Matius 26 - Eipomek

Yahudi yala deiyok nang arye, ‘Yesus opnamap’ tenen, sirikinmek yupu

¹ Yesus arye ayupu nirya akunum nyabukopura, el mapu 12 nang ati nyabuk.

² “Anggun kele. Yahudi yala nang sik Kaplina ati Kwalina sum ambusum arye ubuka ambusum or upnamale. Atalak ara, nara, Ninye Mi Koprop Atonunye bira, ‘Malye nang arye wanwanun yo deice deibuka opnamak’ tenen, inipraka binamniyake,” Yesus arye nyabuk.

³ Yesus arye ayupu nyanmok talak ara, Yahudi yala nang Allah ati arena deiyok nang ap, sik weik deiyoknye ap, yuk Yahudi yala deiyok nang ap, anang nirya arye, tonoknye el aik bulubuka wekik. Anye el si ara, Kayapas. Kayapas ara, Allah arena ati deiyok nang aulamik bukni, elda sik weik deiyoknye ulamuk.

⁴ Anang nirya anyaik wekmekce, yupu talipmek. Ara, ‘Yesus yata wiribuka deice arye tapu koubuka, Yesus optibyeba, yuk nang kum biknamsiyak do?’ tenen, yupu talipmek. Utenebuka yupu talipmek bukni, anang kan-kan yuk nang arye, nyabik.

⁵ “Kum de, nun Kaplina ati Kwalina talak noutamak arye kum opnuyabe. Ninye pia weike amutuku wekmeka ati, Yesus obibyopura, aninye weik yu upliba derepsicak ati, daupmalibuk,” ‘Aminyan talak arye Yesus optibye’ tenen, nyabik. Nyabik bukni, atalak ara Yesus kum obik.

Yesus Betania mutuku unmok talak, kil tonok arye nintong teleb mek dobuka, Yesus el kisok deice dikeibuk yupu

⁶ Yesus ap, el mapu ap, Yerusalem mutuku batakuka, Betania mutuku binuka unmek. Yesus ara, tonoknye el si Simon, el aik binuka bukmokce, din dinmok. Simon ara, min arye barye suse atonun suse, el nong nirya dilamuka ati, el si ara Simon Barye Suse dinanye nyalamik.

⁷ Yesus Simon aik bukmokce, din dinmok talak ara, tonok kil arye bol kat weik makau dobuka boyayuk. Amakau pum bisik ara, nintong teleb mek, dekna pia weik mek awamuka ati, Yesus kisok deice dikeibuk.

⁸ Amek dikeibukopura, Yesus el mapu el damak abukmek arye eibikce, sik kan-kan arye, ton nang ara yu ubukba, malye kanye bobikce, ayupu nyapdayik. “Anintong teleb mek ara, yata ati talya dikipmal do?

⁹ Anintong teleb mek dobuka, yuk nang ati dekmatipyopura, yo bok weik dopropmatibirye, ninye bona utotoa talina kum ninye ati melibuka arepmatibye,” nyapdayik. Sik nyapdayikce, akil ati, yu ubukba wenebuka derebik.

¹⁰ Akil ati wenebikba, Yesus kekebukce anang ati nyabuk. “Anggunce elti, nyana kume. Anggun bataklulume. Malye tenepmalumce wenepmaluma ara, yata ati do? Akil arye nati nintong teleb mek, na kisok deice dikeipmanila ara, pia teleb upmala anya arye, na kanye deipne.

¹¹ Talya bona utotoa talina kum ninye ara anggun ap neika pia unamluma anya arye, anggunce teneplum talakuk aninye meliptume. Bukni, nara anggun ap tuba neika pia kum unamabe.

¹² Akil arye nati, anintong teleb mek dikeipmanila ara, laka nyapnusine. Aminyan na opnikceba dipnamne talak ara, na nong weipnamniyaka ati, wini talak ara, na nong weina ati kintinipdeipmanilarye, winipmanile.

¹³ Ati ara, dipkoprop nyapsine. Na lak teleb yupu bobuka peterelbinamak mutuku nirya ara, akil arye na nong deice nintong teleb mek dikeipmanil ning ara, ‘Akil elti, pia tenenamak’ tenen, pia peterelbanamake,” Yesus arye nyabuk.

Yudas arye, ‘Yesus opnamak’ tenen, ninye yupu delilbiyuk yupu

¹⁴ Nyabukopura, Yesus wipdeiyamuk nang kan-kan bukni, tonoknye el si Yudas Iskariot, ‘Anang arye Yesus olyanamak’ tenen, Allah arena ati deiyok nang, sik dam ninye yupu delilbiyuk.

¹⁵ Yudas arye anang sik dam ninye yupu delilbiyukce ayupu nyabuk. “Yesus opnamluma ati, narye Yesus yukupnirye, arepsinyopura, yo bok yata barye arepnamnulum do?” nyabuka asipdeyuk. Asipdeyukba, sik anang arye, “Winipsiminyopura, keil uang dekna weik ning, yupa winilye 30 arepnukiyabe,” nyabikce, akeil uang nukuka arebik.

¹⁶ Nyabuka arebikopura, Yudas arye, ‘Yata teleb lo waplye talak arye, Yesus dobuka anang ati areptinye do?’ tenelamukce, dinauk ulamuk.

Yesus ap, el mapu ap, Kaplina Kwalina dibik yupu

¹⁷ Sik Yahudi yala nang arye, Nena Kum Roti deiyok koubuka kwalina sum arye, sik apu yapu Mesir mutuku batakuka binuyik talak ara, domba obuka buplan dam dana-danatikilin yo ining likeipmek ati, sik minyuma mapu ona kumce, Allah arye sik aik kaplibuka biyuk ning ara, ‘Aminop talak winyamuk ning nirya ati tuba tenenamap’ tenen, asum arye domba tonok obuka dilamik. Sik Yahudi yala ninye nirya arye winilamika ati, Nena Kum Roti deiyok koubuka kwalina sum deice, Yesus el mapu arye Yesus ati asipdeyik. “Anda, Kaplina ati Kwalina ning dipnamalam ning ara, dan aik kintinililbinuyap do?” nyabuka asipdeyik.

¹⁸ Asipdeyikba, Yesus arye el mapu ati, ayupu nyabuk. “Anggun Yerusalem asik donyaka noutamak bimunye talak ara, ninye tonok eipnamlume. Eipdamunyopura, anye biti nyapnamlulume. ‘Nun peterena deiyoknye birye nyapkile. Allah arye wibuka deiamnuk talak akunum dam upmala anya arye, na ap, na mapu ap, Kaplina ati Kwalina ning dipnamapa ara, an aik pum dilyanamabe, nyapmakile.’ Nyapmasin touk nyalbinululume,” Yesus arye el mapu ati nyapdeibuk.

¹⁹ Nyabukura, el mapu arye Betania mutuku batakuka, Yerusalem mutuku biyikce, Yesus nyapdeipmok ning atonun winibukba, Kaplina Kwalina ati dipnamek ning kintinibuka deibik. Kintinipdeibikopura, asukumuk unmek.

²⁰ Aunmekbuk, akunum inibukopura, Yesus ap, el mapu 12 nang ap, anyaik wekikce, bukuka din dinmek talak ara, Yesus arye ayupu nyabuk.

²¹ “Na dipkoprop nyapsine. Na ap bukmapce, din dinmalum nang noutamak bukni, tonoknye birye, na opnamaniyaka ati, ninye yupu delilbinule,” Yesus arye nyabuk.

²² Nyabukura, sik pia bico ubukba, sik ikin kanye bobuka, Yesus ati tonok-tonok arye ayupu nyanmek. “Naio, narye yukubkiniba, opnamkiyak do? Nara, kume naio,” nyabuka tonok-tonok arye Yesus ati nyanmek.

²³ Nyabuka asilenmekba, Yesus arye anang ati tamubuka nyabuk. “Narye roti dobuka yangalin makau pum burubuka dinmap nang kan-kan, tonoknye birye na opnamaniyaka ati, ninye yupu delilbinamanile.

²⁴ Allah yupu laka nyalamik nang, sik nabi-nabi nang arye, nati sekamnik touk, nara Ninye Mi Koprop Atonunye bira, malye nang arye opnikceba dipnamne. Sik Allah yupu laka nyalamik nang, nabi nang arye laka lyalamik touk, amutuku nang arye winipnamniyak bukni, nara Ninye Mi Koprop Atonunye yupu delilbinamnilanye bira, elin, el li birye kum deiamtiringtoura, telebe. Bukni, el lin, el li birye anye deiamrika ati ara, yupu deiyaliba opnikcopura, Allah arye delilbinamnilanye biti weik arye wenebuka opnamle. Ati anye bira pia bicoe,” Yesus arye nyabuk.

²⁵ Nyabukura, Yudas, ara Yesus yupu deipnamuknye birye, nyabuk. “Naie narye yupu delilbikiniba opnamkiyak do?” Nyabukba, Yesus arye tamubuka nyabuk, “Diba, ance yupu deipniminyeura, opnamaniyake.”

²⁶ Yesus ap, el mapu 12 nang ap, din dinmek bukni, nena kum roti dipnuyik talak ara, Yesus arye aroti dobuka, Allah ati, “Telebe” nyabukopura, aroti tobuka, el mapu ati bokuka arinmokce, ayupu nyanmok. “Aroti ara, na nong atonun ulula ati dobuka diplulume,” nyanmok.

²⁷ Aminyan ara, Yesus arye anggur mek kwebuka, mek makau tonok kintinipmok ning dobuka, Allah ati, “Telebe” nyabukopura, el mapu nirya amakau tonok arye ‘Dipranin banuyak’ tenen, el mapu ati aribukce, ayupu nyabuk.

²⁸ “Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.

²⁹ Nyabukopura, ayupu ton nyabuk. “Na dipkoprop nyapsine, wini talak arye deiyok koubuka, noutamak talak ap, doyanamle talak ap, anggur mek tonap pia kum dinamne bukni, Allah arye el wiamuk ninye lyeplirye, aninye ap, aning-aning nirya ap, talinamle talak akunum uplyopura, nun nirya im deice wekeipyobirye, atalak aryuk, ila tonap anggur mek dipnamne.” Yesus arye nyabuk.

³⁰ Yesus arye nyabukopura, el ap, el mapu ap, sik nirya Allah yupu mot sebikce, alip aik Yerusalem mutuku sik bukmek aik batakuka, banmeka ani, Zaitun mutuku deice welebik.

Yesus arye Peterus ati, “Ance na ati, ‘Anye bira, na walwale’ nyabuka, pilipnamanilame,” nyabuk yupu

³¹ Zaitun mutuku deice unmek talak ara, Yesus arye el mapu 12 nang ati nyabuk. Anggunce nati dib tenepmanulum bukni, ‘Malye nang arye opnamap’ tenen, tapu koubuka bobinikcopura, anggun nirya arye, ‘Se ninye nirya lyebuka talinamlanye, Mesias bira, Yesus dipkoprop ulul do, kum do?’ tenen, kanye boktopsilirye, na batakuka bindopnamnulume. Allah yupu laka nyalamuknye, nabi Zakaria arye, ‘Winipnamake’ nyabuka sekamuk touk winipnamnuluma ati, elce sekamuk yupu nyapnusine. Zakaria arye nyalamuk domon yupu ara, ani. ‘Na Allah arye domba weina deiyoknye opnamne. Opnyopura, el domba nirya buru sakuka bindopnamake.’ (Zakaria 13:7)

³² Zakaria birye nyalilamuk touk winipnamnulume. Bukni, na dipmanya ani, kam buknyopura, na minopce Galilea tam binmaniba, anggun aminyan yanamlume. Yesus arye nyabuk.

³³ Nyabukura, Peterus mikip arye tamubuka nyabuk. “Anang nirya ara anti kanye boktopliba, batakuka bendopkitinga babye, nara kanye bokoltona kumce, kum batakuka bindopnamkine,” nyabuk.

³⁴ Nyabukopura, Yesus arye Peterus ati tamubuka nyabuk. “Kao, dipkoprop nyapkine. Arup lukunyan ara, yim ayam min kum kamupmalye talak ara, an babye like winilye deice arye, nati, ‘Anye bira, na walwale,’ nyabuka palibuka, bataknamanilame,” nyabuk.

³⁵ Yesus arye nyabuk bukni, Peterus arye ila tamubuka mikip arye nyabuk. “Naie kume. An opkikirye, na ton opnitinga babye, nara pia kum bataknamkine,” Peterus arye nyabuk. Peterus arye ayupu nyabuk touk, Yesus el mapu 12 nang nirya babye, atonun nyanmek.

Yesus arye, Getsemani mutuku Allah morobuk yupu

³⁶ Zaitun mutuku deiceuk sik daunmekakuk bukni, mitik pera Getsemani mutuku biyikce, Yesus el mapu ati nyabuk. “Anggun abukmamunbuk, na yukak Allah morolbinune,” nyabuk.

³⁷ Nyabukce, Peterus ap, Zebedeus el mapu bitinye, Yakobus ap, Yohanes ap, bobuka biyukce, ikin kanye bobukce, pia ilil ubukba, anang ati ayupu nyabuk.

³⁸ “Na kanye talima ikin ubuka, pia ilil kanye bopmana ati, na kanye talima uk dimanilce, dipmanto upmane. Na talima uk pia dinmanila anya arye, na talima melildana ati, meneng dam asukumuk, mana kum, bunauk upnamalulume,” nyabuk.

³⁹ Nyabukopura, el mitikto karen kisikdakuka kanup donga biyukce, tukwak lumlumuk dongobuka pulbiyuk. Lumlumuk dongobuka pulbiyukce, ‘Opnikiba dipnaman ning ara, Allah arye lyepnutuopura kum diptinye’ tenen, ikin ubukba, Allah moronmok. Allah moronmok talak ara, ayupu nyanmok. “Na nio, na opnamaniyak talak ikin upniliba, donmanya dipnaman ning ara, ‘Ance lyepnutumba, aning kum winipnamniyak’ tenen, moronmakine. Bukni, na patanmanilba, tenepnarye moronmakina atonun kume. An min arye tenyamnulum atonun winipnunilyame,” Yesus arye nyabuka moronmok.

⁴⁰ Morobukopura, el mapu winilye nang unmekak tamubuka biyukce, manauk unmekba, eibuk. Eibukce, Simon Peterus ati ayupu nyabuk. “Simono anggunda mapmalum do? Anggunda kum winipmanto ati, tonok keting mana kumce, na talima melina ati kum melipmanulum do?

⁴¹ Peteruso, pirilden ning deice arye, anda malye upminyak ati ara, ‘Nada malye winipyak’ tenen, kanye moubuka dilamince, Allah moronauk unamalyame. An talima kanye ara, ‘Winiptinye,’ tenelyam bukni, an nong mikip kum ati ara, kum winiptume nyapkine,” Yesus arye Peterus biti nyabuk.

⁴² Nyabukce, ila tamubuka mitikto pera biyukce, min talak Allah moronmok touk, tonap moronmok. “Na ni Allah, na ikin kanye upnil ning ara, ance ‘El kum obikcopura, na tenelamse ning kum uptue,’ tenepniminyopura, sik yu nang arye winipnamniyaka ara, dawinipninyake. Narye patapnilaba, tenenman ninguk kume. An min arye tenelamnulum touk winipnunilyame,” nyabuka, Yesus arye Allah ati moronmok.

⁴³ Morobukopura, ila tamubuka el mapu winilye nang mapmekak yayuk. Sik wi pia weik unmokba, manauk unmek.

⁴⁴ Winipmekba eibukce, anang asukumuk batakuka, Yesus ara, mitikto karen like winilye ning binabuka ani, min talak moronmok touk, Allah morobuk. Morobukura, tamubuka yayukce, el mapu mapmekak eibuk.

⁴⁵ Eibukopura, el mapu ati nyabuk. “Anggun tuba manauk unmalum do? Akunuma. Yu nang arye, na dobuka bobinuniyak talak akunum uple. Dipdelulume, nara Ninye Mi Koprop Atonunye bira, na ona ati, ninye akunum yupu delilbinmala anya arye, elce inibuka yu nang arepnunile.

⁴⁶ Ati ara, anggun buklulume, nun binuyabe. Na damkinanye akunum yanganmale” Yesus arye nyabuk.

Yesus ona ati, el nong bobuka bobiyik yupu

⁴⁷ Yesus ayupu tuba nyanmok talak ara, Yesus el mapu kan-kan bukni, tonoknye el si Yudas arye Yesus dam tikilyayuk. El menekuka yangayukba, el aminyan tam ninye weik bulubuka yayik. Ayayik nang ara, Yahudi yala nang sik deiyok nang, wisi nang ap, Allah arena ati el si erena aik pum pil dona deiyok nang ap, Musa sekamuk yupu peterena deiyok nang ap arye, yupu nyapdeipmeka ati, parang ya ap, ninye on kama ap, anirya bobuka, ‘Yesus tapu koubuka bobinuyap’ tenen, yayik.

⁴⁸ Ura, Yesus damkinanye birye, Yahudi yala deiyok nang ati nyabuk yupu ara ani. Yudas arye nyabuk. “Na tenebuka mutupnamnanye bira, ara Yesus el uka. Anye bira, taruk talipmunce, tapu koubuka ninye weik arye melibuka bobinululume,” nyapdeibuk.

⁴⁹ Yudas birye ayupu nyapdeipnuyuka ati, adiparyuk Yesus dam yayukce, “Na nie, na peterena deiyoknye,” nyabuka Yesus mutubuk.

⁵⁰ Mutubukba, Yesus arye nyabuk. “Kao ance, ‘Anye biti winipnune,’ tenepnulum ning ara, dawinipnilyame,” nyabuk. Nyabukura, ayanmek nang mikip arye Yesus talibik.

⁵¹ Talibikura, amining dam tikmoknye tonoknye birye, el ya lin aling pum arye, ya kubdakuka, Allah ati arena weik deiyoknye, el amu tam pil donanye tonok, el amul takwetebuk.

⁵² Winibukopura, Yesus arye aya bopmoknye biti nyabuk. “An parang ya ara, ila tamubuka liplyame. Ya bopmace nang ara, ya arye obikiba dipnamake.

⁵³ Winina bataklyame. Anda bita kum bikmalam do? Na ni ati moroptinyopura, adiparyuk el im deice pil don nang, malaikat yupa pia weike 12 pasukan dopdeipnutuba, lyepnitinge.

⁵⁴ Bukni, na moropniba, na ni birye malaikat dopdeipniliba, sikce lyepnikcopura, sik Allah yupu laka nyalamik nang, nabi nang arye nyalamik yupu atonun kum winiptue. Bukni, sik nabi nang arye laka nlyalamik touk, winipnuniyaka ati, narye na ni biti, kum moronune.” Yesus arye nyabuk.

⁵⁵ Ayupu nyabukopura, Yesus arye el tongolyanmek nang ati nyabuk. “Anango, ‘Amutuku talibik nang opbisipnamla ati, el deiyok koubuka el mapu bobinmala,’ tenepmanulumce parang ya ap, ninye on kama ap, bobuka tomolyanulum do? Atalak-atalak nirya, Allah ati arelulum aik dam tikuka peterenmasiba, anggunce kum tomopnulume.

⁵⁶ Bukni, Allah arye nyalilamukba, Allah yupu sekamik nang, nabi nang arye sekeiyamnik touk winipnula ati, anggun tenepmalum touk winipnululume.” Yesus arye el tongolyanmek nang ati nyabuk. Nyabukopura, Yesus el mapu nirya ara, ilil weik ubukba, sikce Yesus asukumuk batakuka, bai bukuka biyik.

Yahudi yala nang, sik yupu lipsisikuka bokolilamik nang dam, Yesus dobuka bobiyik yupu

⁵⁷ Yesus talibuka tongobik nang arye, Allah arena ati, weik deiyoknye, el si ara Kayapas, ‘El aik bobinuyap’ tenen, Yesus bobuka Getsemani mutuku arye, Kayapas el aik bobiyik. Bobiyik talak ara, Yahudi yala nang, sik deiyok nang, wisi nang ap, Allah arena ati deiyok nang ap, Musa sekamuk yupu peterena deiyok nang ap, ‘Yesus ati yupu lipsisikuka bokeibibirye, wenepnamap’ tenen, akunum bulubuka yanmeka ati ara, sik babye anyaik unmek.

⁵⁸ Yesus menekuka bobanmekba, Peterus ara, aminyan yanganmoka ani, Allah arena ati weik deiyoknye, Kayapas, el aik dam yayukce, yin talin nang uku sekuka pekinmekak yanuka bukuk. Bukukce, ‘Sikce Yesus ati yata wiripnuyak do?’ tenen, dinmokce el babye uku pekinmok.

⁵⁹ Yupu lipsisikuka bokolina deiyok nang, Sandeheren nyalamik nanguk bukni, noutamak bokuka, Allah arena ati deiyok nang nirya ap, anang nirya arye, min arye, ‘Yesus opnamabe’ tenelamika ati, atalak babye, aninguk tuba tenenmek. Sikda, yuk nang arye, “Yesus el malye winilye ning ara, ani-ani,” nyabuka, minina yupu arye nyaptingba, kekeptibyeura, ‘Ayupu deice arye, Yesus optibye’ tenen, teninmek.

⁶⁰ Utenenmekba, yuk talya wekmek nang weik arye minina yupu nyanmekba, ‘Opnamtibye ning deiyok yupu dan ning do?’ tenen, kekelenmek. Kekelenmek bukni, ninye opmanto deiyok yupu ara kum nyapdeipmeka ak, kum kekebik. Ninye opmanto yupu kum kekepmeka ati, ‘Se, yata wirin deice arye Yesus optibye do?’ tenebik.

⁶¹ Ninye yuk-yuk weik arye talya yupu uk nyanmeka ani, aminyan ara, yuk nang bitinye nang arye tikuka, el Yesus ati aminina yupu nyaprik. “Yesus arye ayupu nyabukba kekebupa ara ani. Yesus arye nyapsuke. ‘Allah arena ati, ninye taruk arye domikba, Allah ati kam ning obuka arilbalulum aik ara, narye ulupnirye, like winilye sum akunum upyopura, ila tamubuka anyaikuk lipsisikuka dopnamne,’ Yesus arye ayupu nyabukba kekebupe,” nyaprik.

⁶² Nyaprikba, Allah arena ati, weik deiyoknye Kayapas, awekmek nang sik urasinak tikukabukce, Yesus ati ayupu nyabuka asipdeyuk. “Anang arye nyapmakirak yupu ara dan do? Ance tamubuka yupu ton nyapnulam do, kum do?” nyabuka asipdeyuk.

⁶³ Asipdeyuk bukni, Yesus ara yupu tonap tamubuka kum nyabukce, tunim abuk. Winibukopura, ila tonap Allah arena ati, aweik deiyoknye, Kayapas birye, Yesus ati asipdeyuk. “Allah arye dinmasilak unmalama ati, talya yupu nyana kum, dipkoprop ninguk nyapnusilame. ‘Ninye weik lyeplirye, sik kanye talima talinamle’ tenen, Allah arye wipdeiyamuknye, Mesias bira, an aulyam do? Tonda, Pia Teleb Etekdopnye Allah ara, anuk el Mi Koprop ulyam do?” nyabuka asipdeyuk.

⁶⁴ Asipdeyukbuk, Yesus arye tamubuka nyabuk. “Diba, ance nyapmanilam touk na aunune. Ara na uka. Bukni, na dipkoprop nyapsine. Aminyan talak ara, nara Ninye Mi Koprop Atonunye, Allah el Pia Mikipnye birye ereipniliba, el sirik taruk tam bukniba eipnamnulume. Eipnamnulum talak ara, im deice arye dua kan-kan koluka yanamne talak eipnamnulume.”

⁶⁵ Yesus arye ayupu nyabukopura, Allah arena ati, aweik deiyoknye birye, Yesus nyapmok yupu kekebukce, ayupu ati yu weik ubukba, el baju kwiliklobukce ayupu nyabuk. “Yuk nang arye tonap nyapnuyak yupu ara, nun patana kume. Yesus ayupu nyapmala deice arye, Allah ati akunum yanimalce, malye yupu nyapmala anya arye, el wenena ati, yata wiribuka wenepnamap do? Anggun awekmalum nang babye, el yupu nyapmala ara, akunum kekepmalume.

⁶⁶ Ati, el wenena ara, yata wiripnamap do? Anggun bukmalum nang ara yata tenepmalum do?” nyabuk. Nyabukura, ayupu lipsisikuka bokolina deiyok nang, Sandeheren nang nirya arye, “Akunum, Yesus arye ayupu anyapmala ara, pia malye nyapmala ati, adeice arye optibye,” nyabik.

⁶⁷ Nyabikopura, ton nang arye Yesus nong deice si maka tululinmek. Ton nang arye Yesus el asing, baju arye pakubuka kitibikce, anang nirya arye taruk kitibuka, Yesus el nong deice bokuka onmek talak arye ayupu nyanmek.

⁶⁸ “Yuk nang arye, ‘Allah yupu laka nyananye ulule,’ nyakinyake. Tonda, ‘Ninye weik lyeplirye, sik kanye talima talinamlanye Kristus ulule,’ nyakinyaka anya arye, aopmakilanye bira el si laka nyapsilyame,” nyabuka, Yesus ati asinmekce, nalinmek.

Peterus birye, “Anye Yesus ara, na walwale,” nyabuka pilibuk yupu

⁶⁹ Sik anang nirya arye wininmek talak ara, Peterus anyaik dam asukumuk unmok. Ara, Yahudi yala nang Allah arena ati, sik weik deiyoknye Kayapas, el aik dam Peterus unmok. Allah arena deiyoknye, Kayapas, el aik pil don ati melin kil tonok Peterus unmokak yayuk. Peterus uku pekinmokba, akil yayukce, Peterus el urasinuk eibuk ati bita dilenmok. Bita dilenmoka ani, ‘Anye bira, Yesus el melinanye, akunuma,’ tenebukce ayupu nyabuk. “An ap, aGalilea tamnye ap, neika ulamrurume,” nyabuk.

⁷⁰ Nyabukura, Peterus arye tamubuka akil ap, awekmek nang ap, sik nirya ati nyabuk. “Anyapmanilam ning ara, deiyok yata ati nyapmanilam do? Na kum tenepmane. Anyapmanilamnye bira, na walwale,” nyabuka pilibuk.

⁷¹ Nyabuka pilibukce, anyaik denebuka wiyamik poka buplan dam tikilbiyuk. Abinuka tikabukba, yuk melin kil eibukce, awekmek nang ati ayupu nyabuk. “Anye bira, Nasaretnye Yesus ap, melibuka ulamik nang ara, tonoknye ton atikmale,” nyabuk.

⁷² Nyabukba, Peterus ayupu kekebukce, yu ubukba, “Anye bira, na walwale,” nyabukce, pia malye yupu ap tabakuka nyabukce pilibuk.

⁷³ Pilibukba, sik nirya daunmeka ani, Peterus ap tikmek nang arye, Peterus ati, ila tonap nyabik. “Anda, Galilea tam unyak ninye arye yupu nyalamaka atonun, an babye atonun nyalyamnye ati, anye Yesus ara el melibuka balamlum nang ara, an ton aunmalame,” nyabik.

⁷⁴ Nyabikba, Peterus yupu mikip arye tonap nyabuk. “Anyapmanulumnye bira, dipkoprop pia na walwale. Na nyapmasin yupu ara tilila nyapsitinye toura, Allah arye wenebuka opnutue,” nyabuka yupu weik tonun arye nyanmok. Ayupu nyabuk talak aryuk, yim ayam ngalukuk.

⁷⁵ Yim ayam arye ngalukukopura, adiparyuk, Yesus arye Peterus ati min talak nyapmok yupu ara, Peterus ila tonap tenebuk. Tenebukce, “Se, Yesus arye, ‘Yim ayam like bitinye kum kamupmalye talak, anye bira na walwale,’ nyabuka, like winilye deice arye pilipnamanilame,” nyapmanu touk, ‘Na akunum winipne,’ tenebuk. Utenebukce, el kanye talima pia ikin ubukba, anang asukumuk batakuka, bai tam biyukce, weik arye engenmok.