Matius 6 - Eipomek

Yesus arye, bona utotoa talina kum ninye melina ati, nyabuk yupu

¹ Yesus arye ayupu nyabuk. “Anggun kanye moubuka una ati, ayupu nyapnusine. Anggunda, ‘Allah el si erebuka, el pil donamape,’ tenemunye talak nirya ara, yuk nang eipsikirye, ‘Sikda teleb nang, tenenamsiyak’ tenen, ninye si seknak lakak anyuk kum pil donamlulume. Ninye si seknakuk, laka pil domunyopura, anggun ni Allah im deice ululnye birye, ‘Dekne ning arenamne’ tenepsuk ning kum arenamsile.”

² “Aning ati ara, sik tenepce arye, talya nyaltakanyak nang winilamak ning ara, anggun atonun kum wininamlulume. Anang ara, Allah el si erena ati kum bukni, ‘Yuk nang eipsikirye, si erepsikirye, pia teleb nang tenepnamsiyak’ tenen, bona utotoa talina kum ninye patalul ning arebikce talak ara, weik bingong nyana terompet nyabikirye, ninye weik arye, ban bisik nirya ap, Allah yupu peterena aik kopropa ap, asukumuk yuk ninye dinyakak, laka ubuka arenyake. Na dipkoprop nyapsine, Allah arye anang ati, aminyan talak teleb ning ton kum arepnamle. Anang arye, teleb wininyak ning ara, yuk ninye arye, laka akunum elinyaka ati, sik menenga atonun ning ara, akunum dopropmake. Allah arye anang ati, yuk ning tabakuka kum arepnamle.

³ Bona utotoa talina kum nang arepnumunyopura, ‘Yuk nang eipnusiyak’ tenen, lakak kum arenamlulume. Bona utotoa talina kum nang arepnumunye talak ara, Allah elcuk biknamsila ati, yuk nang kekena ati, laka nyana kum diparyuk, talya yupu tunim abuka duknupmunce, arenamlulume.

⁴ Winipmunyopura, yuk nang arye kum eipnamsiyak bukni, anggun ni Allah ara, duknubuka umunye ning nirya elilunye anya arye, elcuk eibuka kel biksilirye, teleb ning kintinipsuka ara, aminyan talak arenamsile.” Yesus arye nyabuk.

Yesus arye Allah morona ati, nyabuk yupu

⁵ Yesus arye ayupu nyabukopura, ayupu ton nyabuk. Anggun talimak malye ning tuba aupsukbuk, ‘Ninye eipsikirye, teleb nang tenepnamsiyak’ tenen, nong bola deiceuk teleb unyak nang wininyak touk, anggunda na mapu arye, aning kum wininamlulume. Amalye unyak nang ara, ‘Yuk nang arye eipsiting’ tenen, ninye bulubuka balamak bisik ap, Allah yupu peterena aik kopropa ap, ninye dinak tikikirye, Allah moronyake. Awininyak ning nirya ara, ‘Teleb nang tenepnamsiyak’ tenen, unyaka anya arye, na dipkoprop nyapsine. Sik dekna atonun ning ara, adeice arye akunum dolonyake. Aminyan talak, Allah arye anang ati, yuk ning ton tabakuka kum arenamle. Bukni, na mapu, anggunce Allah moronamlum talak nirya ara, sik anang wininyak touk kum wininamlulume.

⁶ Anggunda, anggun aik kopropa wekmunce, buplan tirikdongopmunyopura, Allah moronamlulume. Winimunye talak ara, ninye asing arye kum elinyaknye, anggun ni Allah ati moropmunyeba, elcuk dinamsile. Winipmunyopura, anggun ni Allah, ninye duknubuka ulamak ning nirya elilunye anya arye, kel biksilirye, el tenepsuk ning, menenga ning aminyan talak arenamsile.

⁷ Tonda, Allah diba tenena kum nang arye, Allah moropnukce talak, ‘Yupu cang arye nyabibiba kekepnusile,’ tenebuka morolamak touk, anggunda na mapu, aning kum wininamlulume.

⁸ Anang yupu cang arye nyabuka, Allah morolamak touk, kum moronamlulume. Anggun patasilye ning, min kum moropmamunye talak arye, anggun ni Allah akunum kel bikilula anya arye, yupu cang arye morona kum unamlulume.

⁹ Anggunce Allah moronamluma ara, ani. Nun ni Allah im deice ululye birye, ‘Nun babye, yuk nang nirya babye, an siuk erebuka unamap’ tenen, moropkiyabe. Tonda, ance mutuku-mutuku nirya ap, nun tukwak nang nirya ap, talisilyamce, ‘Nun Weik Deiyoknye, an tonok unamsilam’ tenen, moropmabe.

¹⁰ ‘Minop yamince, ninye mutuku-mutuku nirya talibuka unamsilam’ tenen, moropkiyabe. Tonda ance nyapminba, im deice unyak nang pil dolamak touk, nun tukwak nang babye, ‘An tenesiminye touk, melipsiminba, an piluk donamap’ tenen, moropmabe. ‘Ance teneminye touk, im deice ap, tukwak mutuku noutamak ap, aning atouk unamle’ tenen, moropkiyabe.

¹¹ Asum-asum nirya nun kwaning ap, yuk ning ap, patasilye touk, ‘Melibuka arepsiminyeba, dobuka dinamabe’ tenen, moropmabe.

¹² Yuk nang arye nunti, malye upsikiba, nun babye namin kinyap touk, ance ton nun malye wininyap ning ati, ‘Namin kibuka, kum kipdeipnamsilam’ tenen, moropkiyabe.

¹³ ‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.

¹⁴ Anyapmasin yupu ara, urdem ati kum nyapsine. Deiyok ara, yuk nang arye anggunti, malye upsikiba, namin kipmunce, tonap kum tenemunyopura, anggun ni Allah im deice ululnye birye, anggun malye winilulum ning ati atonun, namin kipsilirye, kum daneipsilyopura, aning ati tuba tenebuka kum wenenamsile.

¹⁵ Bukni, yuk nang arye anggunti, malye winipsikiba, kum namin kipmunce, tuba tenemunyopura, anggun ni Allah el babye, anggun malye winilulum ning ati, kum namin kililamsile. Aning ati tuba tenebuka, dipkoprop wenepnamsile. Yesus arye nyabuk.

Yesus arye, “Allah el si erena ati, din dina kumce, si tebuka unamlulume,” nyabuk yupu

¹⁶ Yesus arye nyabuk. Sik talimak malye ning tuba aubuk buk, ‘Ninye eipnamsiyak’ tenen, nong bola deiceuk, teleb unyak nang atonun kum unamlulume. Sik anang ara, Allah si erena ati, din dina kum, si tebuka unyak talak ara, ‘Yuk nang eipsikirye, mambul nang tenepnamsiyak’ tenen, sik asok melmel karikuka engepmanto unyake. Tonda, ‘Yuk nang eipsikirye, se Allah ati din dina kumce, urdemuk unmake, tenenamsiyak’ tenen, potong lelekna ap, mek kekena ap, kum diparyuk, malye-malye ubuka lakak banyake. Anang ara, yuk ninye eibikirye, sikti, ‘Se, sikda mambule,’ tenelamak nang akunum dopromaka anya arye, aminyan talak Allah arye, yuk dekna ning ton, sikti, tabakuka kum arepnamle.

¹⁷ Anang ara wininyak bukni, na mapu anggunda, aning atonun kum wininamlulume. Allah si erena ati, din dina kum, si tebuka unamlum talak nirya ara, anggun nonge ap, asok ap, mek kekukapmunce, potong wibuka talya kanye bobuka, nonge nirya diklya asa unamlulume.

¹⁸ Awinamluma nirya ara, yuk nang eipsikirye, ‘Allah ati din dina kumce, si tebuka unmake, kum tenepnamsiyak’ tenen, nyapsine. Anggun ni Allah ninye asing arye kum elinyaknye, elcuk anggun duknubuka winimunye ning nirya, eibuka kel kilulnye anya arye, el si erena ati, din dina kumce, si tebuka umunyopura, kel biksilirye, el tenesilya ning arenamsile. Yesus arye nyabuk.

Yesus arye mambul ning bulubuka delina ati, nyabuk yupu

¹⁹ Yesus arye ayupu nyabukopura, ayupu ton nyabuk. Anggun mambul ning ara, tukwak mambul ninguk bulubuka, dokola kum delinamlulume. Tukwak mambul ning nirya ara, sisilya una ap, sing arye dina ap deice arye, malye-malye ulule. Tonda, ubula don nang arye, sik buplan kukuka wekikirye, ubula donyake. Ati, tukwak mambul ning nirya ara, kum dasutue.

²⁰ Mambul tenelulum ning ara, tukwak kum delinamlulum bukni, im deice mambul ninguk ara, im deice dokola delinamlulume. Im deice ara, sisilya ap, sing arye dina ap deice arye, mambul ning malye kum uptue. Tonda ubula don nang arye, buplan kukuka, im deice ning ubula kum doptinge. Ati, im deice mambul ning nirya ara, min kum dasutue.

²¹ Anyapmasin yupu ara, talya urdem ati kum nyapsine. Deiyok ara, anggun mambul ning dokola delulumak ara, aninguk patasilibuk, anggun kanye talima aninguk tuba-tuba tenenamlulume. Ati aning ara, im deiceuk dokola delinamlulume.

²² Anggun nonge upna atonun ning ara, anggun asing upsuke. Asing teleb dasutopura, bisik teleb ninguk eibuka bitume. Bukni, asing malye upsilyopura, asing kubuka kwepdanin, malye bisikuk binamlume. Aning atonun, anggun kanye talima anggun bidamnye ning ap, malye ning ap, aning atibuk tenepmunyopura, aminyan wininamlum ning nirya malye winipnamsile.

²³ Anggun asing noutamak dirina kum weksutopura, kunuknakuk bitume. Aning atonun, anggun kanye talima noutamak anggun bidamnye ning atibuk tenepmunce, malye ninguk tuba upmasilyopura, anggun pia malyeuk unamlulume. Anggun kanye talima ap, winimunye ning ap, pia kunuknak atonun unamlulume. Teleb winin ning ara, tonok ning ton kum wininamlume. Yesus arye nyabuk.

“Allah ap, talye tukwak mutuku ning ap kum taleptume,” nyapbuk yupu

²⁴ Yesus arye ayupu nyabukce, ayupu ton nyabuk, “Yata nang do nirya, sik deiyok nang bitinye nang ati, kanye talima deibuka, tonye pil dobuka, tonye pil dobuka, kum winiptinge. Tonok pil donye birye, el deiyok nang bitinye nang utiringopura, tonoknye birye abitinye nang ati, pil kum doptue. El deiyok nang bitinye nang ati, kanye talima deibuka, sik bitinye nang ati, pil teleb ubuka kum doptue. Ato pil don nang ara, ton deiyoknye biti, kanye talima deibuka, ton deiyoknye biti, lik tenebuka unamake. Tonda, sik deiyok nang bitinye ubrikiba, ton deiyoknye biti, kanye deiplirye, meliplirye, pil donamle. Ton deiyoknye biti, lik tenebikirye, lik upliba, bataknamake. Tonye bira, bataknamle. Tonye bira, pia talinamle. Ayupu nyapmasin touk, Allah ap, yo bok do, talya tukwak ning nirya ap ati, neika atonun patapliba, teleb ubuka kum pil doptume. Weik mambul ninguk tenepmunce, wibuka talinamlulume,” Yesus arye nyabuk.

Yesus arye kanye imun una ati, nyabuk yupu

²⁵ Yesus arye ayupu nyabuk. Anggun patasilye ning nirya ati, ‘Se yata winiptibye do?’ tenen, kanye imun una kume. Anggun din ning ap, baju ap ara, mitik mambul bukni, anggun nonge ap, kam una ap ara, weik mambule anya arye, Allah arye anggun patasilye ning ati melinamsile. Aning ati ara, ‘Se, nun yata mek ap, yata din ning ap, dipnamap do? Nun baju ara, yatato baju ongopnamap do?’ tenen, kanye imun kanye bobuka, kum unamlulume.

²⁶ Sik maka lakuka balamaka nirya ati, tenipdelulume. Maka ara, yal ning kouna ap, nong una ap, din ning dokola delina ap, pia kum wininyak bukni, anggun ni Allah arye, amaka, sik din ning tuba areliba, dinyake. Maka ara, mitik mambul bukni, ninye nirya ara, weik mambul unyaka ati, Allah arye anggunti, anggun patasilye ning nirya melibuka arenamsile. Aning nirya ara, kum tenipmalumce, kum kel bikmalum do?

²⁷ Anggun awekmalum nang noutamak ara, yatanye birye tenepturye, el kanye imun uptua deice arye, like tonok talak tonap tabakturye, kam uptu do? Ara, kum winipmanto.

²⁸ Yata ati, ‘Yatato baju ongopnamap’ tenen, kanye imun usulul do? Dolkua kan-kan arye ulamle kait ning ara, tenipdelulume. Akait ning urasin ara, pia teleb ulul bukni, aning ara, pil dona ap, baju ongona ap, kum ulule.

²⁹ Apil kum dolul bukni, ninye deiyoknye, Raja Salomo ongolamuk baju ara, urasin mitik teleb bukni, atalye palamle kait ning urasin ara, pia telebe. Dolkua noutamak talya ulye kait lepmalya ning ara, asum arye kait upmalya ani, keting deiplirye, koulupliba, uku dongonyake.

³⁰ Bukni, Allah arye akait el urasin pia teleb ubuka kwelilule. Ati, aning ara mambul kum ning bukni, anggun tukwak ninye ara, weik mambul ululuma ati, Allah arye anggun patapsilye baju babye, melibuka arenamsile. Bukni, anggunce Allah ati, weik arye diba kum tenelulume. Anggunce, ‘Nun patapsilye ning, Allah arye arenamsile,’ tenen, diba tenelulum ning ara, mitik anunuk usulule.

³¹ Allah arye dipkoprop melinamsila anya arye, anggun mambul upsilye ning ati, ‘Se, yata din ning ap, mek ap, dipnamap do? Tonda, yata baju ongopnamap do?’ tenen, kanye imun kum unamsile. Anggun talima ap, kanye ap, atukwak ning ati, weik patapliba, atalye-talye ning deice kum delinamlulume.

³² Tukwak ning uapliba, ninye patalul ning nirya ara, Allah diba tenena kum ninye arye, ‘Aninguk doproptibye,’ tenebuka unyake. Wininyak bukni, anggunda nati, diba tenelulum ninye, anggun patasilye ning nirya, anggun ni Allah arye, akunum tenesilirye, melibuka arenamsile ati, kanye imun kanye bobuka, kum unamlulume.

³³ Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.

³⁴ Aning ati ara, ‘Ambusum ara, yata winipnamap do?’ tenen, kanye imun una kume. Ambusum ning upmal ning ara, ambusum ning anyuk tenenamlume. Asum-asum nirya, kanye imun usilye ning ara, akunum aupmalula anya arye, yuk sum ning ara, aunmalum sum noutamak tabakuka tenena kume. Yesus arye nyabuk.