Matius 14 - Eipomek

Raja Herodesda, ya arye, Yohanes Pembaptis el ngang sekuk yupu

¹ Yesus el mapu arye peterepra balamika ati, ninye weik arye, Yesus el si kekelamik. Ninye weik kekelamika ati, sikce laka nyalamikba, amutuku talyamuk deiyoknye birye, Raja Herodes babye kekebuk.

² Yesus el pil dolamuk ning, Raja Herodes kekebukce, walwal arye nyabuk. “Se, anye bira Yohanes arye winilule. Yohanes Pembaptis ara, ya arye ngang seklopsinye bira, akunum kam bukuke. Akunum kam bukuka ati, amikip deice arye ninye kum winipmanto ning pil dolule,” walwal arye nyabuk.

³ Raja Herodes arye Yohanes Pembaptis obuka deiyok ara ani. Raja Herodes elcuk yupu nyapdeibukba, el yin talin nang arye Yohanes Pembaptis tapu koubuka deibikce, wenen aik dongobik. Herodes arye Yohanes dobuka wenen aik deibuka deiyok ara, ani. Herodes el weit Pilipus arye domuk kil Herodias ara, Raja Herodes arye dopromuk.

⁴ Dopromuka ati, Yohanes arye Herodes biti nyalamuk. “Anda an weit el kil dopluma deice, Allah arye ‘Yuk nang kilapu dolona kume, winina meme,’ nyamuk yupu ara, ance yanipmalame,” Yohanes arye Herodes ati, nyalamuk.

⁵ Yohanes arye nyalamuka ati, Herodes yu ubukba, elce, ‘Yohanes optinye,’ tenelamuk bukni, Yohanes nyalamuk yupu kekelamik ninye arye, ‘Yohanes ara, Allah el yupu laka nyananye, nabi ulule. Elda, telebnye,’ tenelamika anya arye, Herodes arye, ‘Aninye arye derepnikcak’ tenen, ilil ubukba, ‘Yohanes opnamne, tenepse ning ara, dawaplye,’ tenebukce, batakuk.

⁶ Batakuk bukni, Raja Herodes el deiamik sum akunum ubukura, weik kwalina kwalibuka deibukba, el kayapu nang weik dilyayik. Sik akwalipmok ning dinmek talak ara, Herodes el kil Herodias, el kilmu mot yanuka senmokba, sik anang nirya arye, kanye deibuka dinmek.

⁷ Herodes arye asenmok kilmu ati, kanye deibukce, akilmu ati nyabuk. “Yata ning do, an patapkil ning ara moropniminyopura, dipkoprop arepnukine,” nyabuk. Tonda, Herodes arye “Talya kum nyapmakine, ance patapkilye touk nyapniminyopura, pia dipkoprop arepnamakine,” nyabuk.

⁸ Nyapdeibukopura, akilmu anyaik batakuka, el lin ulamuk aik biyuk. Biyukce el lin Herodias biti asipdeyuk. “Nongo, Raja Herodes arye arepnamnil ning ati, yata ning moropnaman do?” nyabuka asipdeyuk. Asipdeyukba, Herodias arye tamubuka nyabuk. “Nyapnulyame. ‘Yohanes Pembaptis el ya ngang sekuka, el kisok tam pala yangan ning deice deibuka arepnutume,’ nyabuka moropnulyame,” nyabuk. El lin birye nyapdeibuk touk, adiparyuk tamubuka, akilmu Raja Herodes bukmokak binuka morobukce nyabuk. “Yohanes Pembaptis el ya ngang sekukamince, kisok ara, pala yangan ning deice ak yangabdeibuka, ‘Wini talak arepnutum’ tenen, patanmanile,” nyabuk.

⁹ Nyabuka morobukopura, Raja Herodes arye, ‘Se aning ara, yata wiripnun do?’ tenen, malye kanye bobuk. Malye kanye bobuk bukni, elce nyalinmok yupu ara, el kwalina dilyanmek nang nirya arye, akunum kekenmek ati, ‘Aning ara kum arepnune, kum nyaptinye,’ tenebuk.

¹⁰ Utenebuka ati, Raja Herodes arye ninye olina deiyoknye biti, nyabuk. “Yohanes el ngang ya sekuka, el kisok boyanilyame,” nyapdeibukura, biyuk.

¹¹ Anye birye Yohanes wenena aik deiamikak biyukce, Yohanes ngang ya sekukabukce, pala ning deice ak, el kisok dongobuka deibukce, akilmu dam deibuk. Bobiyukce aribukba, akilmu arye aning dobuka, el lin Herodias binuka aribuk.

¹² Aning nirya akunum winibukba, yuk nang arye laka nyabikura, Yohanes el yupu kekebuka melibuka dobolbalamik nang kekebikce yayikopura, Yohanes el nong dobukabikce, ninye weilamik keil deiya bobinuka weibik.

Yesus arye, din ning bokuka aribukba, 5.000 ninye arye dibika ati, nyabuk yupu

¹³ Yohanes ninye mek dongolamuknye obika ati, yuk nang arye, Yesus dam binuka nyabikba, kekebukce bico ubukura, ‘Nara, ninye una kum mutuku didik selbinune,’ tenebukce, mek lia yo deice wekuka bukukce, Galilea mekwen deice biyuk. El ap, el mapu sik obarye (12) nang ap, sik yuk banmek bukni, mekwen deice banuyik talak ara, yuk nang kekebikce, ‘Nun ap epdanamap’ tenen, asik dana-dana dam nang nirya arye, mekwen lilkwa bisik, bik-bik abuka banmekce, Yesus binuyukak biyik.

¹⁴ Yesus ap, el mapu ap, mek lia yo lukuka delilbiyikce, Yesus tukwak tikilbiyukura, amutuku yupa weik wekmek ninye ara, eibuk. Eibukce, awekmek ninye ati, Yesus arye bico tenebuk. Aninye arye, yukakuk dilamuk ninye bobuka boyanmek nirya ara, Yesus arye kwetebuk.

¹⁵ Tuba kwetena ap, peterena ap, wininmok bukni, keting kumupnuyuk talak ara, Yesus el wipdeiyamuk nang, sik 12 nang, el yupu kekebuka melibuka balamik nang arye, Yesus dam nyalyayik. “Naie, ninye kumak unmaba anya arye, keting akunum kumupnula ati, abulupmak ninye ati, ‘Anggunda bilulume,’ nyabuka bokeipminyeba, amutuku noutamak yuk-yuk aik malbitingce, sik din ning dekuka diptinge,” nyabuka nyalyayik.

¹⁶ Nyabik bukni, Yesus arye el mapu sik 12 nang ati nyabuk. “Sik aninye yuk mutuku bana kume. Anggun na mapu aryuk aninye ati, sik din ning areplulume,” nyabuk.

¹⁷ Nyabukopura, sik 12 nang arye tamubuka Yesus ati nyabik. “Kume naio, nun din ning roti pamubarye ap, mekin bal bitinye ap, anyuk upmasila ati, yuk din ning ton kum dekeipyopura, aninye pia weik ati, aupmasil ning ara mitik ati kum areptibye,” nyabik.

¹⁸ Nyabikopura, Yesus arye, “Aupmasil ninguk na dam boyalulume,” nyabuk.

¹⁹ Nyabukopura, Yesus arye nyapdeibukba, el mapu arye yupa weik wekmek ninye ati nyabik. “Anggun yupa yuk-yuk, maning deice yuk-yuk bokuka buklulume,” nyabik. Akunum bukikopura, Yesus arye el mapu, aroti pamubarye ap, amekin bal bitinye ap, arepnamek ning ara dobuka, im deice dipdeyuk. Dipdeyukce, Allah ati, “Telebe,” nyabukce, aroti ara tobukabukce, ‘Na mapu 12 nang arye, abukmak ninye ati arepnuyaka’ tenen, aribuk. Tonda, amekin bal bitinye kalibuka el mapu aribukba, abukmek ninye ati, aroti ap, amekin bal ap, bokuka arepra banmek.

²⁰ El mapu arye abukmek ninye ati, aning bokuka arepra banmekba, dobukabikce dinmek bukni, akunum boubukopura, kwal batakik ning ara, dobukabikce, libuka tonok ak deibik. Yesus el mapu 12 nang arye bulubuka libuka deipmek ning ara, aling atonun ning, el si ara bakul weik ning, 12 deiyamika arye libuka deibik.

²¹ Aroti ap, mekin bal ap, dinmek nang ara, kilapu mapu kum nukik bukni, sal demuk nukika ara, yupa weik 5.000 ninye dipra banmekce unmek. Abukmek nang ara sal demuk nukik.

Yesus elce yan yanibuka, mekwen deice biyuk yupu

²² Aninye weik 5.000 nang, sik din ning arebikba dibikopura, adiparyuk Yesus arye el mapu 12 nang ati, nyabuk. “Anggunda minopce mek lia yo arye mekwen deice banmamunya ani, mekwen otam binamalulume. Nara, awekmak ninye ati, ‘Telebe dabilulume,’ nyapnune,” nyabuk.

²³ Nyabukura, el mapu mekwen deice akunum biyikbuk, awekmek ninye ati, “Telebe, dabilulume,” nyabuka, amutuku batakuka, Yesus arye el yuk, ‘Allah moropnun’ tenen, amutuku deice welebuk. Yesus Allah moronauk unmokbuk, inipmanto akunum ubukopura, Yesus el yuk amutuku deice unmok bukni, el mapu ara mek lia yo arye Galilea mekwen deice bisik noutamak banmek.

²⁴ Sik ‘Otam binamap’ tenen, mekwen lilkwa batakuka, pera mekwen noutam bayik talak ara, urasin deibuka banmek. Banmek bukni, urasin deibuka banmek tam arye, weik mok piripna yayukba, yo lakase mikip arye bukunmek bukni, asukum arye binmanto kum ubuk.

²⁵ Sik amekwen deice tuba banmeka ani, bereknamalya ati, tulik bisik yalamle talak ubukura, Yesus mekwen deice yanibuka, el mapu banmekak biyuk.

²⁶ Banmoka ani, sik dam biyukopura, sikce Yesus el mekwen deice yanibuka banmokak eibik. Eibikce, ‘Ara isa do, ninye kanya banmal do?’ tenen, sik lukdayikce ilil weik ubukba, “Dibik nang kanya yanmasil ani,” nyabuka weik arye ngalukik.

²⁷ Ngalukikba, adiparyuk Yesus arye, “Na aunmana ati, anggun ilil una meme,” nyabukce, “Ilil una kumce, kanye lamapdongobuka banamalulume,” nyabuk.

²⁸ Nyabukopura, Peterus arye Yesus ati nyabuk. “Naie, an dipkoprop aunmaminyopura, ‘Mekwen deice yayo,’ nyapnutumba, narye mekwen deice yanibuka an dam yanune,” nyabuk.

²⁹ Peterus arye nyabukba, Yesus tamubuka, “Telebe anda yalyame,” nyabuk. Nyabuk ati, Peterus ‘Yesus dam binun’ tenen, mek lia yo deice sakuka, mekwen deice yanibuka banmok.

³⁰ Mekwen deice yanibuka banmok talak ara, weik mok piripna donmokba eibukce, ilil weik ubuk arye, mekwen noutam wekukba mekwen singnipmanto ukuk ati, Peterus arye Yesus ati, “Se, naio, na melibuka dopropnilyame,” nyabuka morobuk.

³¹ Morobukba, Yesus adiparyuk Peterus el taruk talibuka doprobukce, nyabuk. “Ance, ‘Winiptinye do, kum do?’ tenen, kanye bokoltonmakila ara, yata ati do? Anda, nati mitik tonunuk dib tenepmanilama arye, mekwen singnipmanto upmakile,” nyabuk.

³² Nyabukopura, Yesus ap, Peterus ap, mek lia yo welebuka bulbirik. Mek liya yo welebuka, sik anang ap bulbirikopura, weik mok piripna donmoka ara tunim abuk.

³³ Tunimabukopura, Yesus el mapu 12 nang arye, ‘Se’ tenen, mambul kanye bobikce, el si erena ati, ayupu nyabik. “Anda, dipkoprop Allah el Mi Koprop ulyame,” nyabik.

³⁴ Mek liya yo arye mekwen deice banmeka ani, mekwen kup-kup otam Genesaret mutuku biyukopura, mek lia yo binuka lukuka deibik.

³⁵ Lukuka deibikce, mek lia yo deice tukwak sakuka tikilbiyik talak ara, adiparyuk sik min arye epdanmek nang aunmekce, Yesus el nong kel bikikce, ‘Yesus atia,’ tenebik. Utenebikopura, amutuku-amutuku noutamak nirya lak nyalbanmekba, amutuku noutamak ulamik ninye nirya, kekenmekce, uk aning-aning nirya dilamuk ninye bobuka, Yesus dam boyanganmekba, kwetenmok.

³⁶ Atonun ton, Yesus balamukak nirya ara, uk dilamne ninye nirya delilbalamikce, aninye arye Yesus ati, “Uk dilamlye ninye arye, an ongopmalam baju mouse ak bolpipkiting do?” nyabuka morolamik. Morolamikce, el baju mouse ak bolfilamik nang nirya ara, uk kwetelilamuk.