Mazmur 13 - Eipomek

Ikin weik ubuknye birye, Allah morobuk yupu

¹ Mazmur yupu deice mot nyana ati, Raja Daud birye sekuk. Ara, Allah yupu mot nyana deiyoknye arepnamika ati, amot sekuk.

² Se, na ni Allah Yahweh, wala yata barye ton uplyopda, ance yanuka na dam lyepdopnamnilam do? Na ikin kanye weik tonun bobuka unun bukni, ance luba tuba kinilyam do? Aminyan dorupnamle talak ara, ila tuba bico tenepnimince, yanuka melipnamnilam do, na nio? Se na ni Allaho, yata barye wala ton kunum uplyeura, ton yanuka melipnamnilam do? Winipmanto ara, ‘Ance donga karikuka yukak dinamlam talak ara, dipkoprob nati kum eipniminyakʼ tenen, nyapkine na nio.

³ Se na nio, yata barye wala ton kunum uplyeura, na talima pum tam aryuk, ‘Yata wiriptinye deice arye, na ikin unilye ning ati, kum daneipnutum do? Aning winiptinye do, kum do?’ tenen, naryuk teniltonauk unamne do? Ara, beren tam talak arye dipdongobuka, keting noutam nirya ara, ikin kanye bopnirye, na kanye pum noutam arye, pia engenauk unamne do?

⁴ Se, na ni Allah Yahweho, narye pia pi dobuka, antibuk an si pia erekunune. Ati, ance na ikin unulul ning nirya ara, eipnimince, na moropkinye touk, ‘Ance yanuka melipnutum’ tenen, moropkine na nio. Nara ikin weik unulula ati, ance mikip arepnutuma deice arye, ‘Tuba teleb kibuka uptinyopura, kum dipnamne’ tenen, moropkine. Ance nati, luba kum kipnamnilam’ tenen, moropkine na nio.

⁵ Na nio, na mal olan nang arye, ‘E, anye nunce akunum obuka malya kiplopnamabe,’ nyapnikcak tenen, na nio anti moropkine. Tonda, ‘Sikce na opnikirye, sik amu tam deipnikiba, ikin weik upnicak’ tenen, ‘Ance moubuka lyepnutume’ tenen, moropkine na nio.

⁶ Bukni, na ni Allaho, narye anti pia diba tenekunune. Ati ance, “Bico tenepsinirye, narye, ‘Winipnamsine,’ nyabuka, nyalin yupu deice arye nyapdeipsise yupu nirya ara, pia dipkoprob winipnamnarya!” Anyapdeipmasulum ning ara, pia diba tenekunune. Na talima noutam nirya ara, an deiceuk deipkine. Ati ara, ance lyepnamnilama ati, na kanye deipnamkine. Narye an Allah Yahweh ati, si ereipkinirye, mot nyanamkine. Deiyok ara, ance pia teleb kibuka meliamnuluma ati, mot nyanirye, an siuk tuba-tuba pia erenamkine.