Matius 28 - Eipomek

Yesus kam bukuk yupu

¹ Sik nirya damapra ulamika ani, Sabat sum akunum ubukura, berekukura, minggu sum beren tam arye, Maria Magdalena ap, Yakobus el lin Maria ap, akilapu bitinye, ‘Yesus el nong weipmanguak dilbinunam’ tenen, akeil deiya dam dilbirik.

² Minggu sum beren tam arye, akilapu Yesus weipmekak binuka, unmarikba, weik ining mek dokukba, im deice arye Allah el pil donanye malaikat tonok yayukce, Yesus weinak buplan tirimok keil bongobuka dopkwetebukce, akeil deice bukuk.

³ Ayayuk malaikat ara, el baju bebeya laklamle atonun winibukce, dirina weik una ap, pia kurun ap ubuk.

⁴ Winibukopura, akalikmek yin talin nang eibikura, lukdayikce, ilil weik ubukba, sik nong nirya sirim talibukce, dipna atonun ubik.

⁵ ‘Akilapu ara, lukdanuka ilil uplyak’ tenen, aim deicanye malaikat arye akilapu ati nyabuk. “Anggun lukdanuka ilil una kume. Na kele, sik yu nang arye wanwanun yo deice opmeknye Yesus ati enmalume.

⁶ Bukni, wini talak ara el anyaka kum unmale. Elce, ‘Kam buknamne,’ nyalilamuk touk, akunum kam bukmale. El nong deipmanguak ara, akeil deiya pum yanuka dipdelulume. El pia asukum kum unmale.

⁷ Eipmunce adiparyuk minopce, elce wipdeiyamuk nang, sik 11 nang ati, ayupu laka nyalbirurume. Yesus ara, akunum kam bukmale. Ati, Yesus arye, ‘Na kam bukuka minopce Galilea tam binmanopura, anggun aminyan bimunyeba, eipdanamabe,’ nyapdeiamsuk touk, el minopce kam bukuka binmale. Ati, anggun nirya epdanamlume. Ayupu laka nyalbinululume. Na akunum nyapsine,” Amalaikat arye, akilapu ati nyabuk.

⁸ Anye ayupu nyabukopura, akilapu arye, kanye bokol tonmok arye, ilil weik ubuk bukni, tonda, teleb kanye deiprikce, ‘Yesus el mapu nyalbinunam’ tenen, keil deiya dam batakuka, bik-bik abuka birik.

⁹ Bisik noutamak bik-bik abuka banmarik talak ara, Yesus talye karin yayukce epdayik. Epdayikce, Yesus arye akilapu bitinye ati, “Telebe,” nyabukba, el dam yarikce, si erebuka, ‘El si kipnunam,’ teneprikce, el yan dam yanuka taliprik.

¹⁰ Winiprikba, Yesus arye ayupu nyabuk. “Anggun ilil una meme. Na mapu dam birumunce, na weit yapu ati nyaprurume. ‘Galilea tam bimunce, Yesus ap epdanuka eipnamlume,’ nyabuka laka nyalbinururume,” Yesus arye nyabuk.

Keil deiya kalikna ati, yin talina nang arye, nyabik yupu

¹¹ Akilapu bitinye bisik noutamak banmarik talak ara, akeil deiya dam kalikmek nang, ton yin nang ara, Yerusalem mutuku laka nyalbiyik. Ara Yerusalem mutuku noutamak bukni, Allah arena ati el si erelamik aik pum pil dona deiyok nang, sik dam binuka awinipmok ning nirya ati, laka nyalbiyik.

¹² Sik yin talin nang arye ayupu laka nyalbiyikopura, sik Allah arena ati deiyok nang ap, Yahudi yala deiyok nang ap kekebikce, ‘Se, yata nyapnuyap do?’ tenen, malye kanye bobikce yupu talinmek. Yupu talinmekce, ayin talin nang ati, yo bok weik arebikce, ‘Tilila yupu nyapnamak’ tenen, ayupu nyapdeibik.

¹³ “Anggunce nyapnamlulume. ‘Kume, nun mapmapu talak ara, Yesus el mapu lukunyan noutamak arye yanuka, Yesus el nong ubula dobuka binmangue,’ nyanamlulume.” Ayupu nyabikce, ayin talin nang sik kunusa dona ati, yo bok weik arebik.

¹⁴ Aribikce, ayupu tonap nyabik. “Anggunda ilil una, meme. Anggunce, ‘Nun mapmapubuk, ubula dopropmangua,’ nyabibyopura, ‘Pilatus kekepsilirye, opsilyak’ tenen, ilil una meme. Nunce anggun melina ati, Pilatus el dam yupu sekenamap ati, nun nyapmasiap yupu uk, kanam asa arye nyapnamlulume. Aning ara, ikin kum upnamsile,” nyapdeibik.

¹⁵ Nyapdeibik touk, yin talin nang ayo bok doprobikce, anyapmek touk nyalbalamik. Ayupu nyalbalamikba, Yahudi yala ninye weike kekelamika ati, wini talak unyak ninye babye, ayupu tuba nyanyake.

Yesus arye, “Na yupu peterelbilulume,” nyapdeibuk yupu

¹⁶ Aning nirya akunum winibukopura, Yesus elce wipdeiyamuk nang, sik 11 nang ara, Yesus arye, ‘Na nyapsinye mutuku, amutuku binamlulume,’ nyapdeibuk touk, Yerusalem mutuku batakuka, Galilea tam noutamak, Yesus arye nyapdeibuk mutuku tamubuka biyik.

¹⁷ Amutuku tamubuka biyikce, daunmek talak ara, Yesus yayukba eibikce, ton nang ara diba tenebikce, el si erebik bukni, ton nang ara, ‘Dip do, telela do?’ tenen, teniltonauk unmek.

¹⁸ Yesus sik dam yayukce ayupu nyabuk. “Im deice ulye ning ap, tukwak mutuku ulye ning nirya ara, Allah arye na amu tam akunum deipnuke. ‘Aning-aning nirya talibuka weik ninye deiyoknye unamle’ tenena ati, Allah arye el mikip weike akunum arepnukba, talinune.

¹⁹ Ati ara, ninye mutuku-mutuku nirya, na yupu moubuka kekebikirye, ‘Na wininye ning atonun wininamak’ tenen, anggunda na mapu arye, ‘Ninye mutuku-mutuku im sirya, mutuku sirya nirya kekenamak’ tenena ati, peterelbanamlume. Peterepra balamunyebuk, ninye dib tenebikceopura, Allah el si deice ap, el Mi Koprop, Yesus na si deice ap, Allah El Dib Kanye si deice ap, sik diba tenepnamak ninye mek dongopdeipnin banamlume.

²⁰ Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.