Biblia Todo Logo
線上聖經

- 廣告 -

Matius 24 - Eipomek


Yesus arye, aning-aning nirya kum danamle talak dam uplyopura, atalak winipnamle ning ati, laka nyabuk yupu
( Markus 13:1-37 ; Lukas 21:5-36 )

1 Yesus arye ayupu akunum nyabukopura, el mapu ap, Allah arelbalamikce, el si erelamik aik pum arye, buru tam bayik talak ara, el mapu arye anyaik domika dipdeyikce, ayupu nyabik. “Naie, dipdelyame. Anyaik-anyaik nirya domik ning ara, urasin pia telebe,” nyabik.

2 Nyabikopura, Yesus arye el mapu nirya ati tamubuka nyabuk. “Allah el si erena ati weik aik domika nirya dipdelulume. Weik cang keil pala arye deibuka welebikce, anyaik dobik keil nirya ara, aminyan ara uluplobiceura, keil deice tonok ning babye kum bataknamake. Anirya daklobikiba, singsinga bulamla atonun upnamle,” nyabuk.

3 Nyabukopura, anyaik batakuka, Zaitun mutuku deice welebuka, abinuka bukikce, yuk nang ap tabakuka kum bukmek anya arye, sik nirya arye Yesus ati asipdeyik. “Naio nyapsilyame. Allah el si erena aik, Yerusalem mutuku ulul aik ara, dan talak arye daklopnamak do? Anyaik daklopnamak ap, sirya talak an yanamlam ning ap, sirya talak sirya daknamle ning ap ati, yata ning uptua deice arye, ‘E, aning nirya akunum dam uple,’ tenen, kel kiptibye do?” nyabuka asipdeyik.

4 Asipdeyik ati, Yesus arye ayupu tamubuka nyabuk. Ninye weik arye nyanamake. “Nada, Yesus el si ap, el mikip ap deice arye yanganyabe,” nyabikirye, “Ninye Lyena Deiyoknye ‘Mesias yanamle,’ nyalamiknye bira, na atia,” nyabuka talya yupu uk nyanamake. Ayupu nyanamaka deice arye, ninye weik atilila yupu kekebuka, dib tenenamake.

5 Atilila nang nyanamsiyaka deice arye, anggun kanye talima nirya lipdakuka, yuk tam bobicak ati, anggun kanye talima kalikdamunce, moubuka unamlulume. Atilila yupu nyanamak nang ara, sik yupu kekebuka, sik tam nang kum kilonamlulume.

6 Tonda, aminyan talak ninye arye, “Ton tam nang ap, yuk tam nang ap olanamake,” nyabuka, talya nyanamake. Tonda, ton tam nang arye, yuk tam nang ap dipkoprop olakiba, laka nyapnamak ning ap, yanuka nyabikiba, kekepmunyopura, ayupu ati ilil asa kum unamlulume. Allah arye, ‘Aning atonun ning wininamle’ tenen, akunum tenelamuka ati, dipkoprop wininamle bukni, ‘Sirya talak sirya daknamle talak ara, kabula,’ tenenamlulume.

7 Ton wininamle ning ara, weik ninye deiyok nang, Raja nang arye talinyak mutuku ninye arye, yuk Raja talinyak mutuku ninye ati, binuka oldanamake. Tonda, ton yala nang arye, ton yuk yala nang ati, oldanamake. Winilamikce ati, mutuku yuk-yuk weik arye lulukunamle. Tonda, wa wibuka kouamice ning nong kum uplyopura, din pia patanauk unamle.

8 Kilapu mi deipnuce talak mi deiyokuk dinmalyani, mi delilamak touk, na laka nyapmasin ning nirya akunum talye karin arye winiplyopopura, anggunce, ‘E, sirya daknamle talak ara, akunum dam uple,’ tenenamlulume. Bukni, aning deiyok bikna talak, sirya daknamle talak ara, aminyan uka.

9 Aning-aning winipnamle talak noutamak ara moubuka dimunce, moubuka tenenamlulume. Yuk nang arye anggunti, ‘Yupu talina deiyok nang arye Yesus el mapu wenebuka opnamak’ tenen, anggun bobuka, tapu koubuka, wenen deiyok nang ati arilbanamsiyake. Nati, diba tenepmanumunya ati, ‘Anang arye opnamak’ tenen, weik ninye deiyok nang ap, sisinanye weik ninye deiyok nang ap, sik dam bobinamsiyake. Ton nang ara, anggun deice ikin ning deipnamsiyake. Ton nang ara, oplopnamsiyake. Nati, diba teneluluma ati, ninye mutuku-mutuku nirya arye anggunti, ‘Anang ara pia nun like,’ tenebuka, mal pinamsiyake.

10 Anyapmasin ning winipnamle talak ara, diba akunum tenepnik ninye bukni, na yupu ap, na ap ati batakukabikirye, sik yuk diba tenenyak ninye ati, ‘Anang ara, nun like,’ tenepdakirye, sik kayapu nang kopropa bukni, ‘Weik nang arye, aninye ati tapu koubuka opnamak’ tenen, wenen deiyok nang dam yukubuka bobanamake.

11 Tonda, atalak ara, na mapu koprop kum bukni, ninye weik arye talya tilila yupu nyana nang arye, “Nunda Allah yupu laka nyana deiyok nang unyabe,” nyabuka, tilila yupu peterepsicopura, ninye weik, anang arye nyanyak yupu diba tenebuka dobolbanamke.

12 Ninye mutuku-mutuku nirya pia malye winin ning weike winipnin balamica deice arye, yuk nang arye yuk nang ati, bico tenebuka kum melinamake. Tonda, sikce nati tuba tenebuka kanye kum delinamniyake. Sik kanye talima tuba kum delinamniyake.

13 Bukni, yatanye do nirya, na batakna kumce, na ap, ninye yuk nang ap ati, bico tenebikirye, kanye bokoltona kum diparyuk, pia kanye lamapdongobuka ulamice nang ara, yuk nang arye anang ati obica babye, Allah arye aninye lyepnamle.

14 Aning-aning nirya, sirya min kum dakmalye talak ara, na lak teleb yupu peterepra banamake. Ara, Allah lyepsilirye, ninye talima melinamsil yupu dobuka, mutuku sirya, im sirya peterepra banamake. Mutuku sirya, im sirya nirya na lak teleb yupu peterepra banamak ning, ara, ‘Ninye mutuku-mutuku nirya kekepting’ tenen, mutuku-mutuku nirya peterepra banamake. Mutuku-mutuku nirya akunum peterepra balamica ani, sirya daknamle talak yanamle.

15 Allah yupu laka nyalamuknye, nabi Daniel arye, ‘Winipnamle’ nyalamuk touk akunum uplyopura, anggunce, ‘Ura, sirya talak akunum uple,’ tenepnamlume. Nabi Daniel arye nyalamuk ning ara, ani. ‘Allah arye el pia like tenebuka, “Pia malye ulyinye birye, na Teleb Aik kum tikilyatue,” nyabuka yupu sekamik ning uk, amalye weiknye yalirye, akurun aik pum akunum tiklyopura, Allah ati arilbalamak aik ara, Allah arye pia bataknamle.’ (Daniel 9:27; 11:31; 12:11) (Ayupu nyalulum nang ara, ‘Deiyok ani’ tenen, moubuka teneipdelulume.)

16 Allah arye el si erena ati arilbalamak aik, pia batakuka bilye talak ara, anggun Yudea tam unamlum ninye arye, Yudea tam batakuka, yuk mutuku adiparyuk bik-bik abuka banamlume.

17 Anggun asik kopropa kum unmamunye ninye ara, aik pum batakmamunye ning tamubuka kum dolbinamlume.

18 Atalak anggun wa winmamunye ninye ara, anggun baju alip ning kwiribuka, aik deipmamunye ning ara, tamubuka aik pum deipmamunya ning kum dolbinamlume. Adip aryuk batakuka, yuk mutuku bik-bik abuka binamlume.

19 Mi bomice kilapu ap, mi moum dininmace kilapu ap ara bicoe. Akilapu ara adiparyuk bik-bik abuka binmanto kum ati, pia ikin unamle.

20-21 Allah arye aning-aning nirya kwepdeiyamuk talak anyapce, wini talak babye, yuk doyanamle talak babye, ikin ning ulamuk, ton unamle bukni, anirya ap, aminyan talak ikin upnamle ning ap, ikin ara mitik tonunuka. Bukni, aning-aning nirya sirya daknamle talak ara, pia ikin weik upnamle. Aning ati ara, kapye li deiplye talak mok celamle touk, ayanamle ikin ning ara, ‘Ikin weik ning ara, kapye li deiplye talak winiplyak’ tenen, tonda, ‘Allah si erena ati didik sen sum, Sabat sum deice arye ikin weik ning yalyak’ tenen, Allah moronamlulume.

22 Sirya talak ikin wininamle talak ara, ikin ning weik arye deipnyopura, ‘Tukwak ninye nirya dibicak’ tenen, Allah arye ikin ning deipnamle talak ara, lo mitik anun aryuk arepnamle. Ninye nirya dibicak ati, Allah arye, ‘Aninye ara, na mapu unamake,’ tenebukce, wibuka deiyamuk ninye ara, ‘Ikin unamle talak weik upliba, ninye nirya dibicak’ tenen, Allah arye, ‘Ikin ning winipnamle talak ara, lo mitik anun aryuk arepnamne,’ akunum tenyamuke.

23-24 Atalak noutamak arye ton nang ara, tilila yupu deice arye, “Ninye nirya lyeplirye, talinamle, nyanyaknye bira, Kristus akunum amutuku ayanmala ani,” nyalyanamake. Ton nangopura, “Kristus omutuku akunum yanuka unmale,” nyanamake. Anang nirya ara, pia malye winin nang anya arye, siktilila yupu uk nyanamaka ati, anang arye nyanyak yupu ara dib kum tenenamlulume. Tonda, na mapu koprop kum bukni, ton nangopura, “Nunda, Allah el yupu laka nyan nang, nabi unyabe,” nyabuka, tilila yupu nyalyanamake. Nyanamak bukni, anang arye nyanyak yupu ara diba kum tenenamlulume. Anang nirya ara, sik yuk nang arye, ‘Nun pil eipsikirye, diba tenebuka dobolyanamsiak’ tenen, ninye arye kum winipmanto ning, sirya dakna pil donamake. ‘Ton anang ara, apil dolamibiba eipsikirye, dipkoprop Allah el mikip deice aryuk apil donyake, tenepnamsiyak’ tenen, mambul pil ton donamake. Apil-apil nirya dopnamaka deiyok ara ani. Ara, ‘Allah el min arye wibuka deiyamuk nang ara, Allah ati batakuka, nun tam kipropsikirye, nunuk dobolyanamsiyak’ tenen, anggun mutuku yanuka pil donamake. Wininamak bukni, Allah wibuka deiyamuk nang arye, atilila ning diba kum tenenamake.

25 Aning nirya wininamle ati, anggun pia kanye moubuka umunce, kintinilinamlulume. Aning nirya min kum winipmalye talak arye, aminyan talak winipnamle ning akunum laka nyapmasina ati, winiplyopura, anang arye nyanyak yupu ara diba kum tenenamlulume. Yesus arye el mapu ati nyabuk.

26 Nyabukce, ayupu ton nyabuk. Aning ati ara, atalak noutamak ara, yata nang do nirya, “Anggun dilyalulume. ‘Ninye weik lyeplirye, talinamle,’ nyanyaknye Kristus ara, anyaik pum amining dam akunum yanmale,” nyabuka tilila yupu nyapsikcopura, aning ati diba kum tenenamlulume. Tonda, yuk nang arye, “Anggun dilbilulume. Omutuku ninye una kumak, Kristus akunum yanmale,” nyapsikcopura, aning ababye anggun diba kum tenenamlulume. Sik nyanamakak ababye, kum dilbanamlulume.

27 Nara, Ninye Mi Koprop Atonunye yanamne talak ara, keting yangan tam arye bebeya, lakliba keting wekelban tam balamle touk, winibuka yanamne. Lak noutam aryuk yanamna anya arye, ninye nirya arye elinamniyake. Yesus arye nyabuk. Nyabukopura, ayupu ton nyabuk.

28 Na tamubuka yanamne talak ara, oltakne ning oplopliba, lyulamlirye, tong nyalamliba, dei bum weik arye amulamle touk, ninye arye, ‘E lyun ning anye,’ tenelamak touk, na yanyopura, lakak ubuka yanamna ati, arup akunum laka nyapmasin ning eipmunyopura, ‘Oyanmal do, ayanmala do?’ kum tenenamlulume. Na yanamne talak lakuk upnamla ati, dipkoprop anggunce kel kipnamlum atia.

29 Aikin talak noutamak bukni, anyapmasin kanye imun ning akunum uplyopura, ‘Aning winipnamle,’ nyabuka nabi Yesaya arye sekamuk yupu atonun winipnamle. Ati, Yesaya sekamuk yupu deice nyapnusine. Ayupu ara ani. ‘Keting ara, kunuknamle. Tonda, wala babye dirina kum upnamle. Tonda, kurya nirya, im deice arye tukwak saknamle. Tonda, im alip tam ulye ning nirya luluklirye, bindaknamle.’ (Yesaya 13:10) “Ayupu ara, nabi Yesaya arye sekamuk yupu nyapsine,” Yesus arye nyabuk. Nyabukce, ayupu tonap nyabuk.

30 Im deice ubuk ning akunum winiplyopopura, nara Ninye Mi Koprop Atonunye, yanunye talak pitin kilin ning lakak upnamle. Winiplyopura, nara, weik mikip ap, dirina ap, urasin teleb una ap, anirya deice arye dua kan-kan yanyeba, tukwak ninye nirya arye lakak eipnamake. Eibikirye, kanye imun weik upliba, ninye mutuku-mutuku nirya weik arye engenamake.

31 Na yanamne talak ara, im deice weik bung-bung ana nyabikiba, na im deice pil don nang, malaikat dopkwetepnyeura, im sirya, mutuku sirya dana-dana nirya, Allah minop arye wibuka deiyamuk nang bulubuka deibikirye, na dam boyanamake.

32 Aning ati ara, winipmanto yupu nyapnusine. Binalye yo kita opmalya ani, bupu kipnulye ati, telel ongoplyopura, ‘Ara, dou mapnamala atia,’ tenelulume. Tonda, ‘Dou abauwa upmala anya arye, dou manamle’ tenen, nyalulume.

33 Aning dimunce, ‘Dou mapnamale’ tenen, kel kilamlum touk, anyapmasin ning nirya eipmunyopura, ‘Sirya daknamle talak akunum dam uple,’ tenepnamlume. Ara, Allah arye aning-aning nirya ap, ninye mutuku-mutuku nirya ap, taliplirye, Weik Ninye Deiyoknye unamle talak, ‘Akunum deiyok kouple’ tenen, kel bikinamlume. Aik buplan dam, tikilyakirye peten-peten nyalamaka atonun, anyapmasin ning akunum uplyopura, ‘Sirya daknamle talak akunum dam uple,’ tenepnamlulume.

34 Na dipkoprop nyapsine. Anyapmasin ning deiyok kouplirye, winipnamle talak eipnamak ninye ara, sik nirya min kum dipmakce talak ara, anyapmasin ning nirya babye, aning-aning nirya sirya daknamle talak ababye, dipkoprop eipnamake.

35 Im deice tam ulye ning nirya ap, tukwak tam ulye ning nirya ap ara, kum danamle bukni, na nyasinye yupu nirya ara, tonok babye ton kum, kum danamle. Pia aupnamle. Na yupu nyasinye touk dipkoprop nong upnamle. Yesus arye nyabuk.


Yesus min kum yanmalye talak, ninye kum bikinyaka ati, nyabuk yupu
( Lukas 17:26-27 ; Lukas 12:42-46 )

36 Yesus arye ayupu akunum nyabukopura, ayupu ton nyabuk. Na dipkoprop nyapsine. Yata nang do nirya, na yanamne sum ara, ‘Asum yanamle do, asum noutamak ara beren tam yanamle do, sintam yanamle do?’ tenen, kum kel bikinyake. Allah el im deice pil don nang, malaikat babye kum kel bikik. Tonda, Allah el Mi Koprop na babye, kum bikse. Na ni Allah elcuk, ‘Sirya talak daknamle talak ani’ tenen, akunum tenyamuka ati, el kele.

37 Minop talak Nuh ulamuk talak, el ap ulamik ninye sik winilamik touk, na Ninye Mi Koprop Atonunye yanamne talak ababye, ninye mutuku-mutuku nirya atonun unamake.

38 Ara, Nuh ulamuk talak weik mekwen min kum deiyamuk talak ara, sik aninye nirya arye, mek dina ap, din ning yala nirya dina ap, kil arilana ap, anirya winipra balamik ati, Nuh bira weik mek lia yo wekuk sum ababye, tuba mangkau kanye bobuka talyauk unmek.

39 ‘Mekwen dipsilyak’ tenena kumce, talya kanye bobuka winilamik. Winipra balamikba, weik mok cenmokce, mekwen deibuka welebukce, atalak ulamik ninye nirya dibuk. Sik talya mangkau kanye bobuka ulamik bukni, mekwen deibuka dibuk touk, na Ninye Mi Koprop Atonunye, tukwak mutuku tamubuka yanamne talak ara, atonun talya mangkau kanye bobuka, ‘Yesus tamubuka kum yanamle’ tenen, talya unamake.

40 Atalak ara, ninye bitinye wa winmariki bukni, tonye batakuka, tonye dem Allah arye dopropnamle.

41 Aning atonun ton kilapu bitinye kwaning danmarikibuk, ton kil batakuka, ton kil tonok dopropnamle. Ara Allah el kanye arya.

42 Aning ati ara, kalikuka dimunce, kanye moubuka unamlulume. Anggun ni kopropa, na min kum yanamne talak ara, ‘El wini talak yanamle’ tenen, kum biktuma ati, nyapsine.

43 Bukni, ‘Anggun moubuka kel kipnululum’ tenen, sirya daknamle talak winipnamsil ning atonun ning ati, winipmanto yupu nyapnusine. Aik deiyoknye birye, ‘Ubula donanye alukunyan noutamak, aketing deice arye ubula dolyanamanile’ tenen, kel kepmatu toura, mana kumce, pia kalikuka dinmatu ati ara, ubula donanye birye, el aik wekuka, el ning ubula kum doproptue.

44 Aning atonun na babye, Ninye Mi Koprop Atonunye yanamne talak ara, anggun mangkau kanye bobuka unamunye keting deice aryuk yanamna ati, kanye talima kintinibuka deipmunce, kanye moubuka pia kalikuka dinamlulume. Ara, ‘Mankau kanye bopmamunye talak arye yalyak’ tenen, kanye moubuka unamlulum ati nyapsine. Ayupu nyabukopura, ayupu ton nyabuk.

45 Weik kel arye pil batakna kum diparyuk, teleb pil melin nang ulamaka atonun, yata nang ton, anang atonun wininamak do? Aik deiyoknye tonok arye, yuk mutuku binuyuk talak ara, el pil donanye tonok ati, “Pil winibuka donamlyame. Na pil melin nang nirya ati, sik din patalye talak ara, bokuka arenamlyame,” nyabuka bokeibuk.

46 Anyaik deiyoknye tamubuka yanamle talak ara, el pil donanye biti yupu nyabuka deibuk touk, weik kelnye ulamturye, batakna kum diparyuk, apil nirya akunum pil dolamlyopura, adeiyoknye birye tamubuka yalyopura, el pil melinanye biti, ‘Na ning nirya talipmince, deiyoknye atonun kibuka, na pil donamnilyame,’ nyabuka, adeiyoknye birye el pil donanye dobuka erepdeipnamle.

47 Na dipkoprop nyapsine. Anyaik deiyoknye birye, ‘Wininalyame,’ nyabuk touk, el pil donanye birye, diksukum piluk dolamlyopura, adeiyoknye el talyamlye ning nirya dobuka, anye arepliba, anye aning taliplirye, el babye weik deiyoknye atonun unamle.

48 Akumopura, apil deiyoknye birye, ‘Winipnulyame,’ nyalyeura, kekebuka pil dolulnye malyeuk uplirye, malyeuk ubuka winiptopura, ‘Kume, na deiyoknye akunum binamukce daulula anya arye, nimalye arye orketing tamunuk tamubuka yanamle,’ teneptue.

49 Utenebukce, el ap pil donyak nang ap, kilapu ap ati, kulabuka oplirye, kanye wangalamak mek din nang ap, neika dibuka utingopura, ‘Na deiyoknye, el aketing yanamle,’ kum teneplirye, talya mangkau kanye bobuka unamle.

50 Talya mangkau kanye bobuka uplye sum ara, el deiyoknye tamubuka yanamle. El pil donanye birye, ‘E aketing yanamle, asum arye yanamle,’ tenen, kum kel kiplye sum arye, el deiyoknye tamubuka yanamle.

51 Adeiyoknye tamubuka yalyopura, amalye winilamlinye, el nong oplirye, seklopnamle. Winiplirye, anye el kanye ara, Allah diba tenena kumce, pia malye winin ninye unamakak, uku din mutuku dongoplye talak ara, kanye imun unamle. Kanye imun upliba, el ap, sik kanye talima noutam malye ning upmalibuk, aning tenena kum diparyuk, bola deice teleb ninguk unyak ninye ap, pia engebuka unamake. Yesus arye nyabuk.

© 2023, Wycliffe Bible Translators, Inc. All rights reserved.

Wycliffe Bible Translators, Inc.
跟著我們:



廣告