Mazmur 119 - Eipomek

“Allah Yahweh arye, nyapdeiamsuk yupu talibuka, el amu tamuk ulamibyopura, pia kam unamabe,” nyabuk yupu

¹ Kanye deibuka, teleb ubuka ulamice, ninye nirya ara, malye winin ning talibuka, pia kum unyake. Tonda, Allah Yahweh elce, “Aning ara, wininamlume. Aning ara, pia kum wininamlulume,” nyalisilye yupu nirya ara, pia moubuka kekenyakce, aninguk talibuka, el amu tam unyakce, dobolbanyak ninye ara, pia kamuk unamake.

² Allah arye, “Wininamlulume,” nyalisilye yupu atibuk, talibuka winimunce, aninguk melibuka, dobolbanamlum ninye nirya ara, kanye deibuka, teleb ubuka winilulume. Aning atonun, winibuka winilulum ninye nirya ara, anggun kanye talima nirya, el deiceuk deipmunce, el tibuk piribuka, elkirikinamlume.

³ Allah Yahweh elce tenelul touk, aninguk talibuka dobolbanamak ninye nirya ara, kanye deibuka, telebuk unamake. Tonda, sik aninye banamak sukum nirya ara, malye winin ning tonok ning babye, talibuka pia kum wininamake. Winibuka unyak ninye nirya ara, kanye deibuka, teleb ubuka wininyake.

⁴ Diba nun ni Allah, ance, “Aning ara, wininamlulume. Aning ara, pia kum wininamlulume. Teleb winina ara, ani,” nyapdeiamsulum yupu nirya, arepsulum deiyok ara, ani. Ara ance, ‘Ayupu nirya kekebikirye, talibuka dobolbakirye, pia diksukumuk winipnin banamak’ tenen, ayupu areamsulume.

⁵ Diba, na ni Allah, nara ance nyapdeiamsulum touk, pia moubuka wininirye, na kanye talima nirya, an deiceuk deipnirye, ance, “Aning ara, wininamlulume. Aning ara, pia kum wininamlulume. Teleb winina ara, ani,” nyapdeiamsulum touk, ‘Na ni koprop Allah arye, meliniliba, ayupu uk moubuka tenepnirye, aninguk melibuka, dobolbanamne’ tenen, morokunune.

⁶ Se, na ni Allah, ance nyapdeiamsulum yupu nirya, moubuka talepnirye, teleb winin ninguk, winipnin banamne. Winibuka unyopura, nara ilil una ap, alye dakna ap ara, pia kum unamne.

⁷ Ance, “Aning ara, wininamlulume. Aning ara, pia kum wininamlulume,” nyapdeiamsulum yupu uk, kel kipnirye, ayupu talibuka wininirye, teleb ubuka wininamne. Winibuka unamne talak nirya ara, na kanye talima nirya arye, an nong deiceuk deipnirye, antibuk telebe nyabuka, an siuk erenamkine.

⁸ Tonda ance, “Aning ara, wininamlulume. Aning ara, pia kum wininamlulume. Teleb winina ara, ani,” nyapdeiamsulum yupu uk, talibuka winilamnirye, an amu tamuk dobolbanamne. Ayupu talibuka dobolbanamne talak nirya ara, ‘Na ni koprop Allah arye nati, pia kum bataknamnile’ tenen, morokunune. Ara, ance nati, ‘Anye bira, teleb ubuka kum winilula anya arye, elti, bataknamne,’ tenebuka, ‘Kum bataknamnilam’ tenen, morokunune na ni Allah.

Allah Yahweh arye, “Aning ara, wininamlulume. Aning ara, pia kum wininamlulume,” nyapdeiamuk touk, winina ati, nyabuk yupu

⁹ Kam nang, sik unamak talak nirya ati, teleb ubuka winina ati, moubuka kalikdakcopura, yuk malye ning ton, sikce talibuka pia kum wininamake. Ara, nun ni koprop Allah ance, “Aning ara, wininamlulume. Aning ara, pia kum wininamlulume,” nyapdeiamsulum touk, sik aninye arye, aninguk moubuka tenebikirye, ayupu talibuka winipnin bacopura, malye un ning ton talibuka kum wininamake.

¹⁰ Tonda, na kanye talima nirya arye, an deiceuk deipkinirye, asum-asum nirya, antibuk piribuka enamkine. Aning atonun, ance meliniminba, ‘Ance nyapdeiamsulum yupu moubuka tenepnirye, pia dobolbanamne’ tenen, morokunune. Ara ance, “Aning ara, wininamlulume. Aning ara, pia kum wininamlulume,” nyapdeiamsulum yupu nirya ara, ‘Moubuka dobolbanamne’ tenen, nyapne.

¹¹ Na ni Allah, ance peteresilyam yupu nirya ara, na kanye noutamakuk, pia moubuka deipnirye, aninguk tenebuka wininune. Winibuka unyopura, narye an dam ton, malye ubuka kum kilinamne.

¹² Diba, na ni Allah Yahweh, anda pia telebuk ulyama anya arye, nara an siuk erenamkine. Winikiniba ance nunti, “Teleb winina ara ani,” nyabuka, nyalisiminye yupu nirya ara, nati melibuka peterenamnilame.

¹³ Na ni koproba Allah ance, “Wininamlulume,” nyapdeiamsulum yupu nirya ara, ‘Yuk ninye ton kekenamak’ tenen, weik yupu deice arye nyanamne.

¹⁴ Winibuka unamne talak nirya ara, na kanye deipnirye ance, “Aning ara, wininamlulume. Aning ara, pia kum wininamlulume,” nyalisilyam yupu uk, talibuka dobolbanamne. Winipmanto ara, ninye arye, ‘Ara, weik mambul ning’ tenen, sik ‘Na’ tenen ning ati, moubuka talilamak touk, narye anyapdeiamsulum yupu nirya ara, pia talibuka wininamne.

¹⁵ Ance, “Aning ara, wininamlulume. Aning ara, pia kum wininamlulume. Teleb winina ara, ani,” nyalisilyam yupu nirya ara, ‘Deiyok noutam ning dan do?’ tenen, narye pia moubuka tenepnirye, talibuka wininamne. Aning atonun, ance, “Aning ara, wininamlulume,” nyapdeiamsulum ning ati, pia teninamne. Malye winin ning tenena kumce, an yupu uk moubuka tenenauk unamne.

¹⁶ Ance, ‘Winibuka unamake’ tenen ati, nyapdeiamsulum yupu nirya ara, aning atonun wininyopura, na kanye delinamne. Winibuka unamna anya arye, ance, “Aning wininamlyame. Teleb winina ara, ani,” nyalisilyam yupu ara, pia kum batakanamne.

Allah Yahweh arye, “Teleb ubuka wininamlume,” nyapdeiamsuk yupu

¹⁷ Nara, ‘Allah el pil donanye birye, telebuk unamne,’ tenenun ati, ance weik arye melipniminba, na kanye talima namin kilinamnilame. Winipniminyopura, na upnin banamne talak nirya ara, ance nyalilalum yupu uk, kekebuka winipnin banamne.

¹⁸ Tonda, ance na asing teleb kibuka lapdeipniminba, teleb winipnilya deice arye, ance, “Aning ara, wininamlulume. Aning ara, pia kum wininamlulume,” nyapdeialum yupu nirya, moubuka dinirye, teleb ubuka kel kipnamne. Ara, an yupu noutamak arye, ninye kum winipmanto ning nirya, moubuka kel biknamna ati, nyapne.

¹⁹ Na tukwak mutuku noutamak, tia unamne talak ara, ninye asik nang winilamak touk wininamna anya arye, an yupu deice arye, “Aning ara winibuka wininamlulume,” nyapdeiamsulum yupu nirya ara, ance pia kum duknunamnilyame. Ance nyasiminye yupu, pia patanulul anya arye, ayupu nirya ara, lakuk kilinamnilyame.

²⁰ Tonda ance, “Aning ara, wininamlulume. Aning ara, pia kum wininamlulume,” nyalisilyam yupu nirya ara, na pia tenenun deice arye, na kanye talima noutamak nirya, wekuka langdipnilirye, na kanye pum tam tenen ning nirya ara, uk dinulule. ‘Aning wininilya deice arye, asum-asum nirya ara, tuba atonunuk wininamnile,’ tenenune. Asum-asum nirya ara, an yupu pia patanulul ati, nyapne.

²¹ Ance nyasiminye yupu kum kekebice ninye arye, kwalinyak deice malye wininamak ninye ati, ance wenepnamlyame. Ance, “Aning ara, wininamlulume. Aning ara, pia kum wininamlulume,” nyapdeiamsulum yupu nirya ara, amalye winin ninguk, talibuka wininyak ninye arye, yaniltanyake. Ance nyalisimin yupu yanibuka batakikirye, malye winipnin banyake. Winibuka unyak ninye ati ara, sik anang nong deice, sulongonamlyame.

²² Ance nyasiminye yupu yaniltalamak ninye noutamak wininuna anya arye, sikce nati, “Elda walwalnye ulula anya arye, talye ninguk talibuka winilule,” nyabuka, nati, yep-yep aninyake. Sik aninye arye, malye winilamaka noutamak arye, na ni koprop ance lyenamnilyame. “Ance nyalilamsulum yupu uk, moubuka talinune anya arye, ancuk lyenamnilyame,” nyabuka, moropkine na ni Allah.

²³ Tonda, amutuku noutamak talibuka wininyakce, ninye deiyok nang nirya arye, bulubuka wekikirye, nati on yupu talinamniak. Sikce winibuka yupu talinamniyak talak nirya babye, nara an pil donanye ununa anya arye, ance, “Teleb winina ara, ani,” nyapdeiamsulum yupu uk, talibuka dobolbanirye, pia tuba tenebuka wininamne.

²⁴ Ati ance, “Aning ara winina kume, aning ara winina telebe,” nyapdeiamsulum yupu noutamak nirya ara, na kel bikna yupu uk ulule. Winiplirye, na kanye talima noutamak nirya, teleb kilinulule. Narye, ‘Se, yata winiptinye do?’ tenen, teniltonauk unilye talak noutamak nirya ara, ance nyasiminye yupu deice arye, ‘E teleb winipnin banamne bisik ara, ani,’ tenebuka bikinune.

Allah Yahweh arye, nyapdeiamuk yupu, moubuka kekena ati, nyabuk yupu

²⁵ Ara, na talima uk diniliba, ‘Dipnamne do?’ tenen, ikin weik unilye talak ara, tuku deiceuk manune. Winibuka ikin uniliba, tuku deice mapmanye bukni, na ni koprop Allah ance, nyapdeiamnulum touk, kam bukipniminba, telebuk wininamne.

²⁶ Narye anti, “Na ni koprop Allah, na wininamne ning ara ani,” nyabuka, laka nyapdeiamkisiba, ance nati tamubuka, “Winibuka unamlyame,” nyapdeiamnulume. Aning atonun, wini talak babye, ance, “Winibuka unamlyame. Teleb winina ara, ani,” nyabuka, laka nyalinilyam yupu nirya ara, ance nati, lakakuk laka nyapnimince, moubuka peterenamnilyame.

²⁷ Winibuka, ayupu laka nyanamnilam talak ara, ance ninye ati, “Aning ara, wininamlulume. Aning ara, pia kum wininamlulume. Teleb winina ara, ani,” nyabuka, nyapdeiamsulum yupu uk, tenebuka wininamne. Nara, ‘Allah arye nyapdeiamsuk yupu, nong noutam ning deiyok dan do?’ tenen, ‘Moubuka biknamne,’ tenenuna anya arye, na ni koprop, ance moubuka melilamniminba, ayupu uk pia tenepnirye, tenebuka wininamne.

²⁸ Tonda, ikin ning na dam yaniliba, kanye imun weik unulule. Na kanye uk dinilye talak nirya ara, na ni Allah, ance nyalisimin yupu, melibuka peterepnimince, na talima kwadinamnilame. Ance nyasiminye yupu deice arye, melibuka peterepnimince, na talima pia mikip kipdeipniminba, narye telebuk wininamne.

²⁹ Aning atonun, na diksukum bisik batakuka, malye bisik kirikuka banmanye talak ara, ancuk na dobuka, yuk pera kilinamnilyame. Winipniminya deice, ance pia teleb ubuka winin ninguk, peterepniminba, ance, “Aning ara, wininamlulume. Aning ara, pia kum wininamlulume,” nyapdeiamsulum yupu uk, talibuka wininamne. Ara, ancuk bico tenepnimince, ‘Teleb winin ninguk peterenamnilam’ tenen, morokunune.

³⁰ Nara, pia teleb ubuka wininirye, diksukum bisikuk, wibuka dipdenirye, dobolbanamne. Allah ance, “Aning ara, wininamlulume. Aning ara, pia kum wininamlulume,” nyapdeiamsulum yupu ara, kum bataknamne. Ayupu ara, na tuba-tuba, tenena arye, nukuka wininamne. Asum-asum nirya noutamak ara, ayupu dinirye, moubuka dobolbanamne.

³¹ Na ni Allah Yahweh, ance, “Winibuka wininamlume. Teleb winina ara, ani,” nyaliniminye touk, aninguk melibuka dobolbanamne. Diba, na ni Allah Yahweh, ance pia kum bataknamnilame. Ati ara, malye ninye arye, na nong deice, malye yupu nyapnica babye, alye dakna ap, ilil una ap, pia kum unamne.

³² Na ni koprop Allah, ance nati, teleb ubuka, kel bikna deiyok ning areniminba, ance nyaliniminye yupu nong noutam ninguk, kekebuka dobolbanune. Aning ati ara, ance nati, “Aning wininamlyame,” nyaliniminye yupu, ‘Aninguk kekebuka, dobolbanirye, kanye deibuka unamne’ tenen, an dam bikbik abuka banune. An yupu uk moubuka talinirye, dobolbanamne.

“Kel bikna deiyok ning arepnutume,” nyabuka morobuk yupu

³³ Diba, na ni Allah Yahweh, ance nati, an weik mambul yupu, “Winibuka wininamlume, teleb winina ara, ani,” nyapdeiamsulum yupu uk, peterenamnilame. Winibuka peterelamnimin buk, atalak arye dipdongobuka, an yupu uk talibuka dobolbanamne. Dobolbalamnya ani, sirya akunum dakanamne.

³⁴ Ance, “Aning ara, wininamlulume. Aning ara, pia kum wininamlulume,” nyalisiminye yupu nirya peterepnimince, kel bikna deiyok ning arepniminba, narye, an yupu uk, tenebuka wininamne. Winibuka unamne talak nirya ara, na kanye tenen ning nirya ara, an deiceuk delinamkine. Ance nyasiminye yupu uk, talibuka dobolbanamne.

³⁵ Na kam unamne talak nirya ara, ance, “Wininalyame,” nyapdeiamsulum yupu nirya ara, peterepniminyeura, ayupu uk, talibuka wininirye, mikip arye unamne. Ara, talye ati kume. Deiyok ara, narye, ‘An yupu uk, talibuka wininamne’ tenen, pia patanulule.

³⁶ Allah ance na kanye talima noutamak, pil dopniminyeura, ance, “Aning ara, wininamlume. Teleb winina ara, ani,” nyapdeiamsulum yupu nirya ara, aninguk pataniliba, an yupu talibuka wininamne. Na kanye talima noutamak, an yupu uk pia pataniliba, aninguk talibuka, wininamne talak nirya ara, yuk talye ning nirya ati, ‘Aning weik arye doproptiniba, bona weik talinanye unamne’ tenen, kum patanamnile. Na kanye aryuk tenen ning, talibuka kum wininamne.

³⁷ Tonda, ance nati, pia moubuka kalikinamnilyame. Ance na batakniminba, ‘Mangkau arye, talye-talye yuk malye winin ninguk eipnirye, melibuka dobolbinyak’ tenen, moropkine. Ara, na ni koprop Allah, an pia kam uminye birye, ‘Wininamake,’ nyasiminye yupu uk, areniminba, ayupu uk talibuka wininamna deice arye, kam pia unamne.

³⁸ Na ni koprop Allah, yata ninye do nirya, anti, ‘Se, nun ni koprop Allah, elda weik mambule’ tenen, ilil unamak ninye nirya ati, ance, ‘Sik ti pia melinamsine,’ nyabuka, nyalilamsulum yupu uk talibuka wininamake. Nara, an amu tam unirye, an piluk talibuka wininuna anya arye, ‘Ance nyalisimin yupu nirya ati, dib tenebuka, pia dobolbanamne, tenebuka wininamne’ tenen, morokunune. Ara, na kanye noutamak teniltona uniliba, ‘An yupu ati, dib tenebuka kum winipnun’ tenen, ‘Na ni koprop Allah melipnilyame,’ nyabuka morokunune.

³⁹ Na ni koprop Allah, ance, “Wininamlulume,” nyabuka nyalisilyam yupu ara, dipkoprob pia telebuk ulule. Ati ara, ‘Narye, malye winin ning talibuka wininyopura, alye dakdanyak’ tenen, na ilil pia weik wininulula ati, ance kalikuka meliniminba, ‘Teleb winin ninguk talibuka wininamne’ tenen, morokunune.

⁴⁰ Dipkoprop ance, “Winibuka unamlulume. Teleb winina ara, ani,” nyabuka, nyalisilyam yupu nirya ati ara, pia pataniliba, ayupu ati narye, pia kanye delinune. Ati ara, malye ning tonok ning babye talibuka kum winimince, anda pia diksukumnye winilyama anya arye, ance nati winiryuk kam un ning arenamnilam deice arye, ‘Kam pia unamne’ tenen, morokunune.

“Allah Yahweh, elce nyalisilye yupu damuk unamlyame,” nyabuk yupu

⁴¹ Diba, na ni koprop Allah Yahweh ance nati, batakanina pia kum diparyuk, bico tenebuka melinilyame. Tonda ance nati, “Winibuka lyebuka delinamkine,” nyabuka, ‘Nyaliniminye touk ubuka lyepnamnilam’ tenen, moropkine na nio.

⁴² Ance melibuka lyepniminyopura, narye ayupu bobuka, nati, ‘Nun like,’ tenenikirye, nyilikininyak ninye, sik dam laka nyalbinamne. Ayupu ara, talye ati kum nyapne. Deiyok ara, na ni koprop Allah, ance nyasilyam yupu ati ara, ‘Ayupu nirya ara, pia dipkoprob yupu anya arye, aninguk talibuka wininamne’ tenen, unune. Ance nyalyam yupu nirya, dib tenenuna anya arye, nati nyilikininyak ninye ati, laka nyalbinamne.

⁴³ Tonda ance, “Aning ara, wininalulume. Aning ara, pia kum wininamlulume,” nyabuka nyapdeiamsulum touk, ‘Ayupu talibuka wininirye, an amu tamuk, teleb ubuka winipnin banyopura, ayupu arye teleb ulinamnil’ tenen, diba tenenune. Ati ara, ance na si pum bisik arye, an teleb nyasilyam yupu dolona kume na nio. Allah arye nyanulul yupu ara, pia dipkoprob yupu tenenuna ati, ‘Adipkoprop yupu dopropnimince, na kum bataknamnilam’ tenen, moropkine na nio.

⁴⁴ Nara ance, “Aning ara, wininalulume. Aning ara, pia kum wininamlulume,” nyapdeiamsulum yupu, ‘Batakna kum diparyuk, talibuka pia winipnin banamne,’ tenenune.

⁴⁵ Kam unamne talak nirya ara, ance nyalilamsulum yupu nirya atibuk, pia pi dobuka, doproptinirye, ‘Deiyok ani’ tenen, elsusunune. Winibuka ununa anya arye, na teniltona kumce, talyeuk luba kibuka, kamuk unamne. Yata malye winin ning arye do, tonok ning babye, na talima tapu koubuka kum winipnamle bukni, telebuk kilinilyamba, telebuk wininamne.

⁴⁶ Tonda ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu dobuka, narye ninye deiyok talibuka wininyak nang, kekena ak nirya laka nyalbinamne. Ayupu bobuka, ninye deiyok nang, sisin nang kekena ati, laka nyalbinamne talak ara, alye ton pia kum dakanamne.

⁴⁷ Ance, “Aning ara, wininalulume. Aning ara, pia kum wininamlulume,” nyapdeiamsulum yupu, kekebuka winina ati, na kanye delinamne. Aning ati ara, an yupu bobuka, yuk ninye dam laka nyalbinamne talak ara, alye kum dakanamne.

⁴⁸ Narye ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu ati, kanye deipnirye, ayupu ap, an ap ati, pia telebe nyabuka, si erekunune. Tonda, ance nunti, nyapdeiamsulum yupu ati, ‘Deiyok noutam ning ara, dan do?’ tenen, ayupu nirya ara, nuknirye moubuka tenenamne.

Allah arye, “Wininalulume, teleb winina ara, ani,” nyapdeiamsuk yupu, yanibikirye, “Ikin ning nun nong deice deilisinyak bukni, Allah arye lyepnamsile,” nyabuk yupu

⁴⁹ Ance na an amu tam unirye, an piluk donunye biti, “Wininamkine,” nyabuka, nyalin yupu nyapdeiamnulum ning, moubuka tenenamnulume. Narye ayupu dobukapnirye, ‘Dipkoprop na ni koprop Allah arye, melibuka lyepnamnil talak ara, dan talak do?’ tenen, kanye bokoltona kumce, kanye deipnirye kintinibuka, dinauk unune.

⁵⁰ Na kanye imun ning unulul talak, ikin unilya babye, kanye deibuka, pin-pina asa arye ununa deiyok ara ani. Ance, “Na yupu kekepminyopura, narye teleb ubuka melipnamkine,” nyabuka, nyalilamnuluma anya arye, ance ayupu nyapdeiamnuluma deice arye, na kanye kwa dipnululume.

⁵¹ Ninye ton malye winibuka, kwalinauk ukirye nati, “Elda mambul kum, talinyeuk ulule,” nyabuka, yep-yep abikirye, pia malye teneninyake. Utenenyak bukni, ance, “Aning ara, wininalulume. Aning ara, pia kum wininamlulume,” nyapdeiamsulum yupu ara, talibuka wininamne. Ayupu ara, batakuka, talye kanye bobuka, kum unamne.

⁵² Na ni koprop Allah Yahweh, ance nunti, “Aning ara, wininalulume. Aning ara, pia kum wininamlulume,” nyalisilyam yupu nirya ara, narye pia moubuka tenenamne. Ara, na kam unye talak nirya ara, na kanye talima noutam, ayupu moubuka tenenuna anya arye, na kanye kwa dinlyame.

⁵³ Tonda, narye sik malye winin ninguk, talibuka wininyak ninye ati, weik arye derenune. Sik aninye ati, lik weik unulul deiyok ara, ance, “Aning ara, wininalulume. Aning ara, pia kum wininamlulume,” nyapdeiamsulum yupu nirya, amalye wininyak ninye arye, ayupu batakuka banyaka atia.

⁵⁴ Na tukwak mutuku noutamak unamne talak nirya ara, tia talakuk unun bukni, lo mitik anun arepniminba, ance, “Wininamlulume, teleb winina ara ani,” nyabuka, nyapdeiamsulum yupu nirya tenepnirye, ayupu deice arye, kanye teleb mot senmanirye, kanye deibuka unamne.

⁵⁵ Diba, na ni Allah Yahweh, na lukunyan manamne talak nirya ara, antibuk pia teninamkine. Ati, na unamne talak nirya, ance, “Aning ara, wininalulume. Aning ara, pia kum wininamlulume,” nyapdeiamsulum yupu, moubuka tenepnirye, ayupu nyasilye touk wininamne.

⁵⁶ Minop talak arye diprongobuka, wini talak babye, ance, “Aning ara, wininalulume. Aning ara, pia kum wininamlulume. Teleb winina ara, ani,” nyaiyalum yupu nirya, ayupu uk talibuka wininune.

Allah Yahweh arye, “Winibuka unamlulume. Teleb winina ara ani,” nyapdeiamuk yupu kekebuka winina ati, nyabuk yupu

⁵⁷ Diba, na ni Allah Yahweh, na kam tuba unamne talak nirya ara, antibuk tenepnirye, pia talibuka unamne. Ance, “Wininamlulume,” nyapdeiamsulum yupu nirya ati, pia tenepnirye, ayupu uk talibuka wininamne, nyapkine.

⁵⁸ Na kanye talima nirya, an deiceuk deipnarye, moropkine. Ara, ‘Ance nati, bico tenepnimince, pia telebuk winilinamnilame’ tenen, moropkine. Abico tenenamnilam deiyok ara, ance, “Winibuka melipnamkine,” nyabuka, nyalina yupu deice arye nyapnulum touk, ‘Aninguk wininamnilam’ tenen, moropkine na nio.

⁵⁹ Na kam unirye banamne talak nirya ara, narye pil dobuka unamne ning nirya ara, pia moubuka tenelamsa deice arye, wininamne. Ara, na kam unamne talak nirya ara, ance, “Wininamlulume. Teleb winina ara, ani,” nyapdeiamsulum yupu moubuka tenepnirye, narye wininamne ning ati, moubuka tenena arye, telebuk unamne.

⁶⁰ Narye wini talak aryuk, ayupu nirya bobuka banamne. ‘Wini talak kum bukni, aminyan yuk talak teleb wininamne,’ kum tenenamne. Ati ance, “Aning ara, wininalulume. Aning ara, pia kum wininamlulume,” nyapdeiamsulum yupu bobuka banamne. Ayupu batakuka, talye kanye bopmaniryuk, kum wininamne. Ayupu ara, pia ati talibuka wininamne.

⁶¹ Tonda, malye winin ninguk, talibuka wininyak nang arye, nati, ‘Anye bira, nun like. El opnamap’ tenen, tapu koubuka deipnitinga babye, ance, “Aning ara, wininalulume. Aning ara, pia kum wininamlulume,” nyapdeiamsulum yupu nirya, na pia kum batakanamne. Aninguk pia talibuka banamne.

⁶² Aning atonun, na mapmanye ani, lukunyan noutamak bukuknye talak ap, dangulongonye talak nirya ara, na ni koprop Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu, diksukum winina ati, arepsulum yupu nirya ati tenepnirye, antibuk, “Telebe,” nyabuka, an siuk erenune.

⁶³ Nara, ance nyapdeiamsulum yupu nirya ati, ilil uplirye, an yupu uk moubuka talinyakce, dobolbanyak ninye nirya ati, narye, ‘Sikda, na kayapu ninye koprop unyake,’ tenebuka unune. Ance nyapdeiamsulum yupu uk, kekebuka dobolbanyak ninye ati, na kanye delinune.

⁶⁴ Diba, na ni Allah Yahweh, ance nun tukwak mutuku, im sirya, mutuku sirya, noutamak unyap ninye ati, pia bico tenesimince, melisilyame. Bico tenesiminye ning nirya ara, tukwak mutuku noutamak, pia weik ulule. Se na ni Allah, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, ance nati, moubuka peterenamnilyame.

Ikin ning, nun nong deice usilya deice arye, nun kanye talima wisipsilirye, adeice arye, Allah arye nyasilye yupu, moubuka kel kinyaba ati, nyabuk yupu

⁶⁵ Se, na ni Allah Yahweh, ‘Ance na an amu tam pil donanye ati, pia teleb kilinamnilam’ tenen, moropkine. Ance, “Winipnamsine,” nyapdeiamsulum yupu nyasilye touk, ‘Ance nati, melibuka teleb kilinamnilam’ tenen, moropkine.

⁶⁶ Ati, ance weik kel kina deiyok ning areniminba, kel kibuka unamna deice arye, ninye yupu teleb kibuka, bokuka delinamne. Tonda, na babye diksukumuk winipnin banamne. Aning ara, talye ati kum nyapne. Deiyok ara, nara ance, “Aning ara, wininalulume. Aning ara, pia kum wininamlulume,” nyapdeiamsulum mem yupu nirya ara, pia dib tenepnirye, ayupu talibuka dobolbanune.

⁶⁷ Tonda, minop talak ara, talye kanye bobuka, malye winin ning talibuka, malye upra balamse bukni, aminyan talak ara, ance na malye winilamse ning ati, wenepnulumba, ikin ulamse. Bukni, wini talak ara, ance nyapdeiamsulum yupu nirya ara, kum batakanamne. Pia atibuk talibuka wininamne.

⁶⁸ Na ni Allah, na akunum bikamse. Anda pia teleb winin ninguk, talibuka winilyamnye anya arye, ance winilyam ning nirya babye, diksukumuk winilyame. Ati, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, peterenamnilyame.

⁶⁹ Ara, sik kanye talima erebuka kwalinyak nang arye, nati malye yupu nyalininyakce, lululin yupu weik nyaninyake. Tilila yupu nyaninyak bukni, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, na kanye talima noutamak nirya arye, ayupu tenepnirye, talibuka wininamne.

⁷⁰ Amalye tilila yupu nyaninyak ninye nirya ara, teleb winin ning moubuka kum kel bikamikca arye, sik kanye talima noutamak, ‘Teleb ning ani, malye ning ani,’ kum tenepmanto ninye unyake. Bukni ance, “Aning ara, wininalulume. Aning ara, pia kum wininamlulume,” nyapdeiamsulum mem yupu nirya ati ara, kanye deipnirye, na talima noutamak deibuka unamne.

⁷¹ Dipkoprop malye weik winilamse ati, ance nati, wenepnulumce, ikin ning weik, na nong deice deiamnulum bukni, winipnuluma deice arye, ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu nirya ara, moubuka bikamse. Ati, ikin ning arepnulum ning ara, teleb kililamnuke.

⁷² Na ni Allah, ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu, nati bokuka, arenilyam ning ara, tukwak mutuku noutamak, talibuka unyak urasin teleb ning, el si ara emas ap, perak ap, dekna weik ulamle. Bukni, na kanye ara, adekna weik ning ara, mitik mambul uka. Ance nyanilyam yupu nirya ati ara, ‘Ayupu ara, weik mambul,’ tenenune. ‘Ayupu ara, weik dekna weik ning atonun ulule,’ tenepnirye, ayupu ati, kanye delinune.

“Allah Yahweh arye peteresilye yupu ara, pia telebuk ulule,” nyabuk yupu

⁷³ Allah ancuk, kwepdeiamnulumce, an taruk aryuk nati, teleb kipdeiamnulume. ‘Wini talak ara, weik kel bikna deiyok ning, areniminya deice arye, ance, “Aning ara, wininalulume. Aning ara, pia kum wininamlulume,” nyalisilyam yupu nirya, moubuka kel kipnamne’ tenen, morokunune.

⁷⁴ Allah ance, “Aning wininamlulume, teleb winina ara, ani,” nyapdeiamsulum yupu nirya ara, kum bataknamne. ‘Ayupu ara, na tuba-tuba tenena arye, ayupu deice arye, teleb ubuka winilinamnile’ tenen, moubuka dobolbanamne. An nyasiminye yupu ati, kanye delinuna anya arye, anti ilil upliba, ‘Nun ni Allah, mambul weik ulul’ tenen, unyak ninye arye nati, eipnicopura, kanye delinamniake.

⁷⁵ Diba, na ni Allah Yahweh ance, “Aning ara, wininalulume. Aning ara, pia kum wininamlulume,” nyapdeiamsulum mem yupu nirya ara, pia diksukum yupu uk ulule. Aning ara, akunum bikamse. Tonda, ance nati, ‘Na mi ulula anya arye, malye winilamuk bukni, pia kum bataknamna anya arye, teleb ubuka wininamle,’ tenelamnulumce, bico teneluluma deice arye, na wenena ati, ikin ning, na nong deice delilamnulume. Aning babye, na bikinune.

⁷⁶ Ati, ance nati bico tenebuka kanye deipnimince, pia batakana kumce, teleb kilinamnilam ning ara, ikin unilye talak noutamak babye, ‘Na talima kwadinamnile’ tenen, moropkine. Ara, na an amu tam unirye, an pil donanye ati, ‘Ance, “Winibuka teleb kilinamkine,” nyabuka, nyalilamnulum touk, wininamnilam’ tenen, moropkine.

⁷⁷ Na ni Allah, na kam unamne talak nirya ara, na kanye deipnirye ance, “Aning ara, wininalulume. Aning ara, pia kum wininamlulume,” nyalisilyam mem yupu uk tenepnirye, na kanye talima nirya, telebuk unilirye, kanye deibuka ayupu dobolbanune. Ati ara, ance nati bico tenebuka upniminba, na ton pia teleb ubuka, kam unamne.

⁷⁸ Deiyok kum upmanile bukni, nati, ‘Anye bira nun like,’ tenepnikirye, sik talima erebuka, kwalibuka unyak nang arye, nati malye kililamnilce, ikin ning, na nong deice delilamnik. Ati ara, ‘Ance sikti, wenepminyebuk, alye daknamak’ tenen, moropkine. Ance sik anang ati, wenepminba, alye dakdanamak bukni, nara ance, “Aning wininamlulume. Teleb winina ara ani,” nyalisilyam yupu nirya ara, ‘Deiyok noutam ning dan do?’ tenen, narye pia moubuka tenepnirye, talinauk unamne.

⁷⁹ Tonda, sikce an Allah ati, ‘Se, nun ni Allah ara, weik mambulnye ulule,’ tenebikirye, anti ilil upmalye ninye nirya ara, tuba tamubuka, na damak yakirye, ‘Nun kwit aulule, tenenamniyak’ tenen, moropkine. Ara, aninye arye, ance nyasiminye yupu nirya ati, kekebikirye, ‘Ayupu ara, el deiyok ani’ tenen, moubuka kel bikinyak ninye ara, ‘Na dam tamubuka yanganamak’ tenen, nyapne.

⁸⁰ Na kanye talima nirya, an deiceuk deipnirye, ance, “Aning wininamlulume. Teleb winina ara ani,” nyalisiminye yupu nirya ara, ‘Moubuka kekepnirye, diksukumuk wininamne’ tenen, moropkine. Tonda, malye winin ning, pia kum winipnyopura, yuk ninye eipnikirye, “El malye winibuk ning ara ani,” nyabuka, ‘Malye yupu, na deice nyapmanto kum unamake’ tenen, moropkine. ‘Winibuka melipnutumba, telebuk winitinyopura, narye ilil uniliba, alye pia kum dakdanamne’ tenen, moropkine na ni Allah.

‘Allah arye, na ikin unilye talak, na damak yalirye, melibuka lyepnamnil’ tenen, nyabuk yupu

⁸¹ Se, ‘Na ni Allah arye na damak yaturye, nati lyepropnamnil talak ara, dan talak arye yanuka lyelonamnil do?’ tenen, na kanye talima noutamak pia pataniliba, na mikip ara, mitanguk akunum upmanile. Bukni, ance, “Wininamlulume, teleb winin ning ara, ani,” nyabuka nyapdeiamsulum touk, ‘Ayupu talibuka unirye, an amu tamuk, teleb ubuka winipnin banyopura, ayupu arye, teleb ulinamnil’ tenen, dib tenenune.

⁸² Ance, “Winipnamkine,” nyapdeiamnulum yupu ati, pia tuba-tuba tenena arye, ‘Se, na ni Allah nyalilamsuk ning ara, dan talak arye yanuka, melipnamnil do?’ tenen, kanye deibuka, na asing arye, pia dinuna ati, na asing akunum malye kipnin banulule. Tonda, narye anti nyapkine, “Se, ance nati, dan talak yanuka, melibuka lyepnimince, na talima kwadinamnilam do?” nyabuka morokunune.

⁸³ Winipmanto ara, aling deiplomikiba, dauamlya ani, akunum lyupliba, ninye eibikirye, “Anya aling ara, dauplye, pia malye winibukba, akunum lyubuka anya arye, batakabe,” nyalamak touk, na babye atonun unune. Ara, ikin weik ulamnukba, na nong bol nirya ara, lyulsaklamnukba, kum winipmanto unune. Winibuka unmanil bukni, ance, “Winibuka unamlume. Teleb winina ara ani,” nyapdeiamsulum yupu ara, pia kum luba kipnamne. Na kanye talima noutamak, tuba aunamnile.

⁸⁴ Na an amu tam unirye, an pil donanye unun bukni, ‘Na ni Allah arye, dan talak arye, yanuka lyepnamnil do?’ tenen, dinauk unune. Yata wiribukap talak, tonap dinauk unamne do? Ara, sikce, ‘Anye bira, nun lik’ tenen, na nong deice ikin ning, weik deilininyak ninye ati, ‘Allah dan talak arye yanuka, sikti, weneplirye, sik nong deice ikin ning delinamle do?’ tenen, dinauk unune.

⁸⁵ Winipmanto ara, ninye arye, ‘Bura tam kam ulul ning, tuku pum bisik sakliba, opnamabe’ tenen, tuku palibuka, lumulamak touk, malye ninye arye, nati, ikin ning weik, na nong deice deilininyake. Ara, sik talima erepdakirye, kwalibuka banyak nang arye, na nong deice, ikin ning weik delininyake. Winibuka unyaka deice arye, Allah ance, “Aning ara, wininalulume. Aning ara, pia kum wininamlulume,” nyapdeiamsulum mem yupu ati, yaniltanauk wininyake.

⁸⁶ Deiyok kum upmale bukni, malye nang arye, na nong deice, ikin ning weik deilininyake. Ati ara, ancuk nati, moubuka melinamnilyame. Tonda, ance, “Winibuka wininamlulume, aning ara, pia kum wininamlulume. Teleb winina ara, ani,” nyapdeiamsulum yupu nirya ara, dipkoprob pung yupu ulula anya arye, ayupu nirya, dib tenenyabe. Ayupu nyasilye touk, winilule.

⁸⁷ Sik malye nang arye nati, ‘Anye bira, obuka kum danaiptibye,’ tenenmaniyak bukni, ance, “Winibuka wininamlume. Teleb winina ara, ani,” nyapdeiamsulum yupu nirya ara, moubuka talinauk unune. Pia kum batakanamne.

⁸⁸ Ance nati, bico tenenimince, melipniminya deice arye, lyepdeipnimince, teleb winilinamnilame. Lyepniminyopura, ance, “Winibuka wininamlulume, aning ara, pia kum wininamlulume. Teleb winina ara, ani,” nyapdeiamsulum yupu nirya ara, kekepnirye, ayupu amu tamuk moubuka unamne.

Allah Yahweh arye, “Wininamlulume,” nyapdeiamuk yupu ara, kum danmanto kum yupu anya arye, “Pia aunamle,” nyabuk yupu

⁸⁹ Diba, na ni Allah Yahweh, ance nyapdeiamsulum yupu nirya ara, min kum danmanto kum yupu ati, pia aunamle. Im deice ap, im noutamak ulul ning ap, pia aunamla touk, ance nyapdeiamsulum yupu babye, pia aunamle. An yupu ara, min kum danmanto kum ulule.

⁹⁰ An pia teleb ubuka uminya deice arye, ance nyasiminye touk, dipkoprob usulule. Ninye arye mapu deibikiba, dadeipdanin banamak ninye babye, ance aninye ati, bico tenepsimince, teleb ubuka melisilyame. Pia kum bataknamsilyame. Tonda, ance tukwak mutuku nirya kwepdeiplumce, moubuka talilyama deice arye, wini talak babye, tuba kat ulule.

⁹¹ Ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu, wini talak babye atonun, pia dib yupu uk ulule. Deiyok ara, yata ning do nirya, Allah ance, ‘Wininamne,’ tenyamlum touk, aulul ning nirya, ance tenelyam touk, aninguk ulule. Aning ati, ara ance nyasiminye yupu nirya ara, pia dipkoprob yupu uk ulule.

⁹² Tonda, na imun kanye bobuka, ulamse talak noutamak arye, ikin arye dipmatinye bukni, an yupu meliamnuka deice arye, kum dipse. Deiyok ara, kam unye talak nirya ara, na kanye deipnirye ance, “Aning ara, wininalulume. Aning ara, pia kum wininamlulume. Teleb winina ara, ani,” nyalisilyam yupu nirya talinirye, na kanye talima nirya telebuk uliniliba, kanye deibuka, ayupu dobolbanune.

⁹³ Ance, “Aning ara, wininalulume. Aning ara, pia kum wininamlulume. Teleb winina ara, ani,” nyalisilyam yupu nirya deice arye, melibuka kam kiliniminba, na tuba kam unune. Aning ati ara, ance nyapdeiamsulum yupu, pia luba kum kinamne.

⁹⁴ Ance nyapdeiamsulum yupu nirya ati, ‘Deiyok dan do?’ tenen, piribuka kel kiamsa ati, na ni Allah ance nati, lyepropnamnilame. Nara, an mi unune.

⁹⁵ Sik malye wininyak nang arye nati, ‘Anye bira, nun lik anya arye, optibye’ tenen, kintinibuka dininyake. Bukni, nara Allah ance, “Winibuka wininamlulume,” nyalisiminye yupu atibuk, ‘Deiyok ani’ tenen, moubuka, kel biknin banamne.

⁹⁶ Tonda, narye dilamnebuk, aning-aning nirya, pia teleb ubuka diksukumuk winilul ning nirya babye, ton pia kum langdilule. Mitik touk winilule. Tonda aminyan talak, kum winipnamle. Bukni, ance nyalisilyam yupu tonok ara, pia langdiplirye, pia awininamle. Anyuk pia teleb winilya ara, kum nukmanto ulirye, kum tunim apmanto winilule.

“Allah arye, ‘Wininamlulume, aning ara, kum wininamlulume,’ nyamsuk yupu uk, kanye deibuka kekenune,” nyabuk yupu

⁹⁷ Dipkoprop nara, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu atibuk, kanye deibuka unune. Asum-asum nirya noutamak, ayupu moubuka tenepnirye wininune.

⁹⁸ Nara, Allah ance nyapdeiamsulum yupu moubuka tenepnirye, batakana kumce, pia talibuka wininuna anya arye, adeice arye, weik kel bikna deiyok ning, weik arye wininulule. Na oldan nang, sikce ayupu moubuka tenena kum deice, malye wininyake. Sikda mitika arye kel bikinyak bukni, narye an yupu kel bikinun deice arye, weik kel bikna deiyok ning wininulule. Ati, pia moubuka tenepnirye wininamne.

⁹⁹ Dipkoprop nara, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu atibuk, kanye deibuka unirye, asum-asum nirya noutamak, ayupu moubuka tenepnirye, talinune. Ati ara, na moubuka teninun ning ara, weik arye teninun bukni, na peterena deiyok nang ara, ‘Deiyok ani’ tenen, sik mitika aryuk, bikinyake. Sik tenelamik atonun, kum tenenune. Nara, pia weik arye tenebuka bikinune.

¹⁰⁰ Na mutuku wisi nang arye, aning-aning nirya ati, mitika arye kel kinyake. Nara, sik winilamik atonun kum wininune. Nara, moubuka dipdenirye, deiyok noutam ning babye weik arye bikinune. Deiyok ara ani. Ara, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya kekebuka, talinirye melinuna ati nyapne.

¹⁰¹ Nara, malye winin ning, ayala-yala nirya, ‘Mangkau kanye bobuka, malye winipnun’ tenen, amalye winin ning damak arye, kwarabuka leipropnirye, an nyaplum yupu uk, dukdongobuka wininune. Ara, ‘Allah ance nyapdeiamsulum yupu, moubuka kekenamne’ tenen, unune.

¹⁰² Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, ancuk peterelamnulume. Ati ara, an yupu tonok ning babye ton, kum batakanune. Aninguk moubuka eipnirye, diksukumuk wininune. Ara, talye ati kume. Allah ancuk peterepnuluma atia.

¹⁰³ Allah ance nyapdeiamsulum yupu ati ara, kanye delinune. Winipmanto ara, ninye arye mong mek dipmakiba, si bam bol dam, min-min teleb lelamle ning ara, mitik teleb ulul bukni, ance nyapdeiamsulum yupu ara, pia weik teleb yupu nyapsuluma anya arye, ayupu ati, weik arye kanye delinune. Mong mek dipniba mitikto lelamnil bukni, an yupu kekepnye talak ara, weik arye kanye delinune.

¹⁰⁴ Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, moubuka kekenye deice arye, moubuka tenepnirye, moubuka bikinune. Ati, an yupu nyasilye touk kum bukni, yuk kirikuka malye bisikuk balamak nang ara, na like. Yuk ninye arye, “Nun telebuk wininmabe,” nyaplobuka, malye ning wininyak ning nirya ati ara, na yu unulule.

“Allah arye nyapdeiamsuk yupu ara, pia teleb ulya deice arye, ninye kanye talima noutamak dirina kilisulule,” nyabuk yupu

¹⁰⁵ Allah ance nyasilyam yupu ara, na kanye talima noutamak, dirina kilinulule anya arye, upna atonun unulule. Ati, na bisik banamanyak ara, an dirina arye, lapdeipniliba banune.

¹⁰⁶ Narye an damak, “Aning ara, pia dipkoprob wininamne,” nyabuka, nyalin yupu nyapse ning ara, kum bataknamne. Aninguk wininamne. Ara, ance nyapdeiamsulum yupu nirya ara, pia dipkoprob diksukum yupu anya arye, aninguk moubuka kekepnirye, talibuka binamne.

¹⁰⁷ Na ni Allah Yahweh, nara pia weik kanye imun deiceuk ununye. Ati ara, Allah ance melibuka kalikinamnilyame. Ara, ‘Minop talak ance nati, “Winibuka melibuka kaliklamkiniba, kam unamlame,” nyabuka nyalilamnulum touk, wininamnilam’ tenen, moropkine.

¹⁰⁸ Na ni Allah Yahweh, narye anti, “Anda pia teleb ulyame,” nyabuka, nyakunun yupu ara, kekenamnilame. Tonda, Allah ance, “Aning wininamlulume, aning ara pia kum wininamlulume. Teleb winina ara, ani,” nyapdeiamsulum yupu nirya ara, ‘Pia moubuka peterepnilyame’ tenen, moropkine.

¹⁰⁹ Tuba-tuba, yu nang ap, ikin ning ap arye, na nong opmanto wininulule. Opmanto unulul bukni, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu nirya ara, narye pia kum luba kinune.

¹¹⁰ Malye winin nang arye nati, ‘Anye bira, nun lik’ tenen, na damak, ‘Wena wepmakiba yulamle atonun, upnamle’ tenen kalikeninyak bukni, Allah ance nyapdeiamsulum yupu nirya, ton kum batakanune. Aninguk talibuka, winipnin banamne.

¹¹¹ Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu ara, pia moubuka talinamne. Ara, minop talak arye, an yupu arepnulumba, aninguk talibuka wininirye, ayupu ara, pia ati aupnamle. Tonda ance nyasilyam yupu ara, weik mambul yupu ulula anya arye, adeice nara, pia kanye tenepnirye, pin-pina asa uniliba, telebuk unamne.

¹¹² Na kanye talima noutamak, tuba pia tenenun ara, ‘Ance nyapdeiamsulum yupu uk, moubuka tenepnirye, dukdongobuka unamne,’ tenenune. Winilamnya ani, dipnyeura, bataknamne. Sisinanye Raja Daud arye nyabuk.

¹¹³ Sik kanye talima tenenyakce unyak nang ara, ‘Allah arye nyasulul yupu ara, talibuka wininamne do?’ tenebuka, pia teniltonauk wininyak ninye ara, na like. Bukni, Allah arye “Aning ara, wininamlume. Aning ara, pia kum wininamlume,’ nyapdeiamsuk yupu ati ara, narye pia teleb kanye deibuka unune.

¹¹⁴ Nara ance nyapdeiamsulum yupu, diba tenenirye, aning nirya moubuka talinirye, pia talibuka dobolbanune. ‘Ayupu aryuk, melibuka kalikinamnileʼ tenen, tuba tenenauk unune. Aning ati ara, Allah ancuk nati, pia teleb kibuka melibuka kalikinilyame. ‘Ikin ning na dam yanuka upnilyakʼ tenen, ilil pia weik unulul talak nirya ara, an damuk yanuka duknunune. Aning ati ara, Allah ancuk nati, pia teleb kibuka melibuka kalikinilyame. ‘Ikin ning na dam yanuka upnilyakʼ tenen, ilil pia weik unulul talak nirya ara, an damuk yanuka duknunune. Winipmanto ara, yin talinye ara, ‘Yuk nang arye, mal dobikiba, na nong deice bisik apnikibuk, dipnyakʼ tenen, el nong lelin ning, el si ara perisai dobuka, lelibikirye balamle touk, anda na kalikna deiyoknye wininilyame. Tonda, ‘Ikin pia weik ning arye, na dam yanuka malye kipnilyakʼ tenen, teleb sukum binuka, duknulbalamak touk, na ilil unilye talak nirya ara, an damuk yanuka duknune.

¹¹⁵ Se, anggun malye winin ninguk talibuka winilulum ninye nirya ara, na dam pia kum yanganamlulume. Deiyok ara, ‘Nara Allah arye, “Aning ara, wininamlume. Aning ara, pia kum wininamlume,” nyapdeipsisi yupu, ‘Pia moubuka kekepnirye, aninguk talibuka wininamne,’ tenenuna ati, anggun malye winilulum nang ara, na dam pia kum yanganamlume.

¹¹⁶ Na ni Allah, ‘Na teleb ubuka, tuba kam unamneʼ tenen, patapnila ati, ance, “Aning ara, wininamlume. Aning ara, pia kum wininamlume,” nyabuka, ‘Nyalin yupu deice nyapdeiamlum yupu deice arye, nati, pia melibuka kalikinamnilamʼ tenen, moropkine. Tonda nara, ‘Na ni Allah, elcuk lyepropnamnile,’ tenenirye, na kanye talima nirya ara, an deiceuk delinuna ati, ance kalikinamnilame. Winipminyopura, aminyan talak ara, ikin ning na dam yatua babye, nara alye kum dakalanamne.

¹¹⁷ Nara, na ni Allah, ‘Ikin ning na dam yanuka, malye kipnilyakʼ tenen, ancuk erepnimince, teleb sukumuk deipnamnilyame. Winibuka akunum deipniminyopura, nara telebuk unamne. Tonda, ance nyasiminye yupu nirya ara, moubuka kekepmince, aninguk pia talinamlyame.

¹¹⁸ Ton nang ara, ance, “Aning ara, wininamlume. Aning ara, kum wininamlume,” nyapdeiamsulum yupu ara, yaniltanauk wininyake. An yupu yaniptabikirye, sik mining kanye aryuk, ‘Kwinisa dobuka, malye winin ninguk talibuka wininamabe. Winibipye ning nirya ara, yuk nang arye eibuka, kum biknamsiakʼ, tenenyake. Utenebuka wininyak bukni, anda Allah arye, sik aninye nirya ati, ‘Aning na likeʼ tenen, batakalule. Ati sikce, ‘Aning ara, wininamabe, wininamabe,’ tenenyak ning nirya ara, nong pia kum upnamle.

¹¹⁹ Sik malye winin ninguk, talibuka wininyak ninye ap, anang arye malye wininyak ning nirya ap ati ara, Allah ance, ‘Aning nirya ara, na like. Ati, anang ap, sikce wininyak ning ap, nirya ara, ninye arye malye din bama dobuka, bura donoklamak ning atonun ulule,’ tenelyame. Aning ati ara, ance, “Aning ara, wininamlume. Aning ara, kum wininamlume,” nyapsulum yupu nirya ara, na pia teleb kanye delinune.

¹²⁰ Tonda, ance ninye tukwak nang nirya ati, moubuka dipdesimince, ninye yupu bokeipsimince, wenebuka menenga ning arepnamsilama ati, narye anti, pia ilil weik unulul ati, na nong nirya ara, birbir abuka, sirim talinulule.

‘Na mal olan nang arye oplopnicak’ tenen, “Lyepnamnilame,” nyabuka, morobuk yupu

¹²¹ Se na ni Allah, nara malye winina kum aryuk, akunum teleb ubuka unirye, dipkoprob diksukum winin ninguk, talibuka winilamse anya arye, ance dobuka, ‘Na nong deice ikin ning deilininyak nang, sik taruk deice, pia kum deipnamnilam’ tenen, moropkine.

¹²² Nara, an amu tam unirye, an piluk melibuka donuna anya arye, ‘Ance melipnimince, telebuk kilinamnilam’ tenen, moropkine. Allah ance na batakniminba, nati, ‘Elda nun like,’ tenebuka, na nong deice, ikin ning weik deilininyak nang, ‘Sik talima erebuka, kwalibuka banyak nang, sik damak pia kum bataknamnilam’ tenen, moropkine.

¹²³ Tonda ance, ‘Na ti melibuka lyepnamnil’ tenen, kintinibuka dikini bukni, min kum yalum anya arye, na asing uk dipnin banulule. Ara, an nyalin yupu deice arye, “Lyepkinirye, teleb kipdeipnamkine,” nyapdeiamnulum ning ati, ‘Se, yata talak winipnamnil do?’ tenen, kintinibuka dinauk unune.

¹²⁴ Na ni koprop Allah, ance, “Wininamlulume. Aning ara, kum wininamlulume. Teleb winina ara, ani,” nyalisilyam yupu dobuka, nati peterenamnilyame. Tonda, na an amu tam unirye, an piluk donanye ununa anya arye, ‘An weik arye bico teneniminya deice arye, teleb ubuka melinamnilam’ tenen, moropkine.

¹²⁵ Nara, an amu tam unirye, an piluk donanye ununa anya arye, ance, “Wininamlulume. Aning ara, kum wininamlulume. Teleb winina ara, ani,” nyalisilyam yupu nirya ara, kel kipnamne. Ance nyalisimin yupu, nong deiyok noutam ning babye, ‘Pia dipkoprob moubuka kel biktinye’ tenen, patanulul ati, ‘Moubuka kel bikna deiyok ning arepnamnilame’ tenen, moropkine na nio.

¹²⁶ Na ni Allah Yahweh ance, ‘Malye wininyak ninye nirya, bulubuka deipnirye, wenepnamna,’ teneplum sum, akunum dam upmale. Ara, talye ati kume. Deiyok ara, ance, “Wininamlulume. Aning ara, kum wininamlulume,” nyapdeiamsulum mem yupu nirya ara, pia malye wininyak ninye arye, ayupu talye mangkau kibuka, yaniltanauk wininyaka anya arye, ‘Wini talak aninye ati, wenepnalyam’ tenen, nyapkine na nio.

¹²⁷ Ance, “Aning winibuka wininamlulume. Aning ara, pia kum wininamlulume,” nyapdeiamsulum yupu ati, weik arye kanye deibuka unune. Urasin teleb kat ning, el si ara emas, pia teleb dekna weik ning uliba, aning mitik anun patanulul bukni, ance nyapdeiamsulum yupu ara, pia teleb ulula ati, ayupu ara, weik arye patanulule.

¹²⁸ Aning ati ara, na kam unamne talak nirya ara, ance, “Winibuka wininamlume. Aning ara, pia kum wininamlulume. Teleb winina ara, ani,” nyabuka, nyalisiminye touk, na babye, ‘Ayupu ara, pia dipkoprob teleb yupu,’ tenenirye, aninguk talibuka wininamne. Tonda, malye winin ning ayala-yala nirya ap, malye wininyak ninye arye, malye wininyaka ap ati, ‘Na like,’ tenebuka unamne.

Allah Yahweh arye, “Aning ara, wininalulume. Aning ara, pia kum wininamlulume,” nyapdeiamuk yupu patasiliba, “Moubuka tenebibirye, wininamabe,” nyabuk yupu

¹²⁹ Allah ance, “Aning ara, wininalulume. Aning ara, pia kum wininamlulume. Aning nirya talibuka wininamlume,” nyapdeiamsulum yupu ara, pia telebuk ulule. Ayupu ara, dib dipkoprob ning atibuk, nyapdeiamsulume. Talye yupu kum nyapdeiamsulume. Ati nara, Allah ance nyapdeiamsulum yupu uk, dukdongobuka tenepnirye, moubuka na talima noutamak deipnirye, unamne.

¹³⁰ Allah ance nyapdeiamsulum yupu ara, pia duknuna yupu atonun unulul bukni, ance kel bikna deiyok ning, areniminya deice arye, an dirina ara, na talima noutamak arye, laka kiliniliba, kel bikinune. Mince kum kel kipmanto ulamse ning ara, an yupu deice arye, dirina areniminya deice arye, ‘Deiyok anya’ tenen, moubuka bikinune. Tonda, aning-aning nirya kum kel bikamik nang daukirye, ‘Ayupu ara, deiyok dan do?’ tenen, tuba walwal ulul ninye ati ara, an nyasiminye yupu deice arye, laka kipdeipminba, an duknuna yupu nirya ara, sikce moubuka kel kipnamake.

¹³¹ Ance nyasiminye yupu weik arye, patanulul anya arye, na kanye talima noutamak ayupu ati tenipdenirye, ‘Se ayupu ara, weik tonun ton kel biktinye’ tenen, talimauk dinulule. Winipmanto ara, kam ara, mek pataliba, si akuka kang-kang alamle tonun, unune. Ara, talye ati kume. Na ni Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu nirya ati ara, ‘Ayupu kel biktinye’ tenen, pia patanilya deice arye unune.

¹³² An si erebikirye, an deiceuk, sik kanye delinyak ninye ati, minopce wana kum diparyuk, ance bico tenesimince, pia teleb ubuka melipsilyame. Aning kel kipse anya arye, narye Allah anti, ‘Na ni koprop’ tenen, na kanye an deiceuk delikununa anya arye, ‘Ance nati, bico tenepnimince, melinamnilam’ tenen, moropkine.

¹³³ Tonda, na ni Allah, ‘Na mangkau arye, an yupu bisibuka yaniptapnirye, malye winipnun’ tenen, an nyalin yupu deice arye nyapdeiamsulum touk, kalikuka melinamnilyame. Tonda, nara mitangnye ununa anya arye, ‘Malye winina deiyok ning, na talima lildoniliba, malye winin ning arye, tapu kouna atonun upniliba, malye weik winipnyak’ tenen, ‘Naio, ance kalikuka melipnimince, malye winina noutamak arye, lopdongopniminba, telebuk wininamne’ tenen, moropkine. Ati na ni Allah, ‘An mikip arye, melibuka kalikinamnilam’ tenen, moropkine.

¹³⁴ Aning atonun, nati, ‘Elda talinye,’ tenenikirye, na nong deice, ikin ning weik deilininyak ninye ara, ‘Sik damak arye, dobuka lyopropnimince, teleb kilinamnilam’ tenen, moropkine. Ara, urdem ati kume. Bukni, ance lyepropniminba, Allah ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu uk, ‘Ance meliniminba, narye ayupu moubuka tenepnirye, dukdongobuka diksukumuk wininamne’ tenen, moropkine na nio.

¹³⁵ Allah an pia teleb, lek arye ulyam dirina ara, na deice delinamnilame. Tonda, ‘Na patapnil ning elinimince, na melina ati, melibuka arenamnilam’ tenen, moropkine. Tonda, Allah ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu uk, ‘Moubuka petereniminba, telebuk wininamne’ tenen, moropkine.

¹³⁶ Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.

“Allah arye, ‘Wininamlulume,’ nyapdeiamsuk yupu ara, pia diksukum winin yupu nyapdeiamsulume,” nyabuk yupu

¹³⁷ Na ni Allah Yahweh, anda malye winin ning tonok ning babye, ton kum ukulule anya arye, dipkoprob anda pia telebnye umince, diksukum winin ninguk winilyame. Tonda, ance, “Aninguk wininamlulume. Aning ara, kum wininamlulume,” nyapdeiamsulum yupu deice arye, ninye ati teleb ubuka, yupu lipsisikuka bokolisilyama anya arye, anda dipkoprob pia telebnye ulyame.

¹³⁸ Allah ance nunti, nyalina yupu deice arye, “Aninguk wininamlulume. Aning ara, kum wininamlulume. Narye nyasinye touk, ubuka winipmunyopura, narye kalikuka melinamsine,” nyapdeiamsulum yupu ara, pia diksukum nyalin yupu uk ulule. Ayupu nirya ara, nun tukwak ninye arye, pia pi deibuka, dib tenenamabe. Ance nunti, tenelamsulum touk, tonok ning babye, kum bataknalame. Ance tenelamsulum touk, aning nirya, dipkoprob pil dobuka wininamsilame.

¹³⁹ Na ni Allah, narye an ap, an yupu ap ati, ‘Aning ara, pia telebuk ulule’ tenen, pia pataniliba, teninauk ununa anya arye, malye wininyak ninye nirya arye, an yupu yanikirye, malye winin ninguk talibuka, wininyaka anya arye, aninye ati, na yu ara, na damak uku buk dilamle touk, unulule. Ara, talye ati kume. Deiyok ara, Allah ance nyapdeiamsulum yupu ara, na oldan ninye nirya, moubuka kum tenekirye, talye luba kinauk wininyaka ati nyapne.

¹⁴⁰ Allah ance, “Winipnamsine,” nyabuka, nyalin yupu deice arye nyapdeiamsulum ning ara, dipkoprob ninguk nyapdeialuma anya arye, ayupu uk, moubuka talibibirye, aninguk dobolbapyopura, nun winin ning nirya ara, telebuk wininyabe. Winibuka unyaba deice arye bikinyabe. An nyapdeiamsulum ninguk, ‘Pia dipkoprob telebuk ulule’ tenen, bikinyabe. Ati ara, nara an amu tam unirye, an nyapdeiamsulum yupu uk, talibuka wininirye, kanye deibuka unamne.

¹⁴¹ Nara, pia mitik mambulnye unune. Tonda, yuk ninye arye nati, ‘Elda talinye ulule. Elda mambulnye kume, talinye koproba ulule,’ teneninyake. Nara, mambulnye kuma bukni, ance, “Aninguk wininamlulume. Aning ara, kum wininamlulume. Teleb winina ara, ani,” nyalisilyam yupu ara, pia kum luba kinune. An yupu ara, pia teninauk unune.

¹⁴² Ance nunti, “Aninguk wininamlulume. Aning ara, kum wininamlulume,” nyalisilyam yupu ara, pia diksukum yupu uk ulule. Atonun, an yupu nirya ara, dipkoprob yupu uk ulule. Tonda, an malye ning, tonok ning babye kum ukilye touk, pia diksukumuk wininalame. Anda diksukum telebnye winilalum atonun, pia teleb ubuka, diksukumuk pia wininalame. An diksukumuk winilyam ning ara, pia kum danamle. Wini talak diksukumuk winilyam touk, pia awininamlame.

¹⁴³ Tukwak mutuku noutamak unamne talak ara, pia kanye imun ning, na damak yanganamnile. Bukni, ikin ning, na damak yanganamnila babye, ance, “Aninguk wininamlulume. Aning ara, kum wininamlulume,” nyapdeiamsulum yupu nirya ati ara, na kanye deibuka unune. Ayupu ara, pia patanulule.

¹⁴⁴ Ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, pia diksukumuk aunamle. Ati, ance kel bikna deiyok ninguk areniminba, aninguk talibuka, wininamne talak ara, teleb ubuka kamuk unamne.

‘Allah Yahweh arye, melibuka lyepnamnil’ tenen, morobuk yupu

¹⁴⁵ Na kanye talima nirya ara, an deiceuk deipnirye, na ni Allah Yahweh anti, “Na melipnilyame,” nyabuka morokunune. Diba, na ni Allah Yahweh, anti nyapkine. Nara, dipkoprob ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu uk, talibuka amu tam unirye, kekebuka dobolbanamne.

¹⁴⁶ Nara, an amu tamuk ubuka unamne talak ara, na ni anti, malye nyabuka, tuba-tuba moronauk unamne. Ara, na ni koprop, ‘Ance nati, lyepnamnil’ tenen, moronamkine. Tonda, na ni koprop ance, “Aning ara, winina meme, aning ara, winina telebe,” nyapdeiamsulum ninguk, ‘Narye tenepnirye wininamne,’ tenenune.

¹⁴⁷ Ati, na mapmanya ani, bereknulye talak, beren tam bukuknye talak nirya ara, ancuk, “Melipnilyame,” nyabuka, moronamkine. Ara, ance nyalisimin yupu nirya ati pia, “Melipnilyame,” nyabuka, moronamkine. Ara ance, “Winibuka melinamsine,” nyayalum yupu ati, ‘Winipnamnilca’ tenen, pia kintinibuka dinauk unamne. Ance nyasiminye yupu deice arye, na kanye delinune.

¹⁴⁸ Aning atonun, inipmaliba, lukunyan noutamak ninye arye, mapmace talak nirya babye, ance nunti, “Winibuka melibuka, teleb updeipnamsine,” nyabuka, nyalina yupu deice nyapdeiamsulum yupu ati, moubuka nuknirye, ‘Deiyok dan do?’ tenen, pia teninuk unune.

¹⁴⁹ Diba, na ni Allah Yahweh, ance na nyapkin yupu nirya ati, an kekepniminya arye, bico tenebuka, melinamnilyame. Ara, ance bico tenesiminya deice arye, melinamnilyame. Aning atonun, na teleb ubuka wininirye, kamuk unamna ati, ance, “Aning wininamlume, aning ara pia kum wininamlulume,” nyapdeiamsulum yupu ulye touk, moubuka kalikinamnilyame.

¹⁵⁰ Ninye malye wininyak nang arye, an winilyam ning nirya ati, ‘Nun like,’ tenebuka wininyak nang ara, na damak aunmake. Sik anang arye tenenyak ning ara, ‘Nunda, pia malye winin ninguk, winipnin balamtibye,’ tenekirye, ance, “Aninguk wininamlulume. Aning ara, kum wininamlulume,” nyapdeialum yupu ara, aninye arye, ‘Nun like,’ tenebuka, yaniltanauk wininyake.

¹⁵¹ Sik aninye ara, wininyak bukni, diba na ni Allah Yahweh, na unamne sukum ara, an awininalame. Tonda, ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, pia dipkoprob ninguk ulule.

¹⁵² Ance nyapdeiamsulum yupu bikamse talak noutamak ara, minop talak arye dipdongobuka, anoutamak talak nirya bikamse. Ara, ance, ‘Na nyapnamsin yupu nirya ara, tia yanuka una ning ati, kum winilyame. Narye nyalisunun yupu nirya ara, pia awininamle,’ tenealumce, ayupu nyapdeiamsulume. Aning ara, na ton bikamse.

“Na ikin unilye talak noutamak ara, na ni Allah melinilyame,” nyabuka, morobuk yupu

¹⁵³ Na ni Allah, ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, kum lubakinuna anya arye, na imun kanye bobuka wininye ning nirya ara, ‘Ance dinimince, melibuka lyelonamnilam’ tenen, moropkine.

¹⁵⁴ Na ni Allah, ance, “Winibuka melibuka teleb kilinamkine,” nyabuka, nyalilamnulum touk, ‘Ance lyelonamnilam’ tenen, moropkine. Yuk nang arye, ninye ati, yupu bokolinyak talak ara, “Elda malye winilule,” nyabuka, lululininyak talak ara, na ni Allah, ‘Ance na damak yanimince, “Anye bira, malye kum winilule,” nyabuka, melinamnilam’ tenen, moropkine.

¹⁵⁵ Ninye yuk ninye ton, yu tenena ap, ‘Malye winin ninguk winiptibye’ tenena ap, aninguk upra banyak ninye ati, ance anang lyebuka, kum melinamlame. Deiyok ara, ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu nirya ara, sikce, ‘Se, ayupu kekebuka, amu tam unamabe,’ tenena kumce, an yupu ati, ‘Nun like,’ tenebuka, batakanyaka ati nyapne.

¹⁵⁶ Diba, na ni Allah Yahweh, ance nati, dipkoprob weik arye bico tenebuka, weik arye melinilyam ning ara, kum nukmanto ulule. Nati, lyebuka delinamnilame. Na ni Allah, ance, “Aninguk wininamlulume. Aning ara, kum wininamlulume” nyapdeiamsulum yupu aulye touk, ‘Ance lyebuka meliniminba, ton kam unamne’ tenen, moropkine.

¹⁵⁷ Ninye weik arye nati, yu tenebuka dobolkirikininyakce, na nong deice, ikin ning weik deilininyak bukni, ance, “Aning wininamlulume, teleb winina ara, ani,” nyapdeiamsulum yupu nirya ara, narye pia kum batakanamne. Aninguk talibuka, dobolbanamne.

¹⁵⁸ Sik malye winin ninguk, talibuka wininyak ninye arye, anti dib tenena kumce, anti yanikinyake. Ati, aninye eipnyopura, narye sikti, ‘Se, amalye wininyak ninye ara, na pia like’ tenen, unune.

¹⁵⁹ Diba, na ni Allah Yahweh, nara ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu nirya ati, narye pia kanye delinune. Winibuka ununa ara, ance elinilyame. ‘Ance nati, dipkoprob weik arye bico tenenimince, weik arye lyebuka meliniminba, tuba kam unamne’ tenen, moropkine.

¹⁶⁰ Ance dipkoprob yupu arisilyam ning nirya ara, pia diksukum yupu uk ulule. Aning atonun, an yupu noutamak arye, malye winin ning pia kum winipmali buk, ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, pia awininamle. Ayupu nirya, min kum kum danmanto ulule.

“Allah Yahweh, ance nyapdeiamsulum yupu nirya ara, kanye deibuka kekepnirye, pia talibuka wininamne,” nyabuk yupu

¹⁶¹ Se, na ni Allah, sik amutuku noutamak talibuka unyak ninye deiyok nang arye, deiyok ton kum upmalibuk, nati, ‘Elda malinye,’ tenebuka, ikin ning weik, na nong deice deibikirye, nati dobolkirikininyake. Wininiyak bukni, nara ance, “Wininamlulume,” nyapdeiamsulum yupu atibuk, na kanye talima noutam arye, ilil tenebuka unune.

¹⁶² Ati ance nati, “Winibuka melibuka teleb kilinamkine,” nyabuka, nyalin yupu deice nyapdeiamnulum yupu nirya ati, na pia kanye delinune. Winipmanto ara, ninye arye, ‘Bona weik doproptibye’ tenen, elkiriklamica ani, eibikirye, weik kanye deibuka, ulamak touk, narye an nyalinilyam yupu ati, kanye deibuka unune.

¹⁶³ Nara, tilila yupu nyana ap, tenepce nyana ap, lululina yupu ap, nirya ati ara, narye, ‘Aning ara, na like’ tenen, pia like unulule. Bukni, na ni Allah ance, “Aning ara, winina telebe, aning ara winina meme,” nyapdeiamsulum yupu ati, narye pia kanye delinune.

¹⁶⁴ Tonok sum noutam bukni, tuba tonap, like tekbarye deice arye, antibuk, “Se, na ni Allah, ance nyapdeiamsulum yupu ara, pia telebuk ulule,” nyabuka, an si erekunune. Ance, “Aninguk wininamlulume. Aning ara, kum wininamlulume,” nyapdeiamsulum yupu noutamak nirya ara, malye yupu tonok ning babye, kum ulula anya arye, ayupu ara, dipkoprob pia diksukum yupu uk ulule.

¹⁶⁵ Tonda, yata ninye do nirya, ance, “Aninguk wininamlulume. Aning ara, kum wininamlulume,” nyapdeiamsulum yupu ati, kanye deibuka, dobolbanyak ninye nirya ara, malye kanye bona kum diparyuk, lamapdongobuka, namin asa arye unyake. Sik adarapdongobuka unamak ninye ara, ikin ning weik, aupmatu babye, malye winina kum diparyuk, telebuk winipnin banyake. Winipmanto ara, sik yan dum dukne keil ton, bisik noutamak aupmalye babye, keil yan dum dukliba, kum sakuka olule.

¹⁶⁶ Na ni koprop Allah Yahweh, ‘Anda ninye weik arye lyenamlam sum ara, yata sum do?’ tenen, nara kintinibuka dinauk unune. Winibuka kintinibuka, dinauk unamne talak noutamak ara, ance, “Aninguk wininamlulume. Aning ara, kum wininamlulume,” nyapdeiamsulum yupu uk, moubuka tenepnirye, talibuka unamne.

¹⁶⁷ Allah ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu ara, pia telebuk ulule. Ayupu nirya ati, na kanye delinune. Ati ara, nara Allah ance nyapdeiamsulum yupu uk, amu tam unirye, ayupu uk tenepnirye, moubuka wininamne.

¹⁶⁸ Na ni Allah, narye wininun ning ayala-ayala nirya ara, ancuk eibuka, bikinilyame. Ati ara, ance, “Aninguk wininamlulume. Aning ara, kum wininamlulume,” nyasiminye yupu ap, “Aning ara, telebe, aning ara malye. Teleb winina ati, ban bisik ara, ani,” nyapdeiamsulum yupu uk talibuka dobolbanune.

Allah ati, “Melipnilyame,” nyabuka, morobuk yupu

¹⁶⁹ Diba, na ni koproba Allah Yahweh, narye anti, na malye nyabuka morokunun ning nirya ara, ‘Kekepnamnilam’ tenen, dobuka, an damuk delikunune. Ara, ance, “Weik kel bikna deiyok ning arepkiniba, na yupu moubuka kel kipnalame,” nyabuka, nyalin yupu deice nyapnulum touk, “Na kel bikna ati arepnilyame,” nyabuka moropkine.

¹⁷⁰ Aning atonun, narye anti, malye nyabuka morokunun ning nirya ara, ‘Kekepnamnilam’ tenen, dobuka, an damuk delikunune. Ara, ance, “Ikin ning noutamak unalam talak nirya ara, naryuk lyepropnamkine,” nyabuka, nyalin yupu deice nyapnulum touk, “Ance lyepropnilyame,” nyabuka moropkine.

¹⁷¹ Allah anda pia aunmince, ance nyasiminye yupu nirya, nati peterenilyame. Ati ara, nara asum-asum nirya, “Se, anda pia teleb ulyame,” nyabuka, an siuk, pia erenamkine.

¹⁷² Na ni Allah, ance, “Aninguk wininamlulume. Aning ara, kum wininamlulume,” nyapdeiamsulum yupu nirya noutam ara, malye yupu tonok ning babye, kum ulule. Ayupu nirya, pia diksukum yupu uk ulule. Ati ara, narye, “Se, Allah el yupu ara, pia telebuk ulule,” nyabuka, kanye lon mot deice arye, pia senamne.

¹⁷³ Ance, “Aninguk wininamlulume. Aning ara, kum wininamlulume. Teleb winina ara, ani,” nyapdeiamsulum yupu nirya, narye, ‘Ayupu uk moubuka kel kipnirye, aninguk pia talibuka wininamne’ tenen, akunum dobuka dobolbanune. Ati, ‘Anda dinimince, kintinibuka natibuk, pia bico tenebuka, melinamnilam’ tenen, moropkine.

¹⁷⁴ Se, na ni Allah, ance ninye weik arye lyepsimince, talibuka teleb kilinamsilam ning ara, ‘Dan talak arye lyepnamsilam do?’ tenen, pia kintinibuka dinauk unune. Tonda, ance, “Aninguk wininamlulume. Aning ara, kum wininamlulume,” nyapdeiamsulum mem yupu nirya ati, na kanye talima noutam nirya arye, ‘Ayupu ara, pia telebe,’ tenenune.

¹⁷⁵ Na ni Allah, ance, “Aninguk wininamlulume. Aning ara, kum wininamlulume,” nyapdeiamsulum mem yupu nirya dopropnirye, talibuka dobolbanamne deice arye, mikip kiliniliba, na teleb ubuka kam unamne. Tonda, ance meliniminba, kam pia unamne talak ara, talye kum unamne. Narye antibuk, weik arye kanye deipnirye, “Anda pia teleb ulyame,” nyabuka, an siuk, pia erenamkine.

¹⁷⁶ Se, na ni Allah, nara an amu tam unirye, an piluk donun bukni, domba basam tonok wangamliba, el weina deiyoknye birye, ‘Na domba basam, dan mutuku ulul do?’ tenen, elamle touk, nara teleb ban bisik wangapnukba, malye kanye bobuka, ununa anya arye, ance elyanamnilame. Ara, talye ati kum bukni, ance, “Aninguk wininamlulume. Aning ara, kum wininamlulume,” nyapdeiamsulum yupu nirya, luba kum kinune. Ayupu ara, moubuka teninauk unune. Ati melibuka elyanamnilame na nio. Raja weik Daud arye, Allah morona deice arye, amot yupu nyabuka sekuke.