Biblia Todo Logo
線上聖經

- 廣告 -

Mazmur 129 - Eipomek


Yu nang arye, Israel yala nang ati, ‘Opnamabe,’ tenenyak nang ara, ‘Allah arye obuka, sirya daktu’ tenen, Allah morobuk yupu

1 Israel yala nang nirya ara, weik sum akunum upne talak ara, Yerusalem mutuku bana ati, amutuku welepnarye, amot nyalamike. Se, nun ni Allah, nun mal olan nang arye, min talak babye, wini talak babye, weik tonun tuba olyangasinyake. Ara, na mitikop ulamse talak arye dipdongobuka, na weik nebuka unye talak nirya ara, tuba pia wininyake. Diba, nun Israel yala nang nirya arye, neika ayupu ton nyanamabe.

2 Se, na ni Allah, nun mitikop ulamupu talak arye, dipdongobuka, nun nebuka unyap talak nirya ara, ayu nang arye, tuba-tuba olyanganauk winisinyake. Ayu nang arye, olyanganauk winisinyak bukni, min kum obuka, sirya daksike.

3 Winipmanto ara, ninye arye, sik wa tuku palilamak touk, yu nang arye, nun nong deice opsikiba, dila weik tonun, ikin delisinyake. Winipmanto ara, ninye arye, sik wa win noutam, tuku cang arye palibuka, delilamak touk, el si ara kerut, yu nang arye, ikin pia weik tonun, nun nong deice deipsikirye, dila weik lake kilisinyake.

4 Allah el si ara Yahweh, pia teleb diksukumnye ulule. Pia malye wininyak nang ara, nun mal olan nang arye, tapu koupdongopsik bukni, Allah arye, atapu nirya ara, lopdeipsukce, lyepropsuke.

5 Yata nang do nirya, sikce nun Yerusalem mutuku noutam unyap nang ati, ‘Nun lik,’ tenesinyak nang nirya ara, ‘An Allah arye, anang nirya weneptumba, nun bataksitingce, sik mutuku uk, tamubuka bitingba, alye pia weik daknamakʼ tenen, moropkiabe na nio.

6 Ara, nun ninye asik dam dolkua talye tiklamle bukni, minopce kum danalamle touk, ‘Nun mal olan nang babye, minop dipnamak’ tenen, morokinyabe. Ara, adolkua keting buppu deiplirye, minop yalakliba, kwinibuka donoklamak touk, ‘Allah ance, nun mal olan nang ati, minop wenebuka optum’ tenen, morokinyabe.

7 Gandum sekukalilamak nang arye, tumakamlye dolkua ara, ‘Aning daupmalye. Aning nirya ara, donoknamabe,’ tenebikirye, adolkua kum libikirye, sik taruk tatang arye, tapu aning kirikdongobuka kum bobanyake. Diba, gandum sekuka lilamak nang arye, ‘Talye palamle dolkua ara, talye ning uka,’ tenebikirye, sik taruk arye aning libuka kum bobanyake.

8 Nun Israel yala nang ati, ‘Nun lik,’ tenesinyak nang, sik wa winyak talak nirya ara, yuk nang arye, awa tuku dam banmakirye, awa pil don nang eibikirye, sikti, “E, nun kayapu telebe. Nun ni Yahweh arye anggunti, teleb kilinamsil’ tenen, Allah ati moronamsiabe,” pia kum nyanamake. Atonun, awa win nang ati, sik dam banamak nang ati, “E, telebe. Allah Yahweh el si deice arye, telebe nyapsiyabe. Allah arye anggunti, ‘Teleb kilinamsil’ tenen, Allah ati moronamsiabe,” pia kum nyanamake.

© 2023, Wycliffe Bible Translators, Inc. All rights reserved.

Wycliffe Bible Translators, Inc.
跟著我們:



廣告