ati malye yupu nyabuka, pia malye weik unyak do?’ tenen, na kanye talima pum tam nirya ara, pia imun kanye bonune. Aning ara, na ni Allah, an kele.

²² Sik amalye winin ninguk, talibuka unyak ninye nirya ati ara, narye sikti, pia yu kanye bonune. Sik anang ati ara, mitik tonun arye, ‘Sikda teleb unyake,’ pia kum tenenune. Tonda, sik anang nirya ara, na mal olan nang atonun ubuka unyake.

²³ Na ni Allah ancuk, na talima noutamak teninun kanye nirya ara, wibuka dipdenimince, kel kinilyame. Tonda, Allah ance, na tenenye kanye nirya ati, pia moubuka dipdemince, biknilyame.

²⁴ Malye winin ning nirya ton, na talima noutamak malye tenen ning awamniliba, eipniminyeura, na ni Allah ance, amalye winin ning nirya dobuka, diksukumuk kipdeipnamnilyame. Tonda, na banamne bisik nirya babye, ance nati, “Pia teleb winin bisik, pia diksukum kam una bisik ara, ani,” nyabuka, talibuka bobinamnilame.