Mazmur 136 - Eipomek

Allah Yahweh arye, nun Israel nang ati, “Bico tenepsinirye, melinamsine. Pia telebuk kilinamsine,” nyalin yupu deice arye nyapsuka ati, elti, ‘Nun ni pia telebe,’ nyabuka, el siuk erenamaba ati, sekuk yupu

¹ Nun ni Allah Yahweh arye, nun Israel nang ati, “Pia bico tenesinirye, tuba-tuba melinamsine. Tonda, batakna kumce, pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye, el tibuk si erebuka kina ati, ‘Naio nunce anti, pia telebe,’ nyabuka nyanamabe.

² Tonda, ninye arye, ‘Nun ni koproba aniʼ tenen, yuk talye ning ati, si erenyak ning nirya ara, nun ni Allah arye, atalye ning nirya deice tam ulirye, aning-aning yala nirya talibuka, pia mikip weiknye ulule. Dipkoprob Allah ara, el tonoka. Tonda, Allah arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe,’ nyabuka nyanamabe.

³ Aning atonun, deiyok koubuka, yuk mikip ulye ning nirya ara, nun ni koproba Allah Yahweh, elda sik deice tamuk ulula ati, Dipkoprob Deiyok Weik Ululnye bira, Allah el tonoka. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye, el tibuk si erebuka kina ati, ‘Naio nunce anti, pia telebe,’ nyabuka nyanamabe.

⁴ Ara, aning-aning yala nirya kwepdeiamuka deiyoknye ulirye, elcuk pia mambul weiknye winilirye, dopmanto kum pil ap, ninye kum winipmanto pil ap, dolule. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye, el tibuk si erebuka kina ati, ‘Naio nunce anti, pia telebe nyabuka,’ nyanamabe.

⁵ Atonun, elce aning-aning nirya kel weik bikilula deice arye, im ap, im tam ulul ning yuk-yuk ning nirya babye, elcuk kwepdeibuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk si erebuka kina ati, ‘Naio nunce anti pia telebe,’ nyabuka nyanamabe.

⁶ Tonda, elcuk, tukwak mutuku, im sirya, mutuku sirya nirya kwepdeibukce, aning nirya dobuka, weik laut mek kwen uamukak deice tam deibukba, asukumuk tuba aulule. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe, nyabkiabe,’ nyanamabe.

⁷ Atonun, Allah arye im deice ulul ning ap, im tam noutamak ap, weik dirina ulye ning nirya ara, elcuk kwepdeibuke. Ara keting ap, wal ap, kurya ap nirya ara, elcuk kwepdeibuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia teleb,’ nyabuka, nyanamabe.

⁸ Diba, ‘Keting noutam talak nirya ara, deiyok koubuka dirina weik arenamle,’ tenebukce, keting kwepdeibuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

⁹ Atonun, elcuk, ‘Lukunyan talak deiyok koubuka, dirina arenamlul’ tenen, aminyan talak ara, wala ap, kurya ap, kwepdeibuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹⁰ Tonda, minop talak sik Mesir mutuku noutam nirya ulamik nang, sik minop deiamik mapu nirya ara, Allah elcuk amapu nirya obuka, sirya dakuk. Winibuka deice arye, sik Mesir mutuku nang ati, imun kanye weik bobuka ulamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe,’ nyabuka, nyanamabe.

¹¹ Mesir mutuku nang, sik minop arye deiamik mapu nirya akunum obukopura, el mapu koproba, sik Israel yala nang batakuka dobukabukce, Mesir mutuku noutam arye, bobinamuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe,’ nyabuka, nyanamabe.

¹² Ara, el mikip taruk ap, el pia mikip weik ulya deice arye, sik Israel nang dobuka, Mesir mutuku noutam arye, lyebuka bobinamuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹³ Tonda, Israel nang, weik laut mekwen, el si Laut Teberau dam yayik talak ara, Allah Yahweh arye, ‘Atam arye, laut mekwen sekdopliba, otam mutuku dabinamak’ tenen, laut mekwen deresekdobukba, amekwen noutam ara, bokuka dana-dana tam kipdobukba, Israel nang ara, tuku deice yanibuka, otam sekdobukba, koubuka bindobik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabuka,’ nyanamabe.

¹⁴ Laut mekwen Teberau noutam deresekukopura, el mapu koproba, sik Israel yala nang nirya, tuku deice anoutam bisik bobiyukba, sikda otam kisikdakuka biyikce, yuk mutuku noutam bindobik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara pia kum bataknamsile. Anirya ara, nun nirya arye el tibuk si erebuka kina ati, ‘Naio nunce anti pia telebe nyabkiabe,’ nyanamabe.

¹⁵ Sik Israel nang ara, teleb kibuka bisik balamik bukni, Mesir mutuku ninye deiyoknye, el si Firaun ap, el tam yin talin nang nirya ara, Allah arye aweik laut Teberau mekwen dobuka, sik nong deice deibukopura, sik nirya obuka, sirya dakuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹⁶ Tonda, Allah arye, el mapu koproba Israel nang ati, ‘Abisik binamlume, asukumuk tiaya unamlume,’ nyalamuka deice arye, ninye pia kum ulamik mutuku noutam arye, menekuka balamukba, sik Israel nang nirya ara, el donga tam yangalamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹⁷ Tonda, Kanaan mutuku noutam balamik talak ara, Allah arye, sik ona ati ninye yala nirya ati, Kanaan mutuku noutam nirya, ninye deiyok kibuka talilamik deiyok nang, sik mikip weik ulamik Raja-Raja nang nirya ara, Allah aryuk, aRaja nang nirya obuka, sirya dakuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹⁸ Diba, Allah elcuk, amutuku-amutuku ulamik ninye deiyok nang, sik Raja nang nirya ton, weik tonun ara, obukba diamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

¹⁹ AKanaan mutuku tam Raja nang kan-kan noutam ara, sik Amori yala nang taleamuknye, el si Sihon babye, obukba dibuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²⁰ Tonda, Bashan mutuku taleamuk Raja, el si Og babye, obukba dibuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²¹ Kanaan mutuku tam Raja-Raja nang akunum obukopura, sik talilamik mutuku nirya dobuka, bokukce, el mapu Israel nang ati, arebuk. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti, pia telebe nyapkiabe,’ nyanamabe.

²² Ara, el amu tam ulamik nang, sik Israel yala nang ati, amutuku tuku nirya bokuka arebukba, doprobikce, amutuku noutam ulamik. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²³ Pia dipkoprob nyapsine. Allah elcuk, nun Israel nang apu yapu ikin weik ulamik talak ara, elcuk tuba tenilamukce, melilamuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye, nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²⁴ Allah arye nunti tenilamsukce, ‘Se, na mapu koproba, Israel nang nirya ara, sik mal olan nang nirya arye, ‘Na mapu Israel nang obikcak’ tenen, anang obukabukce, nunti lyepdopsuke. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Ati ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²⁵ Allah arye ninye tukwak mutuku, im sirya, mutuku sirya nirya, unyap nang ara, yuk kam ulul ning nirya ati, nun patapsilye ati, obuka din ning ara, dobuka elcuk arisulule. Allah Yahweh arye, nun Israel nang ati, “Pia bico tenesinirye, tuba-tuba melinamsine. Pia telebuk kilinamsine,” nyabuka, nyalin yupu deice arye nyapsuka ati, aning ara, pia kum bataknamsile. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.

²⁶ Ati ara, nun ni koproba Allah ara, im deice tam ulula deiyoknye biti, Nun ni Allah telebe,’ nyabuka, el si erenamlume. Nun ni Allah Yahweh arye, ‘Wininamsine, winibuka teleb kipdeipnamsine,” nyalin yupu deice arye nyapdeipsuk yupu nirya ara, pia kum bataknamlume. Elce, ‘Winibuka melinamsine,’ nyapdeiamsuk yupu nirya ara, batakna pia kumce, dipkoprob pia, tuba-tuba arenamsile. Elce nyalin yupu deice arye nyasulul yupu ara, minopce kume, kum danmanto ulule. Anirya ara, nun nirya arye el tibuk, si erebuka kina ati, ‘Naio nunce anti pia telebe nyabkiabe,’ nyanamabe.