Matius 22 - Eipomek

Yesus arye, kil don talak kwalina ati, winipmanto ning ati, nyabuk yupu

¹ Yesus arye, el yupu nyanmok talak kekenmek nang ara, ninye diba tenebikiba, Allah lyepsilirye, sik talima talibuka ulye ning ‘Kel kipnamak’ tenen, winipmanto yupu deice arye nyanmok.

² Yesus arye nyanmok. Ninye arye diba tenebikcopura, Allah arye sik talima talilya atonun ning nyapnusine. Tonok weik ninye deiyoknye, Raja el mi arye kil dopnamuka ati, weik kwalina kwalibuka kintinibuk.

³ Adeiyoknye birye, ‘Na kwalina dilyanamak’ tenen, min arye akunum nyapdeiamuk nang ati, kwalina akunum kintinibukopura, el melin nang dopdeibukura, nyalbiyik. Anang arye, “Winira, anggun dilyalulume,” nyabuka nyalbiyik bukni, el nyapdeiamuk nang arye lik ubukba, “Nun kum yanamabe,” nyabuka batakik.

⁴ El min arye nyapdeiamuk nang batakik bukni, adeiyoknye birye, el melin nang ati yukubukba, yayikopura, nyalbinmek nanguk ila tamubuka, tonap ananguk nyalbana ati, ayupu nyapdeibuk. “Na weik sapi basam teleb ubuka nemuk ning akunum opsirye, kwalibuka deipse. Tonda, aning-aning nirya, teleb ninguk akunum kwalibuka deipsa ati, na mi kil dopnula ati, ‘Kwalina kintinibuka deipsisa dilyalulume,’ nyalbinululume,” nyapdeibuk.

⁵ Nyabukopura, el melin nang binuka nyabikbuk, arup nyapmek ninguk, ila tamubuka tonap lik ubuk ati, lik asa yuk-yuk biyik. Ton nang ara, sik bidamang pil dolbiyik. Ton nang ara, sik bidamang wa wilbiyik.

⁶ Ton abatakik nang arye, anyaik yupu nyalbalamik nang dobuka, ton nang ati, sik nong deice ikin ning deibik. Ton nang ati malye yupu nyabik. Ton nang ati oplobik.

⁷ Sik abatakik nang arye winibikopura, aweik ninye deiyoknye birye yu weik ubuk. Yu weik ubukura, el yin talin nang nyapdeibuk ati, biyikce el mapu ati opmek mutuku ninye nirya obukabikce, sik asik nirya uku dongobikba, dibuk.

⁸ Winibikopura, adeiyoknye birye el melin nang ati ayupu nyapdeibuk. “Na weik kwalina akunum kwalibuka deipse bukni, na minop talak nyapdeiamse nang ara, nati kum bataknitingopura yanuka dipting bukni, sikce na bataknik nang anya arye, sik kum yanamake.

⁹ Aning ati ara, weik bisik dandanya, ninye weik weklamakak nirya bimunce, epdamunye ninye nirya ati, ‘Nun deiyoknye kwalina deipmala ara, dilyalulume,’ nyalbinululume,” nyapdeibuk.

¹⁰ Nyabukura, el melin nang arye el nyabuk touk, bisik dandanya nirya banmek akarye, eldanmek ninye nirya bulubukabikce, kil dopnamuknye el li aik wekik. Teleb nang babye, malye nang babye bulubuka anyaik wekika anya arye, anyaik pum ilibik.

¹¹ Aik libikba, aweik ninye deiyoknye birye, ‘Na kwalina ning dipnuyak ninye eipnun’ tenen, dilyayuk. Dilyayuk talak ara, kil don talak pia teleb baju ongolamik atonun ning kum wininmoknye ton, anang kan-kan bukmokak eibuk.

¹² Eibukce ayupu nyabuk. “Kao, nun kil don talak teleb baju ongonyap ning kum ongopmalam diparyuk, yata wiribuka anyaik duknubuka wekmalam do?” nyabuka wenebuk. Nyabuka wenebukopura, amalye baju ongobuka wekmoknye bira, ‘Yata nyaptinye do?’ tenen, teniltonmok bukni, alye ubuk ati kanye lamapdongobuka bukuk.

¹³ Winibukopura, adeiyoknye birye el melin nang ati nyabuk. “Anye bira, talimunce el yan ap, taruk ap, tapu koubuka, aik pum arye buru tam kunuknak donoklulume. Donokmunyeura, weik kanye imun upliba, engebuka daunamle,” nyabuk.

¹⁴ Yesus arye awekmek nang ati, winipmanto yupu nyabukopura, ayupu deiyok ati, ayupu laka nyabuk. “Ayupu domon deice nyapmasin touk, ninye diba tenebikiba, Allah lyepsilirye, anggun talima talisilya atonun ulule. Allah arye ninye mutuku-mutuku nirya weik arye, ‘Na dam yanamak’ tenen, yuk ulul bukni, ninye mitik anunuk wililulak wekenyake.” Yesus arye nyabuk.

Yesus arye, amutuku talyamuk deiyoknye, Roma mutuku weik ninye deiyoknye Kaisar, pajak yo bok arena ati, nyabuk yupu

¹⁵ Yesus arye ayupu nyabukba, Farisi nang kekebikce, yu weik ubuka ati, ‘Yesus el yupu nyaptua deice arye malye uptue’ tenen, sikce nyapdeibikba, sik Farisi nang ap, Raja Herodes ap, sik nyalamik yupu kekebuka talyamik nang, tenepce ‘Yesus talye asipnuyap’ tenen, Yesus dam yayik.

¹⁶ Yayikce, Yesus ati ayupu asipdeyik. “Anda peterenanye umince, yupu diksukumuk nyalyame. Tonda, an petereminye talak ara, ‘Na peterenunba kekepnikirye, derenuniyak do? Kanye deipnuniyak do?’ kum tenelyame. An petereminye talak ara, ‘Anang ara bona weik talin nang do? Anang ara weik ninye deiyok nang do? Anang ara yuk sisinanye do?’ tenena kum diparyuk, Allah yupu deice arye, ‘Wininamlulume,’ nyasilye touk, diksukumuk peterelyame.

¹⁷ Aning ati ara, asipdenukiyabe. Nun mutuku talisilirye, Roma mutuku weik ninye deiyoknye Kaisar arye, ‘Pemerintah ati, pajak yo bok arenamlume,’ nyasilya ara, arena teleb do, kum do? Apajak yo bok ara pemerintah nang ati arenamap do, bataknamap do?” nyabuka tenebuka arye asipdeyik. (Ara, ‘Yesus el yupu nyaptua deice arye malye uptue’ tenen, talye tenepce asipdeyik.)

¹⁸ Anang nyabuka talye tenepce asipdeyikopura, Yesus arye anang sik talimak malye ning aupmokbuk, duknubuka nyapmek ning bikukce, ayupu nyabuk. “Anggunda, ‘Teleb nang tenepnamsiyak’ tenen, nong bola deice teleb ninguk winilulum bukni, anggunda dipkoprop talima malye-malye nang ululume. Winiluluma anya arye, ‘El yupu nyaptua deice arye malye uptue,’ tenen, tenepce asipdenmanulum ning ara, yata ati do?

¹⁹ Anggun pajak ati pemerintah arelulum keil uang ara, dobuka na arepdenumunyeura, na dipdenune,” nyabuk. Nyabukura, apajak ati arilamik keil uang, sikce dobuka Yesus ati arepdeyikopura, Yesus arye asipdeyuk.

²⁰ “Anggun dipdelulume. Akeil uang deice el ninye urasin atonun puturubuka deibik ning ara, yatanye urasin atonun do? Tonda, el yupu ap puturubuka deibik ning ara, yatanye sekna ning atonun sekuka deibikopura upmal do? Tonda, ninye si sekuka deibik ning ara, yatanye si sekuka deibik do?” nyabuka, Yesus arye asipdeyuk.

²¹ Asipdeyuk ati, sikce tamubuka, “Ara Kaisar el ning,” nyabik. Nyabikopura, Yesus arye anang ati nyabuk. “Ati, Kaisar el ning ara, adiparyuk Kaisar ati arenamlulume. Ton, Allah el ning ara, adiparyuk Allah ati arenamlulume.” Yesus arye nyabuk.

²² Yesus ayupu nyabuka deice arye, Farisi nang ap, Raja Herodes el yupu kekelamik nang ap arye, ‘El yupu nyaptua deice arye malye uptue,’ tenepmap bukni, ‘Aning kum winipmanto uple,’ tenebikce, “Se,” nyabuka ngalukik. Ngalukikce, Yesus asukumuk batakuka yukak bindobik.

Saduki nang arye, ‘Yesus malye nyaptue’ tenen, kil dona ati, tenepce talye asipdeyik yupu

²³ Asum aryuk, Saduki nang arye, Yesus dam asilyayik. Sikce, ‘Ninye dibikirye ila tamubuka kam kum buknamak,’ tenelamik nang anya arye, sikda, ‘Yesus arye malye yupu nyaptue’ tenen, tenepce asilyayik. Saduki nang yayikce Yesus ati nyabik.

²⁴ “Musa sekeiyamsuk yupu ara ani. ‘Tonoknye birye kil dopmalibuk, anye diplyopura, akil arye mi delina kumopura, anye el weit koprop arye, el yok pununa ati, el du kopropa kil yuwak daklirye, mapu deipnamrake,’ nyabuka Musa arye sekeiyamsuke. Nyabuka sekeiyamsuka ati, winipmanto ning asipdenukiyabe.

²⁵ Tonok talak ara, sik du weit tekbarye nang ulamik. Sik du kopropa minopce kil domuk bukni, mi kum deibuk diparyuk dibuk. Minyumanye dibukopura, akil yuwak el weit bitinanye birye yuwak dakuk.

²⁶ Dakukce dobuka daulamrika ani, el babye mi delina kum diparyuk dibuk. Atonun ton winilinye babye, akil yuwak dakuk bukni, mi delina kum diparyuk dibuk. Daupnin balamika ani, sik weitcapu silip tekbarye nang nirya arye, atonok kiluk tonok-tonok arye, dopnin balamik bukni, mi delina kum diparyuk dibik.

²⁷ Sirya ara, akil babye dibuk.

²⁸ Ati aning ara, aminyan ara, Allah arye ninye weik kam bukeipnamle talak ara, atekbarye nang nirya arye akil tonok, yuk-yuk dolamika anya arye, im deice unamak talak ara, yatanye birye akil ati, ‘Na kil,’ nyabuka tamubuka dopropnamle do?” nyabuka, Saduki nang tenepce, Yesus ati asipdeyik.

²⁹ Ayupu talye asipdeyikopura, Yesus arye tamubuka nyabuk. “Allah arye nyapdeibukba sekeiyamik yupu ap, Allah el pia mikip weik ululul ning ap, kum kel bikamluma ati, anggun walwal arye asipdenmanulume.

³⁰ Allah arye ninye weik kam bukeipnamle talak ara, kil ap, sal ap, kum dopdanamrake. Ninye tukwak ninye arye diba tenebikiba, im deice bobinamle ninye nirya ara, Allah el im deice pil don nang, malaikat, im deice unyak touk, kil dolana kum diparyuk unamake,” Yesus arye nyabuk.

³¹ Yesus ayupu nyabukopura, yupu tonap nyabuk. Winira, ‘Dibice ninye kam kum buknamake,’ tenemunya ara, laka nyapnusine. Musa sekamuk yupu noutamak ara, Allah arye nyasilye yupu ara, kum nyalamlumce, aning kum bikilulum do? Allah arye anggunti, nyasilye yupu ara, ani.

³² ‘Abraham ap, Isak ap, Yakup ap, si erenyak Allah ara, na aunune,’ nyabuk. (Keluaran 3:6) Anggun tenipdelulume. Nun kele. Musa arye ayupu nyapdeibuk talak ara, Abraham ap, Isak ap, Yakup ap, sik nong akunum diamik. Dibice ninye arye Allah si kum ereptinge bukni, Musa arye, “Awinilye nang, Allah el si erenenyake,” nyabuka deice arye, ‘Anang ara tuba kam unyake’ tenen, tuba bikinyabe. Allah arye diamice ninye kum talilule. Kam unyak ninyeuk talilule. Aning ati ara, anggun Saduki nang arye, ‘Diamice ninye ila tamubuka kam kum buknamake,’ tenemunya ara, anggun pia malye tenelulume. Aning ara, dib kume. Walwal aryuk tenelulume. Yesus arye sik Saduki yala nang ati nyabuk.

³³ Yesus arye ayupu nyabukba, akekenmek nang nirya arye, ‘Se’ tenen, “El peterelye yupu ara, pia telebe nyabuka kanye deibikce,” ngalukunmek.

Yesus arye, “Allah arye, ‘Wininamlulume, aning ara kum wininamlulume,’ nyapdeibuk yupu noutamak, pia mambul ning ara ani,” nyabuk yupu

³⁴ Yuk nang arye, “Yesus pia teleb yupu nyabukce, sik Saduki nang ak yupu sekuk ati, Saduki nang ara yupu tamubuka kum nyapmanto ubuka ati, talya kanupdongobuka bindobike,” nyabuka laka nyabikura, sik Farisi nang kekebik. Kekebuka bulubukabikce, ‘Nun asipdepya deice arye malye nyaptue,’ tenen, ‘Nun ton piripdenuyabe,’ tenebikce, Yesus dam yayik.

³⁵ Asinmek talak ara, tonoknye ton, Musa sekamuk yupu, mem yupu peterena deiyoknye ulamuka anya arye, weik kelnye ulamuk. Winibuka ulamukce, Yesus dam yayuk. Anye yayukce, ‘Yesus malye yupu nyaptue’ tenen, winildena ati, Yesus ati ayupu talya tenepce asipdeyuk.

³⁶ “Allah arye, ‘Wininamlulume, aning ara kum wininamlulume,’ nyapdeiyamsuk ati, Musa arye sekeiyamsuk yupu noutamak, yupu weik aupmal bukni, pia mambul ning ara dan ning do?” nyabuka asipdeyuk.

³⁷ Asipdeyukbuk, Yesus arye tamubuka nyabuk. “Pia mambul ning ara ani. ‘Nun ni Allah ara, el tonok ulule. Anggun kanye bokoltona kum diparyuk, dib tenepmunce, anggun kanye talima Allah el nong deice delinamlulume. Tonda Allah el deiceuk anggun kanye deibuka unamlum ati, anggun nong nirya ap, anggun mikip ap, anggun kanya ap, anggun kanye tenen ning ap, anirya ara Allah el deiceuk delinamlulume.’ (Ulangan 6:5)

³⁸ Anyapmasin ning ara, Musa arye sekamuk yupu noutamak minyuma ning pia mambul ning nyapmasine.

³⁹ Bitinye ning ara, ani. ‘Tonda, anggun dam unyak nang ati ara, bico tenebuka melinauk unamlulume. Anggunce anggun mining nang ati, kanye deibuka, melilalulum atonun, anggun dam unyak nang, yuk nang ati bico tenebuka, kanye deipmunce, melinamlulume.’ Allah arye nyabuk. (Imamat 19:18)

⁴⁰ Allah yupu laka nyalamik nang arye seklamik yupu ap, Musa arye sekeiamuk yupu ap ara, weik aupmal bukni, pia deiyok koprop ning ara, abitinye nyapmasin yupu akunuma. Allah arye abitinye ‘Wininamlulume,’ nyapdeibuk yupu ara, pia mambule. Abitinye yupu kekebuka biktumopura, yuk aupmalye yupu nirya babye ton tenebuka kel kinamlulume. Yesus arye anye biti nyabuk.

Yesus arye, “Allah el Mi Kopropnye bira ani,” nyabuk yupu

⁴¹ Farisi nang, Yesus dam tuba unmek talak ara, Yesus arye ayupu nyabuk.

⁴² “Anggunda, yata tenepmalum do? ‘Allah arye ninye mutuku-mutuku nirya noutamak ninye weik lyeplirye, sik kanye talima talinamle’ tenen, dopdeipnamlanye, Kristus, el li si ara, yatanye do?” Yesus arye sik Farisi nang ati nyabuk. Nyabukura, sik Farisi nang arye tamubuka nyabik ara, “Ninye weik lyeplirye, sik kanye talima talinamlanye, Kristus ara, nun apu kopropa Daud, el miuk ulule,” nyabik.

⁴³ Nyabikopura, Yesus arye tamubuka nyabuk. Anggunce, ‘Kristus ara, nun apu kopropa Daud, el yala nang arye deibik,’ nyapmanulum ara dib nyapnulume. Bukni, Allah El Dib Kanye, Daud el talimak talibuka deice arye, Daud el bidamnye aryuk, Kristus yanamuknye biti, ‘Na ni yanamle,’ nyabuk. Daud arye, Kristus ati, ‘Na ni,’ nyabuk ning ara, deiyok ara, dan do? Daud arye nyabuk yupu ara ani.

⁴⁴ ‘Allah arye na ni kopropa, Mesiasnye ati nyabuk. Nun bitinye nang arye, ninye nirya talibuka unamnama ati, na sirik tam, weik mambul ak buknamlame. Abukaminyeba, aminyan ara, an yupu yanikinyak ninye ara, narye dobuka an amu tam deipniba, an talinamlame. An yan baripra delin ning deice yan baripra delilbiminye touk, an yupu kum kekekinyak ninye ara, an amu tam deipnyeura, ance anang ati bisibuka anang talinamlame. Anang nirya ara, an amu tam unamake.’ Allah arye nyabuk. (Mazmur 110:1) Allah arye nyapdeibukba, Daud arye sekamuk yupu dobuka nyapmasine. Yesus arye nyabuk. Nyabukopura, ayupu tonap nyabuk.

⁴⁵ “Daud ayupu nyabuka deice arye, Ninye Lyena Deiyoknye, Kristus yanamuknye ati, ‘Na ni kopropa,’ nyabuk. ‘Na ni kopropa,’ nyabuka ati, Ninye Lyena Deiyoknye, Kristus bira, Daud el mi koprop kum uptue. Daud el yalanye birye deibuk bukni, Kristus ara, ninye nirya talinamlanye, pia weiknye ulule.” Yesus arye aFarisi nang ap, awekmek nang nirya ap ati nyabuk.

⁴⁶ Ayupu teleb ubuka nyabuka anya arye, ayupu kekenmek ninye nirya arye, yupu tonok babye tamubuka kum nyabik. Tonda, asum arye dipdongobuka, orsum noutamak nirya ara, aninye nirya Yesus ati ilil ubukba, ila tamubuka tonap kum asipdeyik.