Mazmur 102 - Eipomek

Tonoknye ton, “Ikin uplye ati, imun kanye boplye talak ara, dipkoprob Allah arye, melibuka lyepropnamne,” nyabuk yupu

¹ Atalak ara, ninye tonoknye ton ikin ubukce, pia mitanguk ulamuka ati, anye birye, Allah ati morobuk yupu. Allah morobuk noutam arye, “Ikin unulul ning ara, winibuka-winibuka unulule,” nyabuka, Allah Yahweh el dam nyabuk. Anye birye nyabuk yupu ara ani.

² Se, na ni Allah, an si Yahweh ati, na moropnukin yupu nirya ara, kekepnamnilam’ tenen, moropkine. Ara engebuka, malye nyanmance ngalukunman yupu ara, ‘An dam yatuba, ance kekeptum’ tenen, moropkine.

³ Ikin weik upmanilba, imun kanye bobuka unye talak ara, ‘Na moropnukin yupu kekepnulilam’ tenen, moropkine. Ance nati, ‘Anye bira, na like,’ tenepmince, ‘Amyok kanudongobuka, na malye winin ning kum namin kinamnilam’ tenena ati, moropkine na nio. Ati, narye moropkinye talak ara, ‘Anda na dam yatumce, an amul deice arye kekepnutum’ tenen, moropkine. Tonda, narye moropnye ning ara, ‘Anda adiparyuk minopce, yanuka melibuka lyepropnutum’ tenen, moropkine.

⁴ Anyapmakina deiyok ara, ani. Ara, na kam unye talak ara, min arye kum upnin banulul atia. Winipmanto ara, uku dabikiba, uku buk diplirye, tulum welelamle, atulum ara kumdanin balamle touk, nara minopce dipnyeura, kum danamne. Ikin weik upnilyeba, na nong ara, kanye imun uk dinilye ning ara, winipmanto ning, weik uku dinmalirye, buppu weik ulamle touk, na nong pum tam ara, weik uk dinulul ati, buppu weik unulule.

⁵ Winipmanto ara, kiting tin arye, talye maning yalakuka, sisal seplyeba, ninye arye yanipmacebuk, aminyan talak, amaning kum kilamle touk, na kanye talima noutam babye, uk weik dinulul ati, pia mitang unune. Pia mitang unulula ati, na din dinun nye talak nirya ara, ‘Din ara, na likeʼ tenen, aning lubakilongonune. Winibuka unun talak nirya ara, na din pia kum dinune.

⁶ Uk weik dinilyeba, weik yupu deice arye, malye nyabuka engenune. Tonda, na din dina kum ati, na nong bol nirya ara, malye upnilyeba, na nong bol ara, yok deiceuk uplyeba, unune.

⁷ Tonda, na din dina kum ati, na nong bol nirya ara, malyeuk upnilyeba, na nong bol ara, yok deiceuk upnilyeba, na yok lak diamuk unulule. Aning atonun, ninye pia kum unyakak, pera mutuku noutam ara, lukunyan talak balamle maka, el si burung hantu, el yuk ulamle touk, na babye pia yuk unune. Yuk nang ap, na ap, neika ton pia kum bunyabe.

⁸ Lukunyan noutam ara, mapmanye talak ara, na pia kum mapmanto unune. Asing lanauk unune. Tonda, tonok mitik maka, ninye aik deice tam, el yuk bukapya ani, adiparyuk lakuka balamle touk unune. Nara, na babye pia yuk unune. Yuk nang ap neika una pia kum unune.

⁹ Yu nang arye, ‘Anye opnuyabe,’ tenen, pia dinauk uninyak nang ara, asum-asum nirya, nalipnikirye, malye yupu nyaninyake. Nati, malye weik nyanyak nang arye, ‘Yuk nang ati, malye kipdeipnuyap’ tenebikirye, “Anye pia ikin weik uplyeura, nong malye ulamle touk, sik babye atonun upnamlarya!” nyabuka, na amot nyana deiyoknye si deice arye, sunininyake.

¹⁰ Anyanyaka ara, talye ati kume. Deiyok ara, nara imun kanye bonuna ati, uku sice uk dinune. Ara, sik yuk nang arye, teleb roti kwaning dilamak bukni, nara, uku sice uk dinune. Tonda, narye mek kwebuka, dinye talak nirya ara, na asing mek weik tonun sakanulula ati, mek koproba ap, na asing mek ap, talbalibuka dinune.

¹¹ Se, na Allah, ance nati, ‘Anye bira, na like,’ tenepnimince, yu weik ukulula ati, nati wenenilyame. Ara, ance na bobuka, bai tam atonun akunum donokonilyama ati, nyapkine na nio.

¹² Ati ara, na kam unamne talak ara, bereken talak keting deice arye, dola tiklamya ani, ila tamubuka, adiparyuk kum danalamle touk, ulule. Aning ara, nara, adiparyuk minop dipnamne ati, ayupu ara, nyapne. Tonda winipmanto ara, keting tin deiplyeba, talye maning minop sisal seplirye, malye ulamle touk, na babye minopce dipnamne.

¹³ Bukni, na ni Allah Yahweh, anda aning-aning nirya talibuka, pia deice tam erebuka umince, ninye deiyok una ati, pia teleb buna ning, el si ara takhta deice bukminyak arye, mikip weik deiyoknye pia aunamlame. Ati ara, an si ara, ninye tukwak nang arye, tuba-tuba tenebikirye, an si tonok pia erenamakiake. Ninye tukwak nang arye, mapu deibikceba, dadeipdanin banamak nang nirya babye, an si tuba tenenauk unamake.

¹⁴ Aminyan talak ara, an Allah arye, bukminyakarye, Sion mutuku ap, amutuku noutam unyak nang ap ati, bico tenepsimince, melibuka lyepropnamsilame. Nun kanye ara, ‘Atalak noutam aryuk, ance Sion mutuku unyap nang ati, nun dam yanuka, melibuka lyepropsimince, teleb kilinamsilam,’ tenepmabe. Tonda, nun tenepmaba ara, an Allah arye, ‘Sik Sion mutuku unyak nang, sik lyelon talak, ani,’ akunum teneplum ning ara, wini talak akunum dam yale. Ati, ‘Anda adiparyuk yanuka lyepropsimince, teleb kilinamsilam,’ tenemabe.

¹⁵ Aning ara, talye ati kum nyababe. Allah, an amu tam ubirye, an pil melibuka donyap nang nirya arye, Sion mutuku noutam uamuk aik, uluplobikura, talye tuku deice tuba aubuk keil nirya babye, ‘Aning nirya ara, tuba weik mambul ninguk ulule,’ tenenyabe. Aning atonun, Sion mutuku noutam, talye tuku buta aupmalye babye, ‘Aning nirya ara, pia mambule,’ tenen, tuba bico tenenyabe.

¹⁶ Nun kanye tenenyaba ara, ani. Ara, sirya talak ara, sik yala yuk-yuk nang, anti kum bikamkik yala yuk-yuk mutuku nang nirya ara, anda Allah Yahweh, an mikip weik ulyama ati, bikikirye, anti ilil weik unamle. Tonda, mutuku sirya, im sirya nirya noutam unyak weik ninye deiyok nang, raja-raja nang nirya babye, Allah an pia teleb winilyam ning ap, mikip weik winilyam ning ati, eibikirye, ‘Seʼ tenen, ilil pia weik unamle.

¹⁷ Sik ayala yuk-yuk mutuku nang nirya arye, an Allah ati, ilil unamla deiyok ara ani. Ara, anda Allah Yahweh arye, Sion mutuku ulultaklamik ning nirya ara, ila ton ap, tamubuka teleb kibuka dobikirye, pia telebuk unamle. Winipminyeba, eibikirye, ilil uplyeba, an siuk erenamkiake. Atalak ara, anda Allah Yahweh arye, an pia teleb winilyam ning ap, mikip weik winilyam ning ap ati, dirina pia weik upmince, tukwak yanuka unamlame.

¹⁸ Allah Yahweh arye, sik bona talena kum ati, talye kankan nang arye, elti, moronyak yupu ara, kum kekebuka biknamle. Aminyan talak ara, sik imun kanye bobuka, ikin weik ualamikce nang arye, moronyak ning nirya ara, Allah Yahweh kekeplirye, sikti, melinamle. Sikce moronamak ning nirya ara, Allah arye, “Aning nirya ara, daupye,” pia kum nyanamle. Sikce moronamak ning nirya, akunum bikilula ati, aning kum bataknamle.

¹⁹ Anyapmasin yupu nirya ara, moubuka kekepmunce, sekuka deipnamlume. Ara, ‘Aminyan doyanamle talak unamak nang, sik babye aning nirya kekebikirye, biknamak’ tenen ati, ayupu ara, anggunce seklulume. Ara, atalak unyak nang arye, min diamik mapu bukni, aminyan talak deibikceura, kam tuba unamak nang nirya arye, nun ni Allah Yahweh ati, “Anda pia telebuk ulyame,” nyabuka, el si erenamaka ati, ayupu nirya ara, seklulume.

²⁰ Ayupu ara, ani. Allah Yahweh ara, im deice tam pia teleb lek mutuku noutam ulyak arye, tukwak mutuku eililule. Diba, Yahweh ara, im deice ulyak arye, utam tukwak mutuku nirya babye, elcuk eililule.

²¹ Dilirye, ‘Naʼ tenen nang, sik Israel yala nang ara, yuk pera mutuku wenen aik pum tam unyak nang ap, ikin weik unyak nang ap, sikce yata yupu nyabikce deice arye, nati moropnamniak do?’ tenen, moubuka pia disulule. Ara, sik tukwak mutuku unyak nang kan-kan arye, ninye yupu akunum bokeiamikce, ‘Anang akunum oplopnamabe,’ nyabuka, yupu akunum nyapdeiamik nang wenen aik tuba daunyak nang ati, ‘Naryuk anang loplopnirye, lyepropnamne,’ tenebukce, kintinip deibuk.

²² Allah arye akunum kintinipsukce, ‘Anang nirya lyepropnamne,’ akunum tenyamuka ati, aning akunum uplyopura, atalak ara, Sion mutuku noutam unamak nang nirya arye, nun ni koproba Allah, el si Yahweh ati, “Se, anda pia teleb ulyame,” nyabuka, el si laka nyabuka erenauk unamake. Diba, Yerusalem mutuku noutam unamak nang nirya ara, el Yahweh ati, el siuk erebikirye, “Se, anda dipkoprob, pia telebuk ulyame,” nyanamake.

²³ Ara, mutuku sirya, im sirya nirya noutam unyak nang arye, ‘Allah el siuk erenamabe’ tenen, bulubikceura, Yerusalem mutuku neika yanamak talak ara, Allah ati, si erenamake. Tonda atalak ara, yuk mutuku nang yala-yala nirya ap, sik ninye deiyok nang ap, sik nirya arye, Allah Yahweh ati, diba tenebikirye, el si tonok, pia erenamake.

²⁴ Bukni, narye ayupu nyapmanye bira, wisi kum dase talak ara, Allah arye na mikip nirya ara, adiparyuk akunum dopropnukura, na mitang unune. Winipnuka deice arye, na kam unamne talak ara, akunum sekdongopnukba, keting tamun weik tonun ton, kam kum unamne. Nara, ‘Se, Minopce dipnamnarya,’ tenepne.

²⁵ Ati ara, na ni Allah, narye anti, nyabuka moropkine. Na kam tuba unamanye talak aryuk, ‘Kam una deiyok ning min kum dopropneminyeura, adiparyuk kum dipnamne’ tenen, moropkine na nio. ‘Tuba kam uptinye’ tenen, moropkine. Na ni Allah, anda pia kum dipnalame. Tuba-tuba dounamle talak nirya ara, kamuk unalame. Pia kum dipnalama atia.

²⁶ Aning-aning kum uamuk talak ara, an akunum kam ulyama ati, ancuk, tukwak mutuku nirya kwelina ati, weik mikip arye, kwepdeiplumura, pia mikip weik ulula ati, wini talak babye, tuba aulule. Aning atonun, im noutam ap, im deice ap, amutuku noutam ulye ning nirya ap ara, ancuk kwepdeiplume. An taruk mikip deice aryuk, aning-aning nirya akunum kwepdeiplume.

²⁷ Ance kwepdeiamlum ning yala-yala nirya ara, malye ulamika ani, aminyan sirya talak ara, kum danamle. Bukni, an tonokuk ara, pia ati kamuk tuba, pia telebuk unamlame. Ance kwepdeiamlum ning yala-yala nirya ara, kum upnamle. Winipmanto ara, ninye arye winyak baju ara, aminyan talak lyulamle touk, ance kwepdeiamlum ning nirya babye, kum kipnamlarya. Winipmanto ara, ninye arye minop baju batakikirye, winiryuk baju ongolamak touk, ance aning-aning nirya, kwepdeiamlum ning nirya ara, sirya talak arye kum kipdeipmince, punubuka, winiryuk ning ton, kwepdeipnamlame.

²⁸ Bukni, an tonok ara, winiryuk ning ton pununa kum aryuk, pia tuba-tuba kam umince, pia telebuk unamlame. An keting tamun tuba unamlama ara, kum nukmanto, tonda pia min kume kum danalame.

²⁹ Bukni, an tonok ara, winiryuk ning ton, pununa kum aryuk, pia tuba-tuba kam umince, pia telebuk unamlame. An keting tamun tuba unamlama ara, kum nukmanto, pia aunamle. Tonda, min kume kum danalame. Ance sikti, teleb kipdeipminyeura, sikce deilinamak mapu nirya babye, an damuk, teleb unamake. Aning nirya babye ancuka!