Markus 15 - Eipomek

Yesus dobuka, Pilatus dam bobiyikura, yupu talipmek ati, sekik yupu

¹ Yin talin nang arye, ‘Yesus weik opnamap’ tenen, bobiyikura, Yahudi yala nang Allah arena ati, weik deiyok nang ap, Musa sekamuk yupu peterena deiyok nang ap, Yahudi yala nang, yuk deiyok nang wisi nang ap, alukunyan noutam nirya ara, sik yupu weika arye talinmeka ani, berekuk. Ayupu talipmek nang ara, sik Yahudi yala nang yupu bokolina deiyok nang ati, Sandeheren nang nyalamik. Anang nirya yupu weik talipmekce berekukopura, “Winira, Yesus opnamabe,” tenebuka nyabik. Akunum tenebikopura, Yesus tapu koubuka, Yudea tam talyamuk ninye deiyoknye, el si Pilatus dam bobiyik. Ara, ‘Pilatus arye yupu lipsisikuka bokeipnul’ tenen, bobinuka arebik.

² Bobinuka arebikbuk, Pilatus arye Yesus ati asipdeyuk. “Yahudi yala nang sik weik deiyoknye ati, Raja nyanyaknye bira, an aulyam do?” nyabuka asipdeyuk. Asipdeyukura, Yesus arye tamubuka nyabuk. “Diba anyapmanilam touk unune,” nyabuk.

³ Nyabukura, Allah arena ati deiyok nang nirya arye, ‘Pilatus kekeplirye, diba tenepnamal’ tenen, “Yesus el malye ulul ning, ani-ani,” nyabuka, weika arye lulubuka nyanmek.

⁴ Sik minina yupu weika arye nyanmeka ati ara, Pilatus arye ila tamubuka tonap, Yesus ati asipdeyuk. “AYahudi deiyok nang arye anti, ‘El malye ulul ning, ani-ani,’ nyabuka, weika arye nyanmakiaka anya arye, an bidamnye arye yupu tamubuka nyapmince sik yupu kum seknamalam do?” nyabuka asipdeyuk.

⁵ Asipdeyuk bukni, Yesus arye yupu tamubuka kum nyanmokce, tunimanauk unmoka ati, Pilatus arye, ‘Se, el ilil kum unmala ara, yata kanye bopmal arye do?’ tenen, ngalukuk.

⁶ Ura, Yahudi yala nang Kaplina ati Kwalina talak noutamak arye, amutuku talyamik nang arye wenena aik dongolamik nang kan-kan bukni, ninye nirya arye, ‘Anye bira loplobuka arepsilyame,’ nyapne anye binyuk, amutuku talyamuk deiyoknye, Gubernur arye nyapdeipne touk, tonoknye wibuka loltakalamik.

⁷ Orkiting tamun deice yuk nang arye, ‘Nun Yahudi mutuku talyamsik nang, Roma mutuku nang obuka daknamap’ tenen, olamik talak ara, ninye tonok, el si ara, Barabas, elce ninye ton obuk. Ninye obuka ati, wenena aik dongamikba, wenena aik tuba unmok.

⁸ Keting tamun nirya Kaplina ati Kwalina talak arye, ninye tonok loltaklamika anya arye, ninye weika arye Pilatus dam yayikce, “Nunce tenepmapnye, tonoknye lobuka arepsilyame,” nyabuka morobik.

^9-10 Allah ati arena deiyok nang arye utenebik. ‘Kume, sik yuk nang arye, Yesus el yupu kekebikirye, nun bataksicak,’ tenelamikce, Yesus ati, ‘Nun like,’ tenelamikce kanye erebuka talima bokolilamik. Sik talima bokolilamik ning ara, Pilatus akunum kel kiyamuka anya arye, ‘Anang arye, “Yesus akunum opdeipsilyame,” nyapmanika, deiyok ani,’ akunum tenebuk. Aning akunum kel kiyamuka anya arye, awekmek nang arye “Ninye loplopsilyame,” nyabuka, el dam morolyanmek nang ati asipdeyuk. “Yahudi yala nang, sik weik deiyoknye, Raja nyanyaknye bira, ‘Yesus lopdongopsutu’ tenen, patapmasilbuk, yanuka moropmanulum do?” nyabuka asipdeyuk.

¹¹ Pilatus arye ayupu nyabuka asipdeyuk bukni, el dam ninye weik wekmeka kan-kan, Allah arena deiyok nang arye, yuk nang ati, “Anggunda nyanamlulume. ‘Barabas eluk lopdongopsilyame,’ nyabuka moropnamlulume,” nyabuka yupu akunum nyapdeibik. Nyapdeibika deice arye, awekmek nang nirya arye, “Barabas lopdongopsilyame,” nyanmek.

¹² Nyanmekbuk, Pilatus arye tamubuka nyabuk. “Aning ati ara, sikce Yahudi yala nang sik weik deiyoknye biti, Raja nyanyaknye, anye bira Yesus ati ara, na adiparyuk yata wiripnun do?” nyabuka asipdeyuk.

¹³ Nyabukopura, sik awekmek nang nirya arye, weik yupu nyanmek. “Ance nyapminba, yin talin nang arye anye bira dobuka wanwanun yo deice deibuka opnuyake,” nyabuka yupu weik arye nyanmek.

¹⁴ Nyanmekbuk, Pilatus arye tamubuka nyabuk. “Yata ning deiyok ati opnuyak do? Nun amutuku talilamap nang arye, deiyok kum winipmalambuk ninye talye lup parabuka kum onyabe. Ati, nunce, ‘Aning, wininamlulume, aning ara, kum wininamlulume,’ nyalinyap yupu, peraturan yupu ara, dan yupu yanisilya ati opnuyak do?” nyabuk. Pilatus arye nyabuk bukni, sik awekmek nang nirya arye, ila tamubuka tonap, weik yupu arye nyanmek. “Ance nyapminba, sik yin talin nang arye wanwanun yo deice deibuka opnuyake,” nyanmek.

¹⁵ Pilatus el kanye ara, ‘Awekmek nang nirya ati, sik pataplye ning narye arepnyopura, kanye deipnamniyake,’ tenebukce, Barabas lopdongobukura, talye biyuk. Barabas ara, talye biyuk bukni, Yesus eluk ara, Pilatus arye el yin talin nang ati nyapdeibukura, Yesus dobuka, ninye on ning arye onmek. Onmeka ani, yuk nang arye Yesus dobuka, ‘Yuk yin talin nang arye Yesus dobuka, wanwanun yo deice delilbinuyak’ tenen, arebik.

Yin talin nang arye, Yesus ati, nalinmek yupu

¹⁶ Ayin talin nang arye Yesus dobuka, Pilatus el weik aik pum bisik bobiyik. Pilatus el weik ninye deiyoknye aik si ara, Praetorium aik nyalamik. Anyaik bobiyika ara, ‘Nun neiktoto yin talinyap nang nirya yanuyak’ tenen, yukubikura, nirya bulubuka yayik. Ayayik nang yupa nirya ara, 600 nang yayik.

¹⁷ Sik yayikopura, Yesus nalibuka akutuna ati, atalak ara, weik ninye deiyok nang dekna weik mirin ongon cang baju, el si juba ongolamaka atonun, Yesus el nong deice cang baju, juba ongopdeibik. Winibikce, tace weik ning kwanibukabikce, Yesus el kisok deice angnuprongobik.

¹⁸ Winibikopura, Yesus el nalibuka akutuna ati, weik arye ayupu nyanmek. “Naie, Telebe. Yahudi yala nang, sik weik ninye deiyoknye Raja ulyame,” nyabuka nalinmek.

¹⁹ Nalinmek talak ara, kama doprobikce, el kisok deice onauk unmek. Ona uk unmekce, el nong deice si maka tulunmek. Tonda, ‘Ninye arye weik deiyok nang ati si erebuka kilamak touk, ubibirye, nalinuyap’ tenen, kutam tuku dipdongobuka tikapna, bukapna kinmek.

²⁰ Atalak nirya wininmeka ani, Yesus ati weika arye nalibuka akutunmekopura, atalak el nong deice ongopdeipmek mirin cang baju juba ara, kwiribuka batakikce, el bidamnye ongon cang baju juba ara, ila tamubuka ongopdeibik. Winibikce, ‘Wanwanun yo deice deibuka opnuyap’ tenen, Yesus dobuka bai tam bobiyik.

Yesus wanwanun yo deice deibuka, obik yupu

²¹ Yesus wanwanun yo deice deipnameka ati, bisik banmek talak ara, tonoknye el si Simon Kirene mutukunye buru unmoka ani, bisik noutam yangayukak, eipdayik. Simon el mapu ara, tonda Aleksander, tonda Rufus deiamuk. Yin talin nang arye Yesus bobanmebuk, Simon ap, eipdayikopura, Yesus el wanwanun yo ikin ati, “Ance adiparyuk awanwanun yo tongotaku bilyame,” nyapdeibikura, Simon arye ayo takupdakuka bobiyuk.

²² Simon arye ayo tomongobuka bobanmok ak, bisik banmeka ani, mutuku si Golgota mutuku biyik. Golgota nyalamik ning ara, amutuku urasin ara, ninye kisok yok atonun uamuka mutuku ati, asi silamik.

²³ Golgota mutuku deice biyikopura, Yesus wanwanun yo deice deipnuyika ati, anggur mek kanye wangalamak ning ap, ‘Uk diplyak’ tenen, sekelongon obat si ara, mur ap, tabakuka Yesus arepdeyik bukni, Yesus arye amek kum dibuk.

²⁴ Kum dibukopura, wanwanun yo tuku deice deibuka, Yesus el nong ayo deice alibuka deibikce, taruk dana-dana deibikce, paku dakik. Tonda, el yan tonok ak ansinibuka deibikce paku dakik. Winibikopura, Yesus el nong wanwanun yo deice deipmek yo ara, erebuka tuku lukmeka pum bisik erebuka dopkwetebik. Yesus el ongolamuk cang baju, juba kwiriplopmeka ara, ‘Yatanye dopropnamle do?’ tenen, sik kil-kil nyana deice arye, el si undian kil-kil nyabukabikce, Yesus el cang baju, juba bokuka doprobik.

²⁵ Yesus wanwanun yo deice deibik ara, ninye buru balamak ketingto, beren tam toupne keting, jam sembilan atonun akunum ubukura, wanwanun yo deice deibik.

²⁶ Ninye arye, ‘Yesus el malye winibuk ning deiyok ara, ani’ tenen, yo lakase deice surat sekuka deibikce, ayo lakase ara, Yesus el kisok deice tam deibik. Surat sekik ning ara, atia. ‘Yahudi yala nang sik weik ninye deiyoknye Raja ani,’ sekuka deibik.

²⁷ Yesus wanwanun yo deice deipmekak ara, ubula dolamrik nang bitinye, tonye bira sirik tam, tonye bira kwanim tam, yuk wanwanun yo deice dana-dana deibik.

²⁸ Ubula dolamrik nang dana-dana tam deipmekak deice arye, Allah el yupu laka nyalamuknye nabi Yesaya sekamuk yupu, domon yupu deice Mesiasnye biti nyabuk ning ara, nong dipkoprop akunum ubuk. Nabi Yesaya arye Mesiasnye biti nyamuk yupu ara, ani. ‘Anye ap, ninye yupu yaniltan nang ap, ansinibuka deibike,’ Yesaya arye nyabuk. (Yesaya 53:12)

²⁹ Yesus wanwanun yo deice deipmekak banmek nang arye, Yesus ati malye yupu nyanmekce, ‘Merekuka onmake’ tenen, taruk duk duklabuka kaisunmek. Kai sunmekce ayupu nyanmek.

³⁰ “Ura, akunum winipmakiak atia. Anda, ‘Allah ati arilbalamak aik, el si erena aik uluplopmanya ani, like winilye akunum uplyopura, yuk ning ton punubuka dopnamne,’ nyaminye ati, wini talak wanwanun yo deice lyepdamince, tukwak saklyame,” nyanmek. Nyabuka weik yupu nyanmekce, nalinmek.

³¹ Atalye banmek nang nyanmek touk, Allah ati arena deiyok nang ap, Musa sekamuk yupu peterena deiyok nang ap, sik anang arye, sik babye, Yesus ati, ngilikinmekce akutunmek. Sik nyaldanmek yupu ara, ani. “Yesus arye yuk nang ati melibuka lyelamuk bukni, elce el bidamnye ati, kum lyepdatue.

³² Ninye mutuku-mutuku nirya kan-kan, ninye weik lyeplirye, sik talima talinamlanye, Mesiasnye, Yesus ulamtu toura, wanwanun yo deice lyepdaturye, tukwak kutuksaktu ak, eiptibye. Aning eiptibyopura, anye biti ara, diba teneptibye. Elda Yahudi yala nang, nun weik ninye deiyoknye Raja ulamtu toura, koulukuka yatuak eiptibirye, diba teneptibye,” nyabuka nalinmek. Sik anang nirya nalinmek touk, Yesus noutam dana-dana tam wanwanun yo deice deipmek nang bitinye arye, Yesus ati malye yupu weika arye yanmarik.

Yesus dibuk yupu

³³ Berentam toupne keting deice arye, Yesus wanwanun yo deice deipmekbuk, daupmoka ani, keting dukduk jam dua belas atonun akunum ubukura, amutuku nirya inibukce kuna dakuk.

³⁴ Inibukce kunukmoka ani, keting winilye ton akunum ubukopura, sintam jam tiga atonun akunum ubukba, Yesus weik yupu arye nyabuka ngalukuk. Elce Aramaik yupu deice arye nyabuk ning ara, ani. “Eloi, Eloi lama sabaktani,” nyabuk. Anyabuk yupu deiyok ara, ani. Ara, “Na ni Allah, na ni Allah yata deiyok ati luba kibuka batakmanilam do?” nyabuka ngalukuk.

³⁵ Ayupu nyapmok talak ara, amining dam tikmek nang noutam ara, ton nang kekebikce, “Ura, anggun kekeplulume. Yesus arye Elia si sisibuka yukunmale,” nyabik.

³⁶ Yesus ayupu nyabukura, tonoknye bik-bik abuka biyukce, mek tu lon ning yo siring kiknya dikdongobuka, anggur mek sik ning ‘Yesus dipnul’ tenen, mek busubuka Yesus si babol dam aribuk. Aribukce ayupu nyabuk. “Aning-aning una kum dauplye. Allah yupu lakak nyalamuknye, ‘Nabi Elia arye wanwanun yo deice arye doropnul do?’ tenen, dinuyabe,” nyabuk. (Yesus “Eloi, Eloi,” nyapmok yupu ara, moubuka kum kekepmoka arye, ayupu nyabuk.)

³⁷ Winibukba, Yesus weik arye ngalukuka, malye nyabukce, adiparyuk dibuk.

³⁸ Yesus dibukopura, adiparyuk Allah ati arilbalamik aik, el si erena aik noutamak, ‘Talye ninye ara, Pia Teleb Lek Aik pum tam, mem aik anya arye, kum weknamake’ tenen, wilibuka lapkwecamik cang kain ara, el akain bidamnya aryuk, deice tam arye kwilikuka, dana-dana kibuk.

³⁹ Yin nang yupa weik, 100 nang talyamuknye, Yesus wanwanun yo deipmekak deice tam tikmoka anya arye, Yesus weik arye ngalukukce, el dipmok talak winibuk ning nirya eibukce, ayupu nyabuk. “Se, anye bira, dipkoprop Allah el Mi Koprop ulamuke,” nyabuk.

⁴⁰ Yesus wanwanun yo deice opmek talak ara, kilapu ton mitik yukak arye tikuka dinmek. Anirya dinmek kilapu noutam arye, akilapu si ara, ani. Magdalena mutuku kil, el si Maria ap, wel ulamuknye Yakobus ap, Yoses ap, deibuk kil, el si Maria ap, ton kil el si ara, Salome ap, unmekce dinmek.

⁴¹ Akilapu nirya ara, Yesus Galilea tam balamuk talak ara, el ap, melibuka balamikce, el patana ning dina do yata ning do nirya, sikce melibuka arilamikce pil dolamik. Ton yuk kilapu weik ton, Yesus Yerusalem mutuku welebuk talak ara, sik ap, welepmeka anya arye, sik aunmekce dinmek.

Yesus dibukura, el nong dobuka weilbiyik yupu

⁴² Yahudi yala nang arye Allah si erena ati, ‘Pil dona kum aniryuk, dikdik sena ati, Sabat sum deice Allah el siuk erepnamap’ tenen, dikdik selamik sum upnamoka ati, sik kintinilamik sum akunum ubuk.

⁴³ Kintinibuka delin sum akunum ubuka anya arye, ambusum kum pil dopmanto sum ati, inibukura, tonoknye el si ara, Yusuf Arimatea mutukunye, ilil kum asa malye kibuka, elce, ‘Pilatus dam binuka moropnyeba, Yesus el nong arepnunil’ tenen, Pilatus dam morolbiyuk. Yusuf Arimatea ara Yahudi yala nang, sik yupu bokolina deiyoknye ton ulamukce, Sandeheren nang ap, pil dobuka ulamik. Yusuf ara, Sandeheren nye ulamuk bukni, el babye, ‘Allah arye ninye mutuku-mutuku nirya noutam arye ninye weik lyeplirye, sik talima talinamle talak yanamle’ tenen, Yesus ati diba tenebuka kintinibuka dilamuknye ulamuk.

⁴⁴ Yahudi yala nang ara, ninye dipnopura, keil deiya pum bisik weilamik. Sik nirya winilamika ati, Yusuf arye, ‘Yesus el nong arepnilyopura, keil deiya pum bisik weilbinune’ tenen, Pilatus ak morobukopura, Pilatus arye, ‘E, Yesus ara, minopce akunum dipmal daribe,’ tenebukce lukdayuk. Lukdayukce, yin nang yupa 100 talyamuknye, ‘Eipdarikce lakak nyabuka laka nyapnunil’ tenen, yukubukce, Yesus wanwanun yo deice deipmekakuk dilbiyuk.

⁴⁵ Pilatus arye anye biti yukubukura, anye bira dipdeyukce, “Dipkoprop akunum dipmaue,” nyabukura, Pilatus kekebukopura, Yusuf ati, “Telebe Yesus el nong dobuka daweilbilyame,” nyabuk.

⁴⁶ Pilatus arye nyabuka ati, Yusuf ara, namin teleb cang kain dekukce, wanwanun yo deice arye, Yesus nong dobuka, anamin cang kain arye kitibuka, keil lukamika pum bisik dongobuk. Dongobukce, keil deiya pum ara, yuk weik pala keil bongopnin banmoka ani, buplan tirikdongobuk.

⁴⁷ Yusuf arye Yesus el nong dongobuka weipmokak ara, Maria Magdalena mutuku kil ap, Yoses el lin Maria ap, sikce ton eiprik.