Mazmur 103 - Eipomek

Sisinanye Raja Daud arye, “Allah arye, pia teleb kubuka melimselula ati, mot nyana deice arye “Telebe,” nyabuk yupu

¹ Na Daud arye aMazmur mot yupu nyabuka sekse. “Se, na ni koprop Allah Yahweh atibuk, anda pia telebuk ulyame,” nyabuka, an si erebuka kinamkine. Ati ara, diba, na kanye talima noutamak unerur ning nirya deice arye, Allah ati, ‘Telebeʼ nyakinune. Allah el malye winina ara, pia kum winirura ati, el ap, el si ap ara, pia teleb, dumsisikumuk ulula ati, “An si ara, pia teleb, pia lekuk ulyame,” nyakinune.

² Na kanye talima noutamak, pia moubuka tenipna arye, “Na ni koprop Allah, el si Yahweh atibuk, anda pia telebuk ulyame,” nyabuka, kanye deipnirye, an siuk erebuka kinune. Diba, Allah el malye winina ara, pia kum winirura ati, el ap, el si ap ara, pia teleb, dumsisikumuk ulula ati, “An si ara, pia teleb, pia lekuk ulyame,” nyakinune. Tonda, anda Allah arye nati, bico tenenilirye, pia teleb kibuka melinilya ara, pia kum batakanamne. Aning ara, pia teninauk unamne.

³ Allah el diparyuk, nun malye wininun ning nirya ati, namin kisilirye, kum kibuka deiplyopura, lyesulule. Tonda, nun kanye imun uk talepmasilye ning nirya, Allah el diparyuk auk nirya kum kipdeiplirye, kwetepsilyopura, tuba tamubuka, tonap teleb kilisulule.

⁴ Aninguk kum bukni, Allah arye kum melipnutopura, dipkoprob malye wininyak ninye dibikiba, balamak sukumuk, el si ara Sheol, betinye bukni, Allah ati, diba tenenyak ninye ara, amutuku kum wekinyake. Allah elcuk nun diba teneyap ninye lyesulule. Anya arye, dipnyopura, diplamik ninye unyakak ara, kum binuka unamne. Nara, kamuk unamne. Tonda, Allah arye, bico tenenilirye, ‘Narye anggun, ‘Naʼ tenen nang ati, ‘Winipnamsine. Pia teleb kilinamsine,’ nyabuka, nyalin yupu deice nyapsise yupu nirya ara, pia dipkoprob wininamsine. Tonoknye babye, pia kum bataknamne. Winibuka nyapsuka ati, lyesulule. Adeice melilnamsilya deice arye, tuba-tuba teleb kilisulirye, pia kamuk unamyabe.

⁵ Allah aryuk teleb ning ayala-yala nirya, arenilya deice arye, telebuk kilisulule. Winibuka kam una deiyok ning aresilya deice arye, minopce min kum dipnamabe. Maplye maka, el si ton Rajawali maka, keting tamun weik arye kam ulamle touk, Allah melisilya deice arye, keting tamun yupa weik kam unamape. Kam una deiyok ning aresilya deice arye, wini talak ara, kamnye ulamupu touk, kilisiliba, telebuk unamabe.

⁶ Allah el si Yahweh arye, “Aning ara, wininamlume. Aning ara, pia kum wininamlume,” nyapdeiamsuk yupu nyalye touk, el pil dolye ning nirya ara, aning atouk diksukumuk ulule. Yata ninye do nirya, yuk nang arye, sik nong deice ikin ning weik deibikirye, ikin pil delinyakba, imun kanye bobuka unyak ninye nirya ati ara, Allah el si Yahweh arye melilule. Ara, malye una kum diparyuk, diksukum ubuka melilule. Tonda, yu nang arye, sik amu tam unyak ninye ati, ‘Anang ara, yanibibiba, malye kanye bonamake,’ tenenyak bukni, Allah arye, ‘Sik amu tam unyak ninye ara, lyepnirye, teleb ulinamle,’ tenenilirye, melinulule. Allah arye, pia amutam ubuka, ikin weik unyak nang ati, yupu bokeiplirye, tuba tamubuka telebuk kilisulule.

⁷ Minop talak ara, Allah arye nun apu koprop Musa biti, “Winibuka unune. Teleb winina ati, anggunce binamlum bisik ara, ani,” nyabuka, Musa dam yanuka laka nyalamukba, el tenelye ning nirya, Musa kekelamuk. Kekelamukce, Allah el mikip weik deice arye, mambul pil dolulnye ati, ‘Sik Israel yala nang nirya, kel biknamakʼ tenen, Allah arye, nun apu yapu, sik Israel yala ninye ati, laka nyalbalamukba, sikce diramika ati, kel biklamik.

⁸ Allah el si Yahweh arye, ninye nirya ati, kanye talima arisiliba bico tenenanye ulula anya arye, nun malye wininyap ning ati, adiparyuk wenebuka oplopsutu bukni, minopce yu upliba, kum wenesulule. Aning kum bukni, weik tonun bico tenepsilirye, ‘Winibuka teleb kipdeipnamsine,’ nyabuka, nyalin yupu deice arye nyasilye yupu nirya ara, aninguk dipkoprob, tuba-tuba winisulule. Elce nunti, weik tonun bico tenesulul ning ara, nukmanto kum ulule.

⁹ Tonda, nun tukwak ninye arye, malye wininyap ning ati, pia tuba-tuba ati, yu upliba kum wenesulule. Tonda, elce, “Anggun malye ululum ninye ara, malye weik winilulum ning ara, ani,” nyabuka, tuba-tuba kum wenesulule.

¹⁰ Diba, nun malye wininyap ning ati ara, talye mangkau kibuka wenepsuturye, obuka kum kipdeipsutue. El nyasilye yupu yaniltanauk, wininyap ning nirya dekna ati, weik ikin ning, nun nong deice deipsutu bukni, aning babye kum winisulule. Bico tenebuka melisulule. Amalye un ning nirya, malye winilamap atonun, kum wenesulule.

¹¹ Allah arye minopce kum wenesulula deiyok ara, ani. Allah ati, ‘Se, elda pia mambule. Mikip Weiknye ulule,’ tenen, elti, ilil tenena ara, elce nyasilye yupu, moubuka talinyak nang ati ara, Allah arye, ‘Anang nirya ati, weik tonun bico tenesinirye, winibuka telebuk kipdeipnamsine,’ nyabuka, nyalin yupu deice arye nyapdeiamsuk ning nirya ara, dipkoprob tuba-tuba aresulula ati, aning nirya nong upnamsilca! Tukwak mutuku outam, im deice ara eitam, anoutamak weik lo aupmalye ning ululnye ara, kum nukmanto. Anye atouk, Allah arye, bico tenesulul ning ara, kum nukmanto. Nun ti batakana kum diparyuk, pia weik arye bico tenepsilirye, tuba-tuba melisulule.

¹² Tonda, keting panalyangan tam ara, atam bukni, otam keting wekelbalamle tam aulule. Anoutam mutuku ara, kiklibuka kum nuktipye. Aning atouk, Allah arye lyebuka kilisulul ning nirya ara, atouk ulule. Nun malye winipmabye ning ara, Allah arye dobuka delilbalule. Ara, Allah arye, “Aning ara, wininamlume. Aning ara, pia kum wininamlume,” nyapdeiamsuk yupu yanibibirye, malye winin ninguk, weik tonun talibuka unyap bukni, Allah arye, aning nirya lyebuka kilipsilirye, kum kilisulule. Nun malye ning ara, namin kipsilirye, lyepsilyopura, nun malye wininyap ning dobuka, pia pera sukum atouk delilula ati, aning babye, pia nukmanto kum ulule.

¹³ Tonda, ninye tukwak nang kankan arye, ninye nirya, sikce delilamak mapu ati, weik tonun bico tenelamak touk, Allah ati, nunti, ‘Se, elda pia mambule. Mikip Weiknye ulule’ tenen, elti, ilil tenekirye, el yupu uk moubuka talinyak nang ati ara, Allah Yahweh arye, aninye nirya ati, weik tonun bico tenesulule.

¹⁴ Allah elda, weik tonun bico tenesulula deiyok ara, ani. Ara, Allah el kele. Nun tukwak nang nirya ara, nun kanye talima mikip weik nang kum unyabe. Elce talye tuku buk dobuka kwepdeiamsuk ning ara, tuba tenesulule. Ara, Allah arye tukwak nang kwepdeiamsuk talak ara, kelkel alamuk tuku dobuka adeice arye kwepdeiamsuke. Aning ara, tuba tenesulula ati, yu upliba, minopce obuka sirya kum dakasulule.

¹⁵ Nun tukwak mutuku unyap ninye nirya ara, nun kam un talak ati ara, bumanguk unyabe. Winipmanto ara, Talye palamle mut-muta ara, keting bupu deipliba, sesal sepropliba, minopce kolulamle touk, nunda tia ninyeuk unyaba ati, nun babye, keting tamun weik tonun, kam pia kum unamabe. Minopce dibinyabe. Bukni, mutmuta noutam, kita ning talye pabukablirye, urasin pia teleb ulamle bukni, keting bupu deipliba, sesal sepropliba, minopce kolulamlirye, minopce kum ulamle touk, nun ninye tukwak nang babye, atouk unamape.

¹⁶ Mutmuta kita oplirye, aupmale bukni, bupu kumanya mikip arye, bai tam yo kita deice pu aplyeba, adip aryuk sesal sebuka kum daliba, amutuku ninye arye, akita ning ara, tonap kum elilamak touk, ninye tukwak nang babye, akunum dipbikce ura, akunuma. Yuk nang arye aninye tonap pia kum elinyake. Dibipyopura, yuk ninye minopce lubakisinyake. Dortalak yanamle keting tamun noutamak ara, yuk nang arye, “Anye bira, asukum ulamuk,” nyabuka, laka kum nyaptinge.

¹⁷ Bukni, Allah ati ilil upliba, el amu tamuk ukirye, elti, talinyak ninye ara, aninye ati ara, Allah el si Yahweh arye, sikti, bico tuba tenepsilirye, melisulule. Allah Yahweh arye, “Weik tonun bico tenesinirye, pia teleb kipdeipnamsine,” nyabuka nyalin yupu deice, “Winibuka aning arenamsine, winibuka wininamsine,” nyalamsulul ning nirya ara, pia kum batakalule. Ara, aning-aning min kum kwepdeiamuk talak arye, dipdongobuka, wini talak ap, tonda, dounamle talak ap ara, pia ati, bico tenepsilirye, teleb kilinamsile. Tuba-tuba aninguk, nong kibuka teleb kilinamsile. Tonda, aninye arye deibikiba, dadeipdanin banamak mapu babye, Allah arye diksukum kibuka melimsilirye, sikti, teleb ulinamle. Aninye ati, pia kum bataknamle.

¹⁸ Ara talye daunyak nang nirya ati kum bukni, yata ninye do nirya, Allah arye, “Weik tonun bico tenesinirye, pia teleb kipdeipnamsine,” nyabuka, nyalin yupu deice, “Aning ara, arenamsine. Anggunce aning ara, pia kum wininamlume. Aning ara, wininamlume. Teleb winina ara, ani,” nyabuka, nyalina yupu deice deiamsuk yupu nirya ap, ayupu atibuk moubuka tenebikirye, aninguk talibuka dobolbanyak nang ati, Allah arye pia tuba-tuba bico tenebuka melinamle. Ara, yata nang do nirya, Allah ati, ilil upliba, Allah arye, “Aning ara wininamlume, aning ara pia kum wininamlume,” nyapdeiamsuk yupu moubuka talikirye, pia aninguk wininanyak nang ati, pia bico tenepsilirye, telebuk kilinamsile. Ara, wini talak babye, tonda, dounamle talak babye, pia ati, bico tenepsilirye, teleb kilinamsile. Allah ara, el malye winina pia kumce, pia diksukumuk winilye ning ara, elti, diba tenenyak nang ap, sikce delinyak mapu ap, tonda, amapu arye, delinamak mapu ap ati, Allah arye sik nirya ati, diksukum una deiyok ning, pia arenamsile. Aninye ati, pia kum bataknamle.

¹⁹ Nun ni koprop Allah Yahweh ara, aning-aning deice tam ulirye, weik deiyoknye ulula ati, aning nirya talilule. Aning-aning nirya ara, el amu tamuk ulule. Allah arye, “Pia ninye deiyoknye unamne’ tenen, deiyoknye bulul sukum, el si tahkta deice ara, im deice tam akunum deibuk. Ati, Allah elce talilul ning ara, aning-aning yala-yala nirya ap, tukwak mutuku nirya ap, talilule.

²⁰ Aning ati ara, Allah el im deice pil talibuka donyak nang, sik malaikat nirya ara, Allah elce, “Winamlulume, amutuku binuka pil donamlulume,” nyalilul yupu nirya, kekepmunce, anyalye touk pil dobuka ululume. Anggunda, mikip weik malaikat ululume. Allah aryuk, “Wininamlyame,” nyabuka arisilye yupu nirya ara, kekebuka ululume. Ati, anggun malaikat-malaikat nirya babye, Allah Yahweh, el siuk erenamlume.

²¹ Anggun im deice ululum malaikat nirya, Allah el amu tamuk umunce, Allah nyasilye touk, ayupu moubuka kekepmunce, el piluk dolulum malaikat nirya arye, Allah Yahweh el tibuk, “Anda pia teleb ulyame,” nyabuka, el si erebuka kinamlulume.

²² Tonda, Allah arye kwepdeiamuk kam ning nirya ap, kwepdeiamuk ninye nirya ap arye, anggunce Allah Yahweh el tibuk, “Nun ni Allah, anda pia teleb ulyame,” nyabuka, el si erebuka kinamlulume. Allah arye, aning-aning deice tam talibuka ulirye, Weik Erenanye ulula anya arye, el amu tam ulul ning nirya arye, Allah ati, “Se, anda pia teleb ulyame,” nyabuka, el si erenamlume. Tonda, na Daud arye nyapne. Na kanye talima noutamak, pia moubuka tenipna arye, na ni koprop Allah, el si Yahweh atibuk, “Se, anda pia teleb ulyame,” nyabuka, el si erebuka kinamne.