Mazmur 113 - Eipomek

“Allah ara, pia teleb ulule,” nyabuka, mot nyana ati yupu

¹ Nun nirya arye Allah ati, “Haleluya,” nyabuka, el si erenamabe. Nun nirya arye, nun ni koproba Yahweh ati, “Anda pia telebuk ulyame!” nyabuka, elti, si erenamabe. Tonda, nun ni koproba Allah, el amu tam umunce, el piluk melibuka dolulum nang babye, Yahweh ati, “Anda pia telebuk ulyame,” nyabuka, el si erenamlume. Diba, nun nirya arye, nun ni koproba Yahweh ati, “Anda pia telebuk ulume!” nyabuka, el si erenamabe.

² ‘Ninye mutuku sirya, im sirya nirya arye, nun ni koproba Yahweh ati, “Anda pia telebuk ulyama ati, an si ara, pia teleb siuk ulule,” nyabuka, ‘El si erenamak’ tenen, patasulule, ‘Winibuka nyanamak’ tenen, moronyabe. Ara, “Atalak babye, aminyan talak babye, tonda doupnamle talak babye, ‘Ninye yala-yala nirya arye, Allah ati, ‘Anda pia telebuk ulyame!’ nyabuka, ‘El si erenamake’ tenen, patasulule,” nyabuka, moronyabe.

³ Tonda, tukwak mutuku nang, mutuku sirya, im sirya nirya noutam unyak nang arye, Allah el ap, el si Yahweh ap ati, erenamake. Ara, keting panalyangan tam arye, dipdongobuka, keting kumulban tam ap, anoutam tam nirya ap unyak nang nirya arye, Allah el ap, el si Yahweh ap ati, si erenamake. Diba, pia teleb ning ara, ninye nirya arye, Allah Yahweh elti, el si erenamake.

⁴ Nun tukwak nang, mutuku sirya, im sirya nirya noutam, unyap nang ara, amu tam atonun nang unyap bukni, Yahweh elda tukwak nang yala-yala nirya, pia deice tam ulirye, sik nirya ati, deiyok kibuka talilule. Tonda, Allah Yahweh, el mikip weik ulye ning ap, pia teleb wininyaka ap ara, pia weik ati, pia deice tamnye ulule. Ara, im deice tam ulula atia.

⁵ Ati ara, yatanye ton, nun ni koproba, Allah Yahweh atonun ulul do? Kume, ara nun tukwak nang ara, pia kum winipmanto. El tonoka! Yahweh elda, aning-aning nirya, pia deice tam buklirye, aning-aning nirya talilula atia.

⁶ Tonda, Allah ara, pia deice tam ulula ati, im ap, tukwak mutuku ap ara, Allah el im deice tam ulirye, utam nirya eililule.

⁷ Sik namin asa aryuk unyak nang nirya ara, pia amu tam, tuku butbuta noutam atonun unyak bukni, Allah arye anang nirya ati, moubuka meliplirye, erebuka telebakuk, dobuka deililule. Aning atonun ton, aning-aning kum talikirye, pia kankan uk unyak nang ara, pia amu tamuk unyake. Ninye arye butbuta bataklamaka atonun, pia malye mutuku unyake. Bukni, Allah Yahweh arye anang ati, melibuka lyeplirye, erebuka telebakuk deililule.

⁸ Allah arye, pia talye kankan unyak nang, dobuka erepdeiplirye, weik ninye deiyok nang dam deiplyeba, neika bunyake. Ara, aning-aning nirya, kum talinyak nang dobuka erepdeiplirye, el tenen nang, sik Israel yala nang kan-kan noutam deililule.

⁹ Tonda, mapu kum deipmanto kilapu dobuka, el mikip deice melibuka kwetepleyeba, sik mapu deilinyake. Ati, sik akilapu ap, sik akanye nang yapu ap, sik mapu ap ara, tonok aik noutamuk, kanye deibuka ukirye, si erebuka kinyake. Allah el mikip deice arye, akilapu melibuka kweteplyeura, mapu weik tonun deibikirye, ‘Se, wini talak mapu deilin kilapu ara, nun unyabe,’ tenebikirye, pia kanye deibuka unyake. Aning ati ara, nun nirya arye, nun ni koproba Yahweh ati, “Anda pia telebuk ulyame!” nyabuka, el siuk erenamabe.