Mazmur 1 - Eipomek

Malye winin ninye ap, teleb winin ninye ap, wininamak ning ati, nyabuk yupu

¹ Malye winilamice ninye arye, sik nyabice yupu ap, malye wininyak ning ap, kekebuka kum wininyak ninye ara, Allah arye melilamliba, telebuk unamake. Tonda malye winin ning talibuka wininyak ninye arye malye weik winilamak touk, kum wininyakce, telebuk wininyak ninye ara, Allah arye melipliba, telebuk wininamake. Ati ara, Allah ati, dib tenenyak ninye ara, Allah ati like tenebuka, nalibuka akutunyak ninye ap, neika kum unamake.

² Bukni, sik Allah ati dib tenenyak ninye ara, sik patalul ning ara, Allah Yahweh arye, ‘Wininamlulume, aning ara kum wininamlulume,’ nyabuk yupu nirya atibuk, kanye deibikirye, moubuka kekenyake. Ara, keting noutam talak babye, lukunyan talak babye, Allah Yahweh elce nyalilamsuk yupu nirya kekebikirye, ‘Deiyok ara, aning ati nyabuk do?’ tenen, moubuka tenebikirye, unamake. Aninye ara, Allah arye melilamliba, telebuk unamake.

³ Allah yupu moubuka tenelulnye bira, el wininamle ning nirya ara, telebuk wininamle. Anye el wininamle ning nirya ara, winipmanto ninye arye mek kup-kup ak yo koubikiba paplirye, bok teleb kibuka paplirye, duk moun talak li nirya ara, batakna kumce, teleb kibuka duk moulule. Tonda ayo bok kolubuka, kum saklamla atonun, Allah ati diba tenelulnye birye, wininamle ning nirya ara, telebuk wininamle. Deiyok ara, Allah arye diksukumuk wininyak ninye ati melilamliba, telebuk wininamake.

⁴ Bukni, sik malye winin ninguk, tenebuka upra bace ninye ara, kumanya balirye, pubuka dopliba, sing-singa lakuka balamle atonun unamake. Adeice arye sik ap, sik wininyak ning nirya ap ara, kum danamle.

⁵ Ati ara, malye winin ninguk talibuka wininyak ninye ara, Allah arye tukwak ninye im sirya, mutuku sirya nirya yupu lipsisikuka, wenepnamle talak ara, sik amalye winin ninguk, talibuka wininyak ninye ara, weneplirye, kum daneipnamle. Ara, Allah el mapu noutamak arye bokuka, yukak deiplirye, amalye wininyak ninye ati wenepnamle. Malye winin ninye ap, Allah ati diba tenebuka diksukumuk wininyak ninye ap, neika kum unamake.

⁶ Anyapmasin yupu ara, talye ati kum nyapsine. Deiyok ara, el kanye talima lamapdongobuka arye, Allah amu tam ulirye, diksukumuk winilulnye bira, Allah Yahweh arye melibuka kalikilirye, aninye ati, teleb winililule. Bukni, malye winin ninguk tenebuka, upre bace ninye ara, wenebuka opnamle ati, kintinililule. Sik malye winin ninguk talibuka, wininyak ninye ap, sik wininyak ning ap nirya ara, Allah Yahweh arye kum daneipnamle.