Matius 21 - Eipomek

Yesus arye, Yerusalem mutuku yayuk talak, winibuk ning

¹ Yeriko mutuku batakuka, ‘Yerusalem mutuku binamap’ tenen, Yesus ap, el mapu ap, bisik mapnin balamika ani, asik dolamikak si ara, Betania ap, Betfage ap bisibikce, banmeka, Zaitun mutuku dup welebik.

² Welebikopura, Yesus arye el mapu bitinye nang ati nyabuk. “Ortam mutuku birumunce, asik dolamicak winiryuk wekrumunye talak ara, keledai basam el lin ap, el mi mitik ning ap, kerekipmakca eiprumunyopura, turya kerekdongopmacak lobuka, keledai basam dobuka boyanururume.

³ Winipnurumunyeura, yuk nang eipsikirye, ‘Yata ati winiprum do?’ nyabuka asipsikcopura, tuba tamubuka nyapnamrume. ‘Kume, nun ni Yesus el patapmala ati, bobinimnyeura, akeledai basam balye deice bukuka balyopura, akeledai basam anggun dam tamubuka dopdeipnamsile,’ nyapnamrurume,” Yesus arye abitinye nang ati nyabuk.

⁴ Yesus arye nyabukba, winiprik ning nirya ara, Allah yupu lakak nyalamuknye, nabi Zakaria arye nyalamuk touk winipnamuka ati, Yesus arye ayupu nyabukba, winiprik. Nabi Zakaria nyalamuk yupu ara, ani.

⁵ ‘Ance Yerusalem mutuku unyak ninye ati nyapnulyame. ‘Anggun dipdelulume. Anggun weik ninye deiyoknye, talima lamapdongobuka, keledai basam mi mitik ning deice bukuka yanganmale,’ nyabuka laka nyapnulyame.’ (Zakaria 9:9)

⁶ Zakaria arye, ‘Winipnamle’ tenen, nyalamuk touk, Yesus arye nyabukba, ayupu nyapmok touk, Yerusalem asik dolamik noutam birikce, aik buplan dam keledai basam ap, el mi mitik ning ap, kerekmekak eiprik. Eiprikce binuka lobuka bobirik.

⁷ Lobuka bobanmarika ani, Yesus dam boberikba, aunmek nang sik deice baju kwiribuka keledai basam mi mitik ning balye deice yangapdeibikura, Yesus abasam deice bukukura, bobiyuk.

⁸ Yesus ara, Yerusalem mutuku bisik keledai basam deice bukuka banmokbuk, amutuku bulupmek ninye arye, ton nang ara, ‘Yesus si erepnuyap’ tenen, ninye weik arye, sik ongolamik baju kwiribuka, Yesus yanibuka yanamokak yangapdeibik. Ton nang ara, el yanamok bisik lilkwa arye, atikamuk yo bata yangabuka, bisik yaninak yangapra banmek.

⁹ Yesus banmokak menekuka banmek ninye ap, aminyan yanganmek ninye ap, ‘Yesus ara nun weik ninye deiyoknye Raja upnamsile’ tenen, Allah yupu laka nyalamik nang, nabi nang arye minop talak sekamik yupu dobuka, ayupu weik arye nyapra banmek. Nyapra banmek yupu ara ani. ‘Daud el yala nang arye deibiknye bira, el pia telebe. Hosana. ‘El si erebuka gisal dobabe. Allah el mikip ap, el si ap deice arye yanmasilnye bira, Allah weik arye melipliba, telebuk ulule. Elda weik mambule. Allah anda, im deice umince, weik mikip ulyamnye bira, an si weik arye erepmakiyaba ati, hosana nyababe.’ (Mazmur 118:26) Nyabuka Allah ati weik arye si erenmek.

¹⁰ Yesus arye Yerusalem mutuku bisik banmoka ani, Yerusalem asik dolamikak wekukce, sik Yahudi yala nang nirya arye, ‘Yatanye yanmasil do?’ tenen, mambul kanye bobuka, lukulanmekce, dinmek. Wininmekce, “Anye bira, yatanye do?” nyabuka asilenmekba, sik awekmek nang, yuk nang arye tamubuka nyabik.

¹¹ “Ayanmalanye el si ara, Yesus. Galilea tam noutamak bukni, Nasaret mutuku arye, Allah yupu lakak nyalulnye, nabi yanmal ani,” nyabik.

Yahudi yala nang Allah ati arilbalamik aik, Yesus biyukce winibuk ning ati, nyabuk yupu

¹² Yesus arye, Yahudi yala nang Allah ati arelbalamikce, el si erelamik aik buplan dam biyuk. Tikilbiyukce, Yahudi yala nang, ‘Allah arye, nun malye wininyap ning kum daneipsilirye, lyepnamsil’ tenen, kam ning obuka, Allah arilamik ning, kambing ato ning, ara, domba totoa opnamik ning dekenmek nang ati, Yesus derebukce, yakuka buru tam dopkwetebuk. Tonda, yuk mutuku nang arye sik yo bok dopdeibikba, Yerusalem mutuku nang yo bok arye dekelanmek nang nirya ati, sik yolana dalubuka yamupdonokra biyuk. Tonda, yalma maka atonun maka dekenmek nang, sik bukmek ning babye, danguplobuknin biyuk.

¹³ Wininmok talak ara, aunmek nang ati, ayupu nirya peterenmok. Allah arye nyapdeibukba, nabi Yesaya arye sekeiamuk yupu ara kum tenelulum do? Ayupu ara ani. ‘Ninye mutuku-mutuku nirya arye, na aik ati, “Ninye mutuku-mutuku nirya Allah ati arelbalamikce, el si erelamikce, Allah ati moronyak aik ani,” nyanamake,’ nyabuk.’ (Yesaya 56:7) Tonda Yesus arye ayupu nyabuk. “Allah arye nyapdeibukba Yesaya arye anyapmasin yupu sekeipsuk bukni, ayupu ton aupmale. ‘Anyaik ara na aik bukni, anggunda, ubula nang arye ubula dobuka, duknubuka ulamak aik atonun, na aik akunum malye kipdeiplume.’ (Yeremia 7:11) Nabi Yeremia sekamuk yupu dobuka akunum nyapsine,” Yesus arye anang ati nyabuk.

¹⁴ Yesus ara, Yahudi yala nang arye Allah ati arilbalamik aik unmok talak ara, asing kun nang ap, aik bun nang ap, el dam boyanganmekba, kwetelinmok.

¹⁵ Yesus arye kwetelinmok ning ap, teleb pil dobuka wininmok ning ap elinmekce, anyaik dam talya unmek mapu yupu weik arye nyanmek. “Daud el yalanye birye deibukba ayanmasilanye bira, Ninye Lyena ati, Mesias dopdeipsuknye bira ani. El si erebapa ati, hosana nyababe,” nyanmek. Sik Musa sekamuk yupu peterena deiyok nang ap, Allah arena ati, el si erena aik pum pil dona weik deiyok nang ap, Yesus wininmok ning ap, atalye mapu arye nyanmek ning ap, eibuka kekebikce, yu weik ubukba, Yesus ati nyabik.

¹⁶ “Anyaik dam talya mapu arye nyanmakiyak yupu ara, kum kekenmalam do? Sikce nyanmakiyak yupu ara, malye atia,” nyabuka wenebik. Wenebikba, Yesus arye sik Yahudi yala deiyok nang ati tamubuka nyabuk. “Yo, amapu arye nyanmaniyak yupu ara, na kekepman bukni, sik anyapmaka ara, Allah yupu noutamak aubuk touk nyanmaka anya arye, telebuka. Ayupu ara, kum nyalulum do? Nyalulum bukni, moubuka kum biklumce nyanmanulum do? Ayupu ara, ani. ‘Allah ance sik talimak petereliminyeba, pia mitik mapu ap, kabunye nang ap arye, an si pia teleb ubuka erekinyake. ‘Na si erenamniyak’ tenen, akunum tenyamlume.’ (Mazmur 8:2) Mazmur noutamak sekamik yupu nyapsine,” Yesus arye nyabuk.

¹⁷ Yesus arye Mazmur yupu dobuka nyabukopura, anang asukum batakuka, Yerusalem mutuku asik dolamikak batakukce, Betania mutuku malbiyuk.

Ara yo du mouna kum ati, Yesus arye nyabukba, ara yo kolubuk yupu

¹⁸ Betania mutuku mapmoka berekukopura, ‘Ila tamubuka Yerusalem mutuku binun’ tenen, bisik noutamak yanganmok talak ara, Yesus ara din patabuk.

¹⁹ Din patabuka ati, kwarang yo duk moulamle touk, ara yo tikamukak binuka pera arye eibukce, bok weik ulamuk ati, ‘Duk moubuk do?’ tenen, ayo dam dilbiyuk. Dilbiyukbuk, ayo duk mouna kumce, bok dem uamuk. Bok demuk uamuk ati, Yesus arye ayo wenen ati nyabuk. “Akiting tamun, aketing tamun nirya, duk kum mouminya ati, ninye arye an yo duk kum dakuka dipnamkiyake,” nyabuk. Ayo ati ayupu nyabukopura, atalak aryuk, ayo yating ap, bok ap, nirya kolubuk.

²⁰ Ayo bok, nong ap, yating ap nirya, kolubuk ning ara, Yesus el mapu 12 nang arye eibik. Eibikura, ngalukikce, Yesus ati, nyabik. “Naie, ‘Duk kum moupminyeba, ninye arye kum dakuka dipnamkiyake,’ nyapmom arye, yo akunum kolupmala ara, yata wiribuk arye ayo pola kolupmal do?” nyabik.

²¹ Nyabikopura, Yesus arye tamubuka nyabuk. “Na dipkoprop nyapsine. Yatanye do nirya, kanye talima bokoltona kumce, Allah ati pia dib teneplirye, ‘Narye Allah ati moropne ning ara, Allah arye dipkoprop winipnamnile,’ tenebuka, Allah ati moroplyopura, weik mambul ning uptue. Ara, narye nyapmanuba, ara yo kolupmal touk uptue. Tonda, aninguk kume. Omutuku ati nyaptue. ‘An yuk aryuk erepdakuka, laut mekwen noutamak delilbilyame,’ nyaptuopura, el nyaplye yupu deice aryuk, amutuku el yuk aryuk erebuka, laut mekwen noutamak dopkwetepdatue.

²² Aning ati ara, na nyapsine. Allah moropmamunye talak ara, aning-aning moropmamunye ning nirya ara, ‘Allah arye dipkoprop arepnamsile’ tenen, kanye bokoltona kum diparyuk, diba tenebuka moropmunyopura, Allah arye dipkoprop arenamsile,” Yesus arye nyabuk.

Yahudi yala deiyok nang arye, ‘Yesus arye nun deiyoknye kum upnamsil’ tenen, asipdeyik yupu

²³ Yesus ap, el mapu 12 nang ap, bisik yanganmeka ani, Yerusalem mutuku asik dolamikak wekikce, Yahudi yala ninye arye, Allah arena ap, el si erena ap ati balamik aik dam biyik. Allah ati arilbalamik aik dam bukni, Yahudi yala kum nang, anyaik buru tamuk bulubuka, Allah morolamik. Biyikopura, Yesus arye, anyaik dam wekmek nang ati, el yupu peterenmok. Peterenmokba, Allah si erena aik pum pil dona ati, weik deiyok nang ap, Musa sekamuk yupu peterena deiyok nang ap, Yahudi yala deiyok nang, yuk weik nang ap, Yesus dam yayikce, ‘Wenepnamap’ tenen, asipdeyik. “Yatanye birye yupu deiyok arepkukba, kam ning ara, kambing totoa dekenmangu nang yakuka, buru tam dopkwetepmalam do? Tonda, yatanye birye weik deiyoknye kina ati, erepdeipkukba, apil dolyam do?” nyabuka wenebikce asipdeyik.

²⁴ Asipdeyikba, Yesus arye tamubuka anang ati asipdeyuk. “Anggunti tonok ning asipdenusine. Asipdesinibuk, tamubuka nyapnumunyeura, na pil donye ning yupu deiyok arepnuknye bira, ‘El si anye,’ nyabuka, laka nyapnusine.

²⁵ Anggunce laka nyapnululume, Yohanes arye, dib tenebik ninye mek dongolamuk ning ara, Allah arye nyapdeibukba, apil dobuka winilamuk do? Talya ninye arye nyapdeiamikba, dib tenebik ninye dobuka, mek dongolamuk do? Anggunce na nyapnululume,” Yesus arye nyabuk. Nyabukba, aYahudi yala deiyok nang arye, ‘Yata yupu nyapnuyap do’ tenen, yupu talipdayik. Yupu talipdaikce, nyapdayik. “Se, yata nyapnuyap do? Nunce, ‘Yohanes mek dongolamuk ning ara, Allah arye nyapdeibukba winilamuke,’ nyabibyopura, Yesus arye nunti, ‘Aning ati ara, Yohanes nyalamuk yupu ara, dib kum tenelamlum ning ara, deiyok yata ati do?’ nyabuka wenepsule.

²⁶ Bukni, nun kele, amutuku noutamak unyak ninye nirya arye, ‘Yohanes ara, dipkoprop Allah yupu laka nyananye, nabi ulamuk,’ tenenyaka ati, nunce, ‘Yohanes pil dolamuk ning ara, ninye aryuk nyapdeibikba, apil dolamuk,’ nyabibyopura, awekmak nang nirya kekepsikirye, yu upliba derepsilyake,” nyapdayik. Nyapdayikce, aYahudi yala deiyok nang arye kwaranmek.

²⁷ Ilil ubuka ati, adeiyok nang arye, ‘Duknupnuyap’ tenen, Yesus ati tamubuka talye yupu nyaplobik. Sikce nyabik. “Yohanes arye dib tenen ninye dobuka mek dongolamuk, pil deiyok aribuknye bira, nun walwale,” nyabik. Nyabikopura, Yesus arye tamubuka anang ati nyabuk. “Walwal nyapmanuluma ati, na pil donye ning deiyok yupu nyapdeipnuknye bira, el si kum nyapdeipnusine,” Yesus arye nyabuk.

Tonoknye, el mapu bitinye winiprik ning ati, nyabuk yupu

^28-29 Yesus arye ayupu nyabukopura, winipmanto yupu deice arye ayupu ton nyabuk. Ara Yesus arye sik Yahudi yala nang, Allah ati arena deiyok nang ap, sik yuk Yahudi yala deiyok nang ap ati, winipmanto yupu nyabuk. Tonoknye el mapu bitinye ulamrikba, tonye dam biyukce, nyabuk. “Na mio, na wa wilbinilyame,” nyabukba, ami arye, “Na like, na pil kum dolbinune,” nyabuk. Nyabuka daunmoka ani, aminyan ara, ami el kanye tamubukce, el li morobuk touk, el li wa wilbiyuk.

³⁰ Wa wilbiyukopura, aminyan talak ara amapu sik ni el mi tonye biti, arup nyapmok touk, bitinye mi ati nyabuk, “Na mio, na wa wilbinilyame,” nyabuk. Nyabukura, ami bitinanye birye, “Naie, telebe an wa wilbinukine,” nyaplobuk bukni, wa kum wilbiyuk. Yesus arye winipmanto yupu nyabuk.

³¹ Ayupu akunum nyabukopura, aYahudi yala deiyok nang ati, asipdeyuk. “Amapu bitinye nang ara, sik ni patapmokba, morobuk ning ara, danye birye dipkoprop kekebuka wininmok do?” nyabuka Yesus arye asipdeyuk. Asipdeyukba, sikce, “Minyumanye bira kekebuka el li pil ati melipmoke,” nyabik. Nyabikopura, Yesus arye anang ati tamubuka nyabuk. Na dipkoprop nyapsine. Sik ninye deiyok nang arena ati, pajak yo bok ubula dolonyak nang, pia malye unyak nang ap, talye-talye yoldalamak kilapu ap, aninye nirya, sik malye ning batakuka, akunum dib tenepnikirye, Allah arye ninye mutuku-mutuku nirya noutamak, ninye weik lyebuka sik talima talisilirye, akunum menekuka wekenyake. Bukni, anggun wini talak ululum nang ara dib tenena kum ati, anggun wini talak babye min kum wekelulume.

³² Anyapmasin yupu ara, talya ati kume. Deiyok ara, ani. Ara, Yohanes dib tenen, ninye mek dongolamuknye birye, ‘Diksukum un bisik ara, anye,’ nyabuka, ‘Dib tenenamlum’ tenen, peterelyanamsuk bukni, anggunce el yupu ati dib tenebuka kum dololulume. Anggunce el yupu dib kum tenelamlum bukni, sik ninye talye-talye yolamak kilapu ap, pemerintah arena ati, pajak yo bok ubula dolonyak nang ap, akunum diba tenebikce, sik malye ning akunum batakik. Anang sik malye ning batakikce dib tenebikba, elilulum bukni, aeipmalum ning ati ara, anggun malye umunye ning kum batakmalumce, tuba dib kum tenepmanulume. Aning ati ara, winipmanto yupu ton nyapnusine. Yesus arye aYahudi yala deiyok nang ati nyabuk.

Wa tuku tia talibuka wilamik nang arye, malye ubik ning ati, nyabuk yupu

³³ Yesus arye, “Domon yupu ton nyapnusina ati, kekelulume,” nyabukce ayupu ton nyabuk. Ara Yahudi yala nang arye, Allah ati arilbalamik aik dam, Yesus tuba tikmokce, abulubuka wekmek ninye ati, ayupu nyabuk. Tonok talak ara, anggur duk moulamuk tapu talyamuknye ulamuk. Anggur tapu kouamukce, awa dana-dana tam nirya keil arye poka dobuka antanabuka denepdongamuk. Winyamukce, anggur duk teikna ati, keil kum ubuka kintinyamuk. Tonda, awa kalikuka dina ati, awa dam weik cang yo arye ikukce, adeice ak kalikna aik domuk. Aning nirya akunum kintinipdeibukce, ‘Yuk nang arye awa ara tia talakuk talibuka pil donamak’ tenen, yuk nang ati aribukba, anang arye awamuk ning dekna ati, awa tuku deiyoknye biti yo bok arebik. Winibikopura, awa deiyoknye birye, el kayapu ap neika mana ati, yuk pera mutuku biyuk.

³⁴ Atapu duk ekne talak akunum ubukura, ‘Atapu duk dakuka libikcopura, ton bokuka nati arepnamniyak’ tenen, awa tuku deiyoknye birye, el pil donanye dopdeibukba, el anggur tapu duk wa tia dolamik nang dam biyik.

³⁵ Biyikopura, awa tuku tia talyamik nang eibikce, el pil donanye tonok, el nong talibuka weik arye kulabuka obik. Tonye bira, dipkoprop pia obikba, dibuk. Tonye bira, keil dobuka el nong deice dobuka obikba, dibuk.

³⁶ Atonun ton, awa tuku deiyoknye birye, el pil don nang weik arye tonap dolilamukba, awa tuku tia pil dolamik nang arye, atonun tonap, tuba-tuba anang olamik.

³⁷ Winilamika ani, sirya ara, tonok dopdeipmantonye ubuk. Ara wa tuku deiyoknye, el mi koprop tuba ulamuka anya arye, ‘Anang arye na mi ati si erepnamake,’ tenebukce, el mi dopdeibuk.

³⁸ Dopdeibukba, awa tuku tia talibuka pil dolamik nang dam yanganmokba, eibikce nyabik. “Awa tuku deiyoknye dipliba, el punupnamlanye bira, el mi koprop ayanmala atia. Aning ati ara, nunce el opnamabe. Obibyopura, awa tuku nun damanguk dobuka talipnamabe,” nyabik.

³⁹ Utenebika ati, nyabikopura, anye el mi obikce, el nong ara awa poka domika buru tam donokik.

⁴⁰ Winilamika ati, anggur tapu duk wa tuku deiyoknye birye, el wa win dam tamubuka yanamle talak ara, el wa tia talyamik nang ati, yata wiripnamle do? Yesus arye sik Allah arena ati deiyok nang ap, Musa sekamuk yupu peterena deiyok nang ap, sik awekmek nang nirya ap ati, adomon yupu nyabuk deice arye asipdeyuk.

⁴¹ Asipdeyukba, sikce tamubuka nyabik. “Kume, awa deiyoknye birye el wa tia talyamik nang dam yalirye, anang nirya oplyopura, anggur tapu duk wa dobuka, yuk nang ati arepnamle. Wa tuku arepnamle nang ara, atapu duk li talak, anggur tapu duk dakuka, aning dekuka, el yo bok tamubuka arenamake. El ning tamubuka arenamak ninye ati, el wa tuku dobuka anang tia talak ati arepnamle,” nyabik.

⁴² Nyabikopura, Yesus arye tamubuka ayupu tonap nyabuk. Daud arye sekamuk buku noutamak sekamuk yupu nyapnusin ning ara, deiyok kum tenepmalumce nyanmanulum do? Daud arye domon yupu deice sekamuk yupu ara atia. ‘Keil aik dolamik nang arye ‘Akeil ara malye keil’ tenen, batakik keil ara, abilinga dukuldongonak delilamak keil, pia mambul ning ara, akunum uplye. Pia teleb uplye ning ara, Allah arye teleb kipdeibuka anya arye, nunce aning pia telebe tenenyabe.’ (Mazmur 118:22-23) Ara Daud arye sekamuk yupu akunum nyapsine. Yesus arye Yahudi yala deiyok nang awekmek ati nyabuk.

⁴³ Nyabukopura, adomon yupu ton nyabuk. “Aning ati ara, na dipkoprop nyapsine. Allah arye ninye mutuku-mutuku nirya talinamsil ara, anggun Yahudi yala deiyok nang ap, Yahudi yala nang nirya ap, min arye areamsutu bukni, anggun dam dobuka, yuk nang ati arenamle atia. El arenamle ninye ara, teleb yo arye duk teleb ninguk moulamle touk, el yupu moubuka kekebikirye, el yupu uk talibuka, el piluk donamak nang ati arepnamle,” Yesus arye nyabuk.

⁴⁴ Yesus ayupu nyabukopura, adomon yupu tonap nyabuk. “Yatanye do, anyapmasin keil deice sakuka pulyanamlanye bira, el nong yan taruk nirya, sekuka tonok-tonok yukak donoknamle. Bukni, anyapmasin keil ara, el nong deice sakuka teiklinye bira, el nong bol ton pia kum upnamle. Atu atonun uplopnamle. Anyapmasin ning ara, moubuka tenipnululume.” Yesus arye aYahudi yala deiyok nang ati nyabuk.

⁴⁵ Yesus nyabukba, Allah arena ati weik deiyok nang ap, sik Farisi nang ap, sik nirya arye utenebik. ‘E, Yesus arye domon yupu deice anyapmasila ara, nun wenena ati nyapmasile,’ tenebikce yu ubuk.

⁴⁶ Yu ubukba, sikce, ‘Yesus yata talak arye optibye do? Tonda yata wiribuka arye Yesus tapu kouptibirye, aminyan opnamap do?’ tenen, pia teniltonauk unmek. Winibik bukni, atalak ara, Allah arilbalamik aik dam wekmek nang arye, ‘Yesus ara, dipkoprop Allah yupu laka nyalulnye, nabi ulule’ tenen, sik kanye deipmeka anya arye, sik Yahudi yala deiyok nang arye, ‘Awekmek nang derepsikirye, nun opsikcak’ tenen, Yesus asukumuk batakuka yukak biyik.